An Pagpamiling hin Kalipayan

MGA pipira ka tuig an naglabay, an mga tawo ha Fransia, Alemanya, Daku nga Britanya, ngan Estados Unidos ginpakianhan, “Ano an ginkikinahanglan basi ka magin malipayon?” Ha mga gin-interbyu, 89 porsyento an nagsiring nga ginkikinahanglan an maopay nga kahimsog; 79 porsyento an nagsiring nga makapatagbaw nga pag-asawa o pakig-upod; 62 porsyento an nagsiring nga an mga balos han pagin kag-anak; ngan 51 porsyento an naghunahuna nga kinahanglanon an malampuson nga karera para ha kalipayan. Ngan bisan kon an kadam-an han mga tawo kasagaran nga gintututdoan nga an kwarta diri naggagarantiya hin kalipayan, 47 porsyento hadton ginpakianhan an kombinsido nga nakakahatag ito hin kalipayan. Ano an iginpapakita han totoo nga mga kahimtang?

Siyahan, usisaha an ginbanabana nga koneksyon han kwarta ngan kalipayan. An usa nga surbey ha usa ka gatos nga giririkuhi nga mga tawo ha Estados Unidos nagpakita nga diri hira mas malipayon kay han mga tawo ha kabug-osan. Dugang pa, bisan kon haros nadoble han damu ha Estados Unidos an ira materyal nga mga panag-iya ha naglabay nga tulo ka dekada, diri gud hira mas malipayon yana kay han naglabay, sumala ha mga eksperto han kahimsog ha hunahuna. Ha pagkamatuod, usa nga report an nagkukomento: “Durante han pariho nga panahon, madagmit nga nagdamu an mga naguguol. Nagtulo ka pilo an kadamu han mga tinedyer nga nag-uunay. An mga pagdiborsyo nadoble.” Ha mga 50 ka magkalainlain nga nasud, an mga parasaliksik nga nag-aram han koneksyon han kwarta ngan kalipayan nagsiring nga diri mapapalit han kwarta an kalipayan.

Sunod, mationan-o kaimportante para ha kalipayan an maopay nga kahimsog, makapatagbaw nga pag-asawa, ngan malampuson nga karera? Aw, kon kinahanglanon gud ini nga mga butang basi magin malipayon, kumusta man an minilyon nga mga tawo nga diri nagpapahimulos hin maopay nga kahimsog ngan an ngatanan nga waray makapatagbaw nga pag-asawa? Kumusta man adton mga mag-asawa nga waray mga anak ngan an ngatanan nga kalalakin-an ngan kababayin-an nga waray malampuson nga karera? Ito ba ngatanan nga mga indibiduwal itinanda na nga daan ha kinabuhi nga waray kalipay? Ngan mawawara ba an ginsisiring nga kalipayan hadton nagpapahimulos yana hin maopay nga kahimsog ngan makapatagbaw nga pag-asawa kon magbag-o an ira kahimtang?

Namimiling ba Kita ha Husto nga mga Lugar?

Naruruyag an ngatanan nga magin malipayon. Diri ini urusahon tungod kay an Maglalarang han tawo iginhuhulagway sugad nga an “malipayon nga Dios,” ngan an tawo ginhimo ha dagway han Dios. (1 Timoteo 1:11, NW; Genesis 1:26, 27) Kon sugad, natural la nga mamiling an mga tawo hin kalipayan. Kondi, naoobserbahan han damu nga an pagkaada  kalipayan pariho ha pagsalod ha palad hin baras—ito nga duha masayon mawara.

Kondi, posible daw la nga sobra na an pangalimbasog han iba basi makabiling hin kalipayan? Sugad hito an ginhunahuna han pilosopo nga hi Eric Hoffer. Hiya nakaobserba: “An pagpamiling hin kalipayan usa han nangunguna nga mga hinungdan han kasubo.” Totoo gud ito kon namimiling kita hin kalipayan ha sayop nga mga lugar. Hito nga kahimtang, sigurado nga makakaeksperyensya kita hin panluya ngan kapakyasan. An pangalimbasog nga magin riko; an duro nga pagbuhat basi magin bantogan o kilala; an panalinguha ha pagkab-ot hin politikal, sosyal, o pinansyal nga mga tumong; o an basta la pagkinabuhi para ha kalugaringon ngan an madagmit nga pagpatagbaw, ini ngatanan napapakyas ha paghatag hin kalipayan. Diri urusahon nga ginsusubad han iba an magkakontra nga ideya nga iginpahayag han usa nga awtor nga nagsiring: “Kon umundang la unta kita ha pangalimbasog nga magin malipayon, mahimo gud kita magmalipayon”!

Makatirigamnan nga an surbey nga gin-unabi ha tinikangan hini nga artikulo nagpakita liwat nga 4 ha kada 10 nga tawo an inabat nga an pagbuhat hin maopay ngan pagbulig ha iba nagriresulta ha kalipayan. Ngan ginpabug-atan han 1 ha kada 4 nga an pagtoo ngan relihiyoso nga mga gintotoohan may-ada daku nga bahin ha pagin malipayon. Matin-aw, kinahanglan naton usisahon hin mas maopay kon ano an ginkikinahanglan basi magin totoo nga malipayon. An sunod nga artikulo mabulig ha aton nga buhaton ito.

[Mga Retrato ha pahina 3]

Damu an naghuhunahuna nga an kwarta, makapatagbaw nga kinabuhi ha pamilya, o malampuson nga karera an yawi ha kalipayan. Nauyon ka ba hito?