Hi Henry VIII Ngan an Biblia
Hi Henry VIII Ngan an Biblia
HA IYA libro nga History of the English-Speaking Peoples (Tomo 2), hi Winston Churchill nagsurat: “Ha mga relihiyon an Repormasyon nagdara hin daku nga pagbag-o. An Biblia yana nagin bag-o nga kinakarawat nga surok han maaramon nga sagdon nga nakaimpluwensya ha damu nga mga lugar. Ginhunahuna han nauna nga henerasyon nga peligroso an Baraan nga Sinurat kon gamiton han mga diri-edukado ngan sadang basahon la han kapadian.”
An asoy nagpapadayon: “An bug-os nga inimprinta nga mga Biblia, nga iginhubad ha Ingles ni Tyndale ngan Coverdale, nakita ha siyahan nga panahon ha ikatarapos han katrakdag han 1535, ngan ginhihimo na yana an pipira nga mga edisyon. Ginsagdonan han Gobyerno an mga klero nga iaghat an pagbasa han Biblia.” Katapos hin mga siglo han kawaray kahibaro ha Biblia, nagin pamilyar an Inglatera ha Biblia, kondi tungod ini han bulig han pagmando ni Henry VIII imbes han iglesia. a
“Sugad nga dugang nga hampak ha nauna nga henerasyon an Gobyerno nagsugo ha Paris nga mag-imprinta hin damu nga Ingles nga mga Biblia, nga mas maopay kay han anoman naglabay nga edisyon, ngan han Septyembre 1538 nagsugo nga an ngatanan nga parokya ha nasud sadang pumalit hin gidadakui nga Ingles nga Biblia, basi ibutang ha tagsa nga singbahan, diin masayon gud ito magamit ngan mabasa han mga parasingba. Unom nga kopya an iginbutang ha Katedral han St. Paul, ha Siyudad han Londres, ngan damu an nagtitirok ha katedral ha bug-os nga adlaw basi basahon ito, ginsumatan kami, labi na, kon may-ada hira nabibilngan nga tawo nga klaro, daku an tingog ha pagbasa.”
Makasurubo, ha damu nga mga nasud, damu an diri nagpapahimulos han ira pribilehiyo ha regular nga pagbasa han Biblia. Daku ini nga hinungdan han kabaraka, tungod kay an Biblia la an ‘ginpakaaghat han Dios ngan may kapulsanan ha pagtutdo, ha pagsaway, ha pagtadong han mga butang, ha pagdisiplina ha katadongan.’—2 Timoteo 3:16.
[Footnote]
a Hi Hadi Henry VIII nagmando ha Inglatera tikang han 1509 tubtob han 1547.
[Ginkuhaan han retrato ha pahina 32]
Henry VIII: Debuho ha Royal Gallery ha Kensington, tikang ha libro nga The History of Protestantism (Tomo I)