Mga Leksyon Tikang ha Asoy han Katawo ni Jesus

MINILYON an interesado ha mga hitabo may kalabotan ha katawo ni Jesus. Maoobserbahan ini ha damu hinduro nga iginpapakita nga mga kahimtang ha Belen ngan mga drama mahitungod han katawo ni Jesus nga iginpapasundayag ha bug-os nga kalibotan durante han Pasko. Bisan kon makapainteres, an mga hitabo durante han katawo ni Jesus waray igrekord ha Biblia basi lipayon an mga tawo. Lugod, bahin ito han ngatanan nga Kasuratan nga giniyahan han Dios ha pagtutdo ngan ha pagtadong han mga butang.—2 Timoteo 3:16.

Kon karuyag han Dios nga isaurog han mga Kristiano an katawo ni Jesus, igintagana unta han Biblia an eksakto nga petsa. Diri ba? Katapos unabihon nga natawo hi Jesus ha panahon nga nakadto ha gawas an mga parabantay han mga karnero ha pagbantay han ira mga panon ha gab-i, an eskolar han Biblia nga nabuhi han ika-19 ka siglo nga hi Albert Barnes nagsiring: “Matin-aw tikang hini nga punto nga an aton Manluluwas natawo antes han ika-25 han Disyembre . . . Matugnaw hito nga panahon, ngan labi na ha higtaas ngan bukidnon nga mga lugar hirani ha Betlehem. Waray igpahibaro han Dios an panahon han katawo [ni Jesus]. . . . Diri man importante an paghibaro han panahon; kon importante ito, ginpatipigan unta han Dios an rekord hito.”

Ha kabaliktaran, an mga parasurat han upat nga Ebanghelyo matin-aw nga nagpapahibaro ha aton mahitungod han adlaw nga namatay hi Jesus. Nahitabo ito ha adlaw han Paskua, nga gindumara han ika-14 han Nisan nga bulan han mga Judio, ha katsaringsing. Dugang pa, espisipiko nga ginsugo ni Jesus an iya mga sumurunod nga igsaurog ito nga adlaw ha paghinumdom ha iya. (Lukas 22:19) Waray sugo ha Biblia ha pagsaurog han kompleanyo ni Jesus, ha pagkamatuod, waray bisan ha pagsaurog han kompleanyo han bisan hin-o nga tawo.  Makasurubo, an mga isyu mahitungod ha petsa han katawo ni Jesus bangin makatabon han mas makatirigamnan nga mga hitabo nga nahitabo hito nga panahon.

Mga Kag-anak nga Ginpili han Dios

Ha yinukot nga mga pamilya ha Israel, ano nga klase hin mga kag-anak an ginpili han Dios nga mag-aataman ha iya Anak? Gintagad ba Niya nga importante an mga kuwalidad sugad han dungog ngan bahandi? Waray. Lugod, gintigamnan ni Jehova an espirituwal nga mga kuwalidad han mga kag-anak. Usisaha an kanta han pagdayaw ni Maria, nga nakarekord ha Lukas 1:46-55, nga iya ginkanta katapos hiya sumatan han iya pribilehiyo han pagin iroy han Mesias. Labaw han iba nga mga butang, hiya nagsiring: “Ginpakadaku han akon kalag an Ginoo . . . kay iya gintan-aw an kahimtangan han iya ubos nga surugoon.” Mapainubsanon nga ginhunahuna niya an iya kalugaringon sugad nga “ubos,” nga surugoon ni Jehova. Labaw nga importante, an maopay nga mga kapahayagan han pagdayaw ha kanta ni Maria nagpapakita nga usa hiya ka espirituwal nga tawo nga may daku nga kahibaro ha Kasuratan. Bisan kon makasasala nga tulin ni Adan, hiya an angayan nga pinili sugad nga tunan-on nga iroy han Anak han Dios.

Kumusta man an bana ni Maria, nga nagin pinakaamay ni Jesus? Hi Jose usa nga lalaki nga may-ada kahibaro ha pagpanday. Tungod han iya pagin disidido ha pagtrabaho hin mauyatom pinaagi han iya mga kamot, nakagtagana hiya han panginahanglan han usa nga pamilya nga ha urhi nagkaada lima nga anak nga lalaki ngan diri maminos duha nga anak nga babaye. (Mateo 13:55, 56) Diri bahandianon hi Jose. Han inabot an panahon basi dad-on ni Maria an iya suhag nga anak nga lalaki ha templo han Dios, sigurado nga nasubo hi Jose nga waray hiya makaghatag han halad nga usa nga karnero. Lugod, kinahanglan nira pahimulosan an konsiderasyon para ha mga kablas. Mahitungod han iroy han natatawo pa la nga minasus-an nga lalaki, an balaud han Dios nagsiring: “Kon an iya kahimtang diri makatugot nga hiya magdara hin nati nga karnero, dida hito magdara hiya maduha nga tukmo, o maduha nga sarapati nga piso; an usa para han halad nga sinunog, ngan an usa liwat para han halad tungod han sala: ngan an saserdote magbuhat han pagtabon han sala para ha iya, ngan magmamalinis hiya.”—Lebitiko 12:8; Lukas 2:22-24.

An Biblia nasiring nga “matadong” hi Jose. (Mateo 1:19) Pananglitan, waray hiya makighilawas ha iya birhen nga asawa tubtob nga nanganak hiya kan Jesus. Napugngan hini an bisan ano nga sayop nga pagsabot kon hin-o an totoo nga Amay ni Jesus. Diri masayon para ha bag-o nga mag-asawa nga maglikay ha pagin duok ha pisikal samtang magkalungon hira, kondi ipinakita hito nga pinabilhan nira nga duha an pribilehiyo ha pagin napili ha pag-ataman han Anak han Dios.—Mateo 1:24, 25.

Pariho kan Maria, hi Jose usa ka espirituwal nga tawo. Naundang hiya ha pagtrabaho kada tuig ngan dinadara an iya pamilya ha tulo ka adlaw nga pagbiyahe tikang ha Nasaret ngadto ha Jerusalem basi tumambong ha tinuig nga piyesta han Paskua. (Lukas 2:41) Sigurado nga ginbansay liwat ni Jose an batan-on nga hi Jesus ha sinemana nga kustomre han pakigbahin ha pagsingba ha sinagoga ha ira lugar, diin ginbasa ngan iginsaysay an Pulong han Dios. (Lukas 2:51; 4:16) Salit, waray ruhaduha nga ginpili han Dios an husto nga tunan-on nga iroy ngan pinakaamay para han iya Anak.

Usa ka Maopay nga Bendisyon Para ha Ubos nga mga Magbarantay han mga Karnero

Bisan pa han pagkuri han iya asawa, nga siyam ka bulan nga burod na yana, nagbiyahe hi Jose ngadto ha siyudad han iya mga kaapoy-apoyan basi magparehistro, uyon ha balaud ni Cesar. Han inabot an mag-asawa ha Betlehem, waray hira makabiling hin mauukyan ha damu an tawo nga siyudad.  Salit, tungod han mga kahimtang napiritan hira nga umukoy ha kuwadra, diin natawo hi Jesus ngan iginbutang ha pasabsaban. Basi maparig-on an ira pagtoo, ginpamatud-an ni Jehova ha mapainubsanon nga mga kag-anak nga kaburut-on gud han Dios ini nga katawo. Nagpadara ba hiya hin delegasyon han bantogan nga katigurangan nga kalalakin-an tikang ha Betlehem basi parig-unon-utro an mag-asawa? Waray. Lugod, iginpahayag ni Jehova nga Dios an kahimtang ha maduruto nga mga paramangno hin mga karnero nga nakadto ha gawas ha pagbantay han ira mga panon ha gab-i.

Nagpakita an anghel han Dios ha ira ngan nagsiring ha ira nga kumadto ha Betlehem, diin mabibilngan nira an natatawo pa la nga Mesias nga ‘nahigda ha balurong.’ Nahipausa o naawod ba ini nga ubos nga kalalakin-an ha pakabati nga ini nga natatawo pa la nga Mesias aadto ha usa nga kuwadra? Waray gud! Ha kadagmitan ginbayaan nira an ira mga hayop ngan nagbiyahe ngadto ha Betlehem. Han hin-agian nira hi Jesus, iginsumat nira kan Jose ngan Maria an ginsiring han anghel han Dios. Waray ruhaduha nga nagparig-on ini han pagtoo han mag-asawa nga an ngatanan nga mga butang nahitatabo sugad han katuyoan han Dios. “An mga magbarantay,” ha ira bahin, “nanguli . . . nga naghihimaya, ngan nagdadayaw hira han Dios tungod han ngatanan nga mga bagay, nga ira nabati ngan nakita.” (Lukas 2:8-20) Oo, ha pagpahayag han mga butang ha mga magbarantay han mga karnero nga mahadlukon ha Dios, ginhimo ni Jehova an husto nga pagpili.

Tikang ha ginhisgotan na, nahibaroan naton kon ano nga klase hin mga tawo kita sadang magin, basi makarawat an pag-uyon ni Jehova. Diri naton kinahanglan maghingyap hin dungog o bahandi. Lugod, pariho kan Jose, Maria, ngan han mga magbarantay hin mga karnero, kinahanglan naton sundon an Dios ngan pamatud-an an aton gugma ha iya pinaagi ha pag-una han espirituwal nga mga interes kay ha materyal nga mga butang. Oo, may-ada mag-opay nga mga leksyon nga mahibabaroan pinaagi ha pagpamalandong han mga rekord han mga nahitabo ha panahon han katawo ni Jesus.

[Retrato ha pahina 7]

Ano an iginpapasabot han paghalad ni Maria hin duha nga sarapati?

[Retrato ha pahina 7]

Pinili han Dios nga ipahayag an katawo ni Jesus ha pipira nga ubos nga mga magbarantay han kakarnerohan