Istorya han Kinabuhi

An Gutiay nga mga Pagsakripisyo Nagresulta hin Hura nga mga Bendisyon ha Amon

IGINSUMAT NI GEORGE NGAN ANN ALJIAN

Bisan ha amon inop waray gud kami nga mag-asawa maghunahuna nga usa ka adlaw an pulong nga “magturutdo” sayop nga maluluwas namon nga “yatot.” Waray gud kami maghunahuna nga ha amon sobra 60 anyos nga pangidaron pamamalandungon namon an naiiba pagkit-on nga mga pagkasurat ha pangalimbasog nga makaistorya an mga tawo tikang ha Hirayo nga Sinirangan. Kondi, ini an ginbuhat namon ni Ann ha ikatarapos han dekada han 1980. Susumatan namon kamo kon paonan-o nga an amon gutiay nga mga pagsakripisyo ha naglabay nga katuigan nagresulta hin hura nga mga bendisyon ha amon.

TIKANG ako ha pamilya nga Armeniano ngan membro han Armeniano nga Iglesia. Romano Katoliko hi Ann. Ginkarawat namon nga duha an amon relihiyoso nga mga gintotoohan han nagpakasal kami han 1950. Bainte syete anyos ako, ngan 24 hi Ann. Nag-ukoy kami ha igbaw han akon dry-cleaning shop ha Jersey City, New Jersey, E.U.A. Hito nga panahon, mga upat ka tuig na nga tinatag-iya ko ini nga negosyo.

Han 1955 nakapalit kami hin maopay nga balay nga tulo an kuwarto ha Middletown, New Jersey. Ito nga balay mga 60 kilometro tikang ha akon negosyo, diin nagtrabaho ako ha sulod hin unom ka adlaw kada semana. Kada adlaw, nagagab-ihan ako pag-uli. An panalagsa nga pagbisita han mga Saksi ni Jehova ha akon puwesto ngan pagpahamutang ha akon hin mga literatura mahitungod ha Biblia, an amo la nga higayon nga nakakaistorya ko hira. Binabasa ko an literatura nga may daku nga interes. Bisan kon ginkuha han akon negosyo an kadak-an han akon panahon ngan atensyon, napatubo ko an hilarom nga pagtahod ha Biblia.

Waray pag-iha hinbaroan ko nga an estasyon ha radyo han Watchtower nga WBBR, nagpapahayag  hin mga topiko mahitungod ha Biblia ha oras nga nagmamaneho ako tikadto ngan tiuli tikang ha akon puwesto. Namati gud ako hini nga mga pahayag, ngan an akon nagtutubo nga interes nag-aghat ha akon nga hangyoon an mga Saksi ha pagbisita ha akon. Han Nobyembre 1957, hi George Blanton binisita ha akon balay ngan nagtikang pagdumara ha akon hin pag-aram ha Biblia.

An Amon Pamilya Nagkaurosa ha Putli nga Pagsingba

Ano an inabat ni Ann mahitungod hini ngatanan? Hiya an magsusumat ha iyo.

“Ha tinikangan, nakontra gud ako hinduro. Makadamu ka beses nga gin-ulang ko an pag-aram ha Biblia ni George salit nagdesisyon hiya ha pag-aram ha iba nga lugar, ha sulod hin walo ka bulan. Durante hito nga panahon, nagtikang tumambong hi George ha mga katirok ha Kingdom Hall ha mga Domingo. Hito nga panahon hinbaroan ko na nga seryoso hiya mahitungod han iya pag-aram ha Biblia tungod kay ito la an adlaw nga waray hiya trabaho. Kondi, nagin mas maopay pa gud hiya nga bana ngan amay, ngan nagtikang magbag-o an akon panhunahuna. Ha pagkamatuod, kon waray nagkikita, usahay kinukuha ko an Awake! nga magasin nga pirme binabayaan didto ni George, ngan binabasa ko ito samtang nagtatrapo han lamesa ha sala. Ha iba nga mga higayon, binabasa ha akon ni George an mga artikulo han Awake! nga diri direkta nga naghihisgot han mga doktrina kondi pirme nagpapatin-aw han Maglalarang.

“Usa ka gab-i samtang hi George nag-aaram ha Biblia kaupod ni Bugto Blanton, ginkuha ko an usa nga publikasyon nga iginbutang han amon dos-anyos nga anak, hi George, ha lamesa nga hirani ha akon higdaan. An publikasyon naghihisgot mahitungod ha paglaom han mga patay. Bisan kon kapoy ako, ginbasa ko ito tungod kay an akon apoy nga babaye namatay pa la, ngan nasubo gud ako. Hinbaroan ko dayon ngan hinsabtan an kamatuoran han Biblia nga an mga patay diri nag-aantos ha iba nga lugar ngan hira mabubuhi utro ha tidaraon nga pagkabanhaw. Waray pag-iha napukaw gud an akon interes, naiikag nga nagbabasa ngan nagbabagis han mga punto nga karuyag ko ipakita kan George ha pag-abot niya tikang ha iya pag-aram ha Biblia.

“Haros diri makatoo an akon bana han akon pagbag-o. Han binaya hiya ha balay, nakontra ako, kondi yana interesado gud ako mahitungod han makalilipay nga mga kamatuoran han Biblia nga akon hinbaroan! Waray kami mangaturog bisan lahos na ha katutnga han gab-i ha pag-inistorya mahitungod han Biblia. Iginsaysay ni George an katuyoan han Dios para ha tuna. Ginpakianhan ko hiya hito mismo nga gab-i kon mahimo ba hiya mag-aram ha Biblia ha balay basi makaapi ako hito.

“Hi Bugto Blanton nagsuhestyon nga patambungon an amon duha nga anak ha amon pag-aram. Ginhunahuna namon nga mga bata pa hira hinduro, tungod kay dos ngan kuwatro anyos pa la hira. Kondi, iginpabasa ha amon ni Bugto Blanton an Deuteronomio 31:12, nga nasiring: ‘Tiroka an mga tawo, mga lalaki ngan mga babaye, ngan an kabataan, basi hira makatoon.’ Ginbuhat namon ito nga suhestyon ngan ginhikay pa ngani nga makagkomento an kabataan durante han pag-aram ha Biblia. Urosa nga gin-aadman namon an amon mga komento, kondi diri gud namon hira gintututdoan kon  ano an ira isisiring. Inabat namon nga nakabulig ini ha paggiya ha amon mga anak nga iaplikar mismo ha ira kalugaringon an kamatuoran. Mapasalamaton gud kami pirme han giya nga iginhatag ni Bugto Blanton ha amon basi mabuligan an amon pamilya nga mag-uswag ha espirituwal.”

Mga Ayat nga Nagkikinahanglan hin Pagsakripisyo

Yana nga nagkakaurosa kami ha pag-aram ha Biblia, may-ada kami bag-o nga mga problema. Tungod kay hirayo hinduro an akon puwesto, agsob nga alas-noybe na ha gab-i ako nakakauli. Tungod hini, diri ako nakakatambong ha mga katirok durante ha kabutngaan han semana, bisan kon nakakatambong ako ha mga Domingo. Hito nga panahon, hi Ann natambong na ha ngatanan nga mga katirok ngan madagmit nga nag-uuswag. Karuyag ko liwat tumambong ha ngatanan nga mga katirok sugad man magdumara hin mapulsanon nga pag-aram han pamilya. Maaram ako nga kinahanglan ko maghimo hin mga pagsakripisyo. Salit nagdesisyon ako nga ibanan an mga oras han akon pagtrabaho, bisan kon maibanan ako hin mga kustomer.

Maopay gud an resulta hini nga kahikayan. Seryoso nga gintagad gud namon an pag-aram han pamilya sugad han iba nga lima nga sinemana nga mga katirok ha Kingdom Hall. Gintawag namon ito nga an amon ikaunom nga katirok. Salit nag-eskedyol kami hin espisipiko nga adlaw ngan oras—kada Mierkoles ha alas 8:00 h.g. Usahay katapos han panihapon, kon tapos na kami maghugas han mga pinggan, usa ha amon an masiring, “Oras na para ha ‘katirok’!” Gintitikangan ni Ann an pag-aram kon nalalangan ako, ngan iginpapadayon ko an pagdumara ha akon gud pag-abot.

An usa pa nga nakabulig ha amon nga magpabilin nga marig-on ngan nagkakaurosa sugad nga pamilya amo an urosa nga pagbasa han adlaw-adlaw nga teksto kada aga. Kondi, may-ada problema ha pag-eskedyol hini. Ibaiba an oras han amon pagmata. Gin-iristoryahan namon ini ngan nagdesisyon kami nga kinahanglan durungan kami nga magmata, mamahaw ha alas-6:30 h.a., ngan urosa nga maghisgot han adlaw-adlaw nga teksto. Ini nga kahikayan nakaopay gud ha amon. Han dagku na an amon mga anak, ginpili nira nga mag-alagad ha Bethel. Inabat namon nga ini nga adlaw-adlaw nga mga paghisgot nakabulig ha ira espirituwalidad.

An mga Pribilehiyo Katapos han Bawtismo Nagkinahanglan hin Darodaku nga Pagsakripisyo

Nabawtismohan ako han 1962, ngan katapos han 21 ka tuig nga pagtag-iya ko han akon negosyo, iginbaligya ko ito ngan nangimpleyo ha amon lugar basi magin mas hirani ako ha akon pamilya basi tarampo kami nga makag-alagad kan Jehova. Nagresulta ini hin damu nga mga bendisyon. Ginhimo namon nga tumong nga kami ngatanan masulod ha bug-os-panahon nga ministeryo. Nagtikang ito temprano han dekada han 1970 han an amon suhag nga anak, hi Edward, nagin bug-os-panahon nga ministro, o regular payunir, pakagradwar gud ha high school. Waray pag-iha, an amon anak nga hi George nagtikang magpayunir, ngan waray pag-iha sumunod hi Ann. Nadasig gud ako ha ira nga tulo, tungod kay ginsusumatan nira ako mahitungod han ira mga eksperyensya ha pag-alagad ha kanataran. Sugad nga pamilya, amon ginhisgotan kon paonan-o namon mapapasimple an amon kinabuhi basi kami ngatanan bug-os-panahon nga makag-alagad. Nagdesisyon kami nga ibaligya an amon balay. Nag-ukoy kami dida hito nga balay ha sulod hin 18 ka tuig ngan dida hito kami nagpamilya. Naruyagan gud namon hinduro an amon balay, kondi ginbendisyonan ni Jehova an amon desisyon nga ibaligya ito.

Gin-imbitar hi Edward ha Bethel han 1972, ngan hi George, han 1974. Bisan kon namingaw kami ni Ann ha ira, waray namon paghinunahunaa nga maopay gud unta kon hirani la hira ha amon, kon mag-asawa hira, ngan magkaanak. Lugod, nalipay kami nga an amon mga anak nag-aalagad kan Jehova ha Bethel. a Nauyon kami ha Proberbios 23:15, nga nasiring: “Anak ko kon an imo kasingkasing magmakinaadmananon, an akon kasingkasing magmamalipayon, bisan an akon.”

 Nag-alagad Kami Sugad nga Espesyal Payunir

Nagpadayon kami ha pagpayunir samtang an amon duha nga anak aadto ha Bethel. Katapos, usa ka adlaw han 1975, kinarawat kami hin surat nga nagdadapit ha amon ha pagsulod ha espesyal payunir nga buruhaton ha waray itoka nga teritoryo ha Clinton Country, Illinois. Waray gud namon laomi ito! Nangahulogan ini nga kinahanglan bumaya kami ha New Jersey, diin hirani kami ha amon mga anak ha New York ngan diin nag-uukoy an amon kasangkayan ngan mga paryente. Kondi, ginhunahuna namon ito sugad nga toka tikang kan Jehova ngan nagsakripisyo, nga nagresulta ha bag-o nga mga bendisyon.

Katapos hin pipira ka bulan nga pagsangyaw ha waray-itoka nga teritoryo, nagtikang kami ha pagdumara hin mga katirok ha usa nga panpubliko nga awditoryum ha Carlyle, Illinois. Kondi karuyag namon magkaada permanente nga lugar nga pagkakatirokan. Usa nga mag-asawa hito nga lugar an nakabiling hin gutiay nga lote nga may-ada gutiay hinduro nga payag nga amon napletehan. Ginlimpyohan namon an bug-os nga payag upod na an kasilyas hito ha gawas—ngan ginhimo ito nga gutiay nga katirokan. Malipayon nga nahinunumdoman namon an usa nga kabayo nga baga hin interesado ha amon. Agsob nga iginsusulod niya an iya ulo ha bintana basi hikit-an kon ano an nahitatabo ha katirok!

Inabot an panahon, naporma an Carlyle nga Kongregasyon, ngan nalipay kami nga nakabulig kami hini. Ginbuligan kami han usa nga batan-on nga mag-asawa nga payunir, hira Steve ngan Karil Thompson, nga inabot liwat basi magsangyaw ha waray-itoka nga teritoryo. Nagpabilin didto an mag-asawa nga Thompson ha sulod hin pipira ka tuig ngan ha urhi nag-eskwela hira ha Watchtower Bible School of Gilead ngan igintoka sugad nga misyonero ha Este nga Aprika, diin nag-alagad hira ha pagbiyahe nga buruhaton.

Waray pag-iha nagtikapuno na an amon gutiay nga katirokan, ngan nagkinahanglan na kami hin mas daku. An mag-asawa nga nakabiling hito nga katirokan amo na liwat an nagsulbad han problema ngan nakapalit hin propriedad nga mas angayan para ha Kingdom Hall. Nalipay gud kami han paglabay hin pipira ka tuig, gin-imbitar kami ha dedikasyon han bag-o nga natukod nga Kingdom Hall ha Carlyle! Nakapribilehiyo ako ha pagpahayag para han dedikasyon. An amon toka didto usa ka maopay nga eksperyensya para ha amon, usa nga bendisyon tikang kan Jehova.

Inabrihan Para ha Amon an Usa nga Bag-o nga Kanataran

Han 1979 kinarawat namon an bag-o nga toka, ngadto ha Harrison, New Jersey. Nag-alagad kami didto ha sulod hin mga 12 ka tuig. Durante hito nga panahon nagdumara kami hin pag-aram ha usa nga babaye nga Intsik, ngan nagresulta ini ha damu pa nga pagdumara hin pag-aram ha mga Intsik. Hito nga panahon, hinbaroan namon nga yinukot nga mga estudyante ngan mga pamilya nga Intsik an naukoy ha amon teritoryo. Tungod hini, nadasig kami ha pag-aram han Inintsik nga yinaknan. Bisan kon  nangangahulogan ini ha paggamit hin panahon kada adlaw ha pag-aram han yinaknan, nagresulta ito ha damu nga makalilipay nga mga pag-aram ha Biblia ha mga Intsik ha amon lugar.

Durante hito nga mga tuig, nakaeksperyensya kami hin damu nga pataraw-an nga mga sitwasyon, labi na ha amon mga pangalimbasog ha pagyakan hin Inintsik. Usa ka adlaw iginpakilala ni Ann an iya kalugaringon sugad nga “yatot” han Biblia imbes nga usa nga “magturutdo” han Biblia. An mga pulong magkapariho hinduro. Hiniyom an tagbalay ngan nagsiring: “Alayon sulod kamo. Waray pa gud ako igkaistorya hin yatot han Biblia.” Nakukurian pa gihapon kami yana ha pagyakan han yinaknan.

Katapos, igintoka kami ha iba pa nga lugar ha New Jersey diin nakagpadayon kami ha pag-alagad ha lugar nga inuukyan han mga Intsik. Ha urhi gindapit kami nga bumalhin ngadto ha Boston, Massachusetts, diin an usa nga grupo han mga Intsik gin-organisa ha sulod hin mga tulo ka tuig na. Pribilehiyo namon nga nakabulig kami hini nga grupo ha sulod han naglabay nga pito ka tuig ngan nalilipay kami nga nagin usa na ito nga kongregasyon han Enero 1, 2003.

Mga Bendisyon Tikang ha Nagsasakripisyo-ha-Kalugaringon nga Pagkinabuhi

Ha Malakias 3:10, aton mababasa an pagdapit ni Jehova ha iya katawohan nga dad-on ha sulod an ira mga halad ngan mga sakripisyo basi ibubo niya an iya mga bendisyon tubtob nga waray na panginahanglan. Amon ginbayaan an negosyo nga interesado gud ako. Amon iginbaligya an amon balay, nga naruyagan namon hinduro. Ngan amon liwat iginsalikway an iba pa nga mga butang. Kondi, kon itanding ha mga bendisyon, an mga sakripisyo gutiay hinduro.

Hura gud nga mga bendisyon an iginbubo ni Jehova ha amon! Natagbaw gud kami ha pagkita han amon mga anak nga nagkarawat han kamatuoran, nalilipay kami ha pakigbahin ha bug-os-panahon nga nagluluwas han kinabuhi nga ministeryo, ngan nakikita namon an pag-ataman ni Jehova ha amon mga panginahanglan. Oo, an amon gutiay nga pagsakripisyo nagresulta hin hura nga mga bendisyon ha amon!

[Footnote]

[Retrato ha pahina 25]

Hira Louise ngan George Blanton kaupod ni Ann, 1991

[Retrato ha pahina 26]

An Kingdom Hall ha Carlyle, igindedikar han Hunyo 4, 1983

[Retrato ha pahina 27]

Kaupod an bag-o nga naporma nga Kongregasyon han mga Intsik ha Boston

[Retrato ha pahina 28]

Upod hira Edward, Connie, George, ngan Grace