Kon Paonan-o Ka Makakahimo hin Maopay nga mga Desisyon

AN KAGAWASAN ha pagbuot regalo tikang ha Dios. Kon waray hito, magigin paropariho kita hin mga robot, nga waray kontrol ha aton mga paggios. Kondi, tungod kay may-ada hito, naatubang kita hin mga ayat. Ha pagkaada hin kagawasan ha pagbuot, kinahanglan maghimo kita hin mga desisyon samtang kita nabubuhi.

Siyempre, damu nga mga desisyon an baga hin ordinaryo. An iba, sugad han pagpili hin propesyon o kon mag-aasawa ba o diri, makakaapekto han aton bug-os nga tidaraon. Ha gihapon an iba nakakaapekto ha iba nga mga tawo. An iba nga mga desisyon nga ginhihimo han mga ginikanan may-ada daku nga epekto ha ira mga anak. Dugang pa, kinahanglan makighusay kita ha Dios tungod han damu nga mga desisyon nga aton ginhihimo.—Roma 14:12.

An Panginahanglan hin Bulig

An mga tawo waray maopay nga rekord may kalabotan ha pagdesisyon. Usa han gisasyahani nga mga desisyon han tawo nga nakarekord nakadaot gud. Nagdesisyon hi Eva ha pagkaon han prutas nga matin-aw nga igindiri han Dios. An iya pagpili, nga basado ha hakog nga hingyap, nagtugway ha pakigbahin han iya bana ha pagtalapas ha Dios, ngan an resulta daku nga pag-antos han katawohan. Ha damu nga mga kahimtang, mas iginbabasar pa gihapon han katawohan an ira mga desisyon ha hakugnon nga mga hingyap imbes nga ha husto nga mga prinsipyo. (Genesis 3:6-19; Jeremias 17:9) Ngan kon naatubang hin seryoso nga mga desisyon, agsob nga ginhuhunahuna naton an aton mga limitasyon.

Diri urusahon, kon sugad, nga kon naghihimo hin importante nga mga desisyon, damu an namimiling hin bulig tikang ha mga surok nga labaw ha tawo. An Biblia nagrekord hin okasyon han hi Nabukodonosor, ha butnga han kampanya militar, kinahanglan magdesisyon. Bisan kon hiya hadi, inabat hiya han panginahanglan nga ‘gumamit hin pagtigo,’ komunsulta ha mga espiritu. Salit, an rekord nasiring: “Iya ginbay-og an mga udyong ngadto nganhi, hiya pinmakiana han terapim, hiya nagtan-aw dida ha atay.” (Esekiel 21:21) Sugad man yana, damu an nakonsulta ha mga parapanhimalad ngan mga astrologo ngan ha iba nga mga paagi namimiling hin bulig tikang ha mga espiritu. Kondi nakakalimbong ini.—Lebitiko 19:31.

May-ada Usa nga masasarigan gud ngan ha bug-os nga kasaysayan nabulig ha katawohan ha paghimo hin maaramon nga mga desisyon. Ito nga usa waray iba kondi hi Jehova nga Dios. Pananglitan, ha kadaan nga mga panahon, gintagan han Dios an iya nasud, an Israel, han Urim ngan Tumim—posible nga sagrado nga mga butang nga iginripa kon an nasud naatubang hin mga kahimtang nga importante hinduro. Pinaagi han Urim ngan han Tumim, hi Jehova nahatag hin direkta nga baton ngan nabulig ha mga tigurang han Israel nga siguruhon nga an ira mga desisyon uyon ha iya kaburut-on.—Eksodo 28:30; Lebitiko 8:8; Numeros 27:21.

Tagda an usa pa nga ehemplo. Han ginsugo hi Gideon nga manguna ha kasundalohan han Israel kontra ha Midian, kinahanglan magdesisyon hiya kon kakarawaton ba an sugad hitaas nga pribilehiyo. Tungod kay naruruyag hi Gideon hin pagpasarig nga susuportahan hiya ni Jehova, naghangyo hiya hin milagroso nga tigaman. Hiya nag-ampo nga an barahibo han karnero nga iya igingawas ha bug-os nga gab-i mahulos han tun-og kondi an tuna nga nakapalibot hito magpapabilin nga mamara. Han  sunod nga gab-i, naghangyo hiya nga an barahibo han karnero magpabilin nga mamara samtang an tuna ha palibot hito mahulos han tun-og. Maloloy-on nga iginhatag ni Jehova kan Gideon an mga tigaman nga iya ginhangyo. Sugad nga resulta, husto nga nagdesisyon hi Gideon ngan, pinaagi han suporta han Dios, bug-os nga ginpirde an mga kaaway han Israel.—Hukom 6:33-40; 7:21, 22.

Kumusta man Yana nga Panahon?

Yana nga panahon, nagtatagana pa gihapon hin bulig hi Jehova ha iya mga surugoon kon naatubang hira hin importante nga mga desisyon. Paonan-o? Pariho kan Gideon, sadang ba kita maghangyo hin mga tigaman tikang kan Jehova basi ipakita ha aton an husto nga desisyon? Usa nga mag-asawa an naghunahuna kon sadang ba hira bumalhin ha pag-alagad diin may-ada darodaku nga panginahanglan para hin mga magwarali han Ginhadian. Basi mabuligan hira ha pagdesisyon, naghikay hira hin usa nga pagsari. Ira ibabaligya an ira balay ha espisipiko nga prisyo. Kon mapalit an balay ha itinanda nga petsa ha ginsiring nga prisyo o hiruhitaas pa, huhunahunaon nira ito sugad nga pangirilal-an nga karuyag han Dios nga bumalhin hira. Kon diri mapalit an balay, huhunahunaon nira nga diri karuyag han Dios nga bumalhin hira.

Waray mapalit an balay. Nagpapasabot ba ito nga diri karuyag ni Jehova nga ini nga mag-asawa mag-alagad diin may-ada darodaku nga panginahanglan? Siyempre, baga hin pagpanguna an pagsiguro kon ano an ginbubuhat o diri ginbubuhat ni Jehova para ha iya mga surugoon. Diri naton masisiring nga yana nga panahon hi Jehova diri gud naghihilabot ha pagpakita han iya kaburut-on para ha aton. (Isaias 59:1) Kondi, waray kita katungod ha paglaom han sugad nga paghilabot ha aton dagku nga mga desisyon, nga igintatapod naton ha Dios an aton pagdesisyon. Aw, bisan hi Gideon ha kadak-an nga bahin han iya kinabuhi kinahanglan maghimo hin mga desisyon nga waray milagroso nga mga pangirilal-an tikang kan Jehova!

Ha gihapon, an Biblia nasiring nga makakarawat an giya han Dios. Nagtatagna ito mahitungod han aton panahon: “An imo mga talinga makakabati han usa nga pulong ha imo luyo, nga nasiring: Amo ini an dalan, maglakat kamo dida hini; kon kamo sumimang ha too nga kamot, ngan kon kamo sumimang ha wala.” (Isaias 30:21) Kon naatubang kita hin importante nga mga pagpipilian, husto gud nga mag-usisa basi masiguro nga an aton mga desisyon nauyon ha kaburut-on han Dios ngan nagpapakita han iya hitaas nga kinaadman. Paonan-o? Pinaagi han pagkonsulta ha iya Pulong ngan pagtugot hito nga magin ‘lampara ha aton mga tiil, ngan kahayag ha aton dalan.’ (Salmo 119:105; Proberbios 2:1-6) Ha pagbuhat hini, kinahanglan batasanon naton an pagkuha hin husto nga kahibaro tikang ha Biblia. (Kolosas 1:9, 10) Ngan kon sadang kita magdesisyon, kinahanglan gud naton saliksikon an ngatanan nga mga prinsipyo han Biblia nga may kalabotan hito. An sugad nga pagsaliksik makakahimo ha aton nga ‘masiguro an mas importante nga mga butang.’—Filipos 1:9, 10.

Sadang liwat kita makiistorya kan Jehova ha pag-ampo, nasarig nga mamamati hiya ha aton. Nakakaliaw gud an pagsumat ha aton mahigugmaon nga Dios han desisyon nga aton kinahanglan himoon ngan han mga mapipilian nga aton gintatagad! Katapos, may pagsarig nga makakahangyo kita hin giya ha paghimo hin husto nga desisyon. An baraan nga espiritu agsob nga magpapahinumdom ha aton han mga prinsipyo han Biblia nga naaaplikar, o bangin buligan kita hito nga hisabtan hin mas matin-aw an teksto nga may kalabotan ha aton kahimtang.—Jakobo 1:5, 6.

 Nagtatagana liwat hi Jehova hin hamtong nga mga tawo ha kongregasyon nga aton makakaistorya mahitungod han aton mga desisyon. (Efeso 4:11, 12) Kondi, ha pagpakiana ha iba, diri naton sadang subaron an paagi hadton nakikiistorya ha damu nga mga tawo tubtob nga ha kataposan makaistorya nira an usa nga nagyayakan han ira karuyag hibatian. Katapos ginsusunod nira an iya sagdon. Sadang liwat naton hinumdoman an nagpapahamangno nga ehemplo ni Rehoboam. Han kinahanglan hiya maghimo hin seryoso nga desisyon, kinarawat hiya hin maopay nga sagdon tikang ha tigurang nga kalalakin-an nga nag-alagad kaupod han iya amay. Kondi, imbes nga sundon an ira sagdon, nagpakiana hiya ha batan-on nga kalalakin-an nga nagtubo kadungan niya. Tungod kay ginsunod an ira sagdon, naghimo hiya hin diri maaramon nga desisyon ngan salit nawara an daku nga bahin han iya ginhadian.—1 Hadi 12:1-17.

Kon namimiling hin sagdon, pamiling tikang hadton eksperyensyado ha kinabuhi ngan may-ada maopay nga kahibaro ha Kasuratan ngan hilarom nga pagtahod ha husto nga mga prinsipyo. (Proberbios 1:5; 11:14; 13:20) Kon posible, magkaada panahon ha pagpamalandong ha mga prinsipyo nga nahidadabi ngan ha ngatanan nga impormasyon nga imo natirok. Samtang nakikita mo an mga butang uyon ha Pulong ni Jehova, an husto nga desisyon posible nga magin mas matin-aw.—Filipos 4:6, 7.

An mga Desisyon nga Aton Ginhihimo

An iba nga mga desisyon masayon himoon. Han ginsugo nga umundang ha pagsangyaw, maaram an mga apostol nga kinahanglan hira padayon nga magsangyaw mahitungod kan Jesus, ngan ginpahibaro dayon nira an Sanhedrin mahitungod han ira desisyon nga sundon an Dios imbes nga an tawo. (Buhat 5:28, 29) An iba nga mga desisyon bangin manginahanglan hin dugang nga pamalandong tungod kay waray direkta nga mga pulong han Biblia nga naghihisgot mahitungod hito. Ha gihapon, an mga prinsipyo han Biblia kasagaran nga magpapatin-aw han gimaopayi nga desisyon nga angay himoon. Pananglitan, bisan kon damu han mga klase han kaliawan yana an waray pa ha panahon ni Jesus, may-ada matin-aw nga mga pulong ha Biblia mahitungod han nakakapalipay kan Jehova ngan han nakakapasubo ha iya. Salit, bisan hin-o nga Kristiano nga nakikigbahin ha kaliawan nga nag-aaghat hin kamadarahog, imoralidad, o pagrebelde nakakahimo hin maraot nga desisyon.—Salmo 97:10; Juan 3:19-21; Galasia 5:19-23; Efeso 5:3-5.

Usahay, bangin husto an duha nga desisyon. An pag-alagad diin may-ada darodaku nga panginahanglan usa ka maopay nga pribilehiyo ngan makakagtugway ngadto ha damu nga mga bendisyon. Kondi kon an usa may hinungdan nga magdesisyon hin diri, mahimo pa gihapon hiya magbuhat hin maopay ha iya kongregasyon. Ha panapanahon, bangin kinahanglan kita magdesisyon nga maghahatag ha aton hin higayon ha pagpakita han kahilarom han aton debosyon ngadto kan Jehova o kon ano an pinakaimportante ha aton kinabuhi. Salit, gintutugotan kita ni Jehova nga gamiton an aton kagawasan ha pagbuot basi ipakita an aada gud ha aton kasingkasing.

Agsob nga naaapektohan an iba han aton mga desisyon. Pananglitan, an siyahan-siglo nga mga Kristiano nalipay nga magkaada kagawasan tikang ha damu nga mga igindidiri han Balaud. Nangangahulogan ini, pananglitan, nga mahimo nira karawaton o diri an pagkaon nga mahugaw sumala han Balaud. Ha gihapon, gindasig hira nga tagdon an mga konsensya han iba ha pagdesisyon kon bubuhaton ba o diri ini nga kagawasan. An mga pulong ni Pablo mahitungod hito mahimo iaplikar ha damu nga mga desisyon nga aton ginhihimo: “Diri kamo maghatag  hin katigayonan hin paghipakdol.” (1 Korinto 10:32) An hingyap nga diri makapakdol ha iba bangin makabulig ha pagsiguro han damu nga mga desisyon nga aton hinihimo. Tutal, an gugma ha amyaw amo an ikaduha nga gidadakui nga sugo.—Mateo 22:36, 39.

An Resulta han Aton mga Desisyon

An mga desisyon nga hinimo tikang ha maopay ngan tangkod nga pagtagad han konsensya ngan basado ha mga prinsipyo han Biblia pirme magkakaada maopay nga resulta ha kamaihaan. Siyempre, ha halipot nga panahon, mahimo ito magresulta hin personal nga pagsakripisyo. Han an mga apostol nagsumat ha Sanhedrin han ira desisyon nga padayon nga magsangyaw mahitungod kan Jesus, ginkastigo hira antes pagawson. (Buhat 5:40) Han an tulo nga Hebreohanon—hira Sadrak, Mesak, ngan Abednego—nagdesisyon nga diri hira mayukbo ha bulawan nga imahen ni Nabukodonosor, ira iginbutang ha peligro an ira kinabuhi. Andam hira umatubang ha posibilidad nga mahimo mangahulogan han ira kamatayon an ira desisyon. Kondi maaram hira nga may-ada hira han pag-uyon ngan bendisyon han Dios.—Daniel 3:16-19.

Kon umatubang kita hin mga kakurian katapos magdesisyon sumala ha konsensya, diri ito hinungdan nga hunahunaon nga sayop an desisyon. “An panahon ngan an [diri-ginlalaoman nga] higayon” mahimo makaapekto hin diri maopay ha resulta han bisan gimaopayi an tumong nga mga desisyon. (Eklesiastes 9:11) Dugang pa, usahay gintutugotan ni Jehova an kakurian nga sarihan an kahilarom han aton debosyon. Hi Jakob kinahanglan makigdulong ha bug-os nga gab-i ha usa nga anghel antes kumarawat hin bendisyon. (Genesis 32:24-26) Kita liwat bangin kinahanglan makigdulong ha kakurian, bisan kon nagbubuhat kita han husto. Ha gihapon, kon an aton mga desisyon nauyon ha kaburut-on han Dios, makakasiguro kita nga bubuligan kita niya nga maglampos ngan ha kataposan bibendisyonan kita niya.—2 Korinto 4:7.

Salit, kon naghihimo hin importante nga desisyon, ayaw sarig ha imo kalugaringon nga kinaadman. Pamilnga an mga prinsipyo han Biblia nga aplikado. Pakiistorya kan Jehova mahitungod hito. Kon posible, pakiistorya ha hamtong nga mga igkasi-Kristiano. Ngan magin maisugon. Pahimulusi an hatag han Dios ha imo nga kagawasan ha pagbuot ha makatadunganon nga paagi. Paghimo hin maopay nga desisyon ngan ipakita kan Jehova nga an imo kasingkasing tangkod ha iya.

[Retrato ha pahina 29]

Usisaha an Pulong han Dios antes maghimo hin importante nga mga desisyon

[Mga Retrato ha pahina 30]

Pakiistorya kan Jehova mahitungod han mga desisyon nga kinahanglan mo himoon

[Retrato ha pahina 31]

Mahimo ka makiistorya ha hamtong nga mga Kristiano mahitungod han imo importante nga mga desisyon