Mga Pakiana Tikang ha mga Magbarasa

Ano nga “pagpahuway” an gin-unabi ha Hebreo 4:9-11, ngan paonan-o an usa “[nasulod] hito nga pagpahuway”?

Ha siyahan-siglo Hebreo nga mga Kristiano, hi apostol Pablo nagsurat: “Nahibilin pa in pagpahuway ha adlaw nga iparahuway ha mga tawo han Dios. Kay an tawo nga nakasulod ngadto ha [kanan Dios] pagpahuway nakapahuway man hiya tikang ha iya mga buhat, sugad man han Dios nga pinahuway ha iya mga buhat. Busa manalinguha kita ha pagsulod ngadto hito nga pagpahuway.”—Hebreo 4:9-11.

Han ginhisgotan ni Pablo an mahitungod han pagpahuway han Dios tikang ha Iya buhat, matin-aw nga iya gin-uunabi an ginsisiring ha Genesis 2:2, nga aton mababasa: “Han ikapito nga adlaw ginhuman han Dios an iya buhat nga iya ginhimo; ngan hiya pinahuway han ikapito ka adlaw tikang ha ngatanan nga iya buhat nga iya ginhimo.” Kay ano nga hi Jehova “pinahuway han ikapito ka adlaw”? Sigurado nga diri tungod kay nagkinahanglan hiya nga magkaada utro kusog “tikang ha ngatanan nga iya buhat nga iya ginhimo.” An sunod nga bersikulo naghahatag hin makakabulig nga impormasyon: “Ginbendisyonan han Dios an ikapito nga adlaw, ngan ginpakabaraan ito; kay dida hito hiya pinahuway tikang ha ngatanan nga iya buhat nga kanan Dios ginbuhat ngan ginhimo.”—Genesis 2:3; Isaias 40:26, 28.

An “ikapito nga adlaw” naiiba tikang ha bisan ano han nahiuna nga unom ka adlaw tungod kay ito an adlaw nga ginbendisyonan han Dios ngan ginhimo nga sagrado, nga amo an adlaw nga iginlain para ha, o igindedikar ha, usa ka espesyal nga katuyoan. Ano ito nga katuyoan? Antes pa hito, iginpahayag han Dios an iya katuyoan mahitungod han katawohan ngan han tuna. Ha siyahan nga lalaki ngan ha iya asawa, an Dios nagsiring: “Magmabungahon kamo ngan magdamu ngan pun-on niyo an tuna, ngan pagtag-iyaha niyo ito: ngan paghadian niyo an kaisdaan han dagat, ngan an katamsihan ha mga langit, ngan an ngatanan nga mga mananap nga nabantad ha bawbaw han tuna.” (Genesis 1:28) Bisan kon gintagan han Dios an katawohan ngan an tuna hin hingpit nga tinikangan, magkikinahanglan hin panahon basi an bug-os nga tuna pagdumarahon ngan bag-ohon ngadto ha usa ka paraiso nga puno hin hingpit tawhanon nga pamilya, sugad han katuyoan han Dios. Salit, ha “ikapito nga adlaw,” an Dios pinahuway, o inundang, tikang ha dugang nga mga buruhaton han paglarang ha tuna basi tugotan an iya ginlarang nga mag-uswag sumala ha iya kaburut-on. Ha kataposan hito nga “adlaw,” an ngatanan nga katuyoan han Dios matutuman na. Mationan-o kahilawig ito nga pagpahuway?

Ha pagbalik ha mga pulong ni Pablo ha Hebreo, aton natitigamnan nga iya ginpabug-atan nga “[may] nahibilin pa in pagpahuway ha adlaw nga iparahuway ha mga tawo han Dios,” ngan iya ginsagda an iya mga igkasi-Kristiano nga buhaton an ira maaakos “ha pagsulod ngadto hito nga pagpahuway.” Nagpapakita ini nga han iginsurat ni Pablo ito nga mga pulong, nagpapadayon pa “[an] ikapito nga adlaw” han pagpahuway han Dios, nga nagtikang na mga 4,000 ka tuig antes pa hito. Diri ito matatapos tubtob nga an katuyoan han Dios mahitungod han katawohan ngan han tuna bug-os na nga matuman ha kataposan han Usa ka Yukot ka Tuig nga Pagmando ni Jesu-Kristo, nga amo an “Ginoo han adlaw nga iparahuway.”—Mateo 12:8; Pahayag 20:1-6; 21:1-4.

Samtang ginlalantaw iton urusahon nga paglaom ha tidaraon, iginsaysay ni Pablo kon paonan-o an usa mahimo makasulod ha pagpahuway han Dios. Hiya nagsurat: “An tawo nga nakasulod ngadto ha [kanan Dios] pagpahuway nakapahuway man hiya tikang ha iya mga buhat.” Nagsusumat ini ha aton nga bisan kon may-ada hingpit nga tinikangan, an katawohan ha kabug-osan waray makasulod ha pagpahuway han Dios. Tungod ini kay hi Adan ngan hi Eva waray magsunod ha pagpahuway han Dios ha “ikapito nga adlaw” pinaagi han pagkarawat han iya kahikayan para ha ira. Lugod, hira nagrebelde ngan karuyag bumulag ha Dios. Ha pagkamatuod, hira sinunod ha mga plano ni Satanas imbes nga karawaton an mahigugmaon nga giya han Dios. (Genesis 2:15-17) Sugad nga resulta, nawara nira an posibilidad nga mabuhi ha waray kataposan ha paraiso nga tuna. Tikang hito nga panahon padayon, an ngatanan nga katawohan nagin uripon ha sala ngan kamatayon.—Roma 5:12, 14.

An pagrebelde han katawohan waray makaulang han katuyoan han Dios. Nagpapadayon an iya adlaw han pagpahuway. Kondi, hi Jehova naghimo hin mahigugmaon nga kahikayan—an lukat—pinaagi han iya Anak, hi Jesu-Kristo, basi an ngatanan nga nakarawat hito tungod ha pagtoo mahimo makalaom nga makagawas ngan makapahuway tikang ha pagpas-an han kabug-at han sala ngan kamatayon. (Roma 6:23) Salit ginsagda ni Pablo an iya mga igkasi-Kristiano nga ‘pumahuway tikang ha ira kalugaringon nga mga buhat.’ Kinahanglan karawaton nira an kahikayan han Dios para han kaluwasan ngan diri sarihan nga mangalimbasog para ha ira kalugaringon nga tidaraon ha ira kalugaringon nga paagi, sugad han ginbuhat ni Adan ngan ni Eva. Kinahanglan  likyan liwat nira an ira pagbuhat han pagpakamatadong ha kalugaringon.

An pagsalikway han hakugnon o kalibotanon nga mga pangalimbasog basi buhaton an kaburut-on han Dios totoo nga nakakaliaw ngan nakakahatag hin kapahuwayan. Iginpasamwak ni Jesus ini nga pagdapit: “Kadi ngatanan kamo ha akon, nga nagbubuhat ngan binubug-atan, ngan akon kamo tatagan hin pagpahuway. Pas-ana niyo an akon yugo, ngan magtuon kamo ha akon, kay ako maaghop ngan mapainubsanon ha kasingkasing, ngan kamo makakaagi hin pagpahuway ha iyo mga kalag. Kay an akon yugo masayon, ngan an akon pinas-an magaan.”—Mateo 11:28-30.

An paghisgot ni Pablo mahitungod han pagpahuway han Dios ngan kon paonan-o mahimo makasulod an usa ngada hito sigurado nga surok hin pagdasig ha Hebreohanon nga mga Kristiano ha Jerusalem, nga nag-ilob hin duro nga pagtimaraot ngan pagtamay tungod han ira pagtoo. (Buhat 8:1; 12:1-5) Ha pariho nga paagi, an mga pulong ni Pablo mahimo magin surok hin pagdasig ha mga Kristiano yana nga panahon. Tungod kay maaram nga hirani na gud an katumanan han saad han Dios ha pagdara han usa nga paraiso nga tuna ilarom han iya matadong nga Ginhadian, kita liwat sadang pumahuway tikang ha aton kalugaringon nga mga buhat ngan buhaton an aton mahihimo basi makasulod hito nga pagpahuway.—Mateo 6:10, 33; 2 Pedro 3:13.

[Mga Retrato ha pahina 31]

An saad han Dios nga usa nga paraiso ha tuna matutuman ha kataposan han iya adlaw han pagpahuway