Maopay nga Panguna—Diin Naton Mabibilngan Ito?

“AN TAGSATAGSA nga balay ginhimo hin usa,” siring han Biblia, “kondi an naghimo han ngatanan nga mga butang amo an Dios.” (Hebreo 3:4; Pahayag 4:11) Tungod kay an totoo nga Dios, hi Jehova, an aton Maglalarang, hiya “nakilala han aton panlawas.” (Salmo 103:14) Bug-os nga hinbabaroan niya an aton mga limitasyon ngan mga panginahanglan. Ngan tungod kay hiya mahigugmaon nga Dios, karuyag niya nga matagbaw ito nga mga panginahanglan. (Salmo 145:16; 1 Juan 4:8) Kaupod na an aton panginahanglan para hin maopay nga panguna.

Pinaagi kan propeta Isaias, hi Jehova nagpahayag: “Kitaa, ako naghatag ha iya sugad nga usa nga saksi ha mga katawohan, usa nga magmarando ngan maglalarang [“lider ngan kumander,” NW] ha mga katawohan.” (Isaias 55:4) An solusyon ha krisis han pagkalider yana nag-uupod han pagkilala kon hin-o ini nga Lider—nga ginpili han Makagarahum-ha-ngatanan mismo—ngan pagkarawat han iya pagkalider. Hin-o kon sugad, ini nga igintagna nga Lider ngan Kumander? Ano an mga pamatuod nga takos hiya sugad nga lider? Diin kita niya dadad-on? Ano an kinahanglan naton buhaton basi mapahimulsan an iya panguna?

 Inabot an Iginsaad nga Lider

Mga 2,500 ka tuig an naglabay, an anghel nga hi Gabriel nagpakita kan propeta Daniel ngan nagsiring ha iya: “Hibaroi ngan kilalaha, nga tikang ha paggawas han sugo ha pagpahiuli ngan pagtukod han Jerusalem ngadto ha dinihogan nga usa, an prinsipe, mapipito ka semana, ngan kaunman kag duha ka semana: ini pagtutukuron liwat, lakip in kalsada ngan in kanal, bisan ha masamok nga mga panahon.”—Daniel 9:25.

Matin-aw, iginpapahibaro han anghel kan Daniel an espisipiko nga panahon han pag-abot han pinili nga Lider ni Jehova. An “dinihogan nga usa, an prinsipe,” o an Mesias nga Lider, maabot ha kataposan han 69 ka semana, o 483 ka tuig, kon mag-ihap tikang han 455 A.K.P., han ginawas an sugo ha pagtukod-utro han Jerusalem. a (Nehemia 2:1-8) Ano an nahitabo ha kataposan hito nga panahon? An parasurat han Ebanghelyo nga hi Lukas nasiring: “Ha ikanapulo kag lima ka tuig han paghadi ni Tiberio Cesar, han hi Ponsio Pilato amo an gobernador ha Judea, ngan hi Herodes tetrarka ha Galilea [29 K.P.], . . . inabot an pulong han Dios ngada kan Juan, nga anak ni Sakarias, ha kamingawan. Ngan iya ginlibot an ngatanan nga tuna han Jordan, ngan nagwali han baptis han pagbasol ha pagpasaylo han mga sala.” Hito nga panahon, ‘an mga tawo naghuhulat’ han Mesias nga Lider. (Lukas 3:1-3, 15) Bisan kon damu nga mga tawo an kinadto kan Juan, diri hiya ito nga Lider.

Katapos, han mga Oktubre han 29 K.P., hi Jesus han Nasaret kinadto kan Juan basi magpabawtismo. Ngan hi Juan nagpamatuod, nasiring: “Akon hinkit-an an Espiritu nga nalusad, sugad han sarapati, tikang ha langit, ngan hiya hinunong ha igbaw niya. (Jesus) Ngan ako waray kumilala ha iya, kondi an nagsugo ha akon panbaptis hin tubig, amo adton nagsiring ha akon: Adton nga ha igbaw niya makita mo nga malusad an Espiritu ngan mahunong ha igbaw niya, ini amo an nanmamaptis hin [baraan nga espiritu]. Ngan akon hinkit-an, ngan nagmatuod, nga ini amo an Anak han Dios.” (Juan 1:32-34) Ha iya bawtismo, hi Jesus nagin an dinihogan nga Lider—an Mesias, o Kristo.

Oo, an iginsaad nga ‘lider ngan kumander ngadto ha mga grupo han mga nasud’ napamatud-an nga amo hi Jesu-Kristo. Ngan kon aton uusisahon an iya mga kalidad sugad nga lider, hisasabtan dayon naton nga an iya pagkalider nalabaw gud ha moderno nga mga kinahanglanon ha usa nga susbaranan nga lider.

An Mesias—An Susbaranan nga Lider

An maopay nga lider naghahatag hin matin-aw nga instruksyon ngan nabulig ha mga tawo nga sakop han iya pagmangno nga magkaada personal nga determinasyon ngan abilidad basi masulbad nira an mga problema hin malampuson. ‘Kinahanglanon ini para ha malampuson nga lider ha ika-21 ka siglo,’ siring han libro nga 21st Century Leadership: Dialogues With 100 Top Leaders. Epektibo gud nga gin-andam ni Jesus an iya mga mamarati ha pag-atubang han adlaw-adlaw nga mga kahimtang! Tagda la an iya pinakabantogan nga pahayag—an Sermon ha Bukid. Hura gud ha praktikal nga mga sagdon an mga pulong nga nakarekord ha Mateo kapitulo 5 tubtob ha 7.

Tagda, pananglitan, an sagdon ni Jesus mahitungod ha pagsulbad han personal nga mga diri-pagsinabtanay. Hiya nagsiring: “Busa, kon ikaw magdadara han imo halad ha halaran, ngan mahinumdom ka, nga an imo bugto may gutiay nga butang kontra ha imo. Bayai didto an imo halad ha atubangan han halaran, ngan lakat pakighiuli siyahan ha imo bugto, ngan niyan balik, ngan paghalad han imo halad.” (Mateo 5:23, 24) Importante an pag-una ha pakigmurayaw ha iba—mas importante pa ngani kay ha pagbuhat hin relihiyoso nga obligasyon, sugad han paghatag hin mga regalo ha altar han templo ha Jerusalem sugad han ginkinahanglan han Mosaiko nga Balaud. Kay kon diri, an mga buhat ha pagsingba diri kakarawaton han Dios. An sagdon ni Jesus praktikal yana nga panahon sugad nga praktikal ito han naglabay nga mga siglo.

Ginbuligan liwat ni Jesus an iya mga mamarati nga likyan an lit-ag han imoralidad. Hiya nagsagdon ha ira: “Iyo hinbatian han mga kadaan nga nasiring: Diri ka manlibog. Kondi ako nasiring ha iyo, nga an ngatanan nga nasiplat ha babaye ha pagkaipa ha iya makakapanlibog na ha iya dida ha iya kasingkasing.” (Mateo 5:27, 28) Angayan gud nga pahamangno! Kay ano nga tikangan naton an buhat nga mahingangadto  ha pag-adulteryo pinaagi ha paghunahuna mahitungod hito? Ha kasingkasing nagtitikang an pornikasyon ngan pag-adulteryo, siring ni Jesus. (Mateo 15:18, 19) Maaramon nga panalipdan naton an aton kasingkasing.—Proberbios 4:23.

An Sermon ha Bukid nag-uupod liwat hin ekselente nga sagdon ha paghigugma han mga kaaway han usa, ha pagpakita hin pagkamahinatagon, ha pagkaada husto nga pagtagad ha materyal ngan espirituwal nga mga butang, ngan ha pariho nga mga butang. (Mateo 5:43-47; 6:1-4, 19-21, 24-34) Iginpakita pa ngani ni Jesus ha iya mga mamarati kon paonan-o pamimilngon an bulig han Dios pinaagi ha pagtutdo ha ira kon paonan-o mag-aampo. (Mateo 6:9-13) An Mesias nga Lider nagpaparig-on ngan nag-aandam han iya mga sumurunod ha pag-atubang ha mga problema nga komon ha tawo.

Unom ka beses ha Sermon ha Bukid, gintikangan ni Jesus an iya mga pahayag ha mga pulong nga “iyo hinbatian nga isiniring ha mga kadaan” o “ngan isiniring man,” kondi katapos hiya nagpahayag hin usa pa nga ideya, nasiring nga “kondi ako nasiring ha iyo.” (Mateo 5:21, 22, 27, 28, 31-34, 38, 39, 43, 44) Nagpapakita ito nga an iya mga mamarati nahiara ha paggios ha espisipiko nga paagi, sumala ha yinakan nga mga tradisyon han mga Pariseo. Kondi iginpapakita yana ni Jesus ha ira an naiiba nga paagi—usa nga nagpakita han totoo nga kahulogan han Mosaiko nga Balaud. Hini nga paagi hi Jesus nagpapatikang hin usa nga pagbag-o, ngan ginbuhat niya ini ha paagi nga masayon karawaton han iya mga sumurunod. Oo, ginpagios ni Jesus an mga tawo ha paghimo hin daku nga mga pagbag-o ha ira kinabuhi, ha espirituwal ngan ha moral. Ini an pangirilal-an han totoo nga lider.

Usa nga aradman nga libro ha pagdumara an nagpatin-aw nga makuri gud an pagpatuman han sugad nga pagbag-o. Ito nasiring: “An ahente han pagbag-o [lider] nagkikinahanglan han pagkasensitibo han usa nga social worker, han pagsabot han sikolohista, han kusog han paradalagan, han kaisog han bulldog, han pagin independente han ermitanyo, ngan han pagpailob han usa nga santo. Ngan bisan kon may-ada hito ngatanan nga mga kalidad, waray garantiya han paglampos.”

“An mga lider kinahanglan gumios ha paagi nga karuyag nira gumios an ira mga sumurunod,” siring han artikulo nga may ulohan nga “Panguna: Importante ba an mga Paggawi?” Oo, ginbubuhat han maopay nga lider an iya igintututdo. Totoo gud ito kan Jesu-Kristo! Oo, gintutdoan niya adton kaupod niya nga magin mapainubsanon, kondi nagtagana liwat hiya hin praktikal nga susbaranan para ha ira pinaagi han paghugas han ira mga tiil. (Juan 13:5-15) Diri la kay ginsugo niya an iya mga disipulo nga magsangyaw han maopay nga sumat han Ginhadian han Dios, kondi nangalimbasog gud hiya hito nga buruhaton. (Mateo 4:18-25; Lukas 8:1-3; 9:1-6; 10:1-24; Juan 10:40-42) Ngan may kalabotan ha pagpasakop ha panguna, hi Jesus nagpakita hin susbaranan. “An Anak diri sadang makagbuhat tikang ha iya ngahaw,” nagsiring hiya mahitungod ha iya kalugaringon, “kondi an nakita niya nga ginbuhat han Amay.”—Juan 5:19.

An gin-unabi na nga ginyakan ngan ginbuhat ni Jesus matin-aw nga nagpapakita nga hiya an susbaranan nga Lider. Ha pagkamatuod, labaw hiya ha ngatanan nga suruklan han tawo para han maopay nga panguna. Hi Jesus hingpit. Tungod kay kinarawat han pagkadiri-mamaratyon han hiya mamatay ngan mabanhaw, buhi hiya ha waray kataposan. (1 Pedro 3:18; Pahayag 1:13-18) May-ada ba tawhanon nga lider nga makakatupong hini nga mga kuwalipikasyon?

Ano an Kinahanglan Naton Buhaton?

Sugad nga nagmamando nga Hadi ha Ginhadian han Dios, an Mesias nga Lider magbibendisyon ha masunuron nga katawohan. May kalabotan hini an Kasuratan nagsasaad: “An tuna mapupuno han hibaro ni Jehova, sugad nga an katubigan nagpupuno han dagat.” (Isaias 11:9) “An maaghop makakapanunod han tuna, ngan maglilipay hira tungod han kahuraan han kamurayaw.” (Salmo 37:11) “Hira an tagsatagsa nga tawo malingkod ha sirong han iya balagon han ubas ngan ha sirong han iya kahoy nga igera; ngan waray bisan hin-o nga maghahadlok ha ira.” (Mika 4:4) “An Dios ha iya ngahaw maupod man ha ira, . . . ngan pagpapahiron niya an ngatanan nga luha tikang ha ira mga mata; ngan mawawaray na kamatayon; ngan mawawaray na an kabidoan, bisan pagtangis, bisan kasakit pa gud: kay an siyahan nga mga bagay nag-agi na.”—Pahayag 21:3, 4.

An kalibotan yana nga panahon nakakaeksperyensya  hin krisis ha pagkalider. Kondi, hi Jesu-Kristo nagtutugway han mga maaghop ngadto ha mamurayawon nga bag-o nga kalibotan, diin magkakaurosa an masunuron nga katawohan ha pagsingba kan Jehova nga Dios ngan mag-uuswag ngadto ha kahingpitan. Importante gud nga magkaada kita panahon ha pagkuha hin kahibaro mahitungod ha totoo nga Dios ngan han iya pinili nga Lider ngan gumios uyon hito nga kahibaro!—Juan 17:3.

Usa han gimaopayi nga paagi nga maipapakita naton an pagtahod ha usa ka tawo amo an pagsubad ha iya. Salit, diri ba kita sadang mangalimbasog ha pagsubad han pinakabantogan nga Lider ha kasaysayan han tawo—hi Jesu-Kristo? Paonan-o naton bubuhaton ito? Ano an epekto han pagkarawat han iya panguna ha aton mga kinabuhi? Ini nga mga pakiana ngan an iba pa paghihisgotan ha masunod nga duha nga artikulo.

[Footnote]

[Retrato ha pahina 4]

Igintagna ni Daniel an pag-abot han Lider nga pinili han Dios

[Mga Retrato ha pahina 7]

Igin-andam han mga katutdoan ni Jesus an mga tawo ha pag-atubang han mga problema ha kinabuhi

[Retrato ha pahina 7]

Tutugwayan ni Jesus an masunuron nga katawohan ngadto ha mamurayawon nga bag-o nga kalibotan