“Gamhanan Gud an Pulong han Dios!”

“AN PULONG han Dios buhi, ngan maabtik [“may gahum,” NW].” (Hebreo 4:12) Ha pagpamatuod han diri-mapugngan nga gahum han Pulong han Dios, iginpakita han 2003 Calendar of Jehovah’s Witnesses an unom nga totoo-ha-kinabuhi nga mga istorya tikang ha magkalainlain nga dapit han kalibotan. Ilarom han ulohan nga “Before and After,” iginpakita han kalendaryo kon paonan-o an pagtutdo nga buruhaton han mga Saksi ni Jehova nabulig ha mga tawo nga mapauswag an ira moralidad, bayaan an ira nakakadaot nga mga estilo han pagkinabuhi, maparig-on an ira kinabuhi ha pamilya, ngan mapauswag an personal nga relasyon ha Dios.

Nakarawat an pipira nga mga surat may kalabotan ha kalendaryo han 2003. Iini an pipira hini nga mga komento:

“Ini nga kalendaryo usa nga pamatuod ha totoo nga mga Kristiano nga may-ada iba nga pariho gud ha ira nga kinahanglan mangalimbasog gud ha pakig-away para ha pagtoo. Yana mahimo na nira kitaon an mga retrato sugad nga mga pahinumdom han mga pagbag-o nga ginhimo han pipira.”—Steven, Estados Unidos.

“Karuyag ko gud isurat inin pipira nga mga pulong basi ipahibaro ha iyo nga nabantad gud an akon kasingkasing han 2003 nga kalendaryo. Waray pa gud kalendaryo nga nagkaada sugad nga epekto ha akon. Ini nga mga istorya ha kinabuhi magigin bahin han akon mga gindadara ha akon bag ha pagsangyaw basi ipakita ha mga tawo an personal nga mga ehemplo ngan makatirigamnan nga ebidensya mahitungod han mahimo magin epekto han Biblia ha mga indibiduwal.”—Marc, Belgium.

“Nabantad gud ako han kalendaryo. Napuno ako hin emosyon ha pakabasa ngan pakakita kon paonan-o nabag-o ni Jehova ini nga mga indibiduwal. Sugad nga resulta, napapagios ako nga padayon nga maghimo hin mga pagbag-o ha akon kalugaringon nga kinabuhi. Mas inabat ko gud yana an pagin bahin han aton bug-os-kalibotan nga pagminagburugto.”—Mary, Estados Unidos.

“Nabantad gud hi Jesus han espirituwal nga kahimtang han mga katawohan. Salamat ha pagsubad han susbaranan ni Jesus pinaagi ha pagpublikar han mga istorya ha kinabuhi nga aada ha aton 2003 nga kalendaryo. Yana pa gud la ako nagtangis tungod han usa nga kalendaryo.”—Cassandra, Estados Unidos.

“Han 11 anyos ako, nagtikang ako magsigarilyo; ha urhi nagdroga ako. Agsob ko hunahunaon hadto an pagpakamatay. Han makilala ko hi Jehova, nabuligan ako ha pag-undang hito nga mga bisyo. Ini nga kalendaryo importante hinduro ha akon. An mga ehemplo han akon kabugtoan tikang ha bug-os nga kalibotan nagpaparig-on ha akon. Yana maaram na ako nga diri ako nag-uusahan hini nga kahimtang ngan nga an pinakaimportante amo an gugma kan Jehova ngan bug-os-kasingkasing nga pag-alagad ha iya.”—Margaret, Polandia.

“O, gamhanan gud an Pulong han Dios! Han makarawat ko an 2003 nga kalendaryo, nangalimbasog gud ako nga diri magtangis. Ini nga mga eksperyensya, ngan an mga retrato, makaparig-on gud ha pagtoo.”—Darlene, Estados Unidos.

“An estilo han pagkinabuhi han pipira hini nga mga tawo pariho gud ha akon estilo han pagkinabuhi hadto. Gintagan ako ni Jehova han kusog ha pag-undang ha baga hin diri na mababayaan nga mga bisyo. Damu nga salamat tungod hinin totoo-ha-kinabuhi nga mga istorya.”—William, Estados Unidos.