Sumat han mga Parasamwak han Ginhadian

Napara an Pagpasipara ha Ngaran han Dios

AN Pulong han Dios, an Biblia, nasiring: “Manggawi kamo hin maopay ha butnga han mga Hentil, nga, bisan kon naglilibak hira ha iyo nga baga magburuhat kamo hin maraot, ha pagtan-aw ha iyo mga magopay nga mga binuhatan, ira unta paghimayaon an Dios ha adlaw han pagduaw.” (1 Pedro 2:12) Salit, an totoo nga mga Kristiano nangangalimbasog nga matipigan an maopay nga paggawi basi malikyan an pagpasipara ha ngaran ni Jehova.

Ha hirayo nga lugar han Zambia nga tinatawag nga Senanga, an usa nga maestro ginkawatan hin radyo ha iya balay. Tungod kay an mga Saksi ni Jehova nagwawali dida hito nga lugar, gintahapan hira han lalaki hin pangawat. Iya iginsumat an nahitabo ha mga polis, nasiring nga ginkawat han mga Saksi an iya radyo. Sugad nga ebidensya nga an mga Saksi kinadto ha iya balay, iginpakita niya an tract nga iya nabilngan ha salog. Kondi, nagdumiri pagtoo an mga polis ha iya. Ira ginsagdonan hiya nga lumakat ngan mag-imbistiga hin mas maopay.

An mga Saksi nga nagwali ha mga amyaw han maestro hito nga adlaw gindasig han lawas han mga tigurang nga kumadto ngan makiistorya ha maestro mahitungod hito. Kinadto an pipira nga kabugtoan nga kalalakin-an ngan nakiistorya ha iya, nagsasaysay nga karuyag nira mawara an pagpasipara ha ngaran ni Jehova. Durante han ira paghisgot, ira ginsumatan hiya nga mayada hira nakaistorya nga batan-on nga lalaki ha iya balay ngan gintagan ito nga lalaki hin tract. Sumala han ira paghulagway, nakilala han magturutdo an lalaki. Ha pagkamatuod, pariho an ira relihiyon. Nakiistorya an maestro ha batan-on, kondi nagnigar hiya han mga akusasyon. Katapos hito igin-istorya han maestro ito nga butang ha mga ginikanan han batan-on nga lalaki ngan inuli. Ha sulod hin usa ka oras, igin-uli han iroy han batan-on nga lalaki an radyo nga ginkawat.

Tungod kay nakonsensya, nakiistorya an maestro ha lawas han mga tigurang ngan nangaro hin kapasayloan tungod han sayop nga mga akusasyon. Ginkarawat han mga tigurang an pangaro niya hin kapasayloan kondi naghangyo nga ipahibaro ha publiko an mga resulta basi an ngatanan mahibaro nga waray sala an mga Saksi. Iginpahibaro ito ha eskwelahan, salit nawara an pagpasipara ha ngaran ni Jehova. An mga Saksi ni Jehova padayon nga nagwawali nga may kagawasan dida hiton nga lugar.

[Mga Mapa/Retrato ha pahina 19]

(Para ha aktuwal nga format, kitaa an publikasyon)

APRIKA

Zambia

[Ginkuhaan han Retrato]

Mountain High Maps® Copyright © 1997 Digital Wisdom, Inc.