Magpadayon ha Pag-ani!
Magpadayon ha Pag-ani!
“Hira nga nagtatanom hin mga luha mag-aani hin kalipay.”—SALMO 126:5.
1. Kay ano nga ‘mag-ampo ha Agaron han pag-ani nga magpadara hin mga mag-arani’ yana?
KATAPOS han ikatulo nga pagbiyahe ni Jesu-Kristo ha pagwali ha Galilea, hiya nagsiring ha iya mga disipulo: “An babrion banos, kondi an magbabari talagsa.” (Mateo 9:37) Pariho an kahimtang ha Judea. (Lukas 10:2) Tungod kay nahitabo ito haros 2,000 ka tuig na an naglabay, ano an kahimtang yana? Bueno, durante han naglabay nga tuig han pag-alagad, sobra 6,000,000 nga Saksi ni Jehova an nagpadayon ha simboliko nga pag-ani ha 6,000,000,000 nga tawo han kalibotan, nga damu ha ira an “nanluluya ngan nagpapatlaag, sugad hin mga karnero nga waray magbarantay.” Salit an pagsagda ni Jesus nga “mag-ampo kamo ha Ginoo han babrion, basi hiya magsugo hin mga magbabari ha iya babrion,” angayan yana sugad hadto mga siglo na an naglabay.—Mateo 9:36, 38.
2. Ano an nakakadani han atensyon han mga tawo ha aton?
2 Hi Jehova nga Dios, an Agaron han pag-ani, nabaton han panginyupo nga magpadara hin dugang nga mga mag-arani. Ngan makalilipay gud an pakigbahin hinin ginigiyahan han Dios nga pag-ani! Bisan kon gutiay kita kon itanding ha mga nasud, nakikita han kalibotan an aton madasigon nga pakigbahin ha pagwali-han-Ginhadian ngan paghimo-disipulo nga buruhaton. Ha damu nga nasud agsob nga gin-uunabi kita ha media. An tunog han doorbell ha drama ha telebisyon mahimo magpasabot nga nabisita an mga Saksi ni Jehova. Oo, an aton Kristiano nga buruhaton sugad nga simboliko nga mga mag-arani kilala gud ha ika-21 ka siglo.
3. (a) Paonan-o kita nahibabaro nga natigamnan an buruhaton nga pagwali-han-Ginhadian ha siyahan nga siglo? (b) Kay ano nga makakasiring kita nga an mga anghel nasuporta ha aton ministeryo?
3 Natigamnan liwat han kalibotan an siyahan-siglo nga mga buruhaton ha pagwali-han-Ginhadian ngan an gintimaraot nga mga parasamwak han maopay nga sumat. Salit, hi apostol Pablo nagsurat: “Ako naghuhunahuna, nga iginbutang kami han Dios nga mga apostol nga urhi, sugad ha mga tawo nga pinanhukman ha kamatayon: kay ginbuhat kami [mga apostol] nga taran-awon ha kalibotan, ha mga anghel ngan ha mga tawo man.” (1 Korinto 4:9) Sugad man, an aton pagpadayon sugad nga mga parasamwak han Ginhadian bisan pa han pagtimaraot nagtatawag han atensyon han kalibotan ngada ha aton ngan importante ito ha mga anghel. An Pahayag 14:6 nasiring: “Hinkit-an ko [apostol Juan] an lain nga anghel nga naglulupadlupad ha ginkakatungaan han langit, nga mayada waray kataposan nga Maopay nga Sumat nga igwawali ngadto hadton mga nag-uukoy ha tuna, ngan ha ngatanan nga nasud ngan panon, ngan yinaknan ngan katawohan.” Oo, an mga anghel nasuporta ha aton ministeryo—ha aton pag-ani!—Hebreo 1:13, 14.
“Kamo Pagdudumtan”
4, 5. (a) Ano nga pahamangno an iginhatag ni Jesus ha iya mga disipulo? (b) Kay ano nga ‘gindudumtan’ an mga surugoon han Dios yana?
4 Han an mga apostol ni Jesus sinugo sugad nga mga mag-arani, ira ginsunod an iya instruksyon nga “magmaaram . . . sugad han mga halas, ngan magpakabuotan sugad han mga sarapati.” Hi Jesus nagdugang: “Magtagam kamo ha mga tawo; kay igtutubyan kamo nira ha mga hukmanan, ngan didto ha ira mga sinagoga paghahampakon kamo nira. Oo, ngan ha atubangan han mga gobernador ngan han mga hadi pagdadad-on kamo tungod ha akon, ha pagpamatuod ha ira, ngan ha mga Hentil. . . . Ngan kamo pagdudumtan han ngatanan nga mga tawo tungod han akon ngaran, kondi an magpadayon tubtob ha kataposan, ini amo an maluluwas.”—Mateo 10:16-22.
5 ‘Gindudumtan’ kita yana tungod kay ‘an bug-os nga kalibotan aada ha gahum han usa nga maraot,’ hi Satanas nga Yawa, nga amo an punoan nga kaaway han Dios ngan han Iya katawohan. (1 Juan 5:19) Nakikita han aton mga kaaway an aton espirituwal nga kauswagan kondi diri kinikilala nga buhat ito ni Jehova. Nakikita han mga parakontra an aton malipayon, nahiyom nga mga nawong samtang malipayon nga nakikigbahin kita ha pag-ani. Nahipapausa hira ha aton pagkaurosa! Ha pagkamatuod, bangin napipiritan hira nga karawaton ito kon nagbibiyahe hira ha iba nga nasud ngan makita nga an mga Saksi ni Jehova didto nagbubuhat han pariho gud nga buruhaton nga nakikita nira ha ira nasud. Siyempre, maaram kita nga ha itinanda nga panahon hi Jehova, an aton parabulig ngan surok han aton pagkaurosa, makikilala bisan han aton mga kaaway.—Esekiel 38:10-12, 23.
6. Ano an pasarig ha aton samtang nagbubuhat kita ha pag-ani, kondi ano nga pakiana an nabangon?
6 An Agaron han pag-ani naghatag ha iya Anak, hi Jesu-Kristo, han “ngatanan nga kagamhanan . . . ha langit ngan ha tuna.” (Mateo 28:18) Salit ginagamit ni Jehova hi Jesus ha paggiya ha pag-ani pinaagi han langitnon nga mga anghel ngan han dinihogan nga ‘matinumanon ngan maaramon nga uripon’ dinhi ha tuna. (Mateo 24:45-47; Pahayag 14:6, 7) Kondi paonan-o naton malalamposan an pagkontra han kaaway ngan tipigan pa gihapon an aton kalipay samtang nagpapadayon kita ha pag-ani?
7. Ano nga panhunahuna an sadang pangalimbasogan naton nga tipigan kon ginkukontra o gintitimaraot?
7 Kon naatubang kita ha pagkontra o bisan han direkta nga pagtimaraot, hangyoon naton an bulig han Dios basi matipigan naton an panhunahuna nga sugad han kan Pablo. Hiya nagsurat: ‘Kon ginpapasipara kami, ginmamaopay namon; kon gintitimaraot kami, nag-iilob kami; Kon ginpapakaalohan kami, nakikimalooy kami.’ (1 Korinto 4:12, 13) Ini nga panhunahuna, upod an aton mataktika nga ministeryo ha publiko, usahay nakakagbag-o han paggios han aton mga parakontra.
8. Ano nga pasarig an imo nakakarawat tikang ha mga pulong ni Jesus nga iginrekord ha Mateo 10:28?
8 Bisan an tarhog han kamatayon diri makakapatugnaw han aton kadasig ha pag-ani. Waray-kahadlok nga iginpapasamwak naton an mensahe han Ginhadian ha kadaygan tubtob nga mahihimo. Ngan nakakakuha kita hin makapadasig nga pasarig tikang ha mga pulong ni Jesus: “Diri kamo mahadlok ha nakakamatay han lawas, kondi diri sadang makamatay han kalag; kondi kahadluki lugod an nakakahimo makahibang han kalag ngan han lawas man ha [Gehenna].” (Mateo 10:28) Maaram kita nga an aton langitnon nga Amay amo an Humaratag han kinabuhi. Ginbabalosan niya adton nagtitipig han integridad ha iya ngan matinumanon nga nagpapadayon ha pag-ani.
Nagtatalwas-Kinabuhi nga Mensahe
9. Paonan-o ginios an iba ha mga pulong ni Esekiel, ngan paonan-o nga pariho an nahitatabo yana?
9 Han maisugon nga iginpahayag ni Esekiel an mga mensahe ni Jehova ha ‘rebelyoso nga mga nasud’—an mga ginhadian han Israel ngan Juda—an iba nga mga tawo nalipay ha pakabati han iya ginsiring. (Esekiel 2:3) “Kitaa,” siring ni Jehova, “ikaw sugadsugad ha ira hin usa nga makaruruyag hinduro nga kanta han usa nga may makaruruyag nga tingog, ngan nga nakakatokar hin maopay hin usa nga turunggon.” (Esekiel 33:32) Bisan kon naruyagan nira an mga pulong ni Esekiel, waray nira buhata ito. Ano an nahitatabo yana? Kon an dinihogan nga nanhibilin ngan an ira mga kaupod maisugon nga nagpapahayag han mga mensahe ni Jehova, an iba naruruyag mamati mahitungod han mga bendisyon han Ginhadian, kondi diri nira kinakarawat nga may apresasyon, diri nagigin mga disipulo, ngan diri naupod ha pag-ani.
10, 11. Ha siyahan nga katunga han ika-20 ka siglo, ano an ginbuhat ha pagpasamwak han aton nagtatalwas-kinabuhi nga mensahe, ngan ano an mga resulta?
10 Ha luyo nga bahin, damu an positibo nga nakarawat ha pag-ani nga buruhaton ngan nakikigbahin ha pagpahayag han mga mensahe han Dios. Durante han mga serye han Kristiano nga mga kombensyon tikang han 1922 tubtob 1928, pananglitan, iginpasamwak hin matin-aw an mga mensahe han paghukom ha maraot nga sistema han mga butang ni Satanas. Iginpasamwak ha mga estasyon han radyo ini nga mga mensahe han paghukom nga iginpresentar hiton nga mga asembleya. Katapos hito, an katawohan han Dios nanaltag hin minilyon inimprinta nga mga kopya hini.
11 Ha ikatarapos han dekada han 1930, usa pa nga porma han pagwali nga buruhaton an inabrihan—nagmamartsa nga impormasyon. Ha siyahan, an katawohan ni Jehova nagsul-ot hin mga plakard nga nagpahibaro han mga pahayag ha publiko. Ha urhi, nagdara hira hin mga plakard nga mayada mga pulong sugad han “Relihiyon usa nga lit-ag ngan limbong” ngan “Mag-alagad ha Dios ngan kan Kristo nga Hadi.” Han nagmartsa hira ha mga kalsada, nadani nira an atensyon han mga lumalabay. ‘Daku an nahimo hini basi an atensyon maisentro ha mga Saksi ni Jehova ngan magin maisugon hira,’ siring han usa nga bugto nga regular nga nakigbahin hini nga buruhaton ha tawuhon nga mga kalsada han Londres, Inglatera.
12. Dugang pa ha mga mensahe han paghukom han Dios, ano an ginagamit naton ha aton ministeryo, ngan hin-o an nagkakaurosa yana ha pagwali han maopay nga sumat?
12 Samtang iginpapahayag naton an mga mensahe han paghukom han Dios, iginsusumat liwat naton an iginsaad nga mga bendisyon nga mga bahin han mensahe han Ginhadian. An aton maisugon nga pagwali ha kalibotan nabulig ha aton nga mabilngan an mga takos. (Mateo 10:11) Kadam-an han ultimo nga mga membro han dinihogan nga klase binaton ha matin-aw nga panawagan ha pag-ani durante han mga dekada han 1920 ngan 1930. Ngan, ha kombensyon han 1935, inabot an makaruruyag nga sumat han binendisyonan nga tidaraon para han ‘daku nga panon’ han ‘iba nga mga karnero’ ha paraiso nga tuna. (Pahayag 7:9; Juan 10:16) Ira ginsusunod an mga mensahe han paghukom han Dios ngan inupod ha mga dinihogan ha pagwali han maopay nga sumat nga nagtatalwas-han-kinabuhi.
13, 14. (a) Ano nga pagliaw an makakarawat naton tikang ha Salmo 126:5, 6? (b) Kon magpadayon kita ha pagsabwag ngan pagbisibis, ano an mahitatabo?
13 Nakakaliaw gud ha mga mag-arani han Dios, ngan labi na hadton nag-aantos hin pagtimaraot, an mga pulong han Salmo 126:5, 6: “Hira nga nagtatanom hin mga luha mag-aani hin kalipay: Hiya nga naglalakat ngan nagtitinook, nagdadara hin mga binhi nga isarabwag, ha waray ruhaduha mabalik liwat hiya nga mayada kalipay, ngan magdadara han iya mga binugkos.” An mga pulong han salmista mahitungod han pagsabwag ngan pag-ani nag-iilustrar han pagtagad ngan bendisyon ni Jehova ha nanhibilin nga binalik tikang ha pagkabihag ha kadaan nga Babilonya. Malipayon gud hira ha ira katalwasan, kondi bangin nagtangis hira han nagsabwag han binhi ha binayaan nga tuna nga waray matrabaho durante han ira 70-ka-tuig nga pagkabihag. Kondi, adton nagpadayon ha ira pagsabwag ngan pagtukod nga mga buruhaton nagpahimulos han mga bunga ngan katagbaw tikang ha ira pangalimbasog.
14 Bangin magtangis kita ilarom han pagsari o kon kita o an aton mga igkasi-tumuroo nag-aantos tungod han katadongan. (1 Pedro 3:14) Ha aton pag-ani, ha siyahan bangin makurian kita tungod kay waray kita maipapakita nga proyba han kalamposan han aton mga pangalimbasog ha ministeryo. Kondi kon magpadayon kita ha pagsabwag ngan pagbisibis, an Dios an magpapatubo, agsob nga lahos pa han aton ginlalaoman. (1 Korinto 3:6) Makikita gud ini ha mga resulta han aton panaltag hin mga Biblia ngan Kasuratanhon nga mga publikasyon.
15. Paghatag hin ehemplo han pagkamapulsanon han Kristiano nga mga publikasyon ha pag-ani.
15 Tagda an ehemplo han lalaki nga hi Jim. Han mamatay an iya iroy, nabilngan niya ha iya mga panag-iya an libro nga Life—How Did It Get Here? By Evolution or by Creation? a Ginbasa niya ito nga may interes. Ha pakiistorya ha usa nga Saksi nga dinaop ha iya ha kalsada, inuyon hi Jim ha pagbalik bisita, ngan nagresulta ini ha pag-aram ha Biblia. Hi Jim madagmit nga nag-uswag ha espirituwal, igindedikar an iya kalugaringon kan Jehova, ngan nabawtismohan. Iya ginsumatan an iba nga mga membro han iya pamilya mahitungod han iya hinbaroan. Sugad nga resulta, an iya magurang nga babaye ngan lalaki nagin mga Saksi ni Jehova, ngan hi Jim ha urhi nagpahimulos han pribilehiyo ha pag-alagad sugad nga bug-os-panahon nga boluntaryo ha Bethel ha Londres.
Gintitimaraot Kondi Malipayon
16. (a) Kay ano nga naieksperyensyahan an kalamposan ha pag-ani? (b) Ano nga pahamangno an iginhatag ni Jesus mahitungod han epekto han maopay nga sumat, kondi pinaagi han ano nga paggios nadaop kita ha mga tawo?
16 Kay ano nga mayada sugad nga kalamposan ha pag-ani? Tungod kay an dinihogan nga mga Kristiano ngan an ira mga kaupod nasugot ha mga instruksyon ni Jesus: “An iginsiring ko ha iyo ha kasisidman, igyakan niyo ha kalamragan; ngan an iyo hinbatian ha talinga, igwali didto ha mga kabubungan.” (Mateo 10:27) Kondi, makakalaom kita hin mga kakurian, kay hi Jesus nagpahamangno: “An bugto nga lalaki magtutubyan ha kamatayon han iya bugto nga lalaki; ngan an amay, ha anak; ngan an mga anak matindog kontra ha mga kag-anak, ngan pamamatayon hira.” Hi Jesus nagpadayon ha pagsiring: “Diri kamo maghunahuna nga an akon pagkanhi paghatag hin kamurayawan ha tuna; ako waray kanhi paghatag han kamurayawan kondi ha kampilan.” (Mateo 10:21, 34) Waray tuyoa ni Jesus nga magkabahinbahin an mga pamilya. Kondi an maopay nga sumat usahay mayada hito nga epekto. Pariho man ha mga surugoon han Dios yana. Kon nabisita kita ha mga pamilya, diri naton gintutuyo nga magin hinungdan ito han pagkabahinbahin han pamilya. Karuyag naton nga an ngatanan kumarawat han maopay nga sumat. Salit, nangangalimbasog kita nga makaistorya an ngatanan nga membro han pamilya ha maloloy-on, mapinairon nga paagi basi magin makaruruyag an aton mensahe ha “mga tinunguran han kinabuhi nga waray kataposan.”—Buhat 13:48.
17. Paonan-o iginbubulag adton nasuporta ha pagkasoberano han Dios, ngan ano an usa nga ehemplo hini?
17 An mensahe han Ginhadian nagbubulag hadton nasuporta ha pagkasoberano han Dios. Pananglitan, tagda kon paonan-o naiiba an aton mga igkasi-magsiringba tungod kay hira ‘nagbayad kan Cesar han mga butang ni Cesar kondi ha Dios han mga butang han Dios’ ha mga adlaw han Sosyalismo han Nasud ha Alemanya. (Lukas 20:25) Kabaliktaran ha mga lider han relihiyon ngan nag-aangkon nga mga Kristiano nga kaupod han mga iglesia han Kakristianohan, an mga surugoon ni Jehova nagpabilin nga marig-on, nagdumiri ha pagtalapas han mga prinsipyo han Biblia. (Isaias 2:4; Mateo 4:10; Juan 17:16) Hi Propesor Christine King, awtor han libro nga The Nazi State and the New Religions, nakaobserba: “Kontra han mga Saksi la nga waray maglampos an [Nazi nga] gobyerno, kay bisan kon ginpatay nira an yinukot, nagpadayon an buruhaton ngan han Mayo 1945 an organisasyon han mga Saksi ni Jehova buhi pa gihapon, samtang an Sosyalismo han Nasud waray na.”
18. Ano nga paggios an ipinapakita han katawohan ni Jehova bisan pa han pagtimaraot?
18 Makatirigamnan gud an paggios nga ipinapakita han katawohan ni Jehova kon naatubang hira ha pagtimaraot. Bisan kon an sekular nga mga awtoridad bangin madasig han aton pagtoo, nahipapausa hira nga diri kita nagdudumot o napupungot. Pananglitan, an nakatalwas nga mga Saksi ha Holocaust agsob magpahayag hin kalipay ngan kakontento samtang nahinunumduman nira an ira mga eksperyensya. Maaram hira nga hi Jehova naghatag ha ira hin “kapin kaopay nga gahum.” (2 Korinto 4:7) An mga dinihogan nga kaupod pa naton yana mayada han pasarig nga an ira “mga ngaran nanhisurat ha langit.” (Lukas 10:20) An ira pagpailob nagbubunga hin paglaom nga diri nagriresulta hin kapakyasan, ngan an matinumanon nga mga mag-arani nga mayada tunan-on nga paglaom mayada pariho nga pagtoo.—Roma 5:4, 5.
Magpadayon ha Pag-ani
19. Ano nga epektibo nga mga paagi an ginagamit ha Kristiano nga ministeryo?
19 Kon tubtob san-o pa tutugotan kita ni Jehova ha pagbuhat ha simboliko nga pag-ani diri pa hinbabaroan. Samtang yana, sadang hinumduman naton nga an mga mag-arani mayada espisipiko nga mga paagi ha pagbuhat han ira buruhaton. Sugad man, makakasiguro kita nga an aton pagkamatinumanon ha paggamit han nasarihan na nga mga paagi han pagwali magigin epektibo. Hi Pablo nagsiring ha mga igkasi-Kristiano: “Nanginginyupo ako ha iyo nga magsubad kamo ha akon.” (1 Korinto 4:16) Han nakigkita hi Pablo ha mga tigurang ha Efeso didto ha Mileto, iya ginpahinumdom hira nga waray hiya paglikay ha panutdo ha ira “ha kadaygan, ngan tikang ha tagsatagsa nga balay.” (Buhat 20:20, 21) An kaupod ni Pablo nga hi Timoteo nahibaro han mga paagi han apostol ngan salit gintutdoan hini an mga taga-Korinto. (1 Korinto 4:17) Ginbendisyonan han Dios an mga paagi han pagtutdo ni Pablo, sugad la han iya pagbendisyon ha aton pagpadayon ha pagwali han maopay nga sumat ha kadaygan ngan ha balay-balay, ha mga pagbalik bisita, ha mga pag-aram ha Biblia, ngan ha bisan diin nga mayada mga tawo.—Buhat 17:17.
20. Paonan-o ipinakita ni Jesus nga hirani na an hura espirituwal nga pag-ani, ngan paonan-o nga totoo ini ha bag-o la nga mga tuig?
20 Katapos magwali ha Samaritana nga babaye hirani ha Sikar han 30 K.P., gin-unabi ni Jesus an espirituwal nga pag-ani. Nagsiring hiya ha iya mga disipulo: “Ipaigbaw niyo an iyo mga mata, ngan tan-awa an mga kapatagan, kay magbusag na nga daan ha pagbari. Ngan an nagbabari, nakakarawat hin suhol, ngan nagtitirok han bunga ha kinabuhi nga waray kataposan; basi an nagtatanom ngan an nagbabari magkalipay hin tingob.” (Juan 4:34-36) Bangin nakita na ni Jesus an epekto han pakiistorya niya ha Samaritana nga babaye, kay damu an tinoo ha iya tungod han asoy han babaye. (Juan 4:39) Ha bag-o la nga mga tuig, ginkuha han magkalainlain nga mga nasud an mga pagdiri ha mga Saksi ni Jehova o iginhatag na ha ira an legal nga pagkilala, salit naabrihan an bag-o nga mga kanataran para ha pag-ani. An resulta amo an nagpapadayon nga hura espirituwal nga pag-ani. Ha pagkamatuod, ha bug-os nga kalibotan, nakakarawat an hura nga mga bendisyon samtang malipayon nga nagpapadayon kita ha pagbuhat ha espirituwal nga pag-ani.
21. Kay ano nga mayada kita hinungdan nga magpadayon sugad nga malipayon nga mga mag-arani?
21 Kon an mga bunga hinog na ngan andam na anihon, an mga mag-arani kinahanglan gumios nga may pagkaapurado. Kinahanglan magbuhat hira nga waray paglangan. Yana, kinahanglan magbuhat kita hin maduruto ngan may pagkaapurado tungod kay nagkikinabuhi na kita ha “panahon han kataposan.” (Daniel 12:4) Oo, naatubang kita ha mga pagsari, kondi mayada darodaku nga pag-ani han mga magsiringba ni Jehova kay ha naglabay. Ini kon sugad an adlaw han pagkalipay. (Isaias 9:3) Salit, sugad nga malipayon nga mga mag-arani, magpadayon kita ha pag-ani!
[Footnote]
a Iginpublikar ngan iginpapanaltag han mga Saksi ni Jehova.
Paonan-o Mo Babatunon?
• Paonan-o binabaton han Agaron han pag-ani an pakimalooy para han dugang nga mga mag-arani?
• Bisan kon kita ‘gindudumtan,’ ano nga panhunahuna an gintitipigan naton?
• Kay ano nga malipayon kita bisan kon gintitimaraot kita?
• Kay ano nga sadang kita magpadayon ha pag-ani nga may pagkaapurado?
[Mga Pakiana]
[Mga Retrato ha pahina 16, 17]
Adton nagbubuhat ha espirituwal nga pag-ani mayada suporta han mga anghel
[Retrato ha pahina 18]
An nagmamartsa nga impormasyon nagdara han mensahe han Ginhadian ha atensyon han damu nga mga tawo
[Retrato ha pahina 18]
Kita an nagtatanom ngan nagbibisibis, kondi an Dios an nagpapatubo hito