Kon Paonan-o Nakakarawat an Iba hin mga Baton

DAMU nga mga tawo an nag-aampo. Kombinsido an iba nga binabaton an ira mga pag-ampo. An iba nagruruhaduha kon binabaton ba an ira mga pag-ampo. An iba pa naghihingyap hin mga baton kondi waray maghunahuna ha pagpresenta han ira mga hangyo pinaagi han pag-ampo ngadto ha Dios.

Iginpapakilala han Biblia an totoo nga Dios sugad nga an “Parapamati han pag-ampo.” (Salmo 65:2, NW) Kon nag-aampo ka, nakakasiguro ka ba nga an imo mga pag-ampo nakadirekta ngadto ha totoo nga Dios? An imo ba mga pag-ampo amo an klase han mga pag-ampo nga iya babatunon?

Para ha damu nga mga tawo ha ngatanan nga mga bahin han tuna, an baton napapamatud-an nga oo! Paonan-o nira kinarawat an mga baton? Ano an ira hinbaroan?

An Dios—Hin-o Hiya?

Usa nga maestra ha Portugal nga ginpaeskwela hin mga madre ngan mga padi an sinsero nga nagtuman han iya relihiyon. Han nagbag-o ito nga relihiyon ngan nagbaya ha mga buruhaton nga igintutdo ha iya sugad nga importante, nawurok hiya. Ha iya pagbiyahe ngadto ha iba nga nasud, nagin pamilyar hiya ha mga paagi han pagsingba ha Oriente, ngan nagtikang hiya maghunahuna kon may-ada ba usa nga totoo nga Dios. Paonan-o hiya sadang magsingba? Han ginpakianhan niya an padi mahitungod han mga nakasurat ha Biblia, ginbalewaray an iya mga pakiana, ngan waray hiya matagbaw.

An Katoliko nga singbahan nanaltag na ha siyudad diin nag-uukoy ini nga maestra hin usa nga pampleta nga nagpapahamangno ha mga parukyano nga diri makiistorya ha mga Saksi ni Jehova. Kondi nagpabilin an iya mga pakiana. Usa ka adlaw han binisita ha iya balay an mga Saksi, namati hiya ngan nainteres ha iya hinbatian. Ito an siyahan nga higayon nga nakiistorya hiya ha ira.

Basi makakuha hin mga baton ha iya damu nga mga pakiana, ini nga babaye nagtikang ha pag-aram ha Biblia kaupod han mga Saksi ni Jehova. Kada semana, may-ada hiya hilaba nga listahan han mga pakiana para ha ira. Karuyag niya mahibaro han ngaran han Dios, kon usa la ba an totoo nga Dios, kon inuuyonan ba niya an paggamit han mga imahen ha pagsingba, ngan damu pa. Naobserbahan niya nga an ngatanan nga mga baton nga iya nakarawat  nagtikang ha Biblia, diri personal nga mga opinyon, salit nahipausa hiya ngan nalipay ha iya hinbabaroan. Hinay-hinay nga nakarawat niya an mga baton ha iya damu nga mga pakiana. Yana, nagsisingba hiya kan Jehova ha espiritu ngan kamatuoran, sugad han ginsiring ni Jesu-Kristo nga pagbubuhaton han “mga matuod nga magsiringba.”—Juan 4:23.

Ha Sri Lanka, usa nga pamilya an regular ngan urosa nga nagbabasa han Biblia, kondi waray hira makakuha hin mga baton ha damu nga mga pakiana nga importante ha ira. Bisan kon nanginahanglan hira hin bulig, waray ito maihatag han ira padi. Kondi, binisita an mga Saksi ni Jehova ha ira ngan nagbilin hin mapulsanon nga literatura ha Biblia ha pamilya. Ha urhi, han makapatagbaw nga nabaton han mga Saksi ni Jehova an ira mga pakiana ha Biblia, inuyon hira ha pag-aram ha Biblia. An ira hinbaroan ha ira pag-aram nakapainteres gud ha ira.

Bisan pa hito, an mga katutdoan ha singbahan nga naisilsil na ha asawa durante han iya pagkabata nakapugong ha iya nga makasabot nga an Amay ni Jesu-Kristo “amo la an matuod nga Dios,” sugad han siring mismo ni Jesus. (Juan 17:1, 3) Gintutdoan hiya nga katupong ni Jesus an Amay ngan ini nga “misteryo” diri sadang pagruhaduhaan. Sinsero ngan desperado nga nag-ampo hiya ngadto kan Jehova, nga ginagamit an iya ngaran, ngan naghangyo ha iya nga ipakita ha iya kon hin-o hi Jesus. Katapos, makausa pa nga gin-usisa niya hin maopay an may kalabotan nga mga teksto. (Juan 14:28; 17:21; 1 Korinto 8:5, 6) Inabat niya nga sugad hin diri na hiya buta ha kamatuoran, matin-aw nga nakikita na niya yana nga hi Jehova—an Maglalarang han langit ngan han tuna ngan an Amay ni Jesu-Kristo—amo an totoo nga Dios.—Isaias 42:8; Jeremias 10:10-12.

Pag-antos—Kay Ano?

An lalaki nga hi Job nag-antos hinduro. Ngatanan han iya mga anak namatay ha usa nga bagyo, ngan nagin kablas hiya. Nag-antos liwat hiya hin usa ka maul-ol nga sakit ngan nag-ilob hin pag-ipit tikang ha iya palso nga kasangkayan. Ha butnga hini ngatanan, hi Job nagyakan hin waray-hunahunaa nga mga pulong. (Job 6:3) Kondi hinsabtan han Dios an mga kahimtang. (Job 35:15) Maaram hiya han aada ha kasingkasing ni Job ngan naghatag han sagdon nga ginkinahanglan ni Job. Binubuhat niya liwat ito ha mga tawo yana nga panahon.

Ha Mozambique, dyes anyos pa la hi Castro han mamatay an iya iroy. Naguol gud hiya. “Kay ano nga kinahanglan hiya mamatay ngan bayaan kami?” nagpakiana hiya. Bisan kon ginpadaku hiya han mahadlukon-ha-Dios nga mga kag-anak, nagupong na hiya yana. Ano an makakaliaw han iya hunahuna ngan kasingkasing? Naliaw hiya ha pagbinasa han usa nga gutiay nga Chichewa nga Biblia ngan pakiistorya mahitungod hito ha iya magurang nga kalalakin-an.

Hinay-hinay nga hinsabtan ni Castro nga namatay an iya iroy, diri tungod han kawaray-hustisya ha bahin han Dios, kondi tungod han napanunod nga pagkadiri-hingpit. (Roma 5:12; 6:23) An saad han Biblia nga pagkabanhaw naghatag ha iya han gidadakui nga kaliawan tungod kay nasantop niya nga an pagkabanhaw amo an surok han iya pagsarig nga makikita niya utro an iya iroy. (Juan 5:28, 29; Buhat 24:15) Makasurubo, paglabay hin upat ka tuig la, namatay an iya amay. Kondi hini nga panahon, mas nakarawat na ni Castro an kamatay han iya amay. Yana, nahigugma hiya kan Jehova ngan maunungon nga ginagamit an iya kinabuhi ha pag-alagad ha Dios. An kalipay nga iya nabilngan naoobserbahan han ngatanan nga nakilala ha iya.

Damu nga mga tawo nga namatayan hin mga hinigugma an nakabiling hin kaliawan ha mga kamatuoran han Biblia nga nakaliaw liwat kan Castro. Sugad han iginpakiana ni Job, an iba nga mga tawo nga nakaeksperyensya hin duro nga kakurian tungod han mga buhat han magraot nga mga tawo napakiana: “Kay ano nga an magraot [“padayon nga,” NW] nabubuhi?” (Job 21:7) Kon namamati gud an mga tawo ha ginsisiring han Dios sugad nga baton ha iya Pulong, nahibabaro hira nga an paagi han Dios ha pagdumara han mga butang para gud ha ira kalugaringon nga kapulsanan.—2 Pedro 3:9.

Hi Barbara, nga nagdaku ha Estados Unidos, waray makaeksperyen sya han mga kangirhat han girra. Kondi nagdaku hiya ha kalibotan diin naggigirra an damu nga mga nasud. An mga sumat mahitungod han makangingirhat nga mga panhitabo han girra adlaw-adlaw nga nababasa ha pahayagan. Durante han iya pag-eskwela, nagupong hiya ha paghibaro mahitungod han mga hitabo ha kasaysayan nga nahitabo ha mga paagi nga baga hin diri maitagna nga daan. Ano an hinungdan hito? Napaid ba an Dios ha nahitatabo? Natoo hiya nga naeksister an Dios, kondi nagbabarubag-o an iya mga pagbati mahitungod ha iya.

Kondi, hinay-hinay nga nagbag-o an panlantaw ni Barbara ha kinabuhi sugad nga resulta han  pakig-upod niya ha mga Saksi ni Jehova. Namati hiya ha ira ngan nag-aram han Biblia ha ira. Tinambong hiya ha mga katirok ha Kingdom Hall. Tinambong pa ngani hiya ha usa han ira daku nga mga kombensyon. Dugang pa, kon may-ada hiya iginpapakiana, naobserbahan niya nga diri magkalainlain nga mga opinyon an iginbabaton ha iya han iba-iba nga mga Saksi. Lugod, magkapariho an mga pagsaysay han mga Saksi tungod kay basado ha Biblia an ira panhunahuna.

Iginpakita han mga Saksi an ebidensya tikang ha Biblia nga an kalibotan iniimpluwensyahan ni Satanas nga Yawa, an magmarando hito, ngan nga ipinapakita hito an iya espiritu. (Juan 14:30; 2 Korinto 4:4; Efeso 2:1-3; 1 Juan 5:19) Ira iginsaysay nga an mga hitabo nga nakawurok kan Barbara igintagna ha Biblia. (Daniel, kapitulo 2, 7, ngan 8) Igintagna ito han Dios tungod kay may-ada hiya abilidad ha pagkita han tidaraon kon karuyag niya. An pipira hito nga mga hitabo ginpahinabo han Dios. An iba iya la igintugot. Iginpakita han mga Saksi kan Barbara nga igintagna liwat han Biblia an mag-opay ngan magraot nga mga hitabo ha aton panahon ngan iginsaysay an kahulogan hito. (Mateo 24:3-14) Iginpakita nira ha iya an mga saad han Biblia mahitungod han bag-o nga kalibotan diin magkakaada katadongan ngan mawawaray na pag-antos.—2 Pedro 3:13; Pahayag 21:3, 4.

Hinay-hinay nga nasabtan ni Barbara nga bisan kon diri hi Jehova nga Dios an responsable han pag-antos han tawo, diri niya pinupugngan ito pinaagi han pagpirit ha mga tawo nga sundon an iya mga sugo kon karuyag nira igbalewaray ito. (Deuteronomio 30:19, 20) Naghimo an Dios hin mga kahikayan nga pinaagi hito mahimo kita mabuhi ha waray kataposan ha kalipayan, kondi gintatagan kita niya hin higayon yana nga ipakita kon magkikinabuhi ba kita uyon ha iya matadong nga mga paagi. (Pahayag 14:6, 7) Nagin determinado hi Barbara nga mahibaro han mga ginkikinahanglan han Dios ngan magkinabuhi uyon hito. Hinkit-an liwat niya ha mga Saksi ni Jehova an klase han gugma nga ginsiring ni Jesus nga magigin pangirilal-an han iya totoo nga mga sumurunod.—Juan 13:34, 35.

Ikaw liwat makakapahimulos han mga tagana nga nakabulig ha iya.

Kinabuhi nga May-ada Kahulogan

Bisan adton baga hin malampuson an kinabuhi bangin mamiling hin mga baton ha mga pakiana nga nakakagupong ha ira. Pananglitan, hi Matthew, usa nga batan-on ha Britanya, pirme naabat hadto hin daku nga hingyap nga makilala an totoo nga Dios ngan mahibaroan an katuyoan han kinabuhi. Namatay an amay ni Matthew han 17 anyos hiya. Katapos hito, naggradwar hi Matthew ha iya kurso ha musika ha usa nga unibersidad. Hito nga panahon naeksperyensyahan niya an nagtutubo nga pag-abat hin kawaray pulos ha iya materyalistiko nga paagi han pagkinabuhi. Binayaan niya an iya panimalay basi mag-ukoy ha Londres, ngan didto nahidabi hiya ha mga droga, mga night club, astrolohiya, espiritismo, ngan Zen nga Budhismo ngan iba pa nga mga pilosopiya—ginbuhat niya ini ngatanan tungod kay namimiling hiya hin makapatagbaw nga paagi han pagkinabuhi. Tungod kay nagin desperado nangamuyo hiya ha daku nga tingog ngadto ha Dios nga buligan hiya nga mabilngan an kamatuoran.

Paglabay hin duha ka adlaw, nakaistorya ni Matthew an maiha na nga sangkay ngan iginsaysay niya an iya kahimtang. Ini nga lalaki nag-aram na kaupod han mga Saksi ni Jehova. Han iginpakita kan Matthew an 2 Timoteo 3:1-5, nahipausa hiya ha pagkahusto gud han pagkasaysay han Biblia mahitungod han kalibotan nga nakapalibot ha aton. Han mabasa niya an Sermon ha Bukid, nabantad hito an iya kasingkasing. (Mateo, kapitulo 5-7) Ha tinikangan, nag-alang hiya tungod kay nakabasa na hiya hin barasahon nga nagpapakaraot ha mga Saksi ni Jehova, kondi ha kataposan nagdesisyon hiya ha pagtambong ha mga katirok ha kahirani nga Kingdom Hall.

Nalipay hi Matthew ha iya hinbatian ngan nagtikang mag-aram ha Biblia kaupod han usa han mga tigurang ha kongregasyon. Waray pag-iha nasantop niya nga an iya hinbabaroan amo an iya ginbibiniling hadto, an baton ha iya nauna nga pag-ampo ngadto ha Dios. Naeksperyensyahan niya an mga kapulsanan samtang iya ginbayaan an mga binuhatan nga diri naruruyagan ni Jehova. Samtang ginpapatubo niya an maopay nga kahadlok ha Dios, napagios hiya nga ipahiuyon an iya kinabuhi ha mga sugo han Dios. Hinbaroan ni Matthew nga an sugad nga kinabuhi may-ada totoo nga kahulogan.—Eklesiastes 12:13.

Diri itinanda na nga daan nga hi Matthew o an iba nga gin-unabi na hini nga artikulo makakabiling hin makapatagbaw nga paagi han kinabuhi. Kondi, hinbaroan nira nga may-ada mahigugmaon nga tagana  hi Jehova nga Dios nga nag-uupod han ngatanan nga malipayon nga nagdidesisyon ha pagsunod han iya mga sugo. (Buhat 10:34, 35) Ito nga katuyoan nag-uupod han kinabuhi nga dayon ha kalibotan nga waray girra, diin waray sakit ngan kagutom—waray na bisan kamatayon. (Isaias 2:4; 25:6-8; 33:24; Juan 3:16) Ito ba an imo karuyag? Kon amo, mahibabaro ka hin dugang pa mahitungod ha pamiling han yawi ha makapatagbaw nga kinabuhi pinaagi han pagtambong ha basado-ha-Biblia nga mga katirok ha Kingdom Hall han mga Saksi ni Jehova. Malipayon nga gindadapit ka nga tumambong.

[Retrato ha pahina 7]

Sinsero nga mag-ampo ha Dios, nga ginagamit an iya personal nga ngaran

[Retrato ha pahina 7]

Pag-admi an Biblia kaupod hadton totoo nga nagtututdo mahitungod han mga sulod hito

[Mga Retrato ha pahina 7]

Tambong ha mga katirok ha Kingdom Hall

[Ginkuhaan han Retrato ha pahina 4]

Hiker: Chad Ehlers/Index Stock Photography