“Ito an Gimaopayi nga Mahihimo Mo”

HI Alexis usa nga singko anyos nga bata nga lalaki ha siyudad han Morelia, Mexico, nga an iya mga ginikanan nag-aaram ha Biblia ngan natambong ha mga katirok han mga Saksi ni Jehova. Samtang natambong ha usa nga sirkito nga asembleya upod han iya pamilya, nakita niya an pasundayag mahitungod han pagsangyaw ha balay-balay. Liningi hiya ha iya amay ngan nagpakiana, “Tatay, Tatay, kay ano nga diri ka nagawas ngan nagsasangyaw?” An iya amay binaton, “Nag-aaram pa ako han Biblia ngan nag-aandam basi makasangyaw ako.” Malipayon nga binaton hi Alexis, “Tatay, ito an gimaopayi nga mahihimo mo.”

Nasabtan hinin gutiay nga bata an pagkaimportante han pagbuhat uyon ha iya hinbabaroan mahitungod kan Jehova. Tungod kay kaupod nira ha balay an duha han iya mga patod nga gudtiay pa, nag-ampo anay hiya kan Jehova ngan katapos nakiistorya ha iya mga patod mahitungod han iya hinbabaroan ha My Book of Bible Stories pinaagi han bulig han iya mga ginikanan. Bisan kon diri pa maaram magbasa hi Alexis, maaram gud hiya han mga sulod han libro tungod han mga retrato nga nagpapatin-aw han mga istorya. Nagsiring pa ngani hiya nga karuyag niya bumisita ha mga tawo ha ira mga balay basi isumat ha ira an iya hinbabaroan mahitungod han mga katuyoan han Dios.

Oo, maipapahiuyon han batan-on ngan lagas an ira kinabuhi sumala ha ginlalaoman ha ira ni Jehova, “an Baraan nga Usa,” ngan buhaton an gimaopayi nga pribilehiyo nga pagpamatuod ha mga nasud mahitungod ha iya. (Isaias 43:3; Mateo 21:16) Sigurado, usa ito han gimaopayi nga mahihimo han usa ka tawo.