Ano an Naghahatag hin Totoo nga Kahulogan ha Kinabuhi?

HAN ginpakianhan hi Jesse, usa nga 17-anyos nga estudyante ha hayskul, mahitungod han kahulogan han kinabuhi, hiya binaton, “Maglipay hinduro tubtob nga mahihimo mo, samtang buhi ka pa.” Iba an panhunahuna ni Suzie. “Ha totoo la, natoo ako nga kon ano an karuyag mo mahitabo ha imo kinabuhi amo gud an kahulogan hito,” nagsiring hiya.

Naghunahuna ka na ba kon ano an kahulogan han kinabuhi? May-ada ba usa nga katuyoan para ha ngatanan nga katawohan? O husto ba hi Suzie—nga an aton kinabuhi resulta gud han kon ano an aton hinihimo hito? Mationan-o man kaabanse ha teknolohiya an maaabot han aton sosiedad, may-ada bahin ha aton nga baga hin naghihingyap hin kahulogan ha kinabuhi. Naabot an panahon ha aton kinabuhi nga kadam-an ha aton an naghunahuna, ‘Kay ano nga aanhi kita?’

An moderno nga syensya nangangalimbasog ha pagbaton hito nga pakiana. Ano an resulta? “An pagin buhi waray gud bisan ano nga kahulogan ha proseso han ebolusyon,” nagsiring hi David P. Barash, usa nga propesor ha sikolohiya ngan soolohiya. Para ha mga biologo nga natoo ha ebolusyon, an buhi nga mga linarang may-ada usa la nga tumong: mabuhi ngan magdamu. Salit, hi Propesor Barash nasiring: “Ha daku nga uniberso nga waray katuyoan ngan diri nagtatagad ha mga tawo, responsabilidad han katawohan nga hatagan hin kahulogan an aton mga kinabuhi pinaagi han may-kagawasan, ginhunahuna, tinuyo nga mga pagpili nga aton hinihimo.”

An Surok han Kahulogan Ngan Katuyoan

Ito la gud ba an kahulogan han kinabuhi—nga an tagsa ha aton nagbubuhat han iya naruruyagan? Imbes nga pabay-an kita nga waray-tumong nga magpatlaag la ha uniberso nga waray katuyoan o kahulogan, an Biblia maiha na nga nagsumat nga may-ada katuyoan kon kay ano nga aanhi kita. Diri aksidente la an aton pag-eksister. Ginsumatan kita nga damu nga katuigan an ginamit han Maglalarang ha pag-andam han tuna para ha pag-eksister han tawo. Waray aksidente la nga iniksister. Iya ginsiguro nga an ngatanan “duro hin kaopay.” (Genesis 1:31; Isaias 45:18) Kay ano? Tungod ito kay an Dios may-ada katuyoan para ha tawo.

Kondi, makapainteres nga waray itanda nga daan han Dios an tidaraon han tagsa nga indibiduwal, pinaagi man han panhilabot han Dios o pinaagi han usa nga biolohikal nga proseso. Bisan kon naiimpluwensyahan kita han aton napanunod nga henetiko, kasagaran nga kontrolado naton an aton mga buhat. Kita ngatanan may kagawasan ha pagpili han aton kalugaringon nga paagi han pagkinabuhi.

Bisan kon an tagsa ha aton makakahimo hin personal nga desisyon kon ano an aton bubuhaton ha aton kinabuhi, magigin sayop an diri pag-upod han Maglalarang ha aton mga plano. Ha pagkamatuod, hinbaroan han damu nga an totoo nga kahulogan ngan katuyoan ha kinabuhi nakakaw-ing gud ha relasyon ha Dios. An importante nga kalabotan butnga han Dios ngan han aton katuyoan ha kinabuhi ginpapabug-atan ha personal nga ngaran han Dios, nga Jehova, nga literal nga nangangahulogan, “Hiya Nagpapahinabo nga Magin.” (Eksodo 6:3; Salmo 83:18) Karuyag sidngon, mainuswagon nga gintutuman niya an bisan ano nga iya iginsasaad ngan pirme nga ginbubuhat an iya katuyoan nga buhaton. (Eksodo 3:14; Isaias 55:10, 11) Hunahunaa ito. An ngaran nga Jehova usa nga garantiya ha aton  ngatanan nga hiya an ultimo ngan magpapabilin nga Burabod han makahuluganon nga katuyoan.

An pagkarawat la han pag-eksister han Maglalarang may-ada hilarom nga epekto ha panhunahuna han tawo mahitungod ha kinabuhi. An 19-anyos nga hi Linet nasiring: “An pagkita han ngatanan nga mag-opay hinduro nga mga ginlarang ni Jehova ngan an ira katuyoan nabulig ha akon nga hisabtan nga ako liwat ginlarang nga may katuyoan.” Hi Amber nagdudugang: “Kon an mga tawo nag-uuruistorya mahitungod han ‘diri hinbabaroan,’ nagpapahinumdom ito pirme ha akon nga maaram gud ako. An ebidensya nga naeksister hi Jehova aada gud ha mga butang nga iya ginlarang.” (Roma 1:20) Syempre, importante an pagkilala nga naeksister an Maglalarang, kondi mas importante an pagpatubo hin makahuluganon nga relasyon ha iya.

Pakigsangkay ha Dios

Dinhi liwat, makakabulig an Biblia. An tinikangan nga mga kapitulo hito nagtatagana hin matin-aw nga ebidensya nga hi Jehova nga Dios mahigugmaon nga Amay. Pananglitan, waray niya laranga hira Adan ngan Eva ngan katapos pabay-an la hira nga waray hinbabaroan mahitungod ha iya. Lugod, regular nga nakigkomunikar hiya ha ira. Waray niya pabay-i hira ha Eden basi giyahan an ira kalugaringon samtang nagbubuhat hiya hin iba nga mga butang. Lugod, gintagan niya hira hin espisipiko nga giya kon ano an gimaopayi nga paagi ha pagkinabuhi. Iya gintokahan hira hin makapatagbaw nga buruhaton, ngan iya ginhikay an ira padayon nga edukasyon. (Genesis 1:26-30; 2:7-9) Diri ba ini an imo lalaoman ha may kapas, mahigugmaon nga kag-anak? Yana hunahunaa kon ano an iginpapasabot hito. “An paghibaro nga ginlarang ni Jehova an tuna ngan gindisenyo kita nga may abilidad ha pagpahimulos han iya linarang,” siring ni Denielle, “nagpapakita ha akon nga karuyag niya nga magin malipayon kita.”

Labaw pa hito, pariho han bisan hin-o nga mahigugmaon nga amay, karuyag ni Jehova nga an ngatanan niya nga mga anak magkaada personal nga relasyon ha iya. May kalabotan hini, ginpapasarig kita han Buhat 17:27: “Hiya diri hirayo ha tagsatagsa ha aton.” Ano an naibubulig hito? Hi Amber nasiring: “An pagkilala kan Jehova nakahatag ha akon han kompyansa nga diri gud ako nag-uusahan. Anoman an kahimtang, may-ada ko pirme maaaroan hin bulig.” Dugang pa, samtang nakikilala mo hi Jehova, hibabaroan mo nga hiya buotan, makatadunganon, ngan maopay. Masasarigan mo hiya. “Han magin duok nga sangkay ko hi Jehova,” siring ni Jeff, “maaram na ako nga waray na iba pa nga mas andam pagbulig ha akon kay ha iya.”

Makasurubo, damu nga negatibo nga mga butang an ginsisiring mahitungod kan Jehova. Hiya an ginbabasol tungod han damu nga pag-antos han mga tawo ngan han maraot nga panggawi han relihiyoso nga mga tawo. An pipira han pinakamaraot nga mga hitabo ha kasaysayan han tawo iginbabasol ha iya. Kondi an Deuteronomio 32:4, 5 nagsasaysay: “An ngatanan niya nga mga dalan amo an katadongan. . . . Hira nagbuhat ha mahugaw ha iya, diri hira iya mga anak, ito ira kasurusnan.” Salit, obligasyon naton nga personal nga usisahon an mga kamatuoran.—Deuteronomio 30:19, 20.

Matutuman an Katuyoan han Dios

Kondi, anoman an aton desisyon, waray gud makakapaundang ha Dios ha bug-os nga pagtuman han iya katuyoan para hini nga tuna ngan katawohan. Hinumdumi la, hiya an Maglalarang. Ano, kon sugad, ito nga katuyoan? Gin-unabi ito ni Jesu-Kristo ha iya Sermon ha Bukid han hiya magsiring: “Bulahan an mga maaghop, kay hira makakapanunod han tuna.” Ha urhi, hiya nagsiring ha iya apostol nga hi Juan nga an Dios determinado “ha paghibang ha mga naghihibang han tuna.” (Mateo 5:5; Pahayag 11:18) Tungod kay kaupod na hi Jesus han Dios durante han paglarang, maaram hiya nga tikang pa ha tinikangan katuyoan na han Dios nga magkaada hingpit nga tawhanon nga pamilya nga maukoy ha paraiso nga tuna ha waray kataposan. (Genesis 1:26, 27; Juan 1:1-3) Ngan diri nagbabag-o an Dios. (Malakias 3:6) “Ha waray ruhaduha, sugad ha akon nahunahuna,” nagsasaad an Dios ha aton, “amo man an mahinanabo; ngan sugad han akon gintuyo, amo man an matindog.”—Isaias 14:24.

Ha aton panahon, nagtikang na hi Jehova pagbutang han mga pundasyon han usa nga nagkakaurosa nga komunidad nga iginbasar, diri ha kahakog ngan pagin makikalugaringon pariho han kadak-an han aton kalibotan yana, kondi ha gugma ha Dios ngan ha igkasi-tawo. (Juan 13:35; Efeso 4:15, 16; Filipos 2:1-4) Usa ito nga boluntaryo nga komunidad han mga indibiduwal nga interesado ha  pag-uswag ngan determinado gud ha pagtuman han ira katuyoan—pagsangyaw han maopay nga sumat mahitungod han tiarabot nga Ginhadian han Dios antes matapos ini nga sistema han mga butang. (Mateo 24:14; 28:19, 20) Ha sobra 230 nga katunaan, sobra unom ka milyon nga mga Kristiano an urosa nga nagsisingba na dida ha mahigugmaon, nagkakaurosa nga internasyonal nga pagminagburugto.

Hatagi hin Kahulogan an Imo Kinabuhi

Kon namimiling ka hin mas daku nga kahulogan ha imo kinabuhi, sadang hibaroan mo nga gindadapit ka ni Jehova nga Dios nga makig-upod ha iya katawohan—ha iya “nasud nga matadong”—yana. (Isaias 26:2) Kondi, bangin naghuhunahuna ka, ‘Mationan-o an pagkinabuhi dinhi hinin Kristiano nga komunidad? Karuyag ko gud ba magin bahin hini?’ Pamatii an ginsiring han pipira nga mga batan-on:

Quentin: “An kongregasyon an akon panalipod tikang hini nga kalibotan. An pagsantop nga bahin hi Jehova ha akon kinabuhi nabulig ha akon nga masabtan nga naeksister hiya ngan naruruyag nga magin malipayon ako.”

Jeff: “An kongregasyon amo an gimaopayi nga lugar nga akon maaaroan hin pagdasig. Aada an akon kabugtoan, nga naghahatag han ira suporta ngan pagdayaw. Hira gud an akon pinakapamilya.”

Linet: “Waray kapariho an kalipay han pagkita ha usa nga nakarawat han kamatuoran han Biblia ngan nagdidesisyon ha pag-alagad kan Jehova. Naghahatag ini hin daku nga katagbaw ha akon kinabuhi.”

Cody: “Magigin waray bili an akon kinabuhi kon waray hi Jehova. Pariho han damu hinduro nga iba pa nga mga tawo, sugad hin maaanod la ako tikang ha usa nga butang ngadto ha iba pa, nga nangangalimbasog nga makabiling hin kalipayan kondi diri nakakaagi hito. Lugod, iginhatag ha akon ni Jehova an presyoso nga pribilehiyo han pagin duok ha iya, ngan naghahatag ito hin kahulogan ha akon kinabuhi.”

Kay ano nga diri personal nga mag-usisa? Hibabaroan mo nga pinaagi ha pagin duok ha imo Maglalarang, hi Jehova nga Dios, mabibilngan mo an totoo nga kahulogan ha kinabuhi.

[Mga Retrato ha pahina 31]

An aton relasyon ha Dios naghahatag hin kahulogan ha aton kinabuhi

[Ginkuhaan han Retrato ha pahina 29]

NASA photo