“Diri Kamo Magpas-an han Yugo Upod ha mga Diri Magtinoohon”

SUGAD han makikita mo ha retrato dinhi, nakukurian hinduro an kamelyo ngan an baka nga magkaupod nga nag-aarado. An yugo nga naghihiusa ha ira—nga gintuyo para ha duha nga hayop nga pariho an kadaku ngan kusog—nagpapakuri hiton duha nga hayop. Tungod kay interesado ha kaopayan han sugad nga mga hayop nga ginagamit ha pagtrabaho, an Dios nagsiring ha mga Israelita: “Diri mo pag-usahon an baka ngan an asno ha pag-arado.” (Deuteronomio 22:10) Ito nga prinsipyo naaplikar liwat ha usa nga baka ngan ha usa nga kamelyo.

Kasagaran, an usa nga parauma diri magpapakuri hin sugad hito ha iya mga hayop. Kondi kon waray hiya duha nga baka, bangin butangan niya hin usa nga yugo an iya duha nga magkaiba nga hayop. Matin-aw, ini an ginbuhat han ika-19 ka siglo nga parauma ha retrato. Tungod kay magkaiba an ira kadaku ngan bug-at, an mas maluya nga hayop kinahanglan mangalimbasog nga makadungan ha kalaksi, ngan an mas makusog nga hayop mas mabubug-atan.

Ginamit ni apostol Pablo an ilustrasyon mahitungod han diri magkapariho nga pagpas-an han yugo ha pagtutdo ha aton hin importante nga leksyon. “Diri kamo magpas-an han yugo upod ha mga diri magtinoohon,” nagsurat hiya. “Kay oonan-on ba an pagkatampo han katadongan ngan han diri katadongan? O oonan-on ba an pagkaangbit han kalamrag ngan han kangitngit?” (2 Korinto 6:14) Paonan-o an usa nga Kristiano mahimo magpas-an han yugo upod ha diri igkasi-tumuroo?

An usa nga paagi amo an, kon an usa nga Kristiano nagpili hin asawa nga iba an mga tinotoohan. An sugad nga pagtampo makuri gud para ha ira nga duha, tungod kay an magpadis diri nagkakauyon ha importante nga mga isyu.

Han ginhikay ni Jehova an pag-asawa, iya iginhatag ha asawa an buruhaton sugad nga “kabulig,” o ‘kapadis.’ (Genesis 2:18) Pinaagi liwat kan propeta Malakias, gintawag han Dios an asawa sugad nga “kaupod-upod.” (Malakias 2:14) Karuyag han aton Maglalarang nga an mga mag-asawa magkaupod nga nagkakauyon ha uusa nga espirituwal nga direksyon, nagbibinuligay ha mga responsabilidad ngan hira nga duha pariho nakarawat han mga kapulsanan.

Pinaagi han pag-asawa ‘ha Ginoo la,’ ipinapakita han usa nga Kristiano an pagtahod ha sagdon han aton langitnon nga Amay. (1 Korinto 7:39) Ini an nagigin pundasyon han nagkakauyon nga pag-asawa, nga magdadayaw ngan magpapasidungog ha Dios samtang an mag-asawa nag-aalagad ha iya sugad nga ‘matinumanon nga mga upod ha yugo’ ha espesyal nga kahulogan.—Filipos 4:3.

[Ginkuhaan han mga Retrato ha pahina 32]

Kamelyo ngan oso: Tikang ha libro nga La Tierra Santa, Tomo 1, 1830