Ano an Kahulogan han Panihapon han Ginoo ha Imo?
Ano an Kahulogan han Panihapon han Ginoo ha Imo?
“Kon hin-o an kumaon hini nga tinapay, ngan uminom hini nga tagayan han Ginoo ha diri kaangayan, magigin tampalasan hiya mahitungod han lawas ngan han dugo han Ginoo.”—1 KORINTO 11:27.
1. Ano an pinakaimportante nga hitabo nga ginplano para han tuig 2003, ngan ano an tinikangan hito?
AN PINAKAIMPORTANTE nga hitabo nga ginplano para han tuig 2003 mahitatabo ha katunod han adlaw ha Abril 16. An mga Saksi ni Jehova magkakatirok hito nga panahon ha pagsaurog han Memoryal han kamatayon ni Jesu-Kristo. Sugad han ipinakita ha nahiuna nga artikulo, gintikangan ni Jesus ini nga pagsaurog, nga tinatawag liwat nga Panihapon han Ginoo, katapos isaurog niya ngan han iya mga apostol an Paskua han Nisan 14, 33 K.P. An mga emblema han Memoryal nga tinapay nga waray libadura ngan pula nga alaksiw nagsisimbolo han waray-sala nga lawas ni Kristo ngan han iya iginbubo nga dugo—an amo la nga halad nga makakaglukat han katawohan tikang ha napanunod nga sala ngan kamatayon.—Roma 5:12; 6:23.
2. Ano nga pahamangno an nakarekord ha 1 Korinto 11:27?
2 Adton nakikiangbit ha mga emblema han Memoryal kinahanglan takos ha pagbuhat hito. Iginpatin-aw ito ni apostol Pablo han hiya nagsurat ha mga Kristiano ha kadaan nga Korinto, diin an Panihapon han Ginoo diri ginsasaurog ha husto nga paagi. (1 Korinto 11:20-22) Hi Pablo nagsurat: “Kon hin-o an kumaon hini nga tinapay, ngan uminom hini nga tagayan han Ginoo ha diri kaangayan, magigin tampalasan hiya mahitungod han lawas ngan han dugo han Ginoo.” (1 Korinto 11:27) Ano an kahulogan hito nga mga pulong?
An Iba Diri-Takos nga Nagsaurog Hito
3. Paonan-o ginios an damu nga mga Kristiano ha Korinto ha mga pagsaurog han Panihapon han Ginoo?
3 Damu nga mga Kristiano ha Korinto an diri-takos nga nakiangbit ha Memoryal. May-ada mga pagkabahinbahin ha butnga nira, ngan usa ka beses, an iba nagdara han ira mga pagkaon para ha panihapon ngan ginkaon ito antes o durante han katirok, agsob nga nakaon ngan nainom hin sobra. Diri hira alerto ha hunahuna man o ha espirituwal. Tungod hini hira nagin ‘tampalasan mahitungod han lawas ngan han dugo han Ginoo.’ Adton waray manihapon, nagutom ngan naulang an atensyon. Oo, damu an nakiangbit nga waray pagtahod ngan bug-os nga pagsabot ha pagkaseryoso han selebrasyon. Diri urusahon nga nagresulta ito hin pagkondenar ha ira!—1 Korinto 11:27-34.
4, 5. Kay ano nga importante an pag-usisa-ha-kalugaringon para hadton kasagaran na nga nakikiangbit han mga emblema han Memoryal?
4 Samtang nagtitikahirani an Memoryal kada tuig, importante an pag-usisa-ha-kalugaringon para hadton nahiara na makiangbit ha mga emblema. Basi makiangbit hin husto hinin gin-aarangbitan nga panihapon, kinahanglan magin mahimsog hira ha espirituwal. Bisan hin-o nga waray pagtahod, nagtatamay pa ngani ha halad ni Jesus mamimeligro nga ‘pabulagon tikang ha katawohan han Dios,’ sugad la han usa nga Israelita nga nakiangbit ha gin-aarangbitan nga panihapon samtang mahugaw an iya kahimtang.—Lebitiko 7:20; Hebreo 10:28-31.
5 Iginpariho ni Pablo an Memoryal ha gin-aarangbitan nga panihapon ha kadaan nga Israel. Iya gin-unabi an mga nakikiangbit kaupod ni Kristo ngan katapos nagsiring: “Diri kamo sadang makainom ha tagayan han Dios, ngan ha tagayan han mga yawa; diri kamo sadang makiangbit ha lamesa han Dios, ngan ha lamesa han mga yawa.” (1 Korinto 10:16-21) Kon an usa ka tawo nga kasagaran na nga nakikiangbit ha mga emblema han Memoryal makasala hin seryoso, sadang isumat niya ini kan Jehova ngan maghangyo liwat han espirituwal nga bulig han mga tigurang ha kongregasyon. (Proberbios 28:13; Jakobo 5:13-16) Kon totoo hiya nga nagbabasol ngan nagpapakita hin mga bunga nga angayan ha pagbasol, takos hiya nga makiangbit hito.—Lukas 3:8.
Natambong Sugad nga Matinalahuron nga mga Paraobserba
6. Para kan kanay igin-andam han Dios an pribilehiyo nga makiangbit ha Panihapon han Ginoo?
6 Sadang ba makiangbit ha Panihapon han Ginoo adton nagbubuhat hin maopay yana ha nanhibilin han 144,000 nga kabugtoan ni Kristo? (Mateo 25:31-40; Pahayag 14:1) Diri. Igin-andam han Dios ito nga pribilehiyo para ha mga indibiduwal nga iya gindihogan han baraan nga espiritu basi magin “mga manurunod upod ni Kristo.” (Roma 8:14-18; 1 Juan 2:20) Ano, kon sugad, an kahimtang hadton naglalaom nga mabuhi ha waray kataposan ha bug-os-kalibotan nga paraiso ilarom han pagmando han Ginhadian? (Lukas 23:43; Pahayag 21:3, 4) Tungod kay diri hira kaupod ni Jesus nga mga manurunod nga may langitnon nga paglaom, natambong hira ha Memoryal sugad nga matinalahuron nga mga paraobserba.—Roma 6:3-5.
7. Kay ano nga an siyahan-siglo nga mga Kristiano maaram nga sadang hira makiangbit ha mga emblema han Memoryal?
7 An totoo nga mga Kristiano ha siyahan nga siglo gindihogan han baraan nga espiritu. Damu ha ira an nakagamit han usa o labaw pa han milagroso nga mga regalo han espiritu, sugad han pagyakan hin magkalainlain nga yinaknan. Salit, diri makuri hadto para ha sugad nga mga indibiduwal nga mahibaro nga hira dinihogan-han-espiritu ngan sadang makiangbit ha mga emblema han Memoryal. Kondi, ha aton panahon, mahibabaroan kon an usa ka tawo dinihogan han espiritu basado ha inspirado nga mga pulong sugad hini: “An ngatanan nga ginmamandoan han espiritu han Dios, ini hira amo an mga anak han Dios. Kay waray kamo makakarawat han espiritu ha pagkauripon liwat ngadto ha kahadlok; kondi nakakarawat kamo han espiritu han pagka-pinakaanak, nga tungod hini nangangaraba kita: Abba, Amay.”—Roma 8:14, 15.
8. Hin-o an ginrirepresentaran han “trigo” ngan han ‘mga banwa’ nga gin-unabi ha Mateo kapitulo 13?
8 Paglabay hin mga siglo, an totoo nga mga dinihogan nagtubo sugad hin “trigo” ha urumhan nga may ‘mga banwa,’ o palso nga mga Kristiano. (Mateo 13:24-30, 36-43) Tikang han dekada han 1870, an “trigo” nakita na hin mas matin-aw, ngan paglabay hin haros usa ka gatos ka tuig an dinihogan nga Kristiano nga mga paramangno ginsumatan: “An mga tigurang . . . sadang maghatag hadton nagkakatirok [para ha Memoryal] hini nga mga kondisyon,—(1) pagtoo ha dugo [ni Kristo]; ngan (2) pagpahinungod ha Ginoo ngan ha pag-alagad ha iya, bisan tubtob ha kamatayon. Katapos hito, sadang dapiton nira an ngatanan nga may-ada hini nga disposisyon ngan nagpahinungod ha pakiangbit ha pagsaurog han kamatayon han Ginoo.”—Studies in the Scriptures, Serye VI, The New Creation, pahina 473. a
Pamiling han ‘Iba nga mga Karnero’
9. Paonan-o iginpatin-aw an pangirilal-an han “daku nga panon” han 1935, ngan paonan-o ini nakaapekto ha iba nga nakikiangbit hadto ha mga emblema han Memoryal?
9 Inabot an panahon, nagtikang isentro han organisasyon ni Jehova an atensyon ha iba, dugang pa ha dinihogan nga mga sumurunod ni Kristo. An usa nga makatirigamnan nga panhitabo may kalabotan hini nahitabo ha kabutngaan han mga dekada han 1930. Antes hito nga panahon, gintagad han katawohan han Dios an “daku nga panon” han Pahayag 7:9 (NW) sugad nga ikaduha nga espirituwal nga klase nga makakaupod han 144,000 nga binanhaw nga mga dinihogan ha langit—pariho han mga uray nga kaupod han nobya ni Kristo. (Salmo 45:14, 15; Pahayag 7:4; 21:2, 9) Kondi han Mayo 31, 1935, ha usa nga diskurso ha kombensyon han mga Saksi ni Jehova ha Washington, D.C., E.U.A., iginsaysay tikang ha Kasuratan nga an “daku nga panon” (“daku nga kadam-an,” King James Version) amo an ‘iba nga mga karnero’ nga buhi durante han panahon han kataposan. (Juan 10:16) Katapos hito nga kombensyon, an iba nga nakiangbit hadto ha mga emblema han Memoryal inundang ha pakiangbit tungod kay nasabtan nira nga tunan-on an ira paglaom, diri langitnon.
10. Paonan-o mo isasaysay an paglaom ngan mga responsabilidad han ‘iba nga mga karnero’ yana nga panahon?
10 Labi na tikang han 1935 nga ginbibiling adton ‘iba nga mga karnero,’ nga natoo ha lukat, nagdedikar han ira kalugaringon ngadto ha Dios, ngan nasuporta ha ‘gutiay nga panon’ ha pagsangyaw-han-Ginhadian nga buruhaton. (Lukas 12:32) Inin iba nga mga karnero naglalaom nga mabuhi ha tuna ha waray kataposan, kondi ha ngatanan iba nga mga paagi, pariho hira han nanhibilin han mga manurunod han Ginhadian yana nga panahon. Pariho han mga humarapit han kadaan nga Israel nga nagsingba kan Jehova ngan nagpasakop ha Balaud, an iba nga mga karnero yana nga panahon nakarawat han Kristiano nga mga responsabilidad, sugad han pagsangyaw han maopay nga sumat upod han mga membro han espirituwal nga Israel. (Galasia 6:16) Kondi, sugad la nga an humarapit diri mahimo magin hadi o saserdote han Israel, inin iba nga mga karnero diri liwat mahimo magmando ha langitnon nga Ginhadian o mag-alagad sugad nga mga saserdote.—Deuteronomio 17:15.
11. Kay ano nga an petsa han bawtismo han usa nga tawo may-ada epekto ha iya paglaom?
11 Salit, han dekada han 1930, nagtitikatin-aw ito nga, ha kabug-osan, napili na an langitnon nga klase. Mga setenta ka tuig na yana nga ginbibiling an iba nga mga karnero, nga may-ada tunan-on nga paglaom. Kon an usa nga dinihogan napapamatud-an nga diri matinumanon, posible nga tatawagon an usa ka tawo nga maiha na nga nag-aalagad nga matinumanon ha Dios sugad nga usa han iba nga mga karnero basi sumaliwan ha nawara dida ha 144,000.
Kon Kay Ano nga an Iba Sayop nga Naghuhunahuna nga May-ada Hira Langitnon nga Paglaom
12. Ilarom han ano nga mga kahimtang sadang umundang an usa ka tawo ha pakiangbit ha mga emblema han Memoryal, ngan kay ano?
12 An dinihogan nga mga Kristiano bug-os nga sigurado nga may-ada hira han langitnon nga pagtawag. Kondi ano man kon an iba nga mga indibiduwal nga waray hinin langitnon nga pagtawag nakikiangbit ha mga emblema han Memoryal? Yana nga maaram na hira nga waray gud hira han langitnon nga paglaom, sigurado nga an ira konsensya magpapagios ha ira nga umundang ha pakiangbit. Diri uuyonan han Dios an bisan hin-o nga nagrirepresentar han iya kalugaringon sugad nga tawo nga tinawag nga magin langitnon nga hadi ngan saserdote kon maaram na hiya nga waray gud hiya hito nga pagtawag. (Roma 9:16; Pahayag 20:6) Ginpatay ni Jehova an Lebihanon nga hi Kore tungod han pagbuot-buot ha pagtinguha han Aaroniko nga pagkasaserdote. (Eksodo 28:1; Numeros 16:4-11, 31-35) Kon an bisan hin-o nga Kristiano nakakasabot nga sayop nga nakikiangbit hiya ha mga emblema han Memoryal, sadang hiya umundang ha pakiangbit ngan mapainubsanon nga mag-ampo para han pagpasaylo ni Jehova.—Salmo 19:13.
13, 14. Kay ano nga an iba bangin sayop nga maghunahuna nga may-ada hira han langitnon nga pagtawag?
13 Kay ano nga bangin sayop nga hunahunaon han iba nga may-ada hira han langitnon nga pagtawag? An kamatay han usa nga padis o iba nga trahedya bangin magwara han ira interes ha kinabuhi dinhi ha tuna. O bangin maghingyap hira han langitnon nga paglaom kon an usa nga duok nga sangkay nagpapahayag nga usa hiya nga dinihogan nga Kristiano. Siyempre, an Dios waray magtoka ha bisan hin-o nga magdasig ha iba para hini nga pribilehiyo. Ngan diri niya gindidihogan an mga manurunod han Ginhadian pinaagi han pagpahinabo nga makabati hira hin mga tingog nga may-ada mga mensahe nga nagpaparig-on hito nga pagdihog.
14 Tungod han ideya han palso nga relihiyon nga an ngatanan nga mag-opay nga mga tawo napakadto ha langit, bangin maghunahuna an iba nga may-ada hira han langitnon nga pagtawag. Salit, kinahanglan magbantay kita nga diri kita maimpluwensyahan han sayop nga mga panhunahuna hadto o han iba nga mga butang. Pananglitan, an iba bangin magpakiana ha ira kalugaringon: ‘Nagamit ba ako hin medisina nga nakakaapekto han akon mga emosyon? Emosyonal ba ako hinduro salit bangin sayop nga naghuhunahuna nga usa ako nga dinihogan?’
15, 16. Kay ano nga an iba bangin sayop nga maghunahuna nga mga dinihogan hira?
15 An iba mahimo magpakiana ha ira kalugaringon: ‘Karuyag ko ba magin prominente? Naghihingyap ba ako hin awtoridad yana o sugad nga tidaraon nga igkasi-manurunod upod ni Kristo?’ Han gintawag an mga manurunod han Ginhadian ha siyahan nga siglo, diri ngatanan ha ira may-ada responsable nga mga katungdanan ha kongregasyon. Ngan an mga indibiduwal nga may-ada langitnon nga pagtawag diri nangangalimbasog nga magin prominente o naghahambog han pagin dinihogan. Ira ipinapakita an pagpaubos nga ginlalaoman ha mga may-ada han “hunahuna ni Kristo.”—1 Korinto 2:16.
16 An iba bangin maghunahuna nga may-ada hira langitnon nga pagtawag tungod kay damu na an ira kahibaro ha Biblia. Kondi an pagdihog han espiritu diri nagriresulta hin labaw-ha-ordinaryo nga pagsabot, kay kinahanglan nga tutdoan ngan sagdonan ni Pablo an pipira nga mga dinihogan. (1 Korinto 3:1-3; Hebreo 5:11-14) An Dios may-ada kahikayan ha pagtagana hin espirituwal nga pagkaon para ha ngatanan nga iya katawohan. (Mateo 24:45-47) Salit waray bisan hin-o nga sadang maghunahuna nga an pagin dinihogan nga Kristiano naghahatag ha iya hin kinaadman nga hitaas kay ha kinaadman hadton may-ada tunan-on nga paglaom. An pagdihog han espiritu diri nakikita ha pagin maabtik ha pagbaton ha mga pakiana ha Kasuratan, pagpamatuod, o pagpahayag tikang ha Biblia. An iba nga mga Kristiano nga may-ada tunan-on nga paglaom kuwalipikado liwat hini nga mga bahin.
17. An pagdihog han espiritu nadepende ha ano ngan kan kanay?
17 Kon an usa nga igkasi-tumuroo nagpapakiana mahitungod han langitnon nga pagtawag, an usa nga tigurang o iba nga hamtong nga Kristiano mahimo maghisgot hito nga butang ha iya. Kondi, an usa nga tawo diri makakadesisyon hini para ha iba. An tawo nga totoo nga may-ada hini nga pagtawag diri na kinahanglan magpakiana ha iba kon may-ada hiya han sugad nga paglaom. An mga dinihogan ‘ipinanganak na liwat, diri ha binhi nga madinunuton, kondi ha diri madinunuton, pinaagi han pulong han Dios nga nabubuhi ngan nagpapadayon.’ (1 Pedro 1:23) Pinaagi han iya espiritu ngan Pulong, igintatanom han Dios an ‘binhi’ nga nakakahimo han indibiduwal nga ‘usa nga bag-o nga binuhat,’ nga may-ada langitnon nga paglaom. (2 Korinto 5:17) Ngan hi Jehova an nagpipili. An pagdihog ‘nadepende, diri ha iya nga nagbubuot, bisan ha iya nga nadalagan, kondi ha Dios.’ (Roma 9:16) Salit paonan-o makakasiguro an tawo nga may-ada hiya langitnon nga pagtawag?
Kon Kay Ano nga Kombinsido Hira
18. Paonan-o an espiritu han Dios nagtitestigo upod han espiritu han mga dinihogan?
18 An pagtestigo han espiritu han Dios nagkukombinse ha dinihogan nga mga Kristiano nga hira may-ada langitnon nga paglaom. “Nakakarawat kamo han espiritu han pagkapinakaanak,” nagsurat hi Pablo, “nga tungod hini nangaraba kita: Abba, Amay.” An espiritu mismo nagtitestigo upod ha aton espiritu, nga mga anak kita han Dios. Ngan kon kita mga anak, mga manurunod man; mga manurunod han Dios, ngan sugad man mga manurunod upod ni Kristo; kon ha pagkamatuod nag-aantos kita upod ha iya, basi nga paghimayaon man kita upod niya.” (Roma 8:15-17) Pinaagi han impluwensya han baraan nga espiritu, an espiritu, o marig-on nga disposisyon han mga dinihogan nagpapagios ha ira nga iaplikar ha ira kalugaringon an ginsisiring han Kasuratan mahitungod han espirituwal nga mga anak ni Jehova. (1 Juan 3:2) An espiritu han Dios naghahatag ha ira hin pag-abat han pagin anak niya ngan nagbubunga ha ira hin naiiba nga paglaom. (Galasia 4:6, 7) Oo, makaruruyag hinduro an tunan-on nga kinabuhi nga waray kataposan sugad nga hingpit nga mga tawo nga kaupod han mga membro han pamilya ngan kasangkayan, kondi diri ito an hatag-han-Dios nga paglaom para ha ira. Pinaagi han iya espiritu, ginpapatubo han Dios ha ira an sugad nga marig-on nga paglaom ha langit, salit disidido hira nga isakripisyo an ngatanan nga tunan-on nga mga relasyon ngan mga higayon.—2 Korinto 5:1-5, 8; 2 Pedro 1:13, 14.
19. Ano an nahimo han bag-o nga kauyonan ha kinabuhi han dinihogan nga mga Kristiano?
19 Sigurado an dinihogan nga mga Kristiano han ira langitnon nga paglaom, han pagdad-a ha ira ha bag-o nga kauyonan. Gin-unabi ito ni Jesus han gintikangan niya an Memoryal ngan nagsiring: “Ini nga irinman amo an [“nangangahulogan han,” NW] bag-o nga testamento han akon dugo, nga iginbisibis tungod ha iyo.” (Lukas 22:20) An mga kaapi han bag-o nga testamento o kauyonan amo an Dios ngan an mga dinihogan. (Jeremias 31:31-34; Hebreo 12:22-24) Hi Jesus an manlalaban. Tungod kay nagtikang gumios pinaagi han iginbubo nga dugo ni Kristo, an bag-o nga kauyonan nagkuha diri la tikang ha mga Judio, kondi tikang liwat ha mga nasud, hin katawohan para ha ngaran ni Jehova ngan ginhimo hira nga bahin han ‘binhi’ ni Abraham. (Galasia 3:26-29; Buhat 15:14) Tungod hinin ‘waray kataposan nga kauyonan,’ an ngatanan nga espirituwal nga mga Israelita babanhawon ngadto ha diri-mamaratyon nga kinabuhi ha langit.—Hebreo 13:20.
20. An mga dinihogan gindara ngadto ha ano nga kauyonan upod ni Kristo?
20 Sigurado an mga dinihogan han ira paglaom. Gindara hira ngadto ha dugang nga kauyonan, an kauyonan para ha Ginhadian. Mahitungod han ira pakiangbit upod ni Kristo, hi Jesus nagsiring: “Kamo amo an mga iginkakaupod nakon han ako ginpipinanulay; ngan ako nahatag ha iyo hin ginhadian, sugad han akon Amay nga naghatag hin ginhadian ha akon.” (Lukas 22:28-30) Ini nga kauyonan butnga ni Kristo ngan han iya kaupod nga mga hadi nagpapadayon ha waray kataposan.—Pahayag 22:5.
Panahon han Memoryal—Binendisyonan nga Panahon
21. Paonan-o naton makakarawat an daku nga kapulsanan tikang ha panahon han Memoryal?
21 Damu an mga bendisyon ha panahon han Memoryal. Makakapahimulos kita ha pagbasa han Biblia nga igin-eskedyol para hini nga panahon. Angayan liwat ito nga panahon para ha pag-ampo, ha pamalandong han tunan-on nga kinabuhi ngan kamatayon ni Jesus, ngan ha pakigbahin ha pagsangyaw-han-Ginhadian nga buruhaton. (Salmo 77:12; Filipos 4:6, 7) An pagsaurog mismo nagpapahinumdom ha aton han gugma nga ipinakita han Dios ngan ni Kristo may kalabotan han halad lukat ni Jesus. (Mateo 20:28; Juan 3:16) Ini nga tagana naghahatag ha aton hin paglaom ngan pagliaw ngan sadang magparig-on han aton determinasyon nga igpadayon an sugad-Kristo nga pagkinabuhi. (Eksodo 34:6; Hebreo 12:3) An Memoryal sadang magparig-on liwat ha aton nga tumanon an aton dedikasyon sugad nga mga surugoon han Dios ngan magin maunungon nga mga sumurunod han iya hinigugma nga Anak.
22. Ano an gidadakui nga regalo han Dios ha katawohan, ngan ano an usa nga paagi ha pagpakita hin apresasyon para hito?
22 Mag-opay gud an mga regalo nga iginhahatag ha aton ni Jehova! (Jakobo 1:17) May-ada kita han giya han iya Pulong, han bulig han iya espiritu, ngan han paglaom nga kinabuhi nga waray kataposan. An gidadakui nga regalo han Dios amo an halad ni Jesus para han mga sala han mga dinihogan ngan para han ngatanan nga iba pa nga nagbubuhat hin pagtoo. (1 Juan 2:1, 2) Salit mationan-o kadaku an kahulogan han kamatayon ni Jesus ha imo? Usa ka ba hadton magpapakita hin pagpasalamat para hito pinaagi han pagtambong ha katirok ha katunod han adlaw ha Abril 16, 2003, ha pagsaurog han Panihapon han Ginoo?
[Footnote]
a Iginpublikar han mga Saksi ni Jehova kondi waray na inimprinta yana.
Ano an Imo mga Baton?
• Hin-o an sadang makiangbit ha mga emblema han Memoryal?
• Kay ano nga an ‘iba nga mga karnero’ natambong ha Panihapon han Ginoo sugad nga matinalahuron nga mga paraobserba la?
• Paonan-o nahibaro an dinihogan nga mga Kristiano nga sadang hira makiangbit ha tinapay ngan alaksiw ha Memoryal han kamatayon ni Kristo?
• An panahon han Memoryal amo an angayan nga panahon para han ano?
[Mga Pakiana]
[Graph/Mga Retrato ha pahina 18]
(Para ha aktuwal nga format, kitaa an publikasyon)
Tinambong ha Memoryal
HA MINILYON
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Retrato ha pahina 18]
Matambong ka ba ha Panihapon han Ginoo hini nga tuig?
[Mga Retrato ha pahina 21]
An panahon han Memoryal amo an angayan nga panahon para han dugang nga pagbasa han Biblia ngan pakigbahin ha pagsangyaw-han-Ginhadian nga buruhaton