Padayon nga Mag-alagad kan Jehova nga May Marig-on nga Kasingkasing
Padayon nga Mag-alagad kan Jehova nga May Marig-on nga Kasingkasing
“An akon kasingkasing marig-on, O Dios, an akon kasingkasing marig-on.”—SALMO 57:7.
1. Kay ano nga magkakaada kita hin karig-on pariho han kan David?
HI Jehova makakabulig ha aton nga magin marig-on ha Kristiano nga pagtoo, basi magpabilin kita ha totoo nga Kristianidad sugad nga iya dedikado nga mga surugoon. (Roma 14:4) Salit, magkakaada kita hin karig-on pariho han kan salmista David, nga napagios ha pagkanta: “An akon kasingkasing [marig-on], O Dios.” (Salmo 108:1) Kon an aton kasingkasing marig-on, mapapagios kita ha pagtuman han aton dedikasyon ha Dios. Ngan pinaagi han paglaom ha iya para han giya ngan kusog, mapapamatud-an naton nga kita diri-nababantad, marig-on ha determinasyon ngan pagtoo sugad nga mga magtiripig han integridad, ‘pirme damu an ginbubuhat ha buruhaton han Ginoo.’—1 Korinto 15:58.
2, 3. Ano an iginpapasabot han mga pagsagda ni Pablo nga nakarekord ha 1 Korinto 16:13?
2 Ha mga pagsagda ha mga sumurunod ni Jesus ha kadaan nga Korinto kondi naaplikar gud ha mga Kristiano yana, hi apostol Pablo nagsiring: “Magbantay kamo, magrig-on kamo ha pagtoo, panggawi kamo sugad hin mga lalaki, magmakusog kamo.” (1 Korinto 16:13) Ha Griego an kada usa hini nga mga sugo aada ha presente nga porma, salit nagsasagda hin padayon nga buhat. Ano an iginpapasabot hini nga sagdon?
3 Mahimo kita ‘magpabilin nga nagmamata’ ha espirituwal pinaagi han pagkontra ha Yawa ngan pagpabilin nga duok ha Dios. (Jakobo 4:7, 8) An pagsarig kan Jehova nabulig ha aton nga magpabilin nga nagkakaurosa ngan ‘magin marig-on ha Kristiano nga pagtoo.’ Kita—upod na an damu nga kababayin-an nga kaupod naton—‘nanggagawi sugad hin mga lalaki’ pinaagi han maisugon nga pag-alagad ha Dios sugad nga mga parasamwak han Ginhadian. (Salmo 68:11) Kita ‘nagmamakusog’ pinaagi han padayon nga paglaom ha aton langitnon nga Amay para han kusog ha pagbuhat han iya kaburut-on.—Filipos 4:13.
4. Ano an nagtugway ha aton ha bawtismo sugad nga mga Kristiano?
4 Ipinakita naton nga kinarawat naton an totoo nga pagtoo han bug-os nga nagdedikar kita ngadto kan Jehova ngan ginsimbolohan ito pinaagi han pagpabawtismo ha tubig. Kondi ano an nagtugway ha aton bawtismo? Siyahan nagkuha kita hin husto nga kahibaro ha Pulong han Dios. (Juan 17:3) Nagpatubo ini hin pagtoo ngan nagpagios ha aton nga magbasol, ipinapakita an totoo nga kasubo ha naglabay nga sayop nga mga buhat. (Buhat 3:19; Hebreo 11:6) Sunod, nakombirte kita, tungod kay binaya kita ha sayop nga mga buhat basi magpadayon ha pagkinabuhi uyon ha kaburut-on han Dios. (Roma 12:2; Efeso 4:23, 24) Ginsundan ini han bug-os-kasingkasing nga dedikasyon ngadto kan Jehova ha pag-ampo. (Mateo 16:24; 1 Pedro 2:21) Naghangyo kita ha Dios hin maopay nga konsensya ngan ginbawtismohan sugad nga simbolo han aton dedikasyon ha iya. (1 Pedro 3:21) An pamalandong hini nga mga pitad mabulig ha aton nga magpabilin nga nakasentro ha panginahanglan hin padayon nga pangalimbasog ha pagtuman han aton dedikasyon ngan magpadayon nga nag-aalagad kan Jehova nga may marig-on nga kasingkasing.
Magpadayon ha Imo Pamiling han Husto nga Kahibaro
5. Kay ano nga sadang kita magpadayon ha pagkuha hin kahibaro ha Kasuratan?
5 Basi matuman an aton dedikasyon ha Dios, kinahanglan magpadayon kita ha pagkuha han nagpaparig-on-han-pagtoo nga kahibaro ha Kasuratan. Makalilipay gud an pagkaon hin espirituwal nga karaunon han siyahan nga nahibaro kita han kamatuoran han Dios! (Mateo 24:45-47) Ito nga “mga pagkaon” marasa—ngan nagpakusog ito ha aton ha espirituwal. Yana importante an pagpadayon ha pagkaon hin masustansya nga espirituwal nga karaunon basi matipigan naton nga marig-on an aton kasingkasing sugad nga dedikado nga mga surugoon ni Jehova.
6. Paonan-o ka nabuligan nga mapatubo an kinasingkasing nga apresasyon ha kamatuoran han Biblia?
6 Ginkikinahanglan an pangalimbasog basi magkaada hin dugang nga kahibaro ha Kasuratan. Pariho ito han pagbiling hin nakatago nga mga bahandi—nga nagkikinahanglan hin daku nga pangalimbasog. Kondi may balos gud an pakabiling ‘han kahibaro han Dios’! (Proberbios 2:1-6) Han siyahan nga gin-adman mo an Biblia upod han usa nga parasamwak han Ginhadian, bangin ginamit niya an libro nga Kahibaro nga Nagtutugway Ngadto ha Kinabuhi nga Waray Kataposan. Bangin daku nga panahon an ginamit ha paghisgot han tagsa nga kapitulo, bangin sobra ha usa nga sesyon. Nagpahimulos ka han ginbasa ngan ginhisgotan an gin-unabi nga mga teksto. Kon an usa nga punto makuri masabtan, iginsaysay ito. An nagdudumara han pag-aram ha Biblia ha imo nag-andam hin maopay, nag-ampo para han espiritu han Dios, ngan binulig ha imo nga mapatubo an kinasingkasing nga apresasyon ha kamatuoran.
7. Ano an nakakahimo ha usa ka tawo nga magin kuwalipikado ha pagtutdo han kamatuoran han Dios ha iba?
7 Angayan ini nga pangalimbasog, kay hi Pablo nagsurat: “An gintutdoan han pulong paangbiton niya ha ngatanan nga mag-opay nga mga bagay an nagtutdo ha iya.” (Galasia 6:6) Dinhi ipinapakita han Griego nga teksto nga an mga katutdoan han Pulong han Dios iginpasilsil ha hunahuna ngan kasingkasing han usa nga ‘gintututdoan.’ An imo pagin tinutdoan hito nga paagi nakakahimo ha imo nga magin kuwalipikado ha pagtutdo ha iba pa. (Buhat 18:25) Basi magin maunungon ha imo dedikasyon, kinahanglan tipigan mo an imo espirituwal nga kahimsog ngan karig-on pinaagi han padayon nga pag-aram ha Pulong han Dios.—1 Timoteo 4:13; Tito 1:13; 2:2.
Hinumdumi an Imo Pagbasol Ngan Kakombirte
8. Paonan-o nga posible an pagpakita pirme han diosnon nga paggawi?
8 Nahinunumdoman mo ba an katalwasan nga inabat mo han nahibaro ka han kamatuoran, nagbasol, ngan katapos inabat an pagpasaylo han Dios nga iginbasar ha pagtoo ha halad lukat ni Jesus? (Salmo 32:1-5; Roma 5:8; 1 Pedro 3:18) Sigurado nga diri mo karuyag bumalik ha makasasala nga pagkinabuhi. (2 Pedro 2:20-22) Kaupod han iba nga mga butang, an regular nga pag-ampo ngadto kan Jehova mabulig ha imo nga ipakita pirme an diosnon nga paggawi, tumanon an imo dedikasyon, ngan padayon nga mag-alagad kan Jehova nga matinumanon.—2 Pedro 3:11, 12.
9. Tungod kay iginsalikway na an makasasala nga mga buhat, ano nga buhat an sadang naton igpadayon?
9 Tungod kay nakombirte pinaagi han pagsalikway han makasasala nga mga buhat, padayon nga pamilnga an bulig han Dios ha pagtipig han imo kasingkasing nga marig-on. Sugad ito hin nagbibiyahe ka dida ha sayop nga dalan kondi ginkonsulta mo an masasarigan nga mapa ngan nagtikang magbiyahe dida ha husto nga dalan. Ayaw simang yana dida ha imo dalan. Padayon nga sumarig ha giya han Dios, ngan magin determinado ha pagpabilin ha dalan ngadto ha kinabuhi.—Isaias 30:20, 21; Mateo 7:13, 14.
Ayaw Gud Hingalimti an Imo Dedikasyon Ngan Bawtismo
10. Ano nga mga punto an sadang hinumdoman naton mahitungod han aton dedikasyon ha Dios?
10 Hinumdumi nga nagdedikar ka ngadto kan Jehova ha pag-ampo, nga ginlalantaw an matinumanon nga pag-alagad ha kadayonan. (Judas 20, 21) An dedikasyon nagpapasabot hin paglain, o pagbulag, para ha sagrado nga katuyoan. (Lebitiko 15:31; 22:2) An imo dedikasyon diri temporaryo nga ginkasabotan o obligasyon ha mga tawo. Permanente ito nga dedikasyon ngadto ha Soberano han Uniberso, ngan an pagtuman hito nagkikinahanglan hin pagkamaunungon ha Dios ha bug-os mo nga kinabuhi. Oo, ‘mabuhi man o mamatay, kan Jehova kita.’ (Roma 14:7, 8) An aton kalipay nadepende ha aton pagpasakop ha iya kaburut-on ngan ha aton pagpadayon ha pag-alagad ha iya nga may marig-on nga kasingkasing.
11. Kay ano nga sadang mo hinumdoman an imo bawtismo ngan an kahulogan hito?
11 Hinumdumi pirme an imo bawtismo sugad nga simbolo han imo bug-os-kasingkasing nga dedikasyon ha Dios. Diri ito pinirit nga bawtismo, tungod kay ikaw mismo an nagdesisyon. Determinado ka na ba yana ha pagbuhat han imo kaburut-on uyon ha kaburut-on han Dios ha bug-os mo nga kinabuhi? Naghangyo ka ha Dios hin maopay nga konsensya ngan ginbawtismohan sugad nga simbolo han imo dedikasyon ha iya. Tipigi iton maopay nga konsensya pinaagi han pagtuman han imo dedikasyon, ngan maabot ha imo an hura nga bendisyon ni Jehova.—Proberbios 10:22.
May-ada Bahin an Imo Kaburut-on
12, 13. Paonan-o an aton kalugaringon nga kaburut-on may bahin ha dedikasyon ngan bawtismo?
12 An dedikasyon ngan bawtismo tinuod nga nagdadara hin damu nga mga kapulsanan ha minilyon nga mga tawo ha bug-os nga tuna. Kon aton ginsisimbolohan an aton dedikasyon ha Dios pinaagi han bawtismo ha tubig, namamatay kita may kalabotan ha aton naglabay nga pagkinabuhi kondi diri ha aton kalugaringon nga kaburut-on. Sugad nga mga tumuroo nga gintutdoan hin husto, ginbuhat naton an aton kalugaringon nga kaburut-on han nagdedikar kita ha Dios ha pag-ampo ngan nagpabawtismo. An pagdedikar ngan pagpabawtismo nagkikinahanglan nga hibaroan naton kon ano an kaburut-on han Dios ngan katapos kinaburut-on nga pilion an pagbuhat hito. (Efeso 5:17) Hito nga paagi ginsusubad naton hi Jesus, nga nagbuhat han iya kaburut-on han binayaan niya an iya mga garamiton sugad nga panday, nagpabawtismo, ngan bug-os nga ginamit an iya kalugaringon ha pagbuhat han kaburut-on han iya langitnon nga Amay.—Salmo 40:7, 8; Juan 6:38-40.
13 Gintuyo ni Jehova nga Dios nga an iya Anak ‘mahingpit pinaagi han mga pag-antos.’ Salit kinahanglan buhaton ni Jesus an iya kaburut-on basi matinumanon nga makailob han sugad nga mga pag-antos. Tungod hito, hiya naghalad “hin mga pag-ampo ngan pangamuyo upod an mga magbaskog nga mga pagsinggit ngan mga luha, . . . ngan pinamatian hiya tungod han iya matinalahuron nga kahadlok.” (Hebreo 2:10, 18; 5:7, 8) Kon aton ipinapakita an pariho nga matinalahuron nga kahadlok ha Dios, sigurado liwat kita nga ‘pamamatian,’ ngan makakasarig kita nga paririg-unon kita ni Jehova sugad nga iya dedikado nga mga Saksi.—Isaias 43:10.
Matitipigan Mo an Marig-on nga Kasingkasing
14. Kay ano nga sadang basahon naton an Biblia kada adlaw?
14 Ano an mabulig ha imo nga tipigan an marig-on nga kasingkasing ngan hito nga paagi tumanon an imo dedikasyon ha Dios? Basi magkaada dugang pa gud nga kahibaro ha Pulong han Dios, basaha an Biblia kada adlaw. Ini an pirme iginsasagda ha aton han ‘matinumanon ngan maaramon nga uripon’ nga pagbuhaton. Iginsasagdon ito tungod kay an pagtuman han aton dedikasyon nagkikinahanglan nga magpadayon kita ha paglakat ha kamatuoran han Dios. Kon an organisasyon ni Jehova tinuyo nga nauyon ha palso nga mga katutdoan, diri na unta isasagdon ha mga Saksi ni Jehova ngan ngada hadton ira ginsasangyawan nga basahon an Biblia.
15. (a) Ano an sadang pagtagdon kon naghihimo hin mga desisyon? (b) Kay ano nga masisiring nga an sekular nga trabaho diri amo an pinakaimportante ha usa nga Kristiano?
15 Kon naghihimo hin mga desisyon, tagda pirme kon paonan-o makakaapekto ito ha pagtuman han imo dedikasyon kan Jehova. Bangin may kalabotan ini ha imo sekular nga trabaho. Nangangalimbasog ka ba nga mabuligan ka hito ha pagpauswag han totoo nga pagsingba? Bisan kon nakikita han mga agaron ha kabug-osan nga masasarigan ngan maopay magtrabaho an dedikado nga mga Kristiano, naoobserbahan liwat nira nga an mga Saksi ni Jehova diri sobra kaambisyoso nga mahiuna ha kalibotan ngan diri nakikigkompetensya ha iba para ha pinakahitaas nga mga katungdanan. Tungod ini kay an tumong han mga Saksi diri amo an pagkaada hin bahandi, kabantogan, dungog, o gahum. Para hadton nagtutuman han ira dedikasyon ha Dios, an pinakaimportante nga butang amo an pagbuhat han kaburut-on han Dios. An sekular nga trabaho nga nakakabulig ha ira nga magkaada han mga kinahanglanon ha kinabuhi usa nga panginabuhi nga ikaduha la an bili. Pariho kan apostol Pablo, an ira panginabuhi, o pinakaimportante nga buruhaton, amo an Kristiano nga ministeryo. (Buhat 18:3, 4; 2 Tesalonika 3:7, 8; 1 Timoteo 5:8) Inuuna mo ba pirme ha imo kinabuhi an mga interes han Ginhadian?—Mateo 6:25-33.
16. Ano an bubuhaton naton kon an duro nga kabaraka nagpapakuri ha pagtuman han aton dedikasyon ha Dios?
16 An iba bangin nabubug-atan hinduro han magkalainlain nga mga kabaraka antes nira hinbaroan an kamatuoran. Kondi an ira kasingkasing napuno hin kalipay, apresasyon, ngan gugma ha Dios han kinarawat nira an paglaom han Ginhadian! An pamalandong ha mga bendisyon nga ira pinahihimulsan tikang hadto makakabulig ha ira ha pagtuman han ira dedikasyon kan Jehova. Ha luyo nga bahin, ano man kon an duro nga kabaraka tungod han mga problema nga ordinaryo ha kinabuhi dinhi hini nga sistema nagtatarhog yana nga lumsan “an pulong han Dios,” sugad la nga an mga tunok mahimo makaulang han mga binhi nga tumubo tubtob ha pamunga? (Lukas 8:7, 11, 14; Mateo 13:22; Markos 4:18, 19) Kon inaabat mo nga nagtitikang ini mahitabo ha imo o ha imo pamilya, ihatag an imo kabaraka ngadto kan Jehova ngan mag-ampo nga buligan ka niya nga magtubo ha gugma ngan apresasyon. Kon ihatag mo an imo pinas-an ngadto ha iya, susuportahan ka niya ngan tatagan ka hin kusog basi magpadayon ha pag-alagad ha iya nga malipayon nga may marig-on nga kasingkasing.—Salmo 55:22; Filipos 4:6, 7; Pahayag 2:4.
17. Paonan-o nga posible malamposan an makuri nga mga pagsari?
17 Magpadayon ha regular nga pag-ampo ngadto kan Jehova nga Dios, sugad han imo pag-ampo han nagdedikar ka ha iya. (Salmo 65:2) Kon nasusulay ha pagbuhat hin sayop o kon naatubang ha makuri nga pagsari, hangyoa an giya han Dios ngan an iya bulig ha pagsunod hito. Hinumdumi an panginahanglan hin pagtoo, kay an disipulo nga hi Jakobo nagsurat: “Kon may-ada ha iyo an nakulang hin kaaram, mangaro hiya ha Dios, nga mahinatagon ha ngatanan ngan diri mabadlungon; ngan ito ihahatag ha iya. Kondi mangaro unta hiya nga may pagtoo, ha waray pagruhaduha; kay an nagruruhaduha sugad hin usa nga balod ha dagat nga iginpapalid han hangin ngan nalutaw. Busa diri maghunahuna an sugad nga tawo nga hiya makarawat hin bisan ano nga bagay ha Ginoo; An tawo nga duha an hunahuna, maruhaduhaon ha ngatanan niya nga paagi.” (Jakobo 1:5-8) Kon an usa nga pagsari baga in mabug-at hinduro, makakasiguro kita hini: “Waray pagsulay nga maabot ha iyo nga diri sadang maantos han tawo: kondi an Dios matinumanon, nga diri matugot nga pagsulayon kamo labaw ha iyo [maiilob]; kondi upod ha pagsulay mahatag liwat hiya hin katigayonan ha paglikay, basi nga kamo makahimo ha pag-antos.”—1 Korinto 10:13.
18. Ano an bubuhaton naton kon an seryoso nga tinatago nga sala nagpapaluya han aton determinasyon ha pagtuman han aton dedikasyon kan Jehova?
18 Kumusta man kon an seryoso nga tinatago nga sala nakakaguol han imo konsensya ngan nakakapaluya han imo determinasyon nga tumanon an imo dedikasyon ha Dios? Kon ikaw mabinasulon, maliliaw ka ha paghibaro nga hi Jehova ‘diri magtatamay han nadaot ngan mabinasulon nga kasingkasing.’ (Salmo 51:17) Hangyoa an bulig han mahigugmaon nga Kristiano nga mga tigurang, maaram nga hira—ha pagsubad kan Jehova—diri magtatamay han imo hingyap nga makaeksperyensya han pagpahiuli han maopay nga relasyon ha imo langitnon nga Amay. (Salmo 103:10-14; Jakobo 5:13-15) Katapos, pinaagi han pagparig-on utro han espirituwal nga kusog ngan marig-on nga kasingkasing, makakahimo ka hin tadong nga mga dalan para han imo mga tiil ngan mahibabaro nga posible an pagtuman han imo dedikasyon ha Dios.—Hebreo 12:12, 13.
Magpadayon ha Pag-alagad nga May Marig-on nga Kasingkasing
19, 20. Kay ano nga importante nga magpadayon kita ha pagtuman han aton dedikasyon?
19 Hinin magpakalilisang nga mga panahon, kinahanglan mangalimbasog kita ha pagtuman han aton dedikasyon ngan magpadayon ha pag-alagad ha Dios nga may marig-on nga kasingkasing. Hi Jesus nagsiring: “An magpadayon tubtob ha kataposan, ini amo an maluluwas.” (Mateo 24:13) Tungod kay kita nagkikinabuhi ha “kataposan nga mga adlaw,” an kataposan mahimo umabot ha anoman nga oras. (2 Timoteo 3:1) Dugang pa, waray usa ha aton an nakakasiguro nga buhi kita buwas. (Jakobo 4:13, 14) Salit importante nga magpadayon kita ha pagtuman han aton dedikasyon yana!
20 Pinabug-atan ini ni apostol Pedro ha iya ikaduha nga surat. Ipinakita niya nga sugad la nga an diri-diosnon nga mga tawo nawara ha Baha, sugad man an simboliko nga tuna, o maraot nga sosiedad han tawo, bubungkagon durante han “adlaw ni Jehova.” Salit hi Pedro nagsiring: “Mationan-o an iyo mga ginawian . . . ha ngatanan nga putli nga pangabuhi ngan pagtahod ha Dios”! Iya liwat ginsagda hira: “Mga hinigugma, nga hinbaroan na niyo ini nga mga butang nga daan, magtagam kamo, bangin kamo magkahulog tikang ha iyo mga karig-onan, tungod han pagdad-a ha iyo [han palso nga mga magturutdo ngan diri-diosnon nga mga tawo].” (2 Pedro 3:5-17) Makasurubo gud kon mahisimang an bawtismado nga tawo ngan umabot an kataposan han iya kinabuhi nga napakyas ha pagtipig han marig-on nga kasingkasing!
21, 22. Paonan-o an mga pulong han Salmo 57:7 napamatud-an nga totoo ha kahimtang ni David ngan han totoo nga mga Kristiano?
21 An imo determinasyon nga tumanon an imo dedikasyon ha Dios mapaparig-on kon hinumdoman mo an malipayon nga adlaw han imo bawtismo ngan pangaroon an bulig han Dios basi an imo mga pulong ngan mga buhat makapalipay han iya kasingkasing. (Proberbios 27:11) Diri gud ginpapakyas ni Jehova an iya katawohan, ngan sigurado nga sadang magin matinumanon kita ha iya. (Salmo 94:14) Nagpakita hiya hin pagpaid ngan kalooy pinaagi han pagdaot han mga plano han mga kaaway ngan pagluwas kan David. Tungod kay mapasalamaton hini, iginpahayag ni David an karig-on, an pagkadiri-nababantad, han iya gugma ha iya Paratalwas. May hilarom nga pagbati, hiya nagkanta: “An akon kasingkasing marig-on, O Dios, an akon kasingkasing marig-on: Magkakanta ako, oo, magkakanta ako hin mga [pagdayaw].”—Salmo 57:7.
22 Pariho kan David, an totoo nga mga Kristiano diri nanluluya ha ira debosyon ha Dios. Nga may-ada marig-on nga mga kasingkasing, ira pinasasalamatan hi Jehova tungod han ira katalwasan ngan kaluwasan, nga ha iya malipayon nga nagkakanta hira hin mga pagdayaw. Kon marig-on an imo kasingkasing, masarig ito ha Dios, ngan pinaagi han iya bulig matutuman mo an imo dedikasyon. Oo, masusugad ka han ‘usa nga matadong’ nga mahitungod ha iya an salmista nagkanta: “Diri hiya mahahadlok tungod han mga sumat nga magraot: An iya kasingkasing [marig-on], nga nasarig kan Jehova.” (Salmo 112:6, 7) Pinaagi han pagtoo ha Dios ngan bug-os nga pagsarig ha iya, matutuman mo an imo dedikasyon ngan padayon nga mag-aalagad ka kan Jehova nga may marig-on nga kasingkasing.
Nahinunumdoman Mo Ba?
• Kay ano nga sadang kita magpadayon ha pagkuha hin husto nga kahibaro ha Biblia?
• Kay ano nga sadang naton hinumdoman an aton pagbasol ngan kakombirte?
• Paonan-o kita nagpapahimulos ha paghinumdom han aton dedikasyon ngan bawtismo?
• Ano an mabulig ha aton nga magpadayon ha pag-alagad kan Jehova nga may marig-on nga kasingkasing?
[Mga Pakiana]
[Mga Retrato ha pahina 18]
An paghimo han Kristiano nga ministeryo nga aton pinakaimportante nga buruhaton nabulig ha aton nga magpadayon ha pag-alagad kan Jehova nga may marig-on nga kasingkasing
[Retrato ha pahina 18]
Gintitipigan mo ba an imo espirituwal nga kahimsog pinaagi han adlaw-adlaw nga pagbasa ha Pulong han Dios?