Pag-aram ha Biblia Mapulsanon ba Ito ha Imo?

“DIRI angay basahon kon waray kaupod nga padi.” Ini nga pahamangno makikita ha tinikangan han iba nga mga Biblia nga gintatag-iya han mga Katoliko. “Sugad nga mga Katoliko diri kami pirme nagamit han Biblia,” siring ni Kay Murdy han Catholic Bible Institute ha Los Angeles, “kondi nagbabag-o ito nga kahimtang.” Ha panahon nga nahibabaro an mga Katoliko kon paonan-o an Baraan nga Kasuratan nakakaapekto ha ira kinabuhi, siring niya, “napapatubo nira an ira hingyap para ha Biblia.”

Mahitungod hini nga pagbag-o, an magasin nga U.S. Catholic nagkukotar han usa nga nagdudumara han edukasyon ha relihiyon nga nagsiring nga an mga Katoliko nga kaupod ha mga klase ha pag-aram ha Biblia naabat nga “waray hira tutdui sugad nga mga Katoliko, ngan damu gud an bahandi ha Biblia. Karuyag nira magkaada hin pipira hito nga mga bahandi nga inabat nira nga waray nira makarawat.”

Anoman an kahimtang, ano nga “bahandi” an mabibilngan han usa nga estudyante han Biblia? Hunahunaa: Karuyag mo ba hibaroan kon paonan-o malalamposan an mga pangarit han adlaw-adlaw nga kinabuhi? Paonan-o mo matitipigan an kamurayawan ha sulod han pamilya? Kay ano nga mayada duro nga kawaray-pagtahod ngan diri makisangkayon nga panggawi? Ano an hinungdan han kamadarahog han mga batan-on yana nga panahon? An masasarigan nga mga baton hini ngan han iba pa nakakawurok nga mga pakiana mabibilngan ha Pulong han Dios, an Biblia, ngan tinuod nga “bahandi” ito, diri la para ha mga Katoliko o mga Protestante kondi liwat para ha mga Budhista, mga Hindu, mga Muslim, mga Shintoista, bisan ha mga ateyista ngan mga agnostiko. Sugad han siring han salmista, ‘an pulong han Dios lawag ha iya tiil, ngan suga ha iya agian.’ Masusugad man ito ha imo.—Salmo 119:105.