Kon San-o Maaramon an Pagpalagiw

HA KALIBOTAN yana nga panahon agsob nga nakikita an pagin barumbado ngan pagin mabangis o pag-atubang ha mga pagsulay. An usa ka tawo nga napalagiw tikang ha usa nga sitwasyon kasagaran nga gintatagad sugad nga maluya o matalaw. Bangin tamayon pa ngani hiya.

Kondi, iginpapatin-aw han Biblia nga may-ada mga panahon nga maaramon ngan maisugon an pagpalagiw. Ha pagparig-on hini nga kamatuoran, antes sugoon an iya mga disipulo ha ministeryo, hi Jesu-Kristo nagsiring ha ira: “Kon kamo pagtimarat-an nira dinhi hini nga bungto, palagiw kamo ngadto ha usa.” (Mateo 10:23) Oo, an mga disipulo ni Jesus kinahanglan mangalimbasog ha pagpalagiw tikang ha mga nagtitimaraot ha ira. Diri hira sadang magbuhat hin anoman nga pariho han pakig-away tungod ha relihiyon, nga nagpipirit nga makombirte an iba. May-ada hira mensahe han kamurayawan. (Mateo 10:11-14; Buhat 10:34-37) Salit imbes nga masina, an mga Kristiano kinahanglan pumalagiw, magpahirayo tikang ha nakakapukaw han kasina. Hini nga paagi, natipigan nira an maopay nga konsensya ngan an ira presyoso nga relasyon kan Jehova.—2 Korinto 4:1, 2.

An magkaiba nga ehemplo makikita ha libro han Biblia nga Proberbios. Nagsusumat ito mahitungod han usa ka batan-on nga olitawo nga, imbes nga pumalagiw ha pagsulay, kinadto ha usa nga bigaon “sugad hin baka nga nakadto ha pangihawan.” Ano an resulta? Kalamidad tungod ha pagpadaog ha pagsulay diin nahidabi an iya kinabuhi mismo.—Proberbios 7:5-8, 21-23.

Ano man kon sulayon ka ha pagbuhat hin seksuwal nga imoralidad o umatubang ha iba pa nga posible nga peligro? Sumala ha Pulong han Dios, an angayan nga buhaton amo an pumalagiw, magpahirayo dayon tikang hito nga lugar.—Proberbios 4:14, 15; 1 Korinto 6:18; 2 Timoteo 2:22.