“Ikaw an Babaye nga Birilhon”

Ini nga mga pulong han kumendasyon iginpahayag ha usa ka batan-on nga Moabita. Usa hiya nga balo nga an ngaran hi Rut, nga umagad han Israelita nga babaye, hi Noemi. Ha pag-ukoy ha Israel mga 3000 ka tuig na an naglabay, han nagmando an mga hukom, hi Rut nagkaada maopay nga ngaran. (Rut 3:11) Paonan-o hiya nagkaada hini nga reputasyon? Hin-o an magpapahimulos tikang ha iya susbaranan?

Tungod kay diri nakaon han “tinapay han kahubya,” hi Rut nagtrabaho hin hilawig nga mga oras ngan maduruto sugad nga parapamurot ha mga uma, salit tungod han iya kamaduruto nakarawat niya iton nga kumendasyon. Bisan kon gintanyagan hiya ha pagpagaan han iya trabaho, nagpadayon hiya ha pagtrabaho, labaw pa han ginlalaoman. Makatirigamnan nga angayan ha iya an paghulagway han Biblia ha usa ka darayawon, may kapas, maduruto nga asawa.—Proberbios 31:10-31; Rut 2:7, 15-17.

An espirituwal nga mga kalidad ni Rut—an iya mapainubsanon, nagsasakripisyo-ha-kalugaringon nga paggawi ngan an iya maunungon nga gugma—amo an nangunguna nga mga hinungdan ha maopay nga reputasyon nga iya napahimulsan. Ha pagbaya ha iya mga ginikanan ngan ha iya natawohan nga tuna, nga gutiay la an paglaom ha pakabiling hin seguridad nga maihahatag han pag-asawa, waray hiya bumulag kan Noemi. Ha pariho nga panahon, iginpahayag ni Rut an hingyap nga mag-alagad kan Jehova, an Dios han iya ugangan. Ha pagpabug-at han iya bili, an asoy han Kasuratan nasiring nga hiya “maoroopay para [kan Noemi] kay han pito nga anak nga kalalakin-an.”—Rut 1:16, 17; 2:11, 12; 4:15.

Bisan kon darayawon an rekord han pagkabirilhon ni Rut ha iya mga kaupod nga mga tawo, mas makatirigamnan an positibo nga pagtagad han Dios ha iya mga kalidad ngan an iya pagbalos ha iya hin pribilehiyo nga magin kaapoy-apoyan ni Jesu-Kristo. (Mateo 1:5; 1 Pedro 3:4) Maopay gud nga susbaranan hi Rut diri la para ha Kristiano nga kababayin-an kondi ha ngatanan nga nag-aangkon nga nagsisingba kan Jehova!