Imo ba Igintatanding an Imo Kalugaringon ha Iba?

HIN-O ha aton an waray pa igkita hin tawo nga mas gwapo o mas mahusay kay ha aton, baga hin mas popular, mas madagmit makasabot, o mas maopay an mga grado ha eskwelahan? Bangin an iba mas maopay an kahimsog o mas maopay an trabaho, mas malampuson, o baga hin mas damu an kasangkayan. Bangin mas damu an ira panag-iya, mas kwartahan hira, mas bag-o an awto, o baga hin mas malipayon hira. Ha paghisgot hito nga mga butang, aton ba igintatanding an aton kalugaringon ha iba? Diri ba malilikyan an pagtanding? Kay ano nga bangin maruyag an usa nga Kristiano nga likyan ito? Ngan paonan-o kita mahimo magin kontento nga diri nagtatanding han aton kalugaringon ha bisan hin-o?

Kon Kay Ano Ngan San-o Kita Mahimo Magtanding

An usa nga konsepto kon kay ano nga bangin itanding han mga tawo an ira kalugaringon ha iba amo an tungod kay nagtitipig o nagpapauswag ini han ira pagtagad ha kalugaringon. Agsob nga natatagbaw an mga tawo ha paghibaro nga malampuson hira sugad han ira kasangkayan. Usa pa nga ideya amo nga an mga pagtanding mga pangalimbasog nga ibanan an kawaray-kompyansa mahitungod ha aton kalugaringon, ngan sabton kon ano an aton mahihimo ngan an diri naton mahihimo. Aton naoobserbahan kon ano an nakakab-ot han iba. Kon pariho hira ha aton ha damu nga paagi ngan nakakab-ot hin pipira nga mga tumong, bangin abaton naton nga mahimo naton makab-ot an pariho nga mga tumong.

An mga pagtanding agsob gud nga ginhihimo ha butnga han mga tawo nga may ginkakaparihoan—magkasekso, magkaedad, ngan magkapariho an kahimtang ha sosiedad ngan magkakilala. Mas diri posible nga itanding naton an aton kalugaringon ha usa kon aton ginhuhunahuna nga daku hinduro an kaibahan naton ha iya. Siring pa, mas gutiay an posibilidad nga itanding han ordinaryo nga daragita an iya kalugaringon ha usa nga popular nga modelo kay ha iya mga kaklase, ngan imposible nga itanding han modelo an iya kalugaringon ha daragita.

Ha ano nga mga bahin igintatanding naton an aton kalugaringon? An bisan ano nga panag-iya o abilidad nga gintatagad nga birilhon ha komunidad—intelihensya man ito, kagwapo o kahusay, karikohan, mga bado—mahimo magin basihan ha pagtanding. Kondi, nahihilig kita ha paghimo hin mga pagtanding mahitungod han mga butang nga nakakapainteres ha aton. Pananglitan, posible nga diri kita maaawa ha kadamu han koleksyon nga selyo han usa han aton mga kakilala kon diri man kita interesado ha pagtirok hin mga selyo.

 An pagtanding nag-aaghat hin damu kalain nga mga reaksyon, tikang ha pagkakontento ngadto ha depresyon, tikang ha pagdayaw ngan hingyap ha pagsubad ngadto ha pagkadiri-komportable o kasina. Nakakadaot an pipira hini nga mga emosyon, ngan diri ito angayan para ha mga Kristiano.

Nakikigkompetensya nga mga Pagtanding

Damu nga tawo nga nangangalimbasog ha pagin “daugan” ha mga pagtanding an nagpapakita hin nakikigkompetensya nga disposisyon. Karuyag nira magin mas maopay kay ha iba, ngan diri hira kontento tubtob nga diri pa nira inaabat hira nga mas maopay hira. Diri makalilipay an pakig-upod ha sugad nga mga indibiduwal. An mga pakigsangkay ha ira nakakabug-at, ngan an mga relasyon nakakatensyon. An sugad nga mga tawo diri la kay waray pagpaubos kondi kasagaran nga napapakyas liwat hira ha pag-aplikar han sagdon han Biblia mahitungod ha paghigugma han ira igkasi-tawo, tungod kay an ira pamatasan masayon makaaghat ha iba nga umabat hin pagin ubos ngan taramayon.—Mateo 18:1-5; Juan 13:34, 35.

An pagpaabat ha mga tawo nga mga minos hira nakakadaot ha ira ha usa nga paagi. Sumala ha usa nga parasurat, “mas masakit an aton kapakyasan kon ha aton paghunahuna an mga tawo nga pariho ha aton an kahimtang nagkaada han mga panag-iya nga aton karuyag.” Tungod hito, an nakikigkompetensya nga disposisyon nag-aaghat hin kaawa, kapungot, ngan kasina ha usa tungod han iya mga panag-iya, pag-uswag, katungdanan, reputasyon, mga bentaha, ngan iba pa. Nagriresulta ini ha dugang pa nga pakigkompetensya—usa nga maraot nga sikolo. An Biblia nagkukondenar ha ‘paghiawa-awa ha usa kag usa.’—Galasia 5:26.

Pinaagi ha pagminos han mga nabuhat han mga karibal, an mga tawo nga aw-anon nangangalimbasog nga bawion an ira nadaot nga pagtagad ha kalugaringon. Bangin an sugad nga mga reaksyon baga hin diri importante, kondi kon diri masantop ngan mapugngan, mahimo ito magresulta ha sayop nga buhat nga gintuyo basi dauton an iba. Tagda an duha nga asoy ha Biblia diin an usa nga nahidabi amo an kaawa.

Durante han pag-ukoy ni Isaak kaupod han mga Pilisteohanon, ginbendisyonan hiya hin “mga kapanon hin karnero, ngan . . . mga kapanon hin baka, ngan damu nga mga tawo ha panimalay: ngan naawa ha iya an mga Pilisteohanon.” Ginios hira pinaagi ha pagtabon han mga atabay nga gin-ukab han amay ni Isaak, hi Abraham, ngan ginsidngan hi Isaak han ira hadi nga bumaya na hito nga lugar. (Genesis 26:1-3, 12-16) An ira kaawa maraot ngan nakakadaot. Diri na gud nira mailob an pagin mauswagon ni Isaak ha ira lugar.

Paglabay hin mga siglo, nagin kilala hi David ha patag-awayan. An iya mga nahimo ginpasidunggan han kababayin-an ha Israel, nga nagkanta: “Hi Saul namatay han iya yinukot ngan hi David han iya mga napulo ka yukot.” Bisan kon kinarawat hi Saul hin pagdayaw, ginhunahuna niya nga nakakaminos ito nga pagtanding, ngan nagtubo an kaawa ha iya kasingkasing. Tikang hito nga panahon padayon, nagtipig hiya hin kapungot kan David. Waray pag-iha, iya ginhimo an siyahan han iya damu nga mga pagsari nga patayon hi David. Daku gud nga karaotan an mahimo tumubo tikang ha kaawa!—1 Samuel 18:6-11.

Salit kon an pagtanding naton han aton kalugaringon ha iba—ha ira mga nahimo o mga bentaha—nag-aaghat hin mga pagbati nga pariho ha kaawa o pakigkompetensya, kinahanglan mag-ikmat kita! Nakakadaot ini nga mga emosyon, ngan diri uyon ha panhunahuna han Dios. Kondi antes usisahon kon paonan-o maaatohan an sugad nga mga kinaiya, aton usisahon an usa pa nga butang nga nag-aaghat hin mga pagtanding.

Pag-usisa ha Kalugaringon Ngan Kakontento

‘Baltok ba ako, nakakadani, may abilidad, mahimsog, tinatahod, makaruruyag? Ngan tubtob ha ano nga sukol?’ Talagsa la kita tumindog ha atubangan han espiho nga nagpapakiana hin pariho hini. Kondi, sumala ha usa nga parasurat, “waray ruhaduha, an sugad nga mga pakiana agsob nga nahuhunahuna naton ngan nagkakaada hilom nga baton nga baga hin nakakatagbaw ha aton.” An usa nga tawo nga diri sigurado han iya mahihimo bangin mamalandong mahitungod hini nga mga butang nga waray nakikigkompetensya nga inklinasyon o pagbati hin kaawa. Iya la gin-uusisa an iya kalugaringon. Waray sayop hito. Kondi, an husto nga paagi ha pagbuhat hini diri an pagtanding han aton kalugaringon ha iba.

 Iba-iba an aton mga abilidad, depende ha magkalainlain nga mga hinungdan. Pirme magkakaada mga tawo nga baga hin mas maopay an nahihimo kay ha aton. Salit, imbes nga obserbahan hira nga may kaawa, sadang naton usisahon an aton nahihimo may kalabotan ha matadong nga mga suruklan han Dios, nga nagtatagana hin sigurado nga suruklan ha kon ano an husto ngan maopay. Interesado hi Jehova ha kon ano kita sugad nga indibiduwal. Diri niya kinahanglan itanding kita ha bisan hin-o. Hi apostol Pablo nagsasagdon ha aton: “An tagsa-tagsa nga tawo magsulay ha iya kalugaringon nga buhat, ngan hiya maghihimaya ha iya kalugaringon, ngan diri tungod ha iya amyaw.”—Galasia 6:4.

Pag-ato ha Kaawa

Tungod kay diri hingpit an ngatanan nga tawo, bangin kinahanglanon an duro ngan nagpapadayon nga mga pangalimbasog basi maatohan an kaawa. Masayon an paghibaro nga an Kasuratan nasiring ha aton: “Manguna kamo ha pagpakita hin dungog ha usa kag usa,” kondi mas makuri an pagbuhat hito. Ginkilala ni Pablo an iya kalugaringon nga tendensya ha pakasala. Basi maatohan ito, kinahanglan niya ‘paantuson an iya lawas, ngan ibutang ha pagkauripon.’ (Roma 12:10, NW; 1 Korinto 9:27) Para ha aton, mahimo ito mangahulogan hin pag-ato ha nakikigkompetensya nga mga panhunahuna, ngan pagsaliwni hito hin positibo nga mga panhunahuna. Kinahanglan kita mag-ampo, naghahangyo kan Jehova nga buligan kita nga “diri maghunahuna hin hitaas ha [aton] kalugaringon nga labaw han igo [naton] paghunahunaon.”—Roma 12:3.

Nabulig liwat an pag-aram ha Biblia ngan pamalandong. Pananglitan, hunahunaa an mahitungod han iginsaad han Dios nga Paraiso ha tidaraon. Hito nga panahon an ngatanan magkakaada kamurayawan, maopay nga kahimsog, hura nga pagkaon, komportable nga mga balay, ngan makapatagbaw nga trabaho. (Salmo 46:8, 9; 72:7, 8, 16; Isaias 65:21-23) May-ada pa ba mahihilig ha pakigkompetensya? Waray na gud. Mawawaray na hinungdan ha pagbuhat hito. Oo, waray isumat ni Jehova an ngatanan nga detalye mahitungod ha kon ano an magigin kinabuhi hito nga panahon, kondi makatadunganon nga hunahunaon naton nga mahihimo na han ngatanan an mga hilangkagan ngan mga kaabtik nga ira naruruyagan. An usa mahimo mag-aram hin astronomiya, ngan an usa pa mahimo magdisenyo hin mag-opay nga mga tela. May hinungdan ba nga maawa an usa ha iba? An mga buruhaton han aton mga kaupod mag-aaghat ha aton nga maghimo hin dugang pa, diri magigin hinungdan para masina. An sugad nga nakikigkompetensya nga mga pagbati diri na maeksister.

Kon ito an kinabuhi nga aton ginhihingyap, diri ba kita sadang mangalimbasog nga patuboon an sugad hito nga kinaiya yana? Nagpapahimulos na kita hin espirituwal nga paraiso, nga waray damu nga mga problema han kalibotan nga nakapalibot ha aton. Tungod kay waray nakikigkompetensya nga disposisyon ha bag-o nga kalibotan han Dios, may-ada gud hinungdan nga likyan ito yana.

Niyan, sayop ba nga itanding naton an aton kalugaringon ha iba? O may-ada ba panahon nga bangin angayan ito?

Angayan nga mga Pagtanding

Damu nga mga pagtanding an nagresulta ha mapait o nakakapaguol ha emosyon nga mga reaksyon, kondi diri kinahanglan nga pirme magin sugad hito. May kalabotan hini, tigamni an sagdon ni apostol Pablo: “Magmasubad kamo hadton mga tawo nga tungod ha ira pagtoo ngan pag-ilob nakapanunod han mga saad.” (Hebreo 6:12) Mahimo magin mabungahon an pangalimbasog nga mapatubo an mga kalidad nga pariho han kanan matinumanon nga mga surugoon ni Jehova ha kadaan nga mga panahon. Oo, mahimo ito manginahanglan hin pipira nga mga pagtanding. Kondi, makakabulig ito ha aton nga makita an mga susbaranan  nga mahimo naton subaron ngan an mga bahin nga kinahanglan naton pauswagon.

Tagda hi Jonatan. Mahimo sidngon han usa nga may-ada hiya hinungdan nga maawa. Tungod kay hi Jonatan an suhag nga anak nga lalaki ni Hadi Saul han Israel, bangin may-ada panahon nga naglaom hiya nga magin hadi, kondi ginpili ni Jehova an usa nga lalaki nga mas bata ha iya hin 30 anyos, an batan-on nga hi David. Imbes nga magdumot, naiiba hi Jonatan tungod han iya diri-hakugnon nga pakigsangkay ngan suporta kan David sugad nga pinili nga hadi ni Jehova. Espirituwal gud nga tawo hi Jonatan. (1 Samuel 19:1-4) Diri pariho ha iya amay, nga nagtagad kan David sugad nga karibal, ginkilala ni Jonatan nga hi Jehova an nagmamaniobra han mga panhitabo ngan nagpasakop hiya ha Iya kaburut-on; waray niya itanding an iya kalugaringon kan David, nga nagpapakiana, “Kay ano nga hi David an ginpili ngan diri hi ako?”

Diri gud kita sadang umabat nga tarhog ha aton an aton mga igkasi-Kristiano, nga baga hin nangangalimbasog an iba ha pagin labaw ha aton o pagkuha han aton bahin. Diri angayan an pakipagribal. An pangirilal-an han hamtong nga mga Kristiano amo an kooperasyon, pakig-urosa, ngan gugma, diri pakigkompetensya. “An gugma amo an gidadakui nga kaaway han kaawa,” siring han sosyolohista nga hi Francesco Alberoni. “Kon hinigugma naton an usa ka tawo, karuyag naton an makakaopay ha iya, ngan nalilipay kita kon malampuson ngan malipayon hiya.” Salit kon may-ada usa ha Kristiano nga kongregasyon nga ginpili para ha usa nga prebilehiyo, an mahigugmaon nga paggios amo an pagin kontento hito. Sugad hito hi Jonatan. Pariho ha iya, bibendisyonan kita kon suportahan naton adton matinumanon nga nag-aalagad ha responsable nga mga katungdanan ha organisasyon ni Jehova.

An ekselente nga susbaranan nga iginpapakita han mga igkasi-Kristiano mahimo dayawon ha husto nga paagi. An timbang nga mga pagtanding ha ira makakaaghat ha aton nga subaron ha maopay nga paagi an ira pagtoo. (Hebreo 13:7) Kondi kon diri kita mabinantayon, an pagsubad mahimo magin kompetisyon. Kon inaabat naton nga nalalabwan kita han usa nga aton gindadayaw ngan magsari kita ha pagminos o paglibak ha iya, diri kita nagsusubad, kondi lugod naawa ha iya.

Waray diri-hingpit nga tawo nga hingpit nga surubdan. Salit, an Kasuratan nasiring: “Magsubad kamo ha Dios, sugad ha mga hinigugma nga anak.” Sugad man, “hi Kristo nag-antos man tungod ha iyo, nga gintagan kamo hin susbaranan, basi kamo magsunod ha iya mga pagpitad.” (Efeso 5:1, 2; 1 Pedro 2:21) An mga kalidad ni Jehova ngan ni Jesus—an ira gugma, mapaso nga pagbati, empatiya, ngan pagpaubos—amo an sadang naton pangalimbasogan nga subaron. Sadang kita maghatag hin panahon ha pagtanding han aton kalugaringon ha ira mga kalidad, mga katuyoan, ngan mga paagi han pagbuhat. An sugad nga pagtanding makakapauswag han aton mga kinabuhi, nagtatagana hin sigurado nga giya, karig-on, ngan seguridad, ngan makakabulig ha aton nga makab-ot an kahimtang han pagin hamtong nga Kristiano nga kalalakin-an ngan kababayin-an. (Efeso 4:13) Kon aton isentro an aton atensyon ha pagbuhat han aton gimaopayi ha pagsubad han ira hingpit nga susbaranan, sigurado nga mas diri kita mahihilig ha pagtanding han aton kalugaringon ha aton mga igkasi-tawo.

[Retrato ha pahina 29]

Naawa hi Hadi Saul kan David

[Retrato ha pahina 31]

Waray gud tagda ni Jonatan an mas manghod ha iya nga hi David sugad nga karibal