Kapitulo Dyes

“Usa ka Panahon han Maopay nga Kaburut-on”

Isaias 49:1-26

1, 2. (a) Ano nga bendisyon an ginpahimulosan ni Isaias? (b) Hin-o an nahidadabi ha matagnaon nga mga pulong nga nakarekord ha siyahan nga katunga han Isaias kapitulo 49?

 MAIHA na nga ginpapahimulsan han matinumanon nga mga tawo an pag-uyon ngan panalipod han Dios. Kondi an maopay nga kaburut-on ni Jehova diri basta la nga iginpapaabot niya. An usa nga tawo kinahanglan magin kuwalipikado ha sugad nga waray-kapariho nga bendisyon. Hi Isaias usa nga nagin kuwalipikado hito. Nagpahimulos hiya han pag-uyon han Dios ngan ginamit ni Jehova sugad nga instrumento basi ipahibaro ha iba an Iya kaburut-on. An usa nga ehemplo hini nakarekord ha siyahan nga katunga han kapitulo 49 han tagna ni Isaias.

² Ini nga mga pulong matagnaon nga iginpapaabot ha binhi ni Abraham. Ha siyahan nga katumanan, ito nga binhi amo an nasud han Israel, nga nagtikang kan Abraham. Kondi, an kadam-an han mga pagsaysay matin-aw nga naaplikar ha maiha-na-nga-ginlalaoman nga Binhi ni Abraham, an iginsaad nga Mesias. An giniyahan nga mga pulong naaplikar liwat ha espirituwal nga kabugtoan han Mesias, nga nagigin bahin han espirituwal nga binhi ni Abraham ngan han ‘Israel han Dios.’ (Galasia 3:7, 16, 29; 6:16) Espisipiko nga iginhuhulagway hini nga bahin han tagna ni Isaias an espesyal nga relasyon ni Jehova ngan han iya hinigugma nga Anak, hi Jesu-Kristo.—Isaias 49:26.

Pinili Ngan Ginpapanalipdan ni Jehova

3, 4. (a) May-ada ano nga suporta an Mesias? (b) Kan kanay nakikiistorya an Mesias?

³ Ginpapahimulsan han Mesias an maopay nga kaburut-on ngan pag-uyon han Dios. Gintagan hiya ni Jehova hin awtoridad ngan mga kredensyal nga ginkikinahanglan ha pagtuman han iya misyon. Angayan la, kon sugad, nga an tiarabot nga Mesias nagsiring: “Pamati ha akon, O mga purô; ngan pamati, kamo mga katawohan, tikang ha kahigrayoan: hi Jehova nagtawag ha akon tikang ha tagoangkan; tikang ha ginhawa han akon iroy nginmaran hiya han akon ngaran.”—Isaias 49:1.

⁴ Para ha katawohan tikang ha “kahigrayoan” an ginsiring dinhi han Mesias. Bisan kon an Mesias iginsaad ha mga Judio, an iya ministeryo magigin bendisyon ha ngatanan nga mga nasud. (Mateo 25:31-33) An “mga purô” ngan an “mga katawohan,” bisan kon waray kauyonan kan Jehova, sadang mamati ha Mesias han Israel tungod kay ginsugo hiya basi luwason an ngatanan nga katawohan.

 5. Paonan-o ginhatagan hin ngaran an Mesias bisan antes pa hiya igpanganak sugad nga tawo?

⁵ An tagna nasiring nga ngangaranan ni Jehova an Mesias antes hiya igpanganak sugad nga tawo. (Mateo 1:21; Lukas 1:31) Maiha pa antes hiya matawo, hi Jesus ginngaranan nga “Urusahon nga Magsaragdon, Makagarahum nga Dios, Waray-kataposan nga Amay, Prinsipe han Kamurayawan.” (Isaias 9:6, NW) An Imanuel, nga posible amo an ngaran han anak nga lalaki ni Isaias, nagin matagnaon liwat nga ngaran han Mesias. (Isaias 7:14; Mateo 1:21-23) Bisan an iginhatag nga ngaran nga pinaagi hito makikilala an Mesias—Jesus—igintagna antes hiya matawo. (Lukas 1:30, 31) Ini nga ngaran tikang ha Hebreo nga pulong nga nangangahulogan “Hi Jehova an Kaluwasan.” Matin-aw, waray maglugaring hi Jesus ha pagpili han iya kalugaringon nga magin Kristo.

 6. Ha ano nga paagi pariho hin matarom nga espada an baba han Mesias, ngan paonan-o hiya gintago?

⁶ An matagnaon nga mga pulong han Mesias nagpapadayon: “Ngan ginhimo niya an akon  baba sugad hin matarom nga kampilan; ha lambong han iya kamot iya ako gintago: ngan iya ako ginhimo nga udyong nga kinilkigan; ha iya andulan ako tinakpan.” (Isaias 49:2) Han inabot an panahon para ha Mesias ni Jehova ha pagtikang han iya ministeryo ha tuna han 29 K.P., an mga pulong ngan mga panggawi ni Jesus napamatud-an gud nga pariho hin matarom, binaid nga mga hinganiban, nga nakakadulot ha mga kasingkasing han iya mga mamarati. (Lukas 4:31, 32) An iya mga pulong ngan mga buhat nakaaghat han kasina han daku nga kaaway ni Jehova, hi Satanas, ngan han iya mga ahente. Tikang han katawo ni Jesus, nagsari hi Satanas pagpatay ha Iya, kondi hi Jesus pariho hin udyong nga nakatago ha burutangan hito ni Jehova. a May pagsarig nga makakalaom hiya han panalipod han iya Amay. (Salmo 91:1; Lukas 1:35) Ha itinanda nga panahon, iginhatag ni Jesus an iya kinabuhi tungod ha katawohan. Kondi maabot an panahon nga hiya magawas sugad nga gamhanan nga langitnon nga girriro nga armado ha naiiba nga kahulogan, nga may matarom nga espada nga nagawas ha iya baba. Hini nga panahon, an matarom nga espada nagrirepresentar ha awtoridad ni Jesus ha pagpahayag ngan pagpadapat han mga paghukom kontra ha mga kaaway ni Jehova.—Pahayag 1:16.

Diri kay Waray Kapulsanan an mga Pangalimbasog han Surugoon han Dios

 7. Kan kanay naaplikar an mga pulong ha Isaias 49:3, ngan kay ano?

⁷ Yana hi Jehova nagyakan hinin matagnaon nga mga pulong: “Ikaw akon surugoon; Israel, kan kanay ako paghihimayaa.” (Isaias 49:3) Gin-unabi ni Jehova an nasud han Israel sugad nga iya surugoon. (Isaias 41:8) Kondi hi Jesu-Kristo an nangunguna nga Surugoon han Dios. (Buhat 3:13) Waray mga linarang han Dios an makakagpakita han ‘himaya’ ni Jehova hin mas maopay pa kay ha kan Jesus. Salit, bisan kon literal nga iginpahayag ha Israel, ini nga mga pulong tinuod nga naaplikar kan Jesus.—Juan 14:9; Kolosas 1:15.

 8. Paonan-o gintagad an Mesias han iya mga igkasi-Israelita, kondi hin-o an ginlalaoman han Mesias nga maghuhukom han iya kalamposan?

⁸ Kondi, diri ba totoo nga hi Jesus gintamay ngan iginsalikway han kadam-an han iya mga igkasi-Israelita? Oo. Ha kabug-osan, hi Jesus waray karawata han nasud han Israel sugad nga dinihogan nga Surugoon han Dios. (Juan 1:11) Para ha iya mga kadungan-dungan, an ngatanan nga nabuhat ni Jesus han nakanhi pa hiya ha tuna baga in gutiay la an bili, waray pa ngani pulos. Inin baga hin kapakyasan ha iya ministeryo amo an sunod nga gin-unabi han Mesias: “Ako nagkabudlay ha kawang, ako naggamit han akon kusog ha waray kapulsanan ngan ha parayaw.” (Isaias 49:4a) Waray ipahayag ini nga mga pulong tungod kay nawawad-an hin paglaom an Mesias. Tagda an sunod nga iya ginsiring: “An kasubayan nga para ha akon aada kan Jehova, ngan an akon balos aada ha akon Dios.” (Isaias 49:4b) An kalamposan han Mesias paghuhukman, diri han mga tawo, kondi han Dios.

9, 10. (a) Ano an sugo ni Jehova ha Mesias, ngan ano nga mga resulta an iya nadangat? (b) Paonan-o an mga Kristiano yana madadasig han mga eksperyensya han Mesias?

⁹ Hi Jesus interesado labi na ha pag-uyon, o maopay nga kaburut-on han Dios. Ha tagna, an Mesias nagsiring: “Yana nasiring hi Jehova nga naghitsura ha akon tikang ha tagoangkan ha pagkaiya surugoon, ha pagdara kan Jakob liwat ngadto ha iya, ngan nga an Israel tirukon ngada ha iya kay ako dungganan ha mga mata ni Jehova, ngan an akon Dios nahimo nga akon kusog.” (Isaias 49:5) Inabot an Mesias basi pabalikon an mga kasingkasing han mga anak ni Israel ngadto ha ira langitnon nga Amay. An kadam-an waray gumios, kondi an iba ginios. Kondi, an totoo nga balos ha iya aada kan Jehova nga Dios. An iya kalamposan ginsusukol, diri sumala ha panhunahuna han tawo, kondi sumala ha mga suruklan ni Jehova.

 ¹⁰ Yana, posible nga inaabat usahay han mga sumurunod ni Jesus nga sugad hin waray pulos an ira pagbudlay. Ha iba nga mga lugar, an resulta han ira ministeryo baga hin gutiay la kon itanding ha kadaku han trabaho ngan pangalimbasog nga ginhimo. Ha gihapon, nagpapailob hira, nadadasig han susbaranan ni Jesus. Nadadasig liwat hira han mga pulong ni apostol Pablo, nga nagsurat: “Busa, mga hinigugma ko nga mga kabugtoan, magrig-on kamo, nga diri sadang mabantad, nga magpadayon kamo gihapon ha buruhaton han Ginoo, kay hinbaroan niyo nga an iyo kabudlay tungod ha Ginoo diri waray kapulsanan.”—1 Korinto 15:58.

“Sugâ han mga Hentil”

11, 12. Paonan-o an Mesias nagin “sugâ han mga Hentil”?

¹¹ Ha tagna ni Isaias, gindadasig ni Jehova an Mesias pinaagi han pagpahinumdom ha iya nga an pagin Surugoon han Dios diri “magaan hinduro nga butang.” Kinahanglan buhaton ni Jesus an “pagpabangon han mga tulin ni Jakob ngan [an] pagpahiuli han mga hinungay han Israel.” Hi Jehova dugang nga nagsaysay: “Akon ka liwat ihahatag nga sugâ han mga Hentil, nga ikaw maakon kaluwasan ngadto ha kataposan han tuna.” (Isaias 49:6) Paonan-o ginlalamragan ni Jesus an mga tawo “ngadto ha kataposan han tuna” nga an iya ministeryo ha tuna limitado la ha Israel?

¹² Ipinapakita han rekord ha Biblia nga an kanan Dios “sugâ han mga Hentil” waray maparong han pagbaya ni Jesus ha tuna. Mga 15 ka tuig katapos mamatay hi Jesus, an mga misyonero nga hira Pablo ngan Bernabe nagkotar han tagna ha Isaias 49:6 ngan igin-aplikar ito ha mga disipulo ni Jesus, an iya espirituwal nga kabugtoan. Hira nagsaysay: “Amo ini an iginsugo ha amon han Ginoo: Iginbutang ko ikaw nga kalamrag ha mga Hentil, basi ikaw [magin kaluwasan] tubtob ha sidsid han tuna.” (Buhat 13:47) Antes hiya mamatay, nakita ni Pablo nga an maopay nga sumat mahitungod han kaluwasan iginsasangyaw na diri la ha mga Judio kondi “ha ngatanan nga mga binuhat ha ilarom han langit.” (Kolosas 1:6, 23) Yana, ini nga buruhaton iginpapadayon han nanhibilin han dinihogan nga kabugtoan ni Kristo. Pinaagi han suporta han “daku nga panon” nga minilyon na yana an kadamu, nag-aalagad hira sugad nga “sugâ han mga Hentil” ha sobra 230 nga katunaan ha bug-os nga kalibotan.—Pahayag 7:9, NW.

13, 14. (a) Ano nga reaksyon ha pagsangyaw nga buruhaton an naeksperyensyahan han Mesias ngan han iya mga sumurunod? (b) Ano nga pagbag-o han mga kahimtang an nahitabo?

¹³ Napamatud-an gud nga hi Jehova an nagpapakusog ha iya Surugoon nga an Mesias, ha dinihogan nga kabugtoan han Mesias, ngan ha ngatanan nga membro han daku nga panon nga kaupod nira nga nagpapadayon han buruhaton nga pagsangyaw han maopay nga sumat. Totoo, pariho kan Jesus, an iya mga disipulo naatubang hin pagtamay ngan pagtimaraot. (Juan 15:20) Kondi ha iya itinanda nga panahon, pirme ginpapahinabo ni Jehova an pagbag-o han mga kahimtang basi talwason ngan balosan an iya maunungon nga mga surugoon. Mahitungod ha Mesias, nga “kanan tawo gintamay” ngan “kanan nasud ikinangangalas,” hi Jehova nagsasaad: “An kahadian makita ngan mabangon; an mga prinsipe, ngan hira magsisingba; tungod kan Jehova nga matinumanon, bisan an Baraan nga Usa ha Israel, nga nagpili ha imo.”—Isaias 49:7.

¹⁴ Ha urhi, hi apostol Pablo nagsurat ha mga Kristiano ha Filipos mahitungod hinin igintagna nga pagbag-o han mga kahimtang. Iya iginhulagway hi Jesus sugad nga usa nga gintamay ha pasakitan nga kahoy kondi ginpahitaas han Dios pagkatapos. Gintagan ni Jehova an iya Surugoon hin “hitaas nga katungdanan ngan may pagkabuotan nga iginhatag ha iya an ngaran nga mas hitaas kay ha ngatanan nga iba nga ngaran, basi ha ngaran ni Jesus an tagsa nga tuhod lumuhod.” (Filipos 2:8-11, NW) Ginpahamangnoan an matinumanon nga mga sumurunod ni Kristo nga hira liwat pagtitimarauton. Kondi pariho ha Mesias, makakasarig hira han maopay nga kaburut-on ni Jehova.—Mateo 5:10-12; 24:9-13; Markos 10:29, 30.

“An Panahon nga Makaruruyag”

15. Ano nga espesyal nga “panahon” an gin-unabi ha tagna ni Isaias, ngan ano an iginpapasabot hini?

¹⁵ An tagna ni Isaias nagpapadayon pinaagi han mga pulong nga importante gud. Hi Jehova nagsiring ha Mesias: “Ha usa ka panahon han maopay nga kaburut-on binaton ko ikaw, ngan ha  usa ka adlaw han kaluwasan akon ka binuligan; ngan ako padayon nga nagpanalipod ha imo basi maihatag ka sugad nga usa nga kauyonan para ha katawohan.” (Isaias 49:8a, NW) An kapariho nga tagna nakarekord ha Salmo 69:13-18. Gin-unabi han salmista an “usa ka panahon han maopay nga kaburut-on,” ginagamit an ekspresyon nga “takna nga angay karawaton.” Iginpapasabot hini nga mga pulong nga an maopay nga kaburut-on ngan panalipod ni Jehova iginpapadayon ha espesyal nga paagi kondi durante la han usa ka espisipiko ngan temporaryo nga panahon.

16. Ano an panahon han maopay nga kaburut-on ni Jehova para ha kadaan nga Israel?

¹⁶ Kakan-o ito nga panahon han maopay nga kaburut-on? Ha orihinal nga kahimtang, an mga pulong bahin han tagna mahitungod ha pagpahiuli ngan nagtagna han pagbalik han mga Judio tikang ha pagkabihag. An nasud han Israel nakaeksperyensya hin usa ka panahon han maopay nga kaburut-on han ira nahimo an “pagpabangon han tuna” ngan nabawi an ira “panurundon nga nagkabubungkag.” (Isaias 49:8b) Diri na hira “mga ginapos” ha Babilonya. Durante han ira pagbiyahe tipauli, ginsiguro ni Jehova nga hira diri “gugutumon” o “uuhawon,” waray bisan ano nga “kapaso o diri man an adlaw mahampak ha ira.” An nagpatlaag nga mga Israelita urupod nga binalik ha ira tuna nga natawohan “tikang ha kahigrayoan; . . . tikang ha amihanan, ngan tikang ha katundan.” (Isaias 49:9-12) Bisan pa hinin siyahan nga makatirigamnan nga katumanan, ipinapakita han Biblia nga may-ada dugang pa nga mga aplikasyon hini nga tagna.

17, 18. Ano nga panahon han maopay nga kaburut-on an ginpili ni Jehova durante han siyahan nga siglo?

¹⁷ Siyahan, durante han katawo ni Jesus, an mga anghel nagpasamwak han kamurayawan ngan maopay nga kaburut-on, o pag-uyon han Dios ha katawohan. (Lukas 2:13, 14) Ini nga maopay nga kaburut-on igintanyag, diri ha katawohan ha kabug-osan, kondi para la hadton natoo kan Jesus. Ha urhi, ginbasa ni Jesus ha publiko an tagna ha Isaias 61:1, 2 ngan igin-aplikar ito ha iya kalugaringon sugad nga an parasamwak han “makaruruyag nga tuig han Ginoo.” (Lukas 4:17-21) Gin-unabi ni apostol Pablo nga kinarawat ni Kristo an espesyal nga panalipod ni Jehova durante han panahon nga unudnon pa hiya. (Hebreo 5:7-9) Salit ini nga panahon han maopay nga kaburut-on naaplikar ha pag-uyon han Dios kan Jesus durante han iya bug-os nga kinabuhi sugad nga tawo.

¹⁸ Kondi, may-ada dugang pa nga aplikasyon hini nga tagna. Katapos unabihon an mga pulong ni Isaias mahitungod han panahon han maopay nga kaburut-on, hi Pablo padayon nga nagsiring: “Kitaa, amo na niyan an panahon nga makaruruyag; kitaa, amo na niyan an adlaw han kaluwasan.” (2 Korinto 6:2) Iginsurat ini ni Pablo 22 ka tuig katapos mamatay hi Jesus. Matin-aw nga han magtikang an Kristiano nga kongregasyon ha Pentekostes han 33 K.P., iginpadayon ni Jehova an iya tuig han maopay nga kaburut-on basi mahiupod an dinihogan nga mga sumurunod ni Jesus.

19. Paonan-o magpapahimulos an mga Kristiano yana ha panahon han maopay nga kaburut-on ni Jehova?

¹⁹ Kumusta man an mga sumurunod ni Jesus yana nga diri dinihogan sugad nga mga manurunod han langitnon nga ginhadian han Dios? Adton tunan-on an paglaom magpapahimulos ba hinin makaruruyag nga panahon? Oo. An libro nga Pahayag ha Biblia nagpapakita nga ini an panahon han maopay nga kaburut-on ni Jehova para ha daku nga panon nga magkakagawas “tikang ha daku nga kagol-anan” basi magpahimulos han kinabuhi ha paraiso nga tuna. (Pahayag 7:13-17) Salit, mahimo salingabuton han ngatanan nga Kristiano inin limitado nga panahon nga durante hito iginhahatag ni Jehova an iya maopay nga kaburut-on ha diri hingpit nga mga tawo.

20. Ha ano nga paagi malilikyan han mga Kristiano nga diri mapahimulsan an katuyoan han diri-takos nga pagkabuotan ni Jehova?

²⁰ Antes ipasamwak ni apostol Pablo an makaruruyag nga panahon ni Jehova, nagpahamangno anay hiya. Nanginyupo hiya ha mga Kristiano nga “diri karawaton an diri-takos nga pagkabuotan han Dios ngan bumulag ha katuyoan hito.” (2 Korinto 6:1, NW) Salit, ginsasalingabot han mga Kristiano an tagsa nga higayon ha pagpalipay ha Dios ngan pagbuhat han iya kaburut-on. (Efeso 5:15, 16) Para ha ira kaopayan kon ira susundon an sagdon ni Pablo: “Magtagam kamo, mga kabugtoan, bangin may maada usa dida ha iyo nga may maraot nga kasingkasing nga diri matinoohon, ha  pagbulag ha buhi nga Dios: kondi maglinaygayay kamo an usa kag usa ha adlaw-adlaw, tubtob nga ito tinatawag nga niyan Adlaw pa; bangin may usa ha iyo nga pagpatig-ahon tungod ha limbong han sala.”—Hebreo 3:12, 13.

21. An siyahan nga bahin han Isaias kapitulo 49 natatapos ha ano nga makalilipay nga mga pulong?

²¹ Samtang nag-ikatarapos an matagnaon nga mga pulong butnga ni Jehova ngan han iya Mesias, hi Isaias nagpahayag hin makalilipay nga mga pulong: “Pagkanta, O kalangitan; ngan pagmalipayon, O tuna; ngan rayhak ha pagkanta, O kabukiran: kay hi Jehova naglipay han iya katawohan, ngan may-ada pagbati ha iya mga sinakit.” (Isaias 49:13) Makaruruyag gud nga mga pulong han pagliaw para ha mga Israelita hadto ngan para ha bantogan nga Surugoon ni Jehova, hi Jesu-Kristo, sugad man para ha dinihogan nga mga surugoon ni Jehova ngan ha ira mga kaupod nga “iba man nga mga karnero” yana!—Juan 10:16.

Hi Jehova Diri Nahingangalimot ha Iya Katawohan

22. Paonan-o pinabubug-atan ni Jehova nga diri gud niya hingangalimtan an iya katawohan?

²² Padayon nga iginsusumat yana ni Isaias an mga kapahayagan ni Jehova. Nagtagna hiya nga an bihag nga mga Israelita makakapoy ngan mawawad-an hin paglaom. Hi Isaias nagsiring: “An Sion nagsiring: Hi Jehova binaya ha akon, ngan an Ginoo nalimot ha akon.” (Isaias 49:14) Totoo ba ini? Ginpabay-an na ba ni Jehova an iya katawohan ngan hinngalimtan na hira? Sugad nga tagapagyakan ni Jehova, hi Isaias nagpadayon: “Makakalimot ba an usa nga babaye han iya nasuso nga bata, nga hiya mawaray pagbati han anak han iya tagoangkan? Oo, ini bangin hingalimot, kondi ako diri mahingangalimot ha imo.” (Isaias 49:15) Mahigugmaon gud nga baton tikang kan Jehova! An gugma han Dios ha iya katawohan mas daku pa kay ha gugma han usa nga iroy ha iya anak. Padayon nga ginhuhunahuna Niya an mga maunungon ha iya. Nahinunumdom hiya ha ira nga baga hin an ira mga ngaran nakaukit ha iya mga kamot: “Kitaa, akon ka igin-guhit dida ha mga palad han akon mga kamot; an imo mga kuta aada ha akon atubangan ha dayoday.”—Isaias 49:16.

23. Paonan-o gindadasig ni Pablo an mga Kristiano nga sumarig nga hi Jehova diri nahingangalimot ha ira?

²³ Ha iya surat ha mga taga-Galasia, hi apostol Pablo nagsagdon ha mga Kristiano: “Diri kita manluya ha pagbuhat han maopay; kay ha igo nga panahon mag-aani kita, kon diri kita manluya.” (Galasia 6:9) Ha mga Hebreohanon nagsurat hiya han makapadasig nga mga pulong: “An Dios diri nga diri matadong, nga hikalimtan niya an iyo buhat ngan an iyo gugma nga iyo iginpakita tungod ha iya ngaran.” (Hebreo 6:10) Diri gud kita maghunahuna nga hinngalimtan na ni Jehova an iya katawohan. Pariho ha kadaan nga Sion, an mga Kristiano may-ada maopay nga hinungdan nga magrayhak ngan mapailubon nga maghulat kan Jehova. Matinumanon hiya ha iya mga kondisyon ha kauyonan ngan mga saad.

24. Ha ano nga paagi igpapahiuli an Sion, ngan ano an iya mga igpapakiana?

²⁴ Pinaagi kan Isaias, hi Jehova naghahatag hin dugang nga pagliaw. Adton “maggurunaw [han Sion],” an mga Babilonyahanon man o an apostata nga mga Judio, diri na usa nga tarhog. An “mga anak” han Sion, an bihag nga mga Judio nga nagpabilin nga maunungon kan Jehova, “magdadagmit.” Hira ‘ngatanan matitirok.’ Tungod kay nagdagmit ha pagbalik ha Jerusalem, an nakabalik nga mga Judio magigin mga adorno ha ira sentro nga siyudad, sugad la nga an “usa nga babaye nga karaslon” nagsusul-ot hin ‘mga rayandayan.’ (Isaias 49:17, 18) An mga lugar han Sion ‘nagkaguguba.’ Handurawa an iya kahipausa han tigda la nga may-ada na hiya damu hinduro nga umurukoy salit an iya urukyan nga mga lugar baga hin masuok na. (Basaha an Isaias 49:19, 20.) Natural la nga magpapakiana hiya kon diin tikang ini nga kabataan: “Dida hito masiring ka ha imo kasingkasing: Hin-o an nag-anak ha akon hini, salit nga ako ginbayaan han akon mga anak, ngan ako nag-uusahan, ngan hinalin, ngan naglalagataw ngadto nganhi? Ngan hin-o an nagpatubo hini? Kitaa, ako binayaan nga uusa la; ini, nakain hira?” (Isaias 49:21) Makalilipay gud nga kahimtang para ha baog nga Sion hadto!

25. Ha moderno nga mga panahon, ano nga pagpahiuli an naeksperyensyahan han espirituwal nga Israel?

²⁵ Ini nga mga pulong may-ada moderno nga katumanan. Ha mga tuig han kakurian durante  han siyahan nga girra ha kalibotan, an espirituwal nga Israel nakaeksperyensya hin usa ka panahon han pagkabinayaan ngan pagkabihag. Kondi iginpahiuli ito ngan nahingada ha espirituwal nga paraiso. (Isaias 35:1-10) Pariho han naguba nga siyudad hadto nga iginhulagway ni Isaias, nalipay ito—siring pa—nga makita an iya kalugaringon nga nagbubunga hin malipayon, aktibo nga mga magsiringba ni Jehova.

“Usa nga Tigaman Para ha mga Katawohan”

26. Ano nga giya an igintagana ni Jehova para ha iya natalwas nga katawohan?

²⁶ Ha matagnaon nga paagi, hi Isaias gindara yana ni Jehova ngadto ha panahon nga an Iya katawohan makakagawas na ha Babilonya. Makakarawat ba nira an giya han Dios? Hi Jehova binaton: “Kitaa, akon bibikyawon an akon kamot ngada ha mga nasud, ngan ibubutang ko an akon bandera [“tigaman,” “NW”] ha mga katawohan; ngan ira pagdadad-on an imo mga anak nga kalalakin-an dida ha ira dughan, ngan an imo mga anak nga kababayin-an pagdadad-on dida ha ira mga sugbong.” (Isaias 49:22) Ha orihinal nga katumanan, an Jerusalem, nga amo an sentro han pagmando ngan an hinmumutangan han templo ni Jehova, nagin “tigaman” ni Jehova. Bisan an prominente ngan maimpluwensya nga mga tawo han iba nga mga nasud, sugad han “kahadian” ngan “mga rayna,” binulig ha mga Israelita ha ira pagbiyahe tipauli. (Isaias 49:23a) An mga hadi han Persia nga hira Ciro ngan Artaherhes Longimanus ngan an ira mga panimalay nagin kaupod hadton mga binulig. (Esra 5:13; 7:11-26) Ngan an mga pulong ni Isaias may-ada dugang nga aplikasyon.

27. (a) Ha mas daku nga katumanan, ha ano nga “tigaman” magkakatirok an mga katawohan? (b) Ano an magigin resulta kon an ngatanan nga nasud mapiritan na pagyukbo ha pagmando han Mesias?

²⁷ An Isaias 11:10 (NW) nag-uunabi mahitungod han “usa nga tigaman para ha mga katawohan.” Ini nga mga pulong igin-aplikar ni apostol Pablo kan Kristo Jesus. (Roma 15:8-12) Salit, ha mas daku nga katumanan, hi Jesus ngan an iya mga igkasi-magmarando nga dinihogan han espiritu amo an “tigaman” ni Jehova nga diin magkakatirok an mga katawohan. (Pahayag 14:1) Ha itinanda nga panahon an ngatanan nga mga katawohan ha tuna—bisan an mga magmarando yana—kinahanglan yumukbo ha pagmando han Mesias. (Salmo 2:10, 11; Daniel 2:44) Ano an resulta? Hi Jehova nagsiring: “Ikaw mahibabaro nga ako hi Jehova; ngan hira nga naghuhulat ha akon diri pagpapakaalohan.”—Isaias 49:23b.

“Niyan Hiruhirani Na an Aton Kaluwasan”

28. (a) Pinaagi han ano nga mga pulong ginpasarig utro ni Jehova an iya katawohan nga hira makakagawas? (b) Ano nga saad ni Jehova an gintutuman pa gihapon may kalabotan ha iya katawohan?

²⁸ An iba hadton bihag ha Babilonya bangin nagpakiana, ‘Posible gud ba nga makagawas an Israel?’ Gintagad ni Jehova ito nga pakiana pinaagi han pagpakiana: “Kukuhaon ba an dinakpan tikang ha kusgan o luluwason ba an matuod nga mga bihag?” (Isaias 49:24) An baton, oo. Ginpasarig hira ni Jehova: “Bisan an mga bihag han mga kusgan pangunguhaon, ngan an dinakpan han mabangis luluwason.” (Isaias 49:25a) Nakakaliaw gud nga pasarig! Dugang pa, an maopay nga kaburut-on ni Jehova para ha iya katawohan naabot upod an masasarigan nga saad nga pananalipdan hira. Ha masasarigan nga mga pulong, hiya nagsiring: “Ako makikigsuhay ha iya nga makikigsuhay ha imo, ngan akon luluwason an imo mga anak.” (Isaias 49:25b) Gintutuman pa gihapon ito nga saad. Sugad han nakarekord ha Sakarias 2:8, hi Jehova nagsiring ha iya katawohan: “Hiya nga nakawkaw ha iyo nakawkaw han tawotawo han [akon] mata.” Totoo, nagpapahimulos kita yana hin usa ka peryodo han maopay nga kaburut-on nga durante hito an mga katawohan ha bug-os nga tuna may-ada higayon nga magkatirok ha espirituwal nga Sion. Kondi, ito nga panahon han maopay nga kaburut-on may-ada kataposan.

29. Ano nga makaharadlok nga kabubuwason an naghuhulat hadton nagdudumiri ha pagsugot kan Jehova?

²⁹ Ano an mahitatabo hadton matig-a nga nagdudumiri ha pagsunod kan Jehova ngan nagtitimaraot pa ngani ha iya mga magsiringba? Hiya nagsiring: “Akon pakakaunon han ira kalugaringon nga unod hira nga nagtatalumpigos ha  imo; ngan hira paghuhubgon han ira kalugaringon nga dugo, sugad han matam-is nga alaksiw.” (Isaias 49:26a) Makaharadlok gud nga dadangatan! An sugad nga magtig-a an ulo nga mga kaaway waray dayon nga kabubuwason. Bubungkagon hira. Salit, pinaagi ha pagluwas ha iya katawohan ngan pagbungkag ha iya mga kaaway, hi Jehova makikita sugad nga usa nga Manluluwas. “An ngatanan nga unod mahibabaro nga ako, hi Jehova, amo an imo Manluluwas, ngan an imo Manunubos, an Kusgan nga Uusa ni Jakob.”—Isaias 49:26b.

30. Ano nga mga buhat ha pagluwas an ginbuhat na ni Jehova para ha iya katawohan, ngan ano pa an iya bubuhaton?

³⁰ Ito nga mga pulong siyahan nga natuman han ginamit ni Jehova hi Ciro basi pagawson an Iya katawohan tikang ha pagkabihag ha Babilonya. Natuman liwat ito han 1919 han gingamit ni Jehova an iya nahitrono nga Anak, hi Jesu-Kristo, basi pagawson an Iya katawohan tikang ha espirituwal nga pagkauripon. Salit, gin-uunabi han Biblia hi Jehova ngan hi Jesus sugad nga mga manluluwas. (Tito 2:11-13; 3:4-6) Hi Jehova an aton Manluluwas, ngan hi Jesus, an Mesias, amo an iya “Prinsipe.” (Buhat 5:31) Oo, urusahon gud an mga buhat han Dios ha pagluwas pinaagi kan Jesu-Kristo. Pinaagi han maopay nga sumat, ginpapagawas ni Jehova an mga magtadong an kasingkasing tikang ha pagkauripon ha palso nga relihiyon. Pinaagi han halad lukat, iya hira ginluluwas tikang ha pagkauripon ha sala ngan kamatayon. Han 1919 iya ginluwas an kabugtoan ni Jesus tikang ha espirituwal nga pagkabihag. Ngan ha hirani na umabot nga girra ha Armagedon, iya luluwason an daku nga panon han matinumanon nga katawohan tikang ha kabungkagan nga maabot ha mga magpakasasala.

31. Paonan-o sadang gumios an mga Kristiano sugad nga mga makarawat han maopay nga kaburut-on han Dios?

³¹ Daku gud nga pribilehiyo, kon sugad, nga magin kaupod hadton mga makarawat han maopay nga kaburut-on han Dios! Hinaot maaramon nga gamiton naton ngatanan inin makaruruyag nga panahon. Ngan hinaot magbuhat kita uyon ha pagkaapurado han aton mga panahon, namamati ha mga pulong ni Pablo ha mga taga-Roma: “Hinbaroan ta na an panahon, nga oras na nga kamo magmata tikang ha pagkaturog; kay niyan hiruhirani na an aton kaluwasan, kay ngan han pagtikang ta han pagtoo. An kagab-ihon madali na matapos, ngan an adlaw hirani na: busa isikway ta an mga buhat han kasisidman, ngan igsul-ot ta an mga kampilan han kalamragan. Manggawi kita hin maopay, sugad hin adlaw na; diri ha aringasa ngan paghubog, diri ha kamakimalaw-ay ngan kamaraot, diri ha pagkaaway-away ngan pangabugho. Kondi igsul-ot niyo an Ginoo Jesu-Kristo, ngan diri kamo mag-andam ha mga kairiphon han unod.”—Roma 13:11-14.

32. Ano an mga pasarig ha katawohan han Dios?

³² Padayon nga uuyonan ni Jehova adton namamati ha iya sagdon. Hiya magtatagana ha ira han kusog ngan mga abilidad nga ginkikinahanglan ha pagtuman han pagsangyaw han maopay nga sumat. (2 Korinto 4:7) Gagamiton ni Jehova an iya mga surugoon sugad la nga ginagamit niya an ira Lider, hi Jesus. Iya hihimoon an ira mga baba nga magin “sugad hin matarom nga kampilan” basi matugkad nira an mga kasingkasing han mga maaghop pinaagi han mensahe han maopay nga sumat. (Mateo 28:19, 20) Iya pananalipdan an iya katawohan “ha lambong han iya kamot.” Pariho han “udyong nga kinilkigan,” hira pananagoon “ha iya andulan.” Oo, diri pababay-an ni Jehova an iya katawohan!—Salmo 94:14; Isaias 49:2, 15.

[Footnote]

[Mga Pakiana]