Padayon nga Buhata an mga Butang nga Imo Hinbaroan

“An mga bagay nga iyo hinbaroan, ngan kinarawat, ngan hinbatian, ngan hinkit-an ha akon, ini nga mga bagay an pagbuhaton niyo: ngan an Dios han kamurayaw maupod ha iyo.”—FILIPOS 4:9.

1, 2. Ha kabug-osan, nakakaimpluwensya ba an Biblia ha kinabuhi han mga tawo nga naghuhunahuna nga relihiyoso hira? Isaysay.

 “NAGDUDUGANG an Impluwensya han Relihiyon, Kondi Nawawara an Impluwensya han Moralidad.” Ini nga nangunguna nga ulohan ha pahayagan nga Emerging Trends nagsumat han kabug-osan nga mga resulta han usa nga surbey ha bug-os nga nasud ha Estados Unidos. Matin-aw, nahitatabo hiton nga nasud an pagdamu han mga tawo nga nasingba ngan nasiring nga importante ha ira kinabuhi an relihiyon. Kondi, an report nasiring: “Bisan pa hinin makaruruyag nga kadamu, damu nga mga Amerikano an matin-aw nga nagruruhaduha ha epekto han relihiyon ha kinabuhi han indibiduwal ngan ha sosiedad ha kabug-osan.”

² Diri la ha usa nga nasud nakikita ini nga kahimtang. Ha bug-os nga kalibotan, damu nga mga tawo an nasiring nga kinakarawat nira an Biblia ngan relihiyoso hira, kondi diri nira gintutugotan an Kasuratan nga makaimpluwensya ha ira kinabuhi. (2 Timoteo 3:5) “Pinabibilhan pa gihapon namon an Biblia,” siring han nagdudumara han usa nga grupo han mga parasaliksik, “kondi an paggasto hin panahon ha pagbasa hito, pag-aram hito ngan pag-aplikar hito—diri na ginbubuhat.”

 3. (a) Paonan-o an Biblia nakakaapekto hadton nagigin totoo nga mga Kristiano? (b) Paonan-o inaaplikar han mga sumurunod ni Jesus an sagdon ni Pablo nga nakarekord ha Filipos 4:9?

 ³ Kondi, ha totoo nga mga Kristiano, naiiba an kahimtang. An pag-aplikar han sagdon tikang ha Pulong han Dios nakakagbag-o han ira panhunahuna ngan paggawi. Ngan an bag-o nga personalidad nga ira ipinapakita naoobserbahan dayon han iba. (Kolosas 3:5-10) Para ha mga sumurunod ni Jesus, an Biblia diri usa nga libro nga diri ginagamit nga puno hin tapotapo ha estante. Ha kabaliktaran, hi apostol Pablo nagsiring ha mga Kristiano ha Filipos: “An mga bagay nga iyo hinbaroan, ngan kinarawat, ngan hinbatian, ngan hinkit-an ha akon, ini nga mga bagay an pagbuhaton niyo: ngan an Dios han kamurayaw maupod ha iyo.” (Filipos 4:9) Labaw pa an ginbubuhat han mga Kristiano kay ha pagkarawat han kamatuoran han Pulong han Dios. Ginbubuhat nira an ira hinbabaroan, padayon nga inaaplikar an sagdon han Biblia—ha pamilya, ha trabaho, ha kongregasyon, ngan ha ngatanan nga iba nga mga bahin han kinabuhi.

 4. Kay ano nga makuri an pag-aplikar han mga balaud han Dios?

⁴ Diri masayon an pag-aplikar han mga balaud ngan mga prinsipyo han Dios. Nagkikinabuhi kita ha kalibotan nga ilarom han gahum ni Satanas nga Yawa, nga tinatawag han Biblia nga “an dios hini nga sistema han mga butang.” (2 Korinto 4:4, NW; 1 Juan 5:19) Salit, importante an pagbantay kontra han bisan ano nga makakapugong ha aton ha pagpadayon ha pagtipig han integridad kan Jehova nga Dios. Paonan-o kita magigin mga magtiripig han integridad?

Magsubad ha “Surubdan han mga Putli nga mga Pulong”

 5. Ano an iginpapasabot han ginsiring ni Jesus nga “ha adlaw-adlaw”?

⁵ An usa nga bahin han pagbuhat han aton hinbaroan nagkikinahanglan hin maunungon nga pagsuporta ha totoo nga pagsingba, bisan pa han pagkontra tikang ha mga diri-tumuroo. An pagpailob nagkikinahanglan hin pangalimbasog. “Kon may usa, nga karuyag sumunod ha akon,” siring ni Jesus, “magdumiri ha iya kalugaringon, ngan iya pagpas-anon an iya krus ha adlaw-adlaw, ngan sumunod ha akon.” (Lukas 9:23) Hi Jesus waray magsiring nga sadang sumunod kita ha iya hin usa la ka semana, usa la ka bulan, o usa la ka tuig. Lugod, hiya nagsiring nga sadang naton buhaton ito “ha adlaw-adlaw.” An iya mga pulong nagpapasabot nga an aton pagin disipulo diri la usa ka peryodo han aton kinabuhi o temporaryo la nga debosyon nga aada yana nga adlaw ngan waray na buwas. An maunungon nga pagsuporta ha totoo nga pagsingba nangangahulogan nga matinumanon nga nagpapailob kita ha buruhaton nga aton ginpili, anoman an mahitabo. Paonan-o naton mahihimo ito?

 6. Ano an surubdan han putli nga mga pulong nga hinbaroan han siyahan-siglo nga mga Kristiano tikang kan Pablo?

⁶ Ginsagda ni Pablo an iya igkasi-magburuhat nga hi Timoteo: “Magsubad ha surubdan han mga putli nga mga pulong nga imo hinbatian ha akon, ha pagtoo ngan paghigugma nga aada kan Kristo Jesus.” (2 Timoteo 1:13) Ano an karuyag ipasabot ni Pablo? An Griego nga pulong nga iginhubad dinhi nga “surubdan” literal nga nagtutudlok ha debuho han usa nga pintor. Bisan kon diri detalyado hinduro, an sugad nga debuho may-ada matin-aw nga mga tubtoban salit an may-pagsabot nga magkikita hito makakasabot han bug-os nga hulagway. Ha sugad man nga paagi, an surubdan han kamatuoran nga igintutdo ni Pablo kan Timoteo ngan ha iba waray igdisenyo ha paghatag hin espisipiko nga baton ha tagsa nga posible nga pakiana. Kondi, ini nga grupo han katutdoan naghahatag hin igo nga giya—usa nga debuho, siring pa—basi masabtan han mga tangkod-an-kasingkasing an ginkikinahanglan ni Jehova ha ira. Siyempre, basi malipay an Dios, kinahanglan padayon nga magsubad hira ha surubdan han kamatuoran pinaagi han pagbuhat han ira hinbabaroan.

 7. Paonan-o makakagpadayon an mga Kristiano ha pagsubad ha surubdan han putli nga mga pulong?

⁷ Ha siyahan nga siglo, an kalalakin-an sugad kan Himeneo, Alejandro, ngan Pileto nag-aghat hin mga ideya nga diri naangay ha “surubdan han mga putli nga mga pulong.” (1 Timoteo 1:18-20; 2 Timoteo 2:16, 17) Paonan-o malilikyan han siyahan nga mga Kristiano nga mahisimang han mga apostata? Pinaagi han pag-aram hin maopay ha inspirado nga mga sinurat ngan pag-aplikar hito ha ira kinabuhi. Adton nasubad ha susbaranan ni Pablo ngan han iba nga mga matinumanon nakakilala ngan nagsalikway han bisan ano nga diri nauyon ha surubdan han kamatuoran nga igintutdo ha ira. (Filipos 3:17; Hebreo 5:14) Imbes nga magin “makilalantugion, ngan makimasamok ha mga pulong,”  nagpadayon hira ha ira maopay nga pagkinabuhi ha diosnon nga debosyon. (1 Timoteo 6:3-6) Sugad hito an aton ginbubuhat kon padayon nga inaaplikar naton an mga kamatuoran nga aton hinbaroan. Nagpaparig-on gud han pagtoo nga makita an minilyon nga nag-aalagad kan Jehova ha bug-os nga tuna nga nagpapadayon ha pagsubad ha surubdan han kamatuoran han Biblia nga igintutdo ha ira.—1 Tesalonika 1:2-5.

Isalikway an “mga Surumatanon”

 8. (a) Paonan-o nangangalimbasog hi Satanas ha pagbungkag han aton pagtoo yana nga panahon? (b) Ano nga pahamangno ni Pablo an makikita ha 2 Timoteo 4:3, 4?

⁸ Nangangalimbasog hi Satanas ha pagbungkag han aton integridad pinaagi han pagsabwag hin mga pagruhaduha mahitungod han igintututdo ha aton. Yana nga panahon, sugad la ha siyahan nga siglo, an mga apostata ngan iba pa nangangalimbasog ha pagbungkag han pagtoo han mga inosente. (Galasia 2:4; 5:7, 8) Usahay ginagamit nira an media ha pagpasarang hin sayop nga impormasyon o direkta nga mga buwa pa ngani mahitungod han mga paagi ngan mga motibo han katawohan ni Jehova. Hi Pablo nagpahamangno nga an iba mabaya ha kamatuoran. “Maabot an panahon,” hiya nagsurat, “nga diri hira mag-aantos han putli nga pagturon-an; kondi, tungod ha ira magkatol nga mga talinga, magtitirok hira hin ira mga kalugaringon nga magturutdo nga magsusunod ha ira mga kalugaringon nga kaipa; ngan ira ipahirayo an ira mga talinga tikang ha kamatuoran, ngan mabalik ha mga surumatanon.”—2 Timoteo 4:3, 4.

 9. Ano an bangin nahunahuna ni Pablo han gin-unabi niya an “mga surumatanon”?

⁹ Imbes nga magsubad ha surubdan han putli nga mga pulong, an iba nadani han “mga surumatanon.” Ano ini nga mga surumatanon? Bangin nahunahuna ni Pablo an imahinasyon nga mga leyenda, sugad hadton makikita ha apokripal nga libro nga Tobit. a An mga surumatanon bangin nag-upod liwat han sobra ngan ginbanabana nga mga hurob-hurob. Sugad man, an iba liwat—‘uyon ha ira kalugaringon nga mga kaipa’—bangin nalimbongan hadton nag-aaghat han matinuguton nga pagtagad ha mga suruklan han Dios o kritiko ha mga nangunguna ha kongregasyon. (3 Juan 9, 10; Judas 4) Anoman nga mga hiparakdolan an nahiupod, matin-aw nga ginpili han iba an mga buwa kay ha mga kamatuoran han Pulong han Dios. Waray pag-iha inundang hira ha pagbuhat han mga butang nga ira hinbaroan, ngan nagresulta ini ha ira kalugaringon nga kadaot ha espirituwal.—2 Pedro 3:15, 16.

10. Ano an pipira han mga surumatanon yana nga panahon, ngan paonan-o pinabug-atan ni Juan an panginahanglan han pag-ikmat?

¹⁰ Malilikyan naton nga madani han mga surumatanon yana nga panahon kon aton usisahon ngan pilion an aton pinamamatian ngan binabasa. Pananglitan, an media agsob nga nag-aaghat han imoralidad. Damu nga mga tawo an nagdadasig han agnostisismo o dayag nga ateyismo. An mausisa nga mga kritiko nagtatamay han pag-angkon  han Biblia nga inspirado ito han Dios. Ngan an moderno nga mga apostata padayon nga nangangalimbasog ha pagsabwag hin mga liso han pagruhaduha basi madaot an pagtoo han mga Kristiano. Mahitungod han kapariho nga peligro nga iginpresentar han palso nga mga propeta ha siyahan nga siglo, hi apostol Juan nagpahamangno: “Mga hinigugma, diri kamo tumoo ha ngatanan nga espiritu [“inspirado nga mga kapahayagan,” NW] kondi proybahan niyo an mga espiritu kon mga diosnon ba hira; kay damu nga mga manaragna an nagkagowa nganhi ha kalibotan.” (1 Juan 4:1) Salit kinahanglan mag-ikmat kita.

11. Ano an usa nga paagi han pagsari ngan pagsiguro kon kita ba aada ha pagtoo?

¹¹ Mahitungod hini, hi Pablo nagsurat: “Pagproyba kamo ha iyo ngahaw, kon aada kamo ha pagtoo.” (2 Korinto 13:5) Ginsagda kita han apostol nga padayon nga sarihan an aton kalugaringon ha pagsiguro kon nasunod kita ha ngatanan nga Kristiano nga mga tinotoohan. Kon an aton mga talinga nahihilig ha pamati ha mga tawo nga diri-kontento, kinahanglan mainampoon nga usisahon naton an aton kalugaringon. (Salmo 139:23, 24) Nahihilig ba kita ha pagbiling hin sayop ha katawohan ni Jehova? Kon amo, kay ano? Nasubo na ba kita tungod han mga pulong o mga buhat han usa? Kon amo, husto ba an aton panlantaw ha kahimtang? Bisan ano nga kagol-anan nga inaatubang naton hini nga sistema han mga butang temporaryo la. (2 Korinto 4:17) Bisan kon makaeksperyensya kita hin pipira nga pagsari ha kongregasyon, kay ano nga maundang kita ha pag-alagad ha Dios? Kon nasusubo kita tungod han usa ka butang, diri ba mas maopay an pagbuhat han aton mahihimo ha pagsulbad han problema ngan katapos itapod ito kan Jehova?—Salmo 4:4; Proberbios 3:5, 6; Efeso 4:26.

12. Paonan-o ipinakita han mga taga-Berea an maopay nga susbaranan para ha aton?

¹² Imbes nga magin kritiko, aton tipigan an maopay nga panhunahuna ha espirituwal ha impormasyon nga nakakarawat pinaagi han personal nga pag-aram ngan mga katirok ha kongregasyon. (1 Korinto 2:14, 15) Ngan imbes nga pagruhaduhaan an Pulong han Dios, mas maaramon gud an pagkaada han panhunahuna han siyahan-siglo nga mga taga-Berea nga nag-usisa hin maopay han Kasuratan! (Buhat 17:10, 11) Katapos, aton buhaton an aton hinbabaroan, iginsasalikway an mga surumatanon ngan nagpapabilin ha kamatuoran.

13. Paonan-o kita bangin diri-tinuyo nga nagpapasarang hin mga surumatanon?

¹³ May-ada usa pa nga klase han surumatanon nga kinahanglan kita mag-ikmat. Damu nga pinasobrahan nga mga sumat an nagsasarang, agsob nga pinaagi han E-mail. Maaramon an pag-ikmat ha sugad nga mga istorya, labi na kon diri kita maaram han orihinal nga gintikangan han impormasyon. Bisan kon an usa nga eksperyensya o istorya iginpadara han talahuron nga Kristiano, iton nga indibiduwal bangin diri an orihinal nga gintikangan han mga impormasyon. Salit importante nga mag-ikmat mahitungod han pag-utro o pagpadara han diri-sigurado nga mga impormasyon. Sigurado nga diri naton karuyag utruhon an “diri diosnon nga mga sumat,” o “mga surumatanon nga nagtatalapas han baraan.” (1 Timoteo 4:7; New International Version) Tungod kay may-ada liwat  kita obligasyon ha pagyakan han kamatuoran ha usa kag usa, maaramon an ginbubuhat naton ha paglikay han bisan ano nga magigin hinungdan han bisan diri-tinuyo nga pagpasarang naton hin kabuwaan.—Efeso 4:25.

Positibo nga mga Resulta han Pagbuhat han Kamatuoran

14. Ano nga mga kapulsanan an resulta han pagbuhat han mga butang nga aton hinbaroan tikang ha Pulong han Dios?

¹⁴ An pagbuhat han aton hinbabaroan pinaagi han personal nga pag-aram ha Biblia ngan ha Kristiano nga mga katirok magriresulta hin damu nga mga kapulsanan. Pananglitan, bangin nakikita naton nga nag-uuswag an aton relasyon ha mga kaurupod naton ha pagtoo. (Galasia 6:10) Magigin mas maopay an aton disposisyon kon inaaplikar naton an mga prinsipyo han Biblia. (Salmo 19:8) Dugang pa, pinaagi han pagbuhat han aton hinbabaroan, aton ‘ginrarayandayanan an pagturon-an han Dios’ ngan posible nga madadani naton an iba ha totoo nga pagsingba.—Tito 2:6-10.

15. (a) Paonan-o nagmaisugon an usa nga batan-on ha pagpamatuod ha eskwelahan? (b) Ano an imo hinbaroan tikang hini nga eksperyensya?

¹⁵ Ha mga Saksi ni Jehova damu an mga batan-on nga nagbubuhat han ira hinbaroan pinaagi han personal nga pag-aram ha Biblia ngan ha Kristiano nga mga publikasyon sugad man ha regular nga pagtambong ha mga katirok han kongregasyon. An ira maopay nga paggawi amo an gamhanan nga pamatuod ha mga magturutdo ngan mga igkasi-estudyante ha eskwelahan. (1 Pedro 2:12) Tagda hi Leslie, nga 13-anyos nga daragita ha Estados Unidos. Kinakarawat niya nga nakukurian gud hiya ha pakiistorya ha mga kaklase mahitungod han iya pagtoo, kondi usa ka adlaw nagbag-o ito. “An klase naghisgot mahitungod han mga tawo nga nangangalimbasog ha pagbaligya ha imo hin mga butang. Usa nga daragita an nag-alsa han iya kamot ngan gin-unabi an mga Saksi ni Jehova sugad nga ehemplo.” Sugad nga Saksi, ano an reaksyon ni Leslie? “Gindepensahan ko an akon pagtoo,” siring niya, “ngan sigurado ako nga nahipausa an ngatanan, tungod kay diri gud ako maaringasa ha eskwelahan.” Ano an resulta han kaisog ni Leslie? “Nakapahamutang ako hin brosyur ngan tract ha estudyante, tungod kay may-ada hiya iba pa nga mga pakiana,” siring ni Leslie. Sigurado nga nalilipay gud hi Jehova kon an mga batan-on nga nagbubuhat han ira hinbaroan maisugon ha pagpamatuod ha eskwelahan!—Proberbios 27:11; Hebreo 6:10.

16. Paonan-o nagpapahimulos an usa nga batan-on nga Saksi ha Teokratiko nga Eskwelahan ha Ministeryo?

¹⁶ Usa pa nga ehemplo amo hi Elizabeth. Tikang pa ha edad nga pito ngan ha ngatanan niya nga katuigan ha elementarya, gindadapit hini nga daragita an iya mga magturutdo ha Kingdom Hall kon may-ada hiya bahin ha Teokratiko nga Eskwelahan ha Ministeryo. Kon an magturutdo diri nakakatambong, nagpapabilin hi Elizabeth katapos han klase ngan iginpipresentar an iya bahin ha magturutdo. Ha iya kataposan nga tuig ha hayskul, hi Elizabeth nagsurat hin napulo-ka-pahina nga report mahitungod han mga kapulsanan han Teokratiko nga Eskwelahan ha Ministeryo ngan iginpresentar ito ha atubangan han usa ka grupo han upat nga magturutdo. Ginhangyo liwat hiya nga maghatag hin modelo nga pahayag ha Teokratiko nga Eskwelahan ha Ministeryo, diin iya ginpili an ulohan nga “Kay Ano nga Gintutugotan han Dios an Karaotan?” Hi Elizabeth nagpapahimulos han edukasyonal nga programa nga gindudumara han mga Saksi ni Jehova ha Teokratiko nga Eskwelahan ha Ministeryo. Usa la hiya han damu nga batan-on nga mga Kristiano nga nagdadayaw kan Jehova pinaagi han pagbuhat han mga butang nga ira hinbaroan tikang ha iya Pulong.

17, 18. (a) Ano an iginsasagdon han Biblia mahitungod han pagin tangkod? (b) Paonan-o naapektohan an usa nga lalaki han tangkod nga paggawi han usa han mga Saksi ni Jehova?

 ¹⁷ An Biblia nagsasagdon ha mga Kristiano nga magin tangkod ha ngatanan nga butang. (Hebreo 13:18) An pagkadiri-tangkod makakadaot han aton relasyon ha iba, ngan labi na gud, kan Jehova mismo. (Proberbios 12:22) An aton masasarigan nga paggawi nagpapamatuod nga ginbubuhat naton an mga butang nga aton hinbaroan, ngan nagpapagios ito ha damu nga labaw nga tumahod ha mga Saksi ni Jehova.

¹⁸ Tagda an eksperyensya han sundalo nga hi Phillip. Hinngalimtan niya kon diin niya ibutang an usa nga blangko, pinirmahan nga tseke ngan diri hiya maaram hito tubtob nga iginbalik ito ha iya ha koreo. An tseke hin-agian han usa han mga Saksi ni Jehova, ngan an usa nga nota nga iginlakip hito nagsiring nga an relihiyoso nga mga tinotoohan han nakaagi hito an nagpagios ha iya nga ibalik ito. Nahipausa hi Phillip. “Nakawatan unta nira ako hin $9,000 [E.U.]!” siring niya. Nasubo hiya ha lain nga okasyon han ginkawat an iya kalo ha singbahan. Matin-aw, usa nga kakilala an nagkuha han iya kalo, samtang iginbalik han usa nga estranghero an yinukot nga dolyares! Oo, an tangkod nga mga Kristiano nagpapasidungog kan Jehova nga Dios!

Padayon nga Buhata an Imo Hinbaroan

19, 20. Paonan-o kita magpapahimulos ha pagbuhat uyon ha Kasuratanhon nga mga butang nga aton hinbabaroan?

¹⁹ Adton nagbubuhat han ira hinbaroan tikang ha Pulong han Dios nakarawat hin damu nga mga kapulsanan. An disipulo nga hi Jakobo nagsurat: “An nagtan-aw ha hingpit nga balaud, an balaud han kaluwasan, ngan nagpapadayon hito, nga diri mamarati nga lilimuton kondi magburuhat nga nagbubuhat, ini nga tawo mabubulahan ha iya buhat.” (Jakobo 1:25) Oo, kon magbuhat kita uyon ha Kasuratanhon nga mga butang nga aton hinbabaroan, magkakaada kita totoo nga kalipayan ngan mas malalamposan naton an mga pag-ipit ha kinabuhi. Labaw ha ngatanan, magkakaada kita han bendisyon ni Jehova ngan paglaom han kinabuhi nga waray kataposan!—Proberbios 10:22; 1 Timoteo 6:6.

²⁰ Salit, magpadayon ha pag-aram ha Pulong han Dios. Regular nga makig-upod ha mga magsiringba ni Jehova, ngan maghatag hin atensyon ha materyal nga iginpapahayag ha Kristiano nga mga katirok. Iaplikar an imo hinbabaroan, padayon ha pagbuhat hito, ngan “an Dios han kamurayaw maupod ha [imo].”—Filipos 4:9.

[Footnote]

Nahinunumdoman Mo Ba?

• Ano “an surubdan han mga putli nga mga pulong,” ngan paonan-o kita makakapadayon ha pagsubad hito?

• Ano nga “mga surumatanon” an kinahanglan isalikway naton?

• Ano nga mga kapulsanan an nakakarawat hadton nagbubuhat han mga butang nga ira hinbabaroan tikang ha Pulong han Dios?

[Mga Pakiana]

[Retrato ha pahina 17]

Paonan-o malilikyan han siyahan nga mga Kristiano nga mahisimang han mga apostata?

[Mga Retrato pahina 18]

An mga liso han pagruhaduha mahimo isabwag pinaagi han media, han Internet, ngan han moderno nga mga apostata

[Retrato ha pahina 19]

Diri maaramon an pagpasarang hin diri-sigurado nga mga sumat

[Mga Retrato ha pahina 20]

Ha trabaho, ha eskwelahan, ngan ha bisan diin, inaaplikar han mga Saksi ni Jehova an ira nababasa ha Pulong han Dios