‘Malipayon Ako Tungod ha Pagbansay ha Akon’

DIRI makatoo an batan-on nga hi Kazuna han an iya maestro nagsuhestyon nga umapi hiya ha lupigay han pagdiskurso ha Ingles. An lupigay abrido para ha ngatanan nga hayskul ha daku nga isla ha norte han Hokkaido, kondi an iya eskwelahan waray pa gud magpalista hadto hin estudyante para umapi ha lupigay. Ha adlaw han lupigay, kinukulba hi Kazuna tungod kay mga 50 nga estudyante an kaapi. Mas ginkulba pa gud hiya han hinkit-an niya an duha nga lalaki nga hukom nga Ingles an yinaknan.

Iginpahibaro an mga nagdaog, tikang ha pinakahabubo nga premyo. Han gintawag na an ngaran ni Kazuna, diri hiya makatoo. Hiya ngan an iya maestro nga sapit niya, nahipapausa nga nagbuslongay. Sinaka hi Kazuna ha entablado nga diri pa gihapon makatoo, ngan ginkarawat an iya tropeo—para ha pinakahitaas nga premyo!

“Nagin posible ini tungod la ha pagbansay nga iginhahatag han organisasyon ni Jehova pinaagi han Teokratiko nga Eskwelahan ha Ministeryo,” siring han malipayon nga hi Kazuna. “Malipayon gud ako nga nakarawat ko ini nga pagbansay.” Ito nga eskwelahan, diin nagpalista hi Kazuna tikang han gutiay pa hiya, usa han mga katirok ha kongregasyon han mga Saksi ni Jehova. Ha pangandam para han lupigay, tinagan ni Kazuna hin espesyal nga atensyon an paggamit han mikropono, pagyakan nga may kapaso ngan kadasig, pagkompas, pagkita ha mga mamarati, ngan an iba pa nga mga aradman nga igintututdo ha Teokratiko nga Eskwelahan ha Ministeryo.

Alayon karawata an amon imbitasyon nga tumambong ngan mag-obserba hini nga eskwelahan, nga gindudumara kada semana ha lokal nga Kingdom Hall han mga Saksi ni Jehova. Personal nga kitaa kon paonan-o nagpapahimulos an batan-on ngan lagas. An katirok abrido para ha publiko. Para han dugang nga impormasyon mahitungod han eskwelahan nga pinakahirani ha imo balay, alayon pagpakiana ha mga Saksi ni Jehova ha imo lugar.