Padayon nga Dumungan ha Organisasyon ni Jehova
Padayon nga Dumungan ha Organisasyon ni Jehova
‘An Dios han kamurayawan . . . magsangkap unta ha iyo han ngatanan magopay nga mga butang ha pagbuhat han iya kaburut-on.’—HEBREO 13:20, 21.
1. Ano an populasyon han kalibotan, ngan pira kadamu an mga membro han pipira nga mga relihiyon?
HAN tuig 1999, an populasyon han kalibotan inabot ha unom ka bilyon! Ipinapakita han The World Almanac nga hini nga kadamu mga 1,165,000,000 an Muslim; 1,030,000,000 an Romano Katoliko; 762,000,000 an Hindu; 354,000,000 an Budhista; 316,000,000 an Protestante; ngan 214,000,000 an Ortodokso.
2. Ano an masisiring mahitungod han kahimtang han relihiyon yana nga panahon?
2 Tungod han pagkabahinbahin ngan kasamok ha relihiyon yana nga panahon, mahihimo ba hinin minilyon nga mga tawo an pagbuhat han kaburut-on han Dios? Diri, “kay an Dios diri Dios ha kasamokan, kondi ha paghidait.” (1 Korinto 14:33) Ha luyo nga bahin, kumusta an internasyonal nga pagminagburugto han mga surugoon ni Jehova? (1 Pedro 2:17) Pinamamatud-an han maopay nga pag-usisa nga ‘an Dios han kamurayawan nagsasangkap ha ira han ngatanan magopay nga mga butang ha pagbuhat han iya kaburut-on.’—Hebreo 13:20, 21.
3. Ano an nahitabo ha Jerusalem han Pentekostes 33 K.P., ngan kay ano?
3 Siyempre, an kadamu hadton nakikig-upod ha mga Saksi ni Jehova diri amo an basihan ha pagsiguro kon nagpapahimulos ba hira han pag-uyon han Dios; diri man nagpapalipay ha Dios an pag-uswag han kadamu. Waray niya pilia an mga Israelita tungod kay hira ‘an gidadamui’ han mga katawohan. Hira, ha pagkamatuod, “an gigugutiayi” ha ira. (Deuteronomio 7:7) Kondi tungod kay diri-matinumanon an Israel, ha Pentekostes 33 K.P., iginbalhin ni Jehova an iya pag-uyon ha bag-o nga kongregasyon han mga sumurunod ni Jesu-Kristo. Gindihogan hira han baraan nga espiritu ni Jehova ngan madasigon nga iginpapasamwak ha iba an kamatuoran mahitungod ha Dios ngan kan Kristo.—Buhat 2:41, 42.
Padayon nga Nag-uuswag
4. Kay ano nga makakasiring ka nga an siyahan Kristiano nga kongregasyon padayon nga nag-uswag?
4 Han siyahan nga siglo, an Kristiano nga kongregasyon padayon nga nag-uuswag, inaabrihan an bag-o nga mga teritoryo, naghihimo hin mga disipulo, ngan nagkakaada dugang nga pagsabot ha mga katuyoan han Dios. An siyahan nga mga Kristiano padayon nga nadungan ha espirituwal nga kahayag nga igintagana pinaagi han mga surat nga inspirado han Dios. Tungod kay napagios han mga pagbisita han mga apostol ngan han iba, natuman nira an ira ministeryo. Pinamamatud-an hin maopay ini ha Kristiano Griego nga Kasuratan.—Buhat 10:21, 22; 13:46, 47; 2 Timoteo 1:13; 4:5; Hebreo 6:1-3; 2 Pedro 3:17, 18.
5. Kay ano nga nag-uuswag an organisasyon han Dios yana nga panahon, ngan kay ano nga sadang kita dumungan hito?
5 Pariho han siyahan nga mga Kristiano, an moderno nga mga Saksi ni Jehova nag-uuswag tikang ha gutiay nga tinikangan. (Sakarias 4:8-10) Tikang ha urhi nga bahin han ika-19 ka siglo, matin-aw an ebidensya nga an espiritu han Dios aada ha iya organisasyon. Tungod kay nasarig kita, diri ha gahum han tawo, kondi ha giya han baraan nga espiritu, nagpapadayon kita ha pag-uswag ha aton pagsabot ha Kasuratan ngan ha pagbuhat han kaburut-on han Dios. (Sakarias 4:6) Yana nga aanhi na kita ha “kataposan nga mga adlaw,” importante nga padayon nga dumungan kita ha mainuswagon nga organisasyon ni Jehova. (2 Timoteo 3:1-5) Ha pagbuhat hito matitipigan naton an aton paglaom nga buhi ngan makikigbahin ha pagtestigo mahitungod han natukod na nga Ginhadian han Dios antes umabot an kataposan hini nga sistema han mga butang.—Mateo 24:3-14.
6, 7. Aton paghihisgotan an ano tulo nga bahin diin nag-uuswag an organisasyon ni Jehova?
6 Kaupod naton adton nagtikang ha ira pakig-upod ha organisasyon ni Jehova ha mga dekada han 1920, 1930, ngan 1940. Durante hiton nga mga panahon, hin-o ha aton an naghunahuna han makatirigamnan nga pagtubo ngan padayon nga pag-uswag han organisasyon tubtob hini nga adlaw? Hunahunaa an importante nga mga hitabo nga naieksperyensyahan ha aton moderno nga kasaysayan! Tinuod, mayada balos ha espirituwal, an paghunahuna han mga nahimo ni Jehova pinaagi han iya organisado nga katawohan ha teokratiko nga paagi.
7 Hi David ha kadaan nga panahon nadasig gud han pinamalandong niya an urusahon nga mga buhat ni Jehova. “Kon ako magpahayag ngan magyakan tungod hito,” siring niya, “magdadamu pa ito han [akon] maiisip.” (Salmo 40:5) Mayada kita pariho nga kaluyahan, diri naton maisasaysay an damu bantogan ngan darayawon nga mga buhat ni Jehova ha aton panahon. Kondi, aton paghisgotan an tulo nga bahin diin nag-uuswag an organisasyon ni Jehova: (1) mainuswagon espirituwal nga kahayag, (2) ginpauswag ngan ginpahaluag nga ministeryo, ngan (3) napapanahon nga mga pagbag-o ha mga kahikayan han organisasyon.
Mapasalamaton ha Espirituwal nga Kahayag
8. Uyon ha Proberbios 4:18, tungod han espirituwal nga kahayag ano an hinsasabtan naton mahitungod han Ginhadian?
8 Mahitungod han mainuswagon espirituwal nga kahayag, an Proberbios 4:18 napamatud-an nga totoo. Ito nasiring: “An agianan han pagkamatadong sugad han kapawa ha pamanagbanag, nga nahayag hin labi ngan labi pa ngada ha pagkahingpit [han] adlaw.” Mapasalamaton gud kita ha mainuswagon espirituwal nga kalamrag nga aton naieksperyensyahan! Ha Cedar Point, Ohio, nga kombensyon han 1919, iginpatin-aw an Ginhadian han Dios. Ginagamit ni Jehova an Ginhadian ha pagbaraan han iya ngaran ngan ha pagbindikar han iya pagkasoberano. Ha pagkamatuod, tungod han espirituwal nga kahayag nasasabtan naton nga tikang ha Genesis tubtob ha Pahayag, pinamamatud-an han Biblia an katuyoan ni Jehova ha pagbaraan han iya ngaran pinaagi han Ginhadian nga ginmamandoan han iya Anak. Nadepende hito an urusahon nga paglaom han ngatanan nga nahigugma han pagkamatadong.—Mateo 12:18, 21.
9, 10. Han dekada han 1920, ano an hinbaroan mahitungod han Ginhadian ngan mahitungod han duha magkakontra nga organisasyon, ngan paonan-o ini nakabulig?
9 Ha kombensyon ha Cedar Point han 1922, ginsagda han nangunguna nga mamumulong, nga hi J. F. Rutherford, an katawohan han Dios nga “ipasamwak, ipasamwak, ipasamwak, an Hadi ngan an iya ginhadian.” Ha artikulo nga “Birth of the Nation,” nga iginpublikar ha The Watch Tower han Marso 1, 1925, iginpatin-aw an espirituwal nga pagsabot mahitungod han mga tagna nga nagtudlok ha katukod han Ginhadian han Dios han 1914. Hinsabtan liwat ha dekada han 1920 nga mayada duha magkakontra nga organisasyon—an kan Jehova ngan an kan Satanas. Nagpapadayon an away hito nga duha, ngan magigin kaupod la kita han magdadaog kon padayon kita nga nadungan ha organisasyon ni Jehova.
10 Paonan-o nabulig ha aton an sugad espirituwal nga kahayag? Tungod kay an Ginhadian han Dios ngan an Hadi nga hi Jesu-Kristo diri bahin han kalibotan diri man kita mahimo magin bahin hito. Pinaagi han pagpabilin nga bulag tikang ha kalibotan ipinapakita naton nga dapig kita han kamatuoran. (Juan 17:16; 18:37) Kon nakikita naton an makuri nga mga problema nga nagdadaot hinin maraot nga sistema, mapasalamaton gud kita nga diri kita bahin han organisasyon ni Satanas! Ngan bulahan gud kita ha pagkaada espirituwal nga seguridad ha sulod han organisasyon ni Jehova!
11. Ano an Kasuratanhon nga ngaran nga kinarawat han katawohan han Dios han 1931?
11 Ha Columbus, Ohio, ha kombensyon han 1931, ginhimo an angayan nga aplikasyon han Isaias 43:10-12. Ginkarawat han mga Estudyante han Biblia an pangirilal-an nga ngaran nga mga Saksi ni Jehova. Daku gud nga pribilehiyo an pagpasamwak han ngaran han Dios basi an iba makatawag hito basi matalwas!—Salmo 83:18; Roma 10:13.
12. Ano nga espirituwal nga kahayag mahitungod han daku nga kadam-an an igintagana han 1935?
12 Antes han dekada han 1930, damu han katawohan han Dios an baga in nagruhaduha mahitungod han ira paglaom ha tidaraon nga kinabuhi. An iba naghunahuna mahitungod han langitnon nga kinabuhi kondi nadani ha mga katutdoan han Biblia mahitungod han paraiso nga tuna. Ha Washington, D.C., ha kombensyon han 1935, makalilipay hibaroan nga an daku nga panon, o daku nga kadam-an, han Pahayag kapitulo 7 amo an grupo nga mayada tunan-on nga paglaom. Tikang hadto, an pagtirok han daku nga kadam-an nagpapadayon ha pag-uswag hin mas madagmit gud. Diri ba kita mapasalamaton nga an pangirilal-an han daku nga kadam-an diri na misteryo ha aton? An kamatuoran nga damu hinduro nga katawohan an gintitirok tikang ha ngatanan nga mga nasud, mga tribo, ngan mga yinaknan nagpapagios ha aton nga magdagmit ha aton buruhaton samtang padayon nga nadungan kita ha organisasyon ni Jehova.
13. Ano nga daku nga isyu an iginpatin-aw ha kombensyon ha St. Louis han 1941?
13 An daku nga isyu nga sadang mabaraka an tawhanon nga sosiedad iginpatin-aw ha kombensyon han 1941 ha St. Louis, Missouri. Amo ito an pagmando ha uniberso, o pagkasoberano. Ini an isyu nga kinahanglan masulbad dayon, ngan an daku ngan makalilisang nga adlaw madagmit nga nagtitiarabot ha pagtuman hito! Iginpatin-aw liwat han 1941 an isyu may kalabotan han integridad, nga nagtutugot ha aton nga ipakita sugad nga indibiduwal kon diin kita natindog may kalabotan han pagkasoberano han Dios.
14. Ha internasyonal nga kombensyon han 1950, ano an hinbaroan mahitungod han mga prinsipe nga gin-unabi ha Isaias 32:1, 2?
14 Ha internasyonal nga kombensyon han 1950 ha New York City, husto nga iginpakilala an mga prinsipe han Isaias 32:1, 2. Makapabantad nga takna adto han iginpahayag ni Bugto Frederick Franz ini nga ulohan ngan iginsaysay nga an mga prinsipe han bag-o nga tuna kaupod naton. Hito nga kombensyon ngan ha mga sumunod pa, damu an mga idlap han espirituwal nga kalamrag. (Salmo 97:11) Mapasalamaton gud kita nga an aton agianan “sugad han kapawa ha pamanagbanag, nga nahayag hin labi ngan labi pa”!
Magpadayon ha Aton Ministeryo
15, 16. (a) Paonan-o kita nag-uswag ha aton ministeryo durante han mga dekada han 1920 ngan 1930? (b) Ano nga mga publikasyon an nagdasig ha Kristiano nga ministeryo ha bag-o la nga mga dekada?
15 An ikaduha nga paagi nga nagpapadayon an organisasyon ni Jehova amo an may kalabotan han aton importante nga buruhaton—an pagwali han Ginhadian ngan paghimo hin disipulo. (Mateo 28:19, 20; Markos 13:10) Basi matuman ini nga buruhaton, padayon nga pinabubug-atan ha aton han organisasyon an pagkaimportante han pagpahaluag han aton ministeryo. Han 1922 ginsagda an ngatanan nga mga Kristiano nga makigbahin ha pagwali nga buruhaton. Sadang kilalahon han kada usa an responsabilidad ha pagpasanag han iya kalamrag ngan salit personal nga makigbahin ha pagtestigo han kamatuoran. (Mateo 5:14-16) Han 1927 ginhimo an mga kahikayan nga an Domingo amo an adlaw han ministeryo ha kanataran. Tikang han Pebrero 1940, agsob makita an mga Saksi ha mga kalsada ha mga lugar han negosyo nga nagtatanyag han The Watchtower ngan Consolation (Awake! na yana).
16 Han tuig 1937 iginpagowa an bokleta nga Model Study, nga nagpapabug-at han panginahanglan han mga pagbalik bisita basi tutdoan an iba han kamatuoran han Biblia. Han mga tuig katapos hito, ginpabug-atan gud an pag-aram ha Biblia nga buruhaton. Ginparig-on ini nga bahin han ministeryo pinaagi han pagpublikar han libro nga “Let God Be True” han 1946 ngan An Kamatuoran nga Nagtutugway Ngadto ha Kinabuhi nga Waray Kataposan han 1968. Yana, ginagamit naton an libro nga Kahibaro nga Nagtutugway Ngadto ha Kinabuhi nga Waray Kataposan. An pag-aram hini nga libro nagbubutang hin marig-on nga pundasyon ha paghimo hin mga disipulo.
Magpadayon Upod han mga Pagbag-o ha Organisasyon
17. Uyon ha Isaias 60:17, paonan-o nag-uuswag an organisasyon ni Jehova?
17 An ikatulo nga paagi nga an organisasyon ni Jehova nagpapadayon ha pag-uswag amo an may kalabotan ha mga pagbag-o ha organisasyon. Sumala ha Isaias 60:17, hi Jehova nagsaad: “Para han tumbaga magdadara ako hin bulawan, ngan para han puthaw magdadara ako hin salapi, ngan para han kahoy tumbaga, ngan para han mga bato, puthaw. Akon liwat papagdaiton an imo mga [paramangno], ngan papagmatadungon an imo mga [parahatag-han-toka].” Uyon hini nga tagna, ginhimo an mga paagi ha pagpauswag han pagmangno ha pagwali-han-Ginhadian nga buruhaton ngan pagbantay ha panon.
18, 19. Ano nga mga pagbag-o ha organisasyon an ginhimo ha naglabay nga mga tuig?
18 Han 1919 ginpili an direktor ha pag-alagad ha tagsa nga kongregasyon nga gin-organisa para ha pag-alagad ha kanataran. Nagdasig ini ha aton ministeryo ha kanataran. An eleksyon para han mga tigurang ngan ministeryal nga mga surugoon gintapos han 1932, nga nagtigaman han aton pagbulag ha demokratiko nga mga paagi. Usa pa importante nga hitabo an nadangat han 1938 han nagtikang an pagpili ha ngatanan nga mga surugoon ha kongregasyon nga mas uyon gud ha mga kahikayan han teokratiko nga pagpili ha siyahan Kristiano nga kongregasyon. (Buhat 14:23; 1 Timoteo 4:14) Han 1972 ginpili an mga paramangno ngan ministeryal nga mga surugoon basi mag-alagad, sugad han ginbuhat hadto han sugad nga kalalakin-an ha siyahan nga mga Kristiano. Imbes nga usa la nga tawo an nag-aalagad sugad nga paramangno han kongregasyon, ipinapakita han Filipos 1:1 ngan iba nga teksto nga adton kuwalipikado han Kasuratanhon nga mga kinahanglanon para ha mga paramangno nagkukompuwesto han lawas han mga tigurang.—Buhat 20:28; Efeso 4:11, 12.
19 Han 1975 ginhikay an mga komite han Nagmamando nga Lawas han mga Saksi ni Jehova ha pagmangno ha bug-os-kalibotan nga mga buruhaton han organisasyon han Dios. Ginpili an mga Komite han Sanga ha pagmangno han buruhaton ha ira mga teritoryo. Tikang hadto, ginpasayon an buruhaton ha headquarters ngan ha mga sanga han Watch Tower Society basi ‘masiguro an mas importante nga mga butang.’ (Filipos 1:9, 10) An mga responsabilidad han kabulig nga mga paramangno ni Kristo nag-uupod han panguna ha pagwali nga buruhaton, pagtutdo ha kongregasyon, ngan husto nga pagmangno ha panon han Dios.—1 Timoteo 4:16; Hebreo 13:7, 17; 1 Pedro 5:2, 3.
Aktibo nga Panguna ni Jesus
20. Ha padayon nga pagdungan ha organisasyon ni Jehova kinahanglan kilalahon naton an ano mahitungod han katungdanan ni Jesus?
20 Ha padayon nga pagdungan ha mainuswagon nga organisasyon ni Jehova kinahanglan kilalahon naton an igintoka-han-Dios nga katungdanan ni Jesu-Kristo sugad nga ‘ulo han kongregasyon.’ (Efeso 5:22, 23) Makatirigamnan, liwat, an Isaias 55:4, diin ginsumatan kita: “Kitaa, ako [Jehova] naghatag ha iya sugad nga usa nga saksi ha mga katawohan, usa nga magmarando ngan maglalarang ha mga katawohan.” Sigurado nga maaram hi Jesus manguna. Kilala liwat niya an iya mga karnero ngan an ira mga buhat. Ha pagkamatuod, han ginduaw niya an pito nga kongregasyon ha Asia Minor, lima ka beses hiya nga nagsiring: “Maaram ako han imo mga buhat.” (Pahayag 2:2, 19; 3:1, 8, 15) Maaram liwat hi Jesus han aton mga panginahanglan, sugad han iya Amay, hi Jehova. Antes ighatag an Surubdan nga Pag-ampo, hi Jesus nagsiring: “An iyo Amay [nga Dios] maaram kon ano nga mga butang an iyo ginkikinahanglan, nga diri pa kamo nangangaro ha iya.”—Mateo 6:8-13.
21. Paonan-o nakikita an panguna ni Jesus ha Kristiano nga kongregasyon?
21 Paonan-o ipinapakita an panguna ni Jesus? Usa nga paagi amo an pinaagi han Kristiano nga mga paramangno, an ‘mga regalo nga kalalakin-an.’ (Efeso 4:8) Ipinapakita han Pahayag 1:16 an dinihogan nga mga paramangno sugad nga aada ha too nga kamot ni Kristo, ilarom han iya gahum. Yana nga panahon, ginigiyahan ni Jesus an kahikayan para han mga tigurang, mayada man langitnon o tunan-on nga paglaom an sugad nga kalalakin-an. Sugad han iginsaysay ha nahiuna nga artikulo, ginpipili hira pinaagi han baraan nga espiritu uyon han Kasuratanhon nga mga kinahanglanon. (1 Timoteo 3:1-7; Tito 1:5-9) Han siyahan nga siglo, usa nga grupo han tigurang nga kalalakin-an ha Jerusalem an nagkompuwesto han nagmamando nga lawas nga nagmamangno ha mga kongregasyon ngan ha pagwali-han-Ginhadian nga buruhaton ha kabug-osan. Pariho nga paagi an ginsusunod ha sulod han organisasyon ni Jehova yana nga panahon.
Padayon nga Dumungan!
22. Ano nga bulig an igintatagana han Nagmamando nga Lawas?
22 An mga interes han Ginhadian ha tuna igintatapod ha ‘matinumanon ngan maaramon nga uripon,’ nga ginrirepresentaran han Nagmamando nga Lawas han mga Saksi ni Jehova. (Mateo 24:45-47) An Nagmamando nga Lawas an labi nga responsable ha pagtagana han espirituwal nga pagtutdo ngan giya para ha Kristiano nga kongregasyon. (Buhat 6:1-6) Kondi, kon an mga igkasi-magsiringba naaapektohan han natural nga mga kalamidad, an Nagmamando nga Lawas naghahangyo hin usa o dugang pa nga legal nga korporasyon ha pagtagana hin bulig ngan ha pag-ayad o pagtukod-utro han naguba nga mga balay ngan mga Kingdom Hall. Kon an pipira nga mga Kristiano ginmamaltrato o gintitimaraot, ginhihimo an mga kahikayan ha pagparig-on ha ira ha espirituwal. Ngan ‘ha masamok nga panahon,’ ginhihimo an ngatanan nga pangalimbasog ha pagpadayon han pagwali nga buruhaton.—2 Timoteo 4:1, 2.
23, 24. Anoman an naabot ha iya katawohan, ano an padayon nga igintatagana ni Jehova, ngan ano an sadang magin determinasyon naton?
23 Anoman an umabot ha iya katawohan, hi Jehova padayon nga nagtatagana hin espirituwal nga pagkaon ngan ginkikinahanglan nga giya. An Dios naghahatag liwat hin kinaadman ngan pagsabot ha responsable nga kabugtoan nga kalalakin-an ha pag-andam para han dugang nga pagpauswag ngan mga pagbag-o ha teokratiko nga organisasyon. (Deuteronomio 34:9; Efeso 1:16, 17) Sigurado, hi Jehova nagtatagana han ginkikinahanglan naton ha pagbuhat han sugo ha aton nga paghimo-hin-disipulo ngan pagtuman han aton ministeryo ha bug-os nga kalibotan.—2 Timoteo 4:5.
24 Marig-on gud an aton pagsarig nga diri gud babayaan ni Jehova an iya matinumanon nga katawohan; iya tatalwason hira ha tiarabot “daku nga kagol-anan.” (Pahayag 7:9-14; Salmo 94:14; 2 Pedro 2:9) Mayada kita han ngatanan nga hinungdan nga tipigan an aton pagsarig ha tinikangan tubtob ha kataposan. (Hebreo 3:14) Salit, magin determinado kita nga padayon nga dumungan ha organisasyon ni Jehova.
Paonan-o Mo Babatunon?
• Kay ano nga makakasiring kita nga an organisasyon ni Jehova padayon nga nag-uuswag?
• Ano an ebidensya nga an katawohan han Dios nagpapahimulos han mainuswagon espirituwal nga kahayag?
• Paonan-o nagkaada mga pag-uswag ha Kristiano nga ministeryo?
• Ano nga napapanahon nga mga pagbag-o an ginhihimo ha mga paagi han organisasyon ha mga surugoon ni Jehova?
[Mga Pakiana]
[Retrato ha pahina 17]
Pariho kan David, diri naton maisasaysay an ngatanan han urusahon nga mga buhat ni Jehova
[Retrato ha pahina 18]
An panon han Dios nagpapahimulos tikang ha napapanahon nga mga pagbag-o ha mga paagi han organisasyon
