Ano an may Totoo nga Bili?

An pagtag-iya hin usa nga butang nga may totoo nga bili mahimo magin makalilipay. Kondi ano gud ito nga butang? Damu ba nga kuwarta? Marahalon o talagsahon ba nga alahas? Pagin sikat ngan pagin bantog? Ginpapabilhan gud ini han damu nga mga tawo. An pagkaada hito makakagtagana han kinahanglanon, makakahimo han kinabuhi nga mas mapulsanon, o makakatagbaw han personal nga panginahanglan hin pagdayaw ngan pag-abat nga may nahimo. Nangangalimbasog ba kita nga magtag-iya han sugad nga mga butang, naglalaom nga matatagbaw hito an aton mga tumong ngan mga hingyap para ha tidaraon?

AGSOB nga ginpapabilhan han mga tawo an usa nga butang basado ha kon paonan-o ginpupuno hito an ira mga panginahanglan o gintatagbaw an ira personal nga mga hingyap. Aton ginpapabilhan an mga butang nga nag-aaghat hin pagbati han personal nga kaopayan ngan nagtatagana hin paglaom han may kasigurohan nga tidaraon. Ginpapabilhan naton an mga butang nga nagdadara hin tigda nga katalwasan, kahimyang, o pagkilala. Kondi, an pagpabili nga iginbasar ha aton nagbabag-o nga mga hingyap o mga interes diri marig-on ngan waray hirayo nga panlantaw. Ha pagkamatuod, masisiguro an totoo nga bili pinaagi han kon ano an aton ginhuhunahuna nga gidadakui naton nga panginahanglan.

Ano an gidadakui naton nga panginahanglan? Waray butang nga may-ada bisan ano nga bili kon waray an usa nga importante nga bahin—kinabuhi. Kon waray kinabuhi, diri kita naeksister. Hi Hadi Salomon han kadaan nga Israel nagsurat: “An mga patay diri maaram han bisan ano . . .  kay waray buruhaton, o paghunahuna, o hibaro, o kinaadman, didto ha Sheol [komon nga lubnganan han katawohan].” (Eklesiastes 9:5, 10) Kon mamatay kita, napipiritan kita ha pagbaya ha ngatanan nga butang nga aton gintatag-iya. Salit, an gidadakui naton nga panginahanglan amo an pagkaada usa nga butang nga magtitipig han aton kinabuhi. Ano an makakatipig hito?

Ano an Magtitipig han Aton Kinabuhi?

“An kuwarta usa nga arayopan,” siring ni Hadi Salomon. (Eklesiastes 7:12) Pinaagi han igo nga kuwarta, magkakaada kita pagkaon ngan komportable nga panimalay. An kuwarta magtutugot ha aton nga magpahimulos han kalipay ha pagbiyahe ngadto ha higrayo nga mga lugar. Makakahatag ito han aton mga kinahanglanon kon diri na kita  makagtrabaho tungod han kalagas o sakit. Damu an mga kapulsanan ha pagkaada hin kuwarta. Kondi, diri matitipigan han kuwarta an aton kinabuhi. Hi apostol Pablo nagsagdon kan Timoteo: “Sugoa adton mga manggaranon hini yana nga panahon, nga diri hira magpakahitaas, ngan diri nira ibutang an ira paglaom dida ha diri kamarig-on han mga bahandi, kondi ha Dios.” (1 Timoteo 6:17) Diri mapapalit han ngatanan nga kuwarta ha kalibotan an kinabuhi para ha aton.

Tagda an eksperyensya han lalaki nga hi Hitoshi. Tungod kay nagdaku ha pobre nga pamilya, hi Hitoshi may-ada daku nga hingyap nga magriko. Natoo gud hiya ha gahum han kuwarta salit ginhunahuna niya nga bisan an mga tawo mahimo mapalit hito. Katapos may lalaki nga kinadto ha balay ni Hitoshi ngan nagpakiana ha iya kon maaram hiya nga hi Jesu-Kristo namatay para ha iya. Ini nga pakiana nakapainteres kan Hitoshi tungod kay inabat niya nga waray usa nga mamamatay para ha tawo nga sugad ha iya. Tinambong hiya ha usa ka pahayag publiko mahitungod ha Biblia ngan nahipausa han mahibatian an sagdon nga ‘tipigan an mata nga simple.’ Iginsaysay han mamumulong nga an ‘simple’ nga mata usa nga hirayo an panlantaw ngan nakasentro ha espirituwal nga mga butang. (Lukas 11:34) Imbes nga mangalimbasog para han kuwarta, nagtikang hi Hitoshi pag-una han espirituwal nga mga kaopayan ha iya kinabuhi.

An materyal nga mga panag-iya makakahatag liwat ha aton hin usa ka sukol han karig-onan ngan kasigurohan. An pagkaada hin kahuraan makakakuha han aton kabaraka ha aton mga panginahanglan kada adlaw. An maopay nga balay ha makaruruyag nga mga palibot mahimo maghatag ha aton hin pag-abat nga may nahimo. An uso nga mga bado ngan maopay nga awto makakaghatag ha aton han pagdayaw han iba.

Usa nga bendisyon nga ‘makita an kaopayan para han ngatanan nga pangalimbasog naton.’ (Eklesiastes 3:13) Ngan an pagkaada sobra bangin makahimo ha aton mga hinigugma nga ‘magpahayahay, kumaon, uminom, ngan magliaw.’ Kondi, an materyal nga mga butang may-ada lumalabay la nga bili. Ha usa nga pahamangno kontra ha kahakog, hi Jesu-Kristo nagsiring: “An kinabuhi han usa nga tawo diri ha kahuraan han mga butang, nga iya ginkakaptan.” (Lukas 12:15-21) An mga panag-iya, anoman an kantidad o bili hito, diri makakagarantiya ha aton hin kinabuhi.

Hi Liz, pananglitan, nakaasawa hin lalaki nga malampuson ha pinansyal. Hiya nasiring: “May-ada kami maopay nga balay ngan duha nga awto, ngan an amon pinansyal nga kahimtang naghatag ha amon hin kagawasan nga pahimulosan an bisan ano nga materyal nga igintanyag han kalibotan . . . Baga hin urusahon nga nababaraka pa gihapon ako mahitungod ha kuwarta.” Hiya nagsasaysay: “Damu an nawawara ha amon. Baga hin kon mas damu an imo tinatag-iya, mas waray kasigurohan an imo pag-abat.”

An pagin sikat ngan pagin bantog ginpapabilhan gud liwat han damu tungod kay mahimo ito magdara hin pagdayaw ngan pagpasidungog. Ha kalibotan yana nga panahon an malampuson nga karera usa nga nahimo nga ginkakaawaan. An pagpatubo hin naiiba nga mga abilidad o mga kaabtik bangin makabulig ha aton nga magin bantogan. Mahimo kita dayawon han iba, tagdon gud an aton mga opinyon, ngan maghingyap gud nga makuha an aton pag-uyon. Ini ngatanan mahimo magin makalilipay ngan makapatagbaw. Kondi, ha kataposan, mawawara ito. Hi Salomon may-ada han ngatanan nga himaya ngan gahum nga mahimo pagtag-iyahon han usa nga hadi, kondi hiya nasubo: “Kay han tawo nga makinaadmananon, bisan sugad man han lurong, waray handumanan nga kadayonan; . . . an ngatanan mahingangalimtan.” (Eklesiastes 2:16) An kinabuhi diri amo an balos han pagin sikat o pagin bantog.

Inapresyar gud han eskultor nga hi Celo an usa nga butang nga labaw pa kabirilhon ha pagin sikat. Tungod kay may abilidad, nagin kuwalipikado hiya para ha pag-eskwela nga nagpauswag han iya mga kaabtik. Waray pag-iha an iya nahimo gindayaw han medya ngan han mga kritiko ha arte. Damu han iya mga eskultura an iginpakita ha dagku nga mga siyudad ha Europa. Hi Celo nagsasaysay: “Ginkakarawat ko gud nga ha usa ka panahon an arte amo an giimportantihi nga butang ha akon kinabuhi. Kondi, nahunahuna ko nga para ha akon, an pagpadayon ha akon karera mahimo igpariho ha pangalimbasog ha pag-alagad ha duha nga agaron. (Mateo 6:24) Kombinsido ako nga an giimportantihi nga butang nga akon mahihimo amo an pagsangyaw han maopay nga sumat han Ginhadian han Dios. Salit personal nga nagdesisyon ako nga bayaan an akon trabaho sugad nga eskultor.”

 Ano an May-ada Gidadakui nga Bili?

Tungod kay waray butang nga may-ada bisan ano nga kapulsanan o bili kon waray kinabuhi, ano an mahimo naton pagtag-iyahon nga maggagarantiya nga padayon kita nga mabubuhi? An ngatanan nga kinabuhi nagtitikang kan Jehova nga Dios. (Salmo 36:9) Oo, “ha iya mabubuhi kita, ngan makakagkiwa [ngan maeksister].” (Buhat 17:28) Nahatag hiya hin waray kataposan nga kinabuhi sugad nga regalo hadton iya mga hinigugma. (Roma 6:23) Ano an kinahanglan naton buhaton basi magin kuwalipikado para hini nga regalo?

An pagkarawat hin regalo nga waray kataposan nga kinabuhi nadepende ha aton pagkaada duok nga relasyon kan Jehova. Salit, an iya pag-uyon amo an may darodaku nga bili kay han bisan ano nga posible naton pagtag-iyahon. Kon may-ada kita hito, may-ada kita paglaom han totoo ngan waray kataposan nga kalipay. Kondi, kon waray pag-uyon han Dios, maatubang kita hin waray kataposan nga kabungkagan. Matin-aw, kon sugad, an bisan ano nga mabulig ha aton nga magkaada hin maopay nga relasyon kan Jehova may-ada daku hinduro nga bili.

Kon Ano an Kinahanglan Naton Buhaton

An aton kalamposan nadepende ha aton pagkuha hin kahibaro. An surok han husto nga kahibaro amo an Pulong ni Jehova, an Biblia. Ito la an nagsusumat ha aton kon ano an aton kinahanglan buhaton basi mapalipay an Dios. Salit kinahanglan naton pag-adman hin maopay an Kasuratan. An maduruto nga pangalimbasog nga mahibaro han ngatanan nga aton mahihimo mahitungod kan Jehova nga Dios ngan kan Jesu-Kristo nagriresulta ha ‘kahibaro nga nangangahulogan hin waray kataposan nga kinabuhi.’ (Juan 17:3) An sugad nga kahibaro usa nga bahandi nga angay pabilhan!—Proberbios 2:1-5.

An kahibaro nga aton nakukuha tikang ha Pulong han Dios nagsasangkap ha aton nga buhaton an sunod nga pitad—an pagbuhat hin pagtoo kan Jesu-Kristo. Hi Jehova nagsugo nga an ngatanan nga nahirani ha iya kinahanglan magbuhat hito pinaagi kan Jesus. (Juan 14:6) Ha pagkamatuod, “ha bisan hin-o nga lain kan Kristo waray kaluwasan.” (Buhat 4:12) An aton ultimo nga kaluwasan nadepende, diri ha ‘salapi o bulawan . . . , kondi ha presyoso nga dugo ni Kristo.’ (1 Pedro 1:18, 19) Kinahanglan ipakita naton an aton pagtoo pinaagi han pagtoo ha mga katutdoan ni Jesus ngan pagsunod han iya susbaranan. (Hebreo 12:1-3; 1 Pedro 2:21) Ngan birilhon gud an iya halad! An aplikasyon han mga kapulsanan hito nagsisiguro han waray kataposan nga tidaraon han ngatanan nga katawohan. Kon bug-os nga iaplikar ito para ha aton, gintatagan kita han birilhon gud nga regalo nga waray kataposan nga kinabuhi.—Juan 3:16.

Hi Jesus nagsiring: “Higugmaon mo an Ginoo nga imo Dios ha bug-os mo nga kasingkasing ngan ha bug-os mo nga kalag, ngan ha bug-os mo nga hunahuna.” (Mateo 22:37) An paghigugma kan Jehova nangangahulogan nga “pagtumanon ta an iya mga sugo.” (1 Juan 5:3) An iya mga sugo nagkikinahanglan nga magpabilin kita nga bulag tikang ha kalibotan, magkaada husto nga pamatasan, ngan maunungon nga sumuporta ha iya Ginhadian. Hito nga paagi ‘pinipili naton an kinabuhi’ imbes han kamatayon. (Deuteronomio 30:19) Kon kita ‘magin duok ha Dios, hiya magigin duok man ha aton.’—Jakobo 4:8.

An pagpasarig han pag-uyon han Dios mas birilhon kay han ngatanan nga mga bahandi han kalibotan. Adton may-ada han pag-uyon han Dios amo an giririkuhi nga mga tawo ha tuna! Salit, hinaot mangalimbasog kita nga magkaada han bahandi nga may totoo nga bili—an pag-uyon ni Jehova. Oo, aton pamatian an sagdon ni apostol Pablo: “Pagsunda an katadongan, an pagtahod ha Dios, an pagtoo, an paghigugma, an pag-ilob, an pagkaaghop. Pakig-away hin maopay nga pakig-away ha pagtoo, dakpa an kinabuhi nga waray kataposan.”—1 Timoteo 6:11, 12.

[Mga Retrato ha pahina 21]

Ano an imo ginpapabilhan gud? Kuwarta, materyal nga mga panag-iya, pagin sikat, o iba pa?

[Retrato ha pahina 23]

Kinahanglan pag-adman naton hin maopay an Kasuratan