Pagsubad ha Dios han Kamatuoran
Pagsubad ha Dios han Kamatuoran
“Magsubad kamo ha Dios, sugad ha mga hinigugma nga anak.”—EFESO 5:1.
1. Ano an tinotoohan han iba mahitungod han kamatuoran, ngan kay ano nga sayop an ira pangatadongan?
“ANO an kamatuoran?” (Juan 18:38) Ito nga pakiana, nga matahapon nga iginpakiana ni Ponsio Pilato haros 2,000 ka tuig na an naglabay, baga in nagpapasabot nga an kamatuoran makuri hinduro hiagian. Damu yana an mauyon hito. An kamatuoran mismo gin-aatake. Bangin hinbatian mo na nga ginsiring nga an kada usa amo an nagdidesisyon kon ano an kamatuoran, o nga an kamatuoran diri bug-os, o nga an kamatuoran padayon nga nagbabag-o. Sayop ito nga pangatadongan. An tumong gud han pagsaliksik ngan edukasyon amo an paghibaro han totoo nga mga impormasyon, han kamatuoran, mahitungod han kalibotan nga aton inuukyan. An kamatuoran diri personal nga opinyon la. Pananglitan, an tawhanon nga kalag mahimo nga diri-mamaratyon o mamaratyon. Hi Satanas mahimo nga naeksister o diri. Mahimo nga may-ada katuyoan ha kinabuhi o waray. Ha tagsa nga kahimtang, usa la an husto nga baton. An usa kamatuoran, ngan an usa pa buwa; diri mahimo magin totoo ito nga duha.
2. Ha ano nga mga paagi nga hi Jehova amo an Dios han kamatuoran, ngan ano nga mga pakiana an paghihisgotan yana?
2 Ha nahiuna nga artikulo, aton ginhisgotan nga hi Jehova amo an Dios han kamatuoran. Maaram hiya han kamatuoran ha ngatanan nga butang. Kabaliktaran gud ha iya malimbong nga kaaway nga hi Satanas nga Yawa, hi Jehova pirme nga maminatud-on. Dugang pa, hi Jehova hura nga nagpapahayag han kamatuoran ha iba. Hi apostol Pablo nagsagda ha mga igkasi-Kristiano: “Magsubad kamo ha Dios, sugad ha mga hinigugma nga anak.” (Efeso 5:1) Sugad nga mga Saksi ni Jehova, paonan-o naton masusubad hiya ha pagyakan han kamatuoran ngan ha pagkinabuhi uyon hito? Kay ano nga importante an pagbuhat hito? Ngan ano an aton pasarig nga inuuyonan ni Jehova adton nagpapadayon ha pagin maminatud-on? Aton kitaon.
3, 4. Paonan-o iginhulagway han mga apostol nga hi Pablo ngan hi Pedro an mahitatabo durante han “kataposan nga mga adlaw”?
3 Nagkikinabuhi kita ha panahon nga kaylap an kabuwaan ha relihiyon. Sugad han igintagna ni apostol Pablo pinaagi han giya han Dios, damu nga mga tawo hinin “kataposan nga mga adlaw” an may-ada dagway han diosnon nga debosyon kondi nagwawara han gahum hito. An iba nakontra ha kamatuoran, “bug-os nga nahugawan an hunahuna.” Dugang pa, ‘an mga magraot ngan maglimbong nga mga tawo natubo ha maraot ngan labi pa gud nga maraot, ngan nanlilimbong hira ngan pinanlilimbongan man hira.’ Bisan kon an sugad nga mga tawo pirme nga nag-aaram, diri gud hira nakakadangat ha “pagkilala [“husto nga kahibaro,” NW] ha kamatuoran.”—2 Timoteo 3:1, 5, 7, 8, 13.
4 Hi apostol Pedro giniyahan liwat ha pagsurat mahitungod han kataposan nga mga adlaw. Sugad la han iya igintagna, diri la kay iginsasalikway han mga tawo an kamatuoran kondi gintatamay liwat nira an Pulong han Dios ngan adton nagpapasamwak han kamatuoran nga aada hito. “Ha ira mga kalugaringon nga kairiphon,” an sugad nga mga magyubit nagbabalewaray han kamatuoran nga an kalibotan ha panahon ni Noe linibnasan hin tubig, nga nagpapakita hin ehemplo han tidaraon nga adlaw han paghukom. An ira mga hingyap mangangahulogan hin kalamidad para ha ira kon umabot na an panahon han Dios ha pagbungkag ha diri-diosnon nga mga tawo.—2 Pedro 3:3-7.
An mga Surugoon ni Jehova Maaram han Kamatuoran
5. Sumala kan propeta Daniel, ano an mahitatabo ha “panahon han kataposan,” ngan paonan-o natutuman ini nga tagna?
5 Ha paghulagway mahitungod han “panahon han kataposan,” igintagna ni propeta Daniel an naiiba gud nga hitabo ha katawohan han Dios—an pagpahiuli han relihiyoso nga kamatuoran. Hiya nagsurat: “Damu an madalagan ngadto nganhi, ngan an [“totoo nga,” NW] kahibaro magdudugang.” (Daniel 12:4) An katawohan ni Jehova diri nawuwurok o nabubuta han daku nga Paralimbong. Pinaagi ha pag-usisa ha mga pahina han Biblia, nagkaada hira husto nga kahibaro. Ha siyahan nga siglo, ginlamragan ni Jesus an iya mga disipulo. “Bug-os nga inabrihan niya an ira mga hunahuna basi masabtan an kahulogan han Kasuratan.” (Lukas 24:45, NW) Ha aton panahon, ito liwat an ginbubuhat ni Jehova. Pinaagi han iya Pulong, han iya espiritu, ngan han iya organisasyon, nabuligan na niya an minilyon nga mga tawo ha bug-os nga tuna nga masabtan an iya na hinbabaroan—an kamatuoran.
6. Ano nga mga kamatuoran han Biblia an nasasabtan han katawohan han Dios yana?
6 Sugad nga katawohan han Dios, nasasabtan naton an damu nga mga butang nga diri unta naton mahibabaroan ha iba nga paagi. Maaram kita han mga baton ha mga pakiana nga pinangalimbasogan nga hibaroan han maaramon nga mga tawo ha kalibotan ha sulod hin mga milenyo na. Pananglitan, maaram kita kon kay ano nga may-ada pag-antos, kon kay ano nga namamatay an mga tawo, ngan kon kay ano nga an mga tawo diri makakadangat ha kamurayawan ngan pagkaurosa ha bug-os nga kalibotan. Ginbendisyonan liwat kita hin usa nga bisyon han mahitatabo ha tidaraon—an Ginhadian han Dios, an paraiso nga tuna, ngan an waray kataposan nga kinabuhi ha kahingpitan. Nakilala naton hi Jehova, an Usa nga Supremo. Hinbaroan naton an mahitungod han iya makaruruyag nga personalidad ngan an kinahanglan pagbuhaton naton basi makarawat an iya bendisyon. Tungod ha paghibaro han kamatuoran nakikilala naton kon ano an diri totoo. An pag-aplikar han kamatuoran nagpapanalipod ha aton tikang ha waray pulos nga mga tinguha, nabulig ha aton nga makarawat an gimaopayi ha kinabuhi, ngan naghahatag ha aton hin urusahon nga paglaom ha tidaraon.
7. Hin-o la an makakasabot ha mga kamatuoran han Biblia, ngan hin-o an diri?
7 Nasasabtan mo ba an kamatuoran han Biblia? Kon amo, hura nga binendisyonan ka. Kon an usa nga awtor nagsusurat hin libro, kasagaran nga dinidisenyo niya ito basi makadani ha usa ka espisipiko nga grupo hin mga tawo. An iba nga mga libro iginsurat para ha mga tawo nga hitaas an edukasyon, an iba para ha kabataan, ngan an iba pa para han mga aada ha espesyal nga mga pag-aradman. Bisan kon masayon na magkaada hin Biblia an ngatanan, gintuyo ito nga masabtan ngan maapresyar han partikular nga grupo hin mga tawo. Dinisenyo ito ni Jehova para ha mga mapainubsanon, ha maaghop nga mga tawo ha tuna. An sugad nga mga tawo makakasabot ha kahulogan han Biblia, anoman an ira edukasyon, kultura, kahimtang ha kinabuhi, o tribo. (1 Timoteo 2:3, 4) Ha luyo nga bahin, an pagsabot ha kamatuoran han Biblia diri iginhahatag ha mga tawo nga diri husto nga nakahilig hito, intelihente man hira o edukado. An mga mapahitas-on, an mga hambog, diri makakasabot han presyoso nga mga kamatuoran han Pulong han Dios. (Mateo 13:11-15; Lukas 10:21; Buhat 13:48) An Dios la an makakahimo hin sugad hito nga libro.
Maminatud-on an mga Surugoon ni Jehova
8. Kay ano nga hi Jesus mismo an kamatuoran?
8 Pariho kan Jehova, maminatud-on an iya matinumanon nga mga Saksi. Hi Jesu-Kristo, an pinakabantogan nga Saksi ni Jehova, nagparig-on han kamatuoran pinaagi han mga butang nga iya igintutdo ngan han iya paagi han pagkinabuhi ngan pagkamatay. Ginparig-on niya an pagkatotoo han pulong ngan mga saad ni Jehova. Tungod hito, hi Jesus mismo an kamatuoran, sugad la han iya mismo ginsiring.—Juan 14:6; Pahayag 3:14; 19:10.
9. Ano an ginsisiring han Kasuratan mahitungod han pagyakan han kamatuoran?
9 Hi Jesus “puno han grasya ngan kamatuoran” ngan “waray bisan ano nga limbong dida ha iya baba.” (Juan 1:14; Isaias 53:9) Ginsusubad han totoo nga mga Kristiano an susbaranan nga ipinakita ni Jesus ha pagin maminatud-on ha iba. Hi Pablo nagsagdon ha mga igkasi-tumuroo: “Magyakan kamo an tagsatagsa hin kamatuoran ha iya amyaw: kay mga bahin kita ha usa kag usa.” (Efeso 4:25) Una pa, hi propeta Sakarias nagsurat: “Pagyakan han kamatuoran ha usa kag usa.” (Sakarias 8:16, NW) Maminatud-on an mga Kristiano tungod kay karuyag nira nga lipayon an Dios. Maminatud-on hi Jehova ngan maaram hiya han kadaot nga resulta han mga buwa. Salit, husto nga ginlalaoman niya an iya mga surugoon nga magyayakan han kamatuoran.
10. Kay ano nga nagbubuwa an mga tawo, ngan ano an nakakadaot nga mga resulta?
10 Para ha damu nga mga tawo, an pagbuwa baga in masayon nga paagi ha pagkaada hin partikular nga mga bentaha. An mga tawo nagbubuwa basi diri masirotan, basi makaganansya, o basi dayawon han iba. Kondi, an batasan na nga pagbuwa usa nga bisyo. Dugang pa, an buwaon diri makarawat han pag-uyon han Dios. (Pahayag 21:8, 27; 22:15) Kon kilala kita nga maminatud-on, an iba natoo ha aton ginsisiring; nasarig hira ha aton. Kondi, kon hibaroan nga nagsusumat kita hin bisan usa la nga buwa, an iba bangin magruhaduha na ha pagin maminatud-on han anoman nga aton sisidngon ha tidaraon. Usa nga Aprikano nga proberbio an nasiring: “An usa nga buwa nakakadaot han usa ka yukot nga kamatuoran.” Usa pa nga proberbio an nasiring: “An usa nga buwaon diri totoohan, bisan kon nagyayakan hiya hin kamatuoran.”
11. Ha ano nga paagi nga an pagin maminatud-on labaw pa kay ha pagsumat la han kamatuoran?
11 An pagin maminatud-on nangangahulogan hin labaw pa kay ha pagsumat la han kamatuoran. Usa nga paagi ito han pagkinabuhi. Ipinapakita hito kon hin-o kita. Iginsusumat naton an kamatuoran ha iba diri la pinaagi han aton ginsisiring kondi pinaagi liwat han aton ginbubuhat. “Ikaw nga . . . nagtututdo ha imo igkasi-tawo, diri ka nagtututdo ha imo ngahaw?” nagpakiana hi apostol Pablo. “Ikaw nga nagwawali nga diri angay mangawat an tawo, nangangawat ka ba? Ikaw nga nasiring, nga an tawo diri angay manlibog, nanlilibog ka ba?” (Roma 2:21, 22) Kon karuyag naton ipaangbit an kamatuoran ha iba, kinahanglan magin maminatud-on kita ha ngatanan nga aton mga paagi. An aton reputasyon ha pagin maminatud-on ngan pagin tangkod magkakaada marig-on nga epekto ha paagi han pagkarawat han mga tawo ha aton igintututdo.
12, 13. Ano an iginsurat han usa nga batan-on mahitungod han pagin maminatud-on, ngan ano an hinungdan han iya hitaas nga suruklan ha moral?
12 Hinsasabtan liwat han batan-on nga mga surugoon ni Jehova an pagkaimportante han pagin maminatud-on. Ha usa nga sinurat nga pagsaysay ha eskwelahan, hi Jenny, nga 13 anyos hiton nga panahon, nagsurat: “An pagin tangkod usa nga hiyas nga akon gud ginpapabilhan. Makasurubo, diri damu nga mga tawo an bug-os nga tangkod yana. Nagsasaad ako ha akon kalugaringon nga magpapabilin ako nga tangkod ha akon kinabuhi. Magigin tangkod liwat ako bisan kon an pagsumat han kamatuoran diri dayon maghahatag hin kapulsanan ha akon o ha akon kasangkayan. Ginsisiguro ko nga an akon kasangkayan amo adton nagsusumat han kamatuoran ngan tangkod nga mga tawo.”
13 Ha pagkomento mahitungod hini nga sinurat nga pagsaysay, an maestra ni Jenny nagsiring: “Bisan kon batan-on ka pa, napatubo mo na an marig-on gud nga prinsipyo ha moral ngan maopay nga pamatasan. Maaram ako nga magpapabilin ka ha imo surundon tungod kay marig-on gud an imo moralidad.” Ano an hinungdan han karig-on ha moral hini nga daragita? Ha introduksyon han iya sinurat nga pagsaysay, siring ni Jenny nga an iya relihiyon “naghahatag han mga suruklan para han [iya] kinabuhi.” Pito ka tuig na an naglabay tikang nga iginsurat ni Jenny iton nga pagsaysay. Sugad han iginsaysay han iya maestra, nagpapadayon hi Jenny ha pagpakita hin hitaas nga suruklan ha moral ha iya kinabuhi sugad nga usa han mga Saksi ni Jehova.
Iginpapahayag han mga Surugoon ni Jehova an Kamatuoran
14. Kay ano nga an mga surugoon han Dios labi nga may-ada daku gud nga responsabilidad ha pagparig-on han kamatuoran?
14 Syempre, an iba gawas pa han mga Saksi ni Jehova mahimo magsumat han kamatuoran ngan mangalimbasog nga magin tangkod. Kondi, sugad nga mga surugoon han Dios, labi nga may-ada kita daku gud nga responsabilidad ha pagparig-on han kamatuoran. Igintapod ha aton an mga kamatuoran han Biblia—mga kamatuoran nga makakagtugway ha usa ngadto ha kinabuhi nga waray kataposan. Salit, obligasyon naton nga ipaangbit ito nga kahibaro ha iba. “Kon hin-o an tinagan hin damu,” siring ni Jesus, “damu an pangangaroon ha iya.” (Lukas 12:48) Sigurado nga ‘damu an pinangangaro’ tikang hadton ginbendisyonan han presyoso nga kahibaro han Dios.
15. Ano nga kalipay an nakakarawat mo ha pagpaangbit han kamatuoran han Biblia ha iba?
15 May-ada kalipay ha pagpaangbit han kamatuoran han Biblia ha iba. Pariho han siyahan-siglo nga mga disipulo ni Jesus, iginpapasamwak naton an maopay nga sumat—usa nga makalilipay nga mensahe han paglaom—ngada hadton “nanluluya ngan nagpapatlaag, sugad hin mga karnero nga waray magbarantay” ngan ha ira nga ginbuta ngan nawurok tungod han “mga katutdoan han mga demonyo.” (Mateo 9:36; 1 Timoteo 4:1, NW) Hi apostol Juan nagsurat: “Waray ko na kalipay nga labaw hini, ha pamati nga an akon mga anak nanggagawi ha kamatuoran.” (3 Juan 4) An pagkamatinumanon han “mga anak” ni Juan—bangin adton gintutdoan niya han kamatuoran—naghatag ha iya hin daku nga kalipay. Nalilipay kita kon nakikita naton nga an mga tawo nakarawat nga may apresasyon ha Pulong han Dios.
16, 17. (a) Kay ano nga diri ngatanan nakarawat han kamatuoran? (b) Ano nga kalipay an imo makakarawat samtang iginpapasamwak mo an kamatuoran han Biblia?
16 Oo, diri ngatanan makarawat han kamatuoran. Hi Jesus nagyakan han kamatuoran mahitungod ha Dios, bisan ha panahon nga diri kinakarawat han kadam-an an pagbuhat hito. Ha Judio nga mga parakontra hiya nagsiring: “Kay ano nga diri kamo natoo ha akon? An ha Dios nanmamati ha mga pulong han Dios; tungod hini diri kamo nanmamati ha mga pulong han Dios, kay diri kamo ha Dios.”—Juan 8:46, 47.
17 Pariho kan Jesus, diri kita naundang ha pagsumat han presyoso nga kamatuoran mahitungod kan Jehova. Diri naton ginlalaoman nga an ngatanan makarawat ha aton iginsusumat ha ira, kay diri ngatanan nagkarawat han ginsiring ni Jesus. Kondi, malipayon kita ha paghibaro nga ginbubuhat naton an husto. Tungod han iya mahigugmaon-nga-pagkabuotan karuyag ni Jehova nga maipahayag an kamatuoran ha katawohan. Sugad nga mga nagtatag-iya han kamatuoran, an mga Kristiano nagigin mga paradara han kalamrag ha madulom nga kalibotan. Pinaagi han pagpasanag han kalamrag han kamatuoran pinaagi han aton mga pulong ngan mga buhat, mabubuligan naton an iba nga maghatag hin himaya ha aton langitnon nga Amay. (Mateo 5:14, 16) Aton iginpapasamwak ha kadaygan nga iginsasalikway naton an palso nga bersyon ni Satanas han kamatuoran ngan ginpaparig-on naton an putli ngan waray hugaw nga Pulong han Dios. An kamatuoran nga hinbabaroan naton ngan iginpapaangbit makakahatag hin totoo nga kagawasan para hadton nakarawat hito.—Juan 8:32.
Igpadayon an Pagin Maminatud-on
18. Kay ano nga inuyonan ni Jesus hi Natanael, ngan paonan-o?
18 Hi Jesus naghigugma ngan nagyakan han kamatuoran. Durante han iya ministeryo ha tuna, inuyonan niya adton maminatud-on. Mahitungod kan Natanael, hi Jesus nagsiring: “Kitaa, an usa nga matuod nga taga-Israel, nga waray limbong.” (Juan 1:47) Katapos, hi Natanael, nga tinawag liwat nga Bartolome, ginpili nga magin usa han 12 nga apostol. (Mateo 10:2-4) Daku gud ito nga kadungganan!
19-21. Paonan-o ginbendisyonan an lalaki nga buta hadto tungod han iya maisugon nga pagin maminatud-on?
19 Usa nga bug-os nga kapitulo ha libro nga Juan ha Biblia an nagsasaysay han asoy han usa pa nga tangkod nga lalaki nga ginbendisyonan ni Jesus. Diri kita maaram han iya ngaran. Kondi maaram kita nga an lalaki usa nga makililimos nga buta tikang ha katawo. Nahipausa an mga tawo han iginpahiuli ni Jesus an iya panan-aw. An mga sumat mahitungod hinin milagroso nga katambal inabot ha pipira nga mga Pariseo, nga nangangalas ha kamatuoran, nga nagsarabot nga paiwason ha sinagoga an bisan hin-o nga natoo kan Jesus. Tungod kay maaram han ira plano, an nahahadlok nga mga ginikanan han buta hadto nga lalaki nagbuwa ha mga Pariseo, nasiring nga diri hira maaram kon paonan-o nga nakakakita na an ira anak nga lalaki o kon hin-o an nagbuhat hito.—Juan 9:1-23.
20 An natambal nga lalaki iginpatawag na liwat han mga Pariseo. Waray pagtagad ha anoman nga magigin resulta, maisugon nga iginsumat niya an kamatuoran. Iya iginsaysay kon paonan-o hiya natambal ngan nga hi Jesus an nagbuhat hito. Tungod kay nahipausa nga inin prominente ngan edukado nga kalalakin-an diri natoo nga hi Jesus tikang ha Dios, an natambal nga lalaki waray kahadlok nga nagsagda ha ira nga karawaton an matin-aw: “Kon ini nga tawo diri tikang ha Dios, hiya diri makakahimo hin bisan ano.” Tungod kay waray na ibabaton, gin-akusahan han mga Pariseo an lalaki hin kawaray pagtahod ngan ginpaiwas hiya.—Juan 9:24-34.
21 Han hinbaroan ini ni Jesus, mahigugmaon nga ginbiling niya an lalaki. Katapos buhaton ito, iya ginparig-on an pagtoo nga ipinakita hito nga lalaki nga buta hadto. Dayag nga ipinakilala ni Jesus an iya kalugaringon sugad nga an Mesias. Ginbendisyonan gud ito nga lalaki tungod ha pagsumat han kamatuoran! Sigurado nga inuuyonan han Dios adton nagsusumat han kamatuoran.—Juan 9:35-37.
22. Kay ano nga sadang igpadayon naton an pagin maminatud-on?
22 An pagbuhat han kamatuoran usa nga buruhaton nga sadang seryosohon naton. Importante ito ha pagpatubo ngan pagtipig hin maopay nga relasyon ha mga tawo ngan ha Dios. An pagin maminatud-on amo an pagin abrido, putli, masayon madaraon, ngan masasarigan, ngan nagriresulta ito hin pag-uyon ni Jehova. (Salmo 15:1, 2) An pagin buwaon amo an pagin malimbong, diri-masasarigan, ngan palso, ngan nagriresulta ito hin pagsalikwaya ni Jehova. (Proberbios 6:16-19) Salit, magin determinado nga magpadayon ha pagin maminatud-on. Oo, basi masubad an Dios han kamatuoran, kinahanglan mahibaro kita han kamatuoran, magyakan han kamatuoran, ngan magkinabuhi uyon ha kamatuoran.
Paonan-o Mo Babatunon?
• Kay ano nga mapasalamaton kita nga maaram kita han kamatuoran?
• Paonan-o naton masusubad hi Jehova ha pagin maminatud-on?
• Ano an mga kapulsanan han pagpaangbit han mga kamatuoran han Biblia ha iba?
• Kay ano nga importante nga magpadayon ha pagin maminatud-on?
[Mga Pakiana]
[Mga Retrato ha pahina 17]
Tungod kay gintaporan han kamatuoran han Biblia, madasigon nga iginpapaangbit ito han mga Kristiano ha iba
[Mga Retrato ha pahina 18]
An buta nga lalaki nga gintambal ni Jesus ginbendisyonan gud tungod ha pagsumat han kamatuoran