Kapitulo Bainte-tres

Padayon nga Maghulat kan Jehova

Isaias 30:1-33

1, 2. (a) Ano an mensahe han Isaias kapitulo 30? (b) Ano nga mga pakiana an aton paghihisgotan yana?

 HA Isaias kapitulo 30, aton mababasa an dugang nga mga kapahayagan han Dios kontra han magraot. Kondi, ini nga bahin han tagna ni Isaias nagpapatin-aw han pipira nga makalilipay nga mga kalidad ni Jehova. Ha pagkamatuod, an mga kalidad ni Jehova iginsasaysay ha matin-aw nga mga termino salit, siring pa, makikita naton an iya nakakaliaw nga presensya, mababatian an iya naggigiya nga tingog, ngan maaabat an iya nakakatambal nga pagkapot.—Isaias 30:20, 21, 26.

² Bisan pa hito, an mga kahimungto ni Isaias, an apostata nga mga umurukoy ha Juda, nagdumiri ha pagbalik ngadto kan Jehova. Lugod, sinarig hira ha tawo. Ano an inabat ni Jehova mahitungod hini? Ngan paonan-o ini nga bahin han tagna ni Isaias nabulig ha mga Kristiano yana nga panahon nga padayon nga maghulat kan Jehova? (Isaias 30:18) Aton kitaon.

Kalurongan Ngan Kabungkagan

 3. Ano nga plano an iginbubuhayhag ni Jehova?

³ Ha sulod hin pipira ka panahon an mga lider han Juda patago nga nagpaplano ha pamiling hin paagi nga malikyan an pagmando han Asirya. Kondi, hi Jehova nagkikinita. Yana iya iginbubuhayhag an ira plano: “Kairo han mga anak nga masukihon, nasiring hi Jehova, nga nakuha hin sagdon, kondi diri tikang ha akon; ngan nga nakikigbugkos, kondi diri ha akon Espiritu, nga hira magdugang hin sala ngada ha sala; nga linakat ngadto ha Ehipto, ngan waray magpakiana ha akon baba; ha pagpakusog ha ira ngahaw ha kusog ni Paraon, ngan ha pag-ayop ngada ha lambong han Ehipto.”—Isaias 30:1, 2a.

 4. Paonan-o iginbutang han rebelyoso nga katawohan han Dios an Ehipto ha lugar han Dios?

⁴ Kinalasan gud adton nagpaplano nga mga lider han makabati nga iginbuhayhag an ira plano! An pagbiyahe ngadto ha Ehipto basi makig-alyansa hito diri la kay pakiggirra kontra han Asirya; pagrebelde ito kontra kan Jehova nga Dios. Ha panahon ni Hadi David, an nasud naglaom kan Jehova sugad nga balwarte ngan inayop ‘ha lambong han iya mga pako.’ (Salmo 27:1; 36:7) Yana hira ‘dinangop ha kusog ni Paraon’ ngan ‘inayop ha lambong han Ehipto.’ (Isaias 30:2b) Iginbutang nira an Ehipto ha lugar han Dios! Daku gud ito nga pagtraydor!—Basaha an Isaias 30:3-5.

5, 6. (a) Kay ano nga an pakig-alyansa ha Ehipto usa ka makamaratay nga sayop? (b) Ano nga pagbiyahe hadto nga ginhimo han katawohan han Dios an nagpapatin-aw han kalurongan hini nga pagbiyahe ngadto ha Ehipto?

⁵ Sugad hin binabaton an anoman nga ideya nga an misyon ngadto ha Ehipto usa la nga waray planoha nga pagbisita, hi Isaias naghahatag hin dugang pa nga mga detalye. “An [kapahayagan kontra] han kamanampan ha Salatanan. Lahos ha tuna han kasamok ngan kasakit, diin tikang an babaye nga leon ngan an leon, an kolebra ngan an maping-it nga malupad nga halas, ira gindara an ira manggad dida ha mga sugbong han batan-on nga mga asno, ngan an ira mga bahandi dida ha mga bukdol han mga kamelyo.” (Isaias 30:6a) Klaro nga ginplano hin maopay an biyahe. An mga sinugo nag-organisa hin karaban han mga kamelyo ngan mga asno, nga ira kinargahan hin marahalon nga mga butang ngan gintugwayan tipakadto ha Ehipto nga naagi ha usa nga kamingawan nga gin-uukyan hin maaringasa nga mga leon ngan malara nga mga halas. Ha kataposan, an mga sinugo inabot ha ira destinasyon ngan iginhatag an ira mga bahandi ha mga Ehiptohanon. Ira ginpalit an panalipod—o ito an ira ginhunahuna. Kondi, hi Jehova nasiring: “[Para] ha katawohan . . . diri [ito magigin] mapulsanon ha ira. Kay an Ehipto nabulig ha kawang, ngan ha waray tinguha: busa akon hiya tinawag nga Rahab nga nalingkod ha mahadong.” (Isaias 30:6b, 7) An “Rahab,” usa nga ‘daku nga hayop ha dagat,’ nagsimbolo ha Ehipto. (Isaias 51:9, 10) Nagsasaad hiya han ngatanan nga butang kondi waray ginhihimo. An pakig-alyansa han Juda ha iya usa nga makamaratay nga sayop.

⁶ Samtang iginsasaysay ni Isaias an pagbiyahe han mga sinugo, bangin nahinunumdoman han iya mga mamarati an pariho nga pagbiyahe nga ginhimo ha panahon ni Moises. An ira mga kaapoy-apoyan naglakat dida gud mismo hiton “makalilisang nga kamingawan.” (Deuteronomio 8:14-16) Kondi, ha panahon ni Moises, an mga Israelita nagbiyahe pahirayo ha Ehipto ngan ha paggawas tikang ha pagkabihag. Hini nga panahon an mga sinugo nagbibiyahe ngadto ha Ehipto ngan, ha pagkamatuod, ngadto ha pagpasakop. Kalurongan gud! Hinaot diri gud naton himoon an sugad nga diri-maaramon nga desisyon ngan balyoan an aton espirituwal nga kagawasan hin pagkauripon!—Itanding an Galasia 5:1.

Pagkontra ha Mensahe han Propeta

 7. Kay ano nga iginpasurat ni Jehova kan Isaias an Iya pahamangno ha Juda?

⁷ Ginsusumatan ni Jehova hi Isaias nga isurat an mensahe nga iginhatag pa la niya basi “ini ma para ha panahon nga umarabot para [ha pagpamatuod] ha kadayonan.” (Isaias 30:8) An diri pag-uyon ni Jehova ha pagpasulabi han pakig-alyansa ha tawo hin labaw kay ha pagsarig ha Iya kinahanglan isurat para ha kapulsanan han tiarabot nga mga henerasyon—upod na an aton henerasyon yana nga panahon. (2 Pedro 3:1-4) Kondi may-ada mas apurado pa nga panginahanglan hin sinurat nga rekord. “Ini amo an katawohan nga masukihon, mga anak nga buwaon, mga anak nga diri namamati ha balaud ni Jehova.” (Isaias 30:9) Iginsalikway han katawohan an sagdon  han Dios. Salit, kinahanglan isurat ito basi ha urhi diri hira makagnigar nga kinarawat nira an husto nga pahamangno.—Proberbios 28:9; Isaias 8:1, 2.

8, 9. (a) Ha ano nga paagi nangangalimbasog an mga lider han Juda nga aghaton an mga propeta ni Jehova ha pagkompromiso? (b) Paonan-o ipinapakita ni Isaias nga diri hiya mahahadlok?

⁸ Iginhahatag yana ni Isaias an usa nga ehemplo han rebelyoso nga paggios han katawohan. Hira “nasiring ha mga manarag-an: ayaw pagkita; ngan ha mga manaragna: Ayaw panagna ha amon hin mag-opay nga mga butang, pagyakan ha amon hin maghamis nga mga butang, panagna hin mga limbong.” (Isaias 30:10) Ha pagsugo nga umundang na an matinumanon nga mga propeta ha pagyakan han “mag-opay,” o totoo, ngan ha pagyakan lugod han “maghamis” ngan “limbong,” o buwa, ipinapakita han mga lider han Juda nga karuyag nira nga gitikon an ira mga talinga. Karuyag nira dayawon, diri hukman. Ha ira hunahuna, bisan hin-o nga propeta nga diri karuyag managna sumala han ira karuyag sadang ‘umiwas tikang ha dalan, sumimang tikang ha agianan.’ (Isaias 30:11a) Sadang hiya magyakan han mga butang nga makaruruyag ha talinga o bug-os nga umundang na ha pagsangyaw!

⁹ Iginpipirit han mga kaaway ni Isaias: “Pahunonga tikang ha amon atubangan an Baraan nga Usa ha Israel.” (Isaias 30:11b) Paundanga hi Isaias ha pagyinakan ha ngaran ni Jehova, “an Baraan nga Usa ha Israel”! Ini mismo nga titulo nakakaaringit ha ira tungod kay an hitaas nga mga suruklan ni Jehova nagbubuhayhag han ira mangil-ad nga kahimtang. Ano an reaksyon ni Isaias? Hiya nagpapahayag: “Ha sugad hini nasiring an Baraan nga Usa ha Israel.” (Isaias 30:12a) Waray pag-alang nga iginyayakan ni Isaias an mga pulong mismo nga diri karuyag hibatian han mga nakontra ha iya. Diri hiya mahahadlok. Pagkamaopay nga susbaranan para ha aton! Kon may kalabotan ha pagpasamwak han mensahe han Dios, an mga Kristiano kinahanglan diri gud magkompromiso. (Buhat 5:27-29) Pariho kan Isaias, hira padayon nga nagpapasamwak: ‘Ha sugad hini nasiring hi Jehova’!

An mga Resulta han Pagrebelde

10, 11. Ano an magigin mga resulta han pagrebelde han Juda?

¹⁰ Iginsalikway han Juda an pulong han Dios, sinarig ha buwa, ngan tinapod ‘ha limbong.’ (Isaias 30:12b) Ano an magigin mga resulta? Imbes nga bumaya ha eksena hi Jehova sugad han karuyag han nasud, pahihinaboon niya nga diri na umiksister an nasud! Tigda ngan bug-os nga mahitatabo ini, sugad han pinabug-atan ni Isaias ha usa nga ilustrasyon. An pagrebelde han nasud pariho hin “usa nga kaluhoan nga andam ha kahulog, nga nabutol dida ha hitaas nga kuta, kanay kabungkagan maabot ha kadagmitan ha usa ka dali.” (Isaias 30:13) Sugad la nga an nagtitikadaku nga butol ha hitaas nga kuta ha kataposan makakapukan han kuta, sugad man an nagtitikaduro nga pagrebelde han mga kadungandungan ni Isaias makakapukan han nasud.

¹¹ Ipinapakita ni Isaias pinaagi han usa pa nga ilustrasyon an pagkabug-os han tiarabot nga kabungkagan: “Iya ini bubungkagon sugad han garamiton nga nabuong han parapanhimo hin daba, nga ini ginpinitpinit nga waray ginhungay: ha pagkaagi nga waray hiaagian dida ha mga tipik hini nga usa nga bika nga ipakakakuha hin kalayo tikang ha haringan, o ipakakasarok hin tubig tikang ha tangke.” (Isaias 30:14) An kabungkagan han Juda magigin bug-os gud salit waray importante nga butang nga magpapabilin—bisan an usa nga tipik han tibod nga igo an kadaku ha pagkuha han mapaso nga mga agbon tikang ha haringan o ha pagsarok hin tubig tikang ha lugar nga hanangon. Makaarawod gud nga kataposan! Tigda la ngan bug-os gud pariho hito an tiarabot nga kabungkagan hadton nagrirebelde kontra han totoo nga pagsingba yana nga panahon.—Hebreo 6:4-8; 2 Pedro 2:1.

Iginsalikway an Tanyag ni Jehova

12. Paonan-o malilikyan han katawohan han Juda an kabungkagan?

¹² Kondi, para ha mga mamarati ni Isaias, mahimo likyan an kabungkagan. May-ada paagi ha pagpalagiw. An propeta nagsasaysay: “Ha sugad hini nasiring an Ginoo hi Jehova, an Baraan nga Usa ha Israel: Ha pagbalik ngan ha pagpahuway kamo maluluwas; ha pagkahilom ngan ha pagsarig maaamo an iyo kusog.” (Isaias 30:15a) Hi Jehova andam ha pagluwas ha iya katawohan—kon magpakita hira hin pagtoo pinaagi han “pagpahuway,” o paglikay ha pamiling hin kaluwasan pinaagi han mga kaalyado nga mga tawo, ngan pinaagi han ‘pagpabilin nga diri nababaraka,’ o pagpakita hin pagsarig ha gahum han Dios ha pagpanalipod pinaagi han diri kahadlok. “[Kondi],” hi Isaias nagsusumat ha katawohan, “diniri kamo.”—Isaias 30:15b.

13. Ha ano sinarig an mga lider han Juda, ngan makatadunganon ba an sugad nga pagsarig?

¹³ Katapos, hi Isaias dugang pa nga nagsasaysay: “Kondi kamo nagsiring: Diri, tungod kay kami mapalagiw dida ha kakabayohan; busa kamo mapalagiw: ngan, kami mananakay dida ha maglaksi; busa hira nga magbubukod ha iyo magmamalaksi.” (Isaias 30:16) An mga taga-Judea naghuhunahuna nga an maglaksi nga kakabayohan, imbes nga hi Jehova, an makakaluwas ha ira. (Deuteronomio 17:16; Proberbios 21:31) Kondi, binaton an propeta, nga an ira pagsarig magigin imahinasyon la tungod kay hiaabotan hira han ira mga kaaway. Bisan an damu hinduro diri makakabulig ha ira. “Usa ka yukot an mapalagiw ha kanan usa pagtarhog; ha kanan lima pagtarhog mapalagiw kamo.” (Isaias 30:17a) An kasundalohan han Juda malilisang ngan mapalagiw ha pagsinggit han pipira la nga kaaway. a Ha kataposan, an nahisalin la an mahibibilin, nga nag-uusahan, “sugad hin parola dida ha igbaw han bukid, ngan sugad hin bandera dida ha bawbaw han bungtod.” (Isaias 30:17b) Sugad han igintagna, han ginbungkag an Jerusalem han 607 A.K.P., an nanhibilin la an naluwas.—Jeremias 25:8-11.

[Footnote]

[Mga Pakiana]