An Mga Problema han Pagbansay ha Bata Yana

HAN GAB-I na hinduro, usa nga tag-iya hin restawran nag-andam nga magsara na ngan umuli. Katapos, duha nga babaye ngan usa nga bata an sinulod ngan nag-order hin pagkaon. Tungod kay kapoy na hinduro, nasulay an tag-iya ha pagsumat ha ira nga sarado na an restawran, kondi nagdesisyon hiya ha pagluto han ira gin-order. Samtang an kababayin-an nag-iistorya ngan nakaon, nagdarudalagan an bata ha sulod han restawran, naghuhulog hin mga biskit ha salog ngan gintatamakan ito. Imbes nga sawayon hiya, nahiyom la an iroy han bata. Han ha kataposan binaya an mga kustomer, kinahanglan limpyohan han kapoy na nga tag-iya an mahugaw nga salog.

Sugad han sigurado nga hinbabaroan mo na, ini nga totoo-ha-kinabuhi nga kahimtang nag-iilustrar nga ha damu nga mga pamilya, an pagbansay ha bata diri epektibo nga ginbubuhat. Magkalainlain an mga hinungdan hito. May-ada mga kag-anak nga nagtutugot la ha ira mga anak nga buhaton an ira karuyag, tungod kay naghuhunahuna hira nga an kabataan sadang patuboon ha palibot nga may kagawasan. O tungod kay sagipo hinduro an mga kag-anak, bangin diri hira nagahin hin panahon ha paghatag ha ira mga anak hin mabinantayon nga atensyon ngan ginkikinahanglan nga pagbansay. An iba nga mga kag-anak naabat nga an pag-eskwela han ira anak amo an pinakaimportante, salit ira tinatagan an bata hin haros waray-limitasyon nga kagawasan basta magkaada la hiya maopay nga mga grado ha eskwelahan ngan makasulod ha kilala nga kolehiyo.

Kondi, may mga tawo nga nasiring nga kinahanglan bag-ohon an mga prinsipyo han mga kag-anak ngan an mga patakaran han sosiedad ha kabug-osan. Nangangatadongan hira nga an kabataan nahidadabi na ha ngatanan nga klase hin mga krimen ngan an kamadarahog ha eskwelahan nagdudugang kada adlaw. Salit, usa nga prinsipal ha usa nga intermedya nga eskwelahan ha Seoul, Republika han Korea, an nagpabug-at nga sadang magin prayoridad an pagbansay ha kabataan mahitungod ha pagpauswag han ira mga personalidad. Hiya nagsiring: “An pagpatubo hin maopay nga pamatasan sadang mauna ha pagkaada hin kahibaro.”

Damu nga mga kag-anak nga naruruyag nga makakolehiyo ngan maglampos ha kinabuhi an ira mga anak an nagbabalewaray ha mga pahamangno. Kon usa ka nga kag-anak, ano an karuyag mo magin personalidad han imo anak? Karuyag mo ba hiya magin adulto nga may maopay nga moralidad ngan may pag-abat hin responsabilidad? Karuyag mo ba hiya magin matinagaron ha iba, nakakapahiuyon, ngan may-ada positibo nga disposisyon? Kon amo, alayon tagda an masunod nga artikulo.