Kon Paonan-o Naiiba an Nagmamando nga Lawas Tikang ha Legal nga Korporasyon

AN TINUIG nga mga katirok han Watch Tower Bible and Tract Society of Pennsylvania gindudumara tikang pa han Enero 1885. Han gintitirok an dinihogan nga mga Kristiano han tikatarapos han ika-19 ka siglo, an mga direktor ngan mga opisyal hini nga korporasyon mayada langitnon nga paglaom. Ha pagkamatuod, haros pirme ini an kahimtang.

Mayada usa nga diri langitnon. Han 1940, hi Hayden C. Covington—nga hito nga panahon abogado han Sosiedad ngan usa han ‘iba nga mga karnero,’ nga mayada tunan-on nga paglaom—ginpili nga direktor han Sosiedad. (Juan 10:16) Nag-alagad hiya sugad nga bise presidente han Sosiedad tikang han 1942 tubtob han 1945. Hito nga panahon, inundang hi Bugto Covington sugad nga direktor ha pagsunod han baga hin kaburut-on ni Jehova hadto—nga an ngatanan nga mga direktor ngan mga opisyal han korporasyon han Pennsylvania kinahanglan dinihogan nga mga Kristiano. Hi Lyman A. Swingle an sinaliwan kan Hayden C. Covington ha grupo han mga direktor, ngan hi Frederick W. Franz ginpili sugad nga bise presidente.

Kay ano nga natoo an mga surugoon ni Jehova nga an ngatanan nga mga direktor ngan mga opisyal han Watch Tower Bible and Tract Society of Pennsylvania sadang magin dinihogan nga mga Kristiano? Tungod kay hito nga panahon, an grupo han mga direktor ngan mga opisyal han korporasyon han Pennsylvania duok nga ginkilala nga kaupod han Nagmamando nga Lawas han mga Saksi ni Jehova, nga pirme ginkokompuwesto han dinihogan-han-espiritu nga kalalakin-an.

An Makasaysayan nga Tinuig nga Katirok

Ha tinuig nga katirok nga gindumara han Oktubre 2, 1944, ha Pittsburgh, an mga membro han korporasyon han Pennsylvania naghimo hin unom nga resolusyon nga nagpauswag han nakasurat nga katuyoan hito. An nakasurat nga katuyoan nag-unabi nga ihahatag an mga katungod ha pagpili ha mga naghatag hin kuwarta para ha mga buruhaton han Sosiedad, kondi ginpara ito ha ikatulo nga pagpauswag hito. An report hiton tinuig nga katirok nagsiring: “An membro ha Sosiedad diri masobra ha 500 . . . An tagsa nga pinili kinahanglan bug-os-panahon nga surugoon han Sosiedad o part-time nga surugoon han kongregasyon han mga saksi ni Jehova ngan kinahanglan magpakita han espiritu han Ginoo.”

Katapos hito, an mga direktor han Sosiedad kinahanglan ibutos ha katungdanan han mga indibiduwal nga bug-os nga debotado kan Jehova, nga diri iginbabasar kon pira an kantidad han ira iginhatag nga kuwarta ha pagpauswag han buruhaton han Ginhadian. Nauyon ngay-an ini ha hinayhinay nga mga pag-uswag nga igintagna ha Isaias 60:17, nga aton mababasa: “Para han tumbaga magdadara ako hin bulawan, ngan para han puthaw magdadara ako hin salapi, ngan para han kahoy tumbaga, ngan para han mga bato, puthaw. Akon liwat papagdaiton an imo mga [paramangno], ngan papagmatadungon an imo mga [parahatag-han-toka].” Ha pag-unabi han ‘mga paramangno’ ngan ‘mga parahatag-han-toka,’ ini nga tagna may kalabotan ha mga pag-uswag ha mga paagi han organisasyon dida ha katawohan ni Jehova.

Inin importante nga pitad ha pagpahiuyon han organisasyon ha teokratiko nga pagbag-o nahitabo ha kataposan han “duha ka yukot tulo ka gatos ka kakurulpon ngan kaagahon,” nga gin-unabi ha Daniel 8:14. Hito nga panahon, ‘an baraan nga lugar’ ‘gindara ngadto ha husto nga kahimtang.’

Kondi, katapos han makasaysayan tinuig nga katirok han 1944, nagpabilin an importante nga pakiana. Tungod kay an Nagmamando nga Lawas duok nga ginkilala kaupod han korporasyon han Pennsylvania nga pito an membro nga direktor, nangahulogan ba ini nga an Nagmamando nga Lawas diri gud mahimo magkompuwesto hin sobra pito nga dinihogan nga Kristiano? Dugang pa, tungod kay an  mga direktor ginpipili han mga membro han korporasyon, an mga membro han korporasyon ba an nagpipili han mga membro han Nagmamando nga Lawas ha katirok kada tuig? An mga direktor ngan mga opisyal ba han Watch Tower Bible and Tract Society of Pennsylvania ngan an mga membro han Nagmamando nga Lawas magkapariho, o magkaiba hira?

Usa pa nga Diri-Hingangalimtan Tinuig nga Katirok

Ini nga mga pakiana ginbaton ha tinuig nga katirok nga gindumara han Oktubre 1, 1971. Hito nga okasyon, iginpatin-aw han usa nga mamumulong nga an nagmamando nga lawas han ‘matinumanon ngan maaramon nga uripon’ ginatos ka tuig nga nauna ha Watch Tower Bible and Tract Society of Pennsylvania. (Mateo 24:45-47) Naporma an nagmamando nga lawas ha Pentekostes han 33 K.P., sobra 18 ka siglo antes han pag-eksister han korporasyon han Pennsylvania. Ha tinikangan, an nagmamando nga lawas ginkompuwesto, diri han 7 nga kalalakin-an, kondi han 12 nga apostol. Matin-aw, nagdugang an kadamu hito ha urhi, kay an ‘mga apostol ngan an mga tigurang ha Jerusalem’ an nagdumara.—Buhat 15:2.

Han 1971 iginsaysay han pariho nga mamumulong nga an mga membro han Watch Tower Society diri makakabutos para han mga membro han dinihogan Nagmamando nga Lawas. Kay ano? “Tungod kay,” siring niya, “an nagmamando nga lawas han ‘uripon’ nga klase diri pinili han bisan hin-o nga tawo. Pinili ito ni . . . Jesu-Kristo, an Ulo han totoo Kristiano nga kongregasyon ngan an Ginoo ngan Agaron han ‘matinumanon ngan maaramon nga uripon’ nga klase.” Matin-aw, kon sugad, nga an mga membro han Nagmamando nga Lawas diri maibubutos para ha katungdanan han mga membro han bisan ano legal nga korporasyon.

Ha pagpadayon, iginpahayag han mamumulong inin importante gud nga mga pulong: “An nagmamando nga lawas waray mga opisyal sugad han Board of Directors han Sosiedad, nga amo an presidente, bise presidente, sekretaryo-tesurero ngan kabulig nga sekretaryo-tesurero. Mayada la ito tsirman.” Ha damu nga katuigan, an presidente han korporasyon han Pennsylvania amo liwat an nangunguna nga membro han Nagmamando nga Lawas. Diri na magigin sugad hito an kahimtang. Bisan kon diri magkapariho ha eksperyensya o abilidad, an mga membro han Nagmamando nga Lawas magkapariho ha responsabilidad. An mamumulong nagdugang: “Bisan hin-o nga membro han nagmamando nga lawas mahimo magin tsirman hito bisan kon ha pariho nga panahon diri presidente han . . . Sosiedad . . . Nadepende ito ngatanan ha sistema han pagkasunodsunod han magigin tsirman han nagmamando nga lawas.”

Hiton diri-hingangalimtan tinuig nga katirok han 1971, iginpatin-aw an kaibahan han dinihogan-han-espiritu nga mga membro han Nagmamando nga Lawas ngan han mga direktor han korporasyon han Pennsylvania. Ha gihapon, an mga membro han Nagmamando nga Lawas padayon nga nag-aalagad sugad nga mga direktor ngan mga opisyal han Sosiedad. Kondi, yana nga panahon, nabangon an pakiana: Mayada ba Kasuratanhon nga hinungdan nga an mga direktor han Watch Tower Bible and Tract Society of Pennsylvania kinahanglan magin mga membro han Nagmamando nga Lawas?

Waray an baton. An korporasyon han Pennsylvania diri amo la an korporasyon nga ginagamit han mga Saksi ni Jehova. Mayada iba pa. Usa an Watchtower Bible and Tract Society of New York, Incorporated. Ginpapasayon hito an aton buruhaton ha Estados Unidos. Matin-aw nga an bendisyon ni Jehova aada hito nga korporasyon, bisan kon kadam-an han mga direktor ngan mga opisyal hito tikang ha ‘iba nga mga karnero.’ An International Bible Students Association ginagamit ha Britanya. An iba legal nga mga korporasyon ginagamit ha pagpauswag han mga interes han Ginhadian ha iba nga mga nasud. Ito ngatanan urosa nga nabulig ngan mayada bahin ha pagpasamwak han maopay nga sumat ha bug-os nga tuna. Diin man ito nga lugar o hin-o man an nag-aalagad sugad nga mga direktor o mga opisyal, ini nga mga korporasyon teokratiko nga ginigiyahan ngan ginagamit han Nagmamando nga Lawas. Salit, an sugad nga mga korporasyon mayada igintoka nga mga buruhaton ha pagpahaluag han mga interes han Ginhadian.

Mapulsanon para ha aton nga mayada legal nga mga korporasyon. Pinaagi hito ginsusunod naton an mga balaud ha lokal ngan han nasud, sugad han ginkinahanglan han Pulong han Dios. (Jeremias 32:11; Roma 13:1) An legal nga mga korporasyon nagpapasayon han aton buruhaton ha pagpasarang han mensahe han Ginhadian pinaagi han  pag-imprinta hin mga Biblia, mga libro, mga magasin, mga brosyur, ngan iba nga mga barasahon. An sugad nga mga korporasyon ginagamit liwat sugad nga legal nga mga instrumento ha pagdumara han mga butang may kalabotan ha mga panag-iya, mga pangalimbasog ha pagbulig, mga kontrata ha paggamit han mga pasilidad han kombensyon, ngan iba pa. Mapasalamaton kita ha mga serbisyo han sugad legal nga mga korporasyon.

Pagpakilala han Ngaran ni Jehova

Han 1944, an Artikulo II han sinurat nga katuyoan han Watch Tower Bible and Tract Society of Pennsylvania ginpauswag ha pagpatin-aw han mga tumong hini nga korporasyon. Sumala ha sinurat nga katuyoan, an mga katuyoan han Sosiedad nag-uupod hinin importante nga katuyoan: “An pagwali han ebanghelyo han ginhadian han Dios ilarom ni Kristo Jesus ngadto ha ngatanan nga mga nasud ha pagpasamwak han ngaran, pulong ngan pagkahitaas han Makagarahum-ha-ngatanan nga Dios nga hi JEHOVA.”

Tikang han 1926 iginpakilala ‘han matinumanon nga uripon’ an ngaran ni Jehova. Labi nga makatirigamnan an nahitabo han 1931 han ginkarawat han Mga Estudyante han Biblia an ngaran nga Mga Saksi ni Jehova. (Isaias 43:10-12) An mga publikasyon han Sosiedad nga nagpakilala han ngaran han Dios nag-uupod han mga libro nga Jehovah (1934), “Let Your Name Be Sanctified” (1961), ngan “The Nations Shall Know That I Am Jehovah”—How? (1971).

Labi na gud an New World Translation of the Holy Scriptures, nga iginpublikar ha kabug-osan hito ha Ingles han 1960. Nagsusulod ito han ngaran ni Jehova ha ngatanan nga lugar diin makikita an Tetragrammaton ha Hebreo nga Kasuratan. Ini nga hubad nag-uupod liwat han ngaran han Dios ha 237 nga mga bahin ha Kristiano Griego nga Kasuratan diin an maopay nga pag-usisa nagpakita nga husto ini. Mapasalamaton gud kita nga, ha magkalainlain nga mga paagi, gintutugotan ni Jehova an “uripon” ngan an Nagmamando nga Lawas hito ha paggamit han ira mga panag-iya ha pagpublikar ngan legal nga mga korporasyon ha pagpakilala han iya ngaran ha bug-os nga tuna!

Gindasig an Panaltag han Pulong han Dios

An katawohan ni Jehova padayon nga nagpapasamwak han iya ngaran ngan ginpapahitaas an iya Pulong pinaagi han pagpublikar ngan panaltag hin minilyon nga basado ha Biblia nga mga publikasyon sugad man han Biblia mismo. Temprano han dekada han 1900, an Watch Tower Society nagin legal nga tag-iya han katungod ha pagpublikar han The Emphatic Diaglott, an Griego-Ingles nga edisyon han Kristiano Griego nga Kasuratan ni Benjamin Wilson. Iginpublikar han Sosiedad an edisyon han King James Version han mga Estudyante han Biblia, nga nag-upod han 500-pahina nga suplemento ha kataposan han libro. Han 1942 iginpublikar hito an King James Version nga mayada mga reperensya ha ligid han pahina. Ngan han 1944 an Sosiedad nagtikang ha pag-imprinta han American Standard Version han 1901, nga nagamit han ngaran han Dios. An ngaran ni Jehova mababasa liwat ha The Bible in Living English, ni Stephen T. Byington, nga iginpublikar han Sosiedad han 1972.

An legal nga mga korporasyon nga ginagamit han mga Saksi ni Jehova nabulig ha pag-imprinta ngan panaltag hini ngatanan nga mga hubad han Biblia. Kondi, makatirigamnan gud an duok hinduro nga kooperasyon han Watch Tower Society ngan han grupo han dinihogan nga mga Saksi ni Jehova nga nagkukompuwesto han New World Bible Translation Committee. Malipayon kita nga, ha bug-os o ha bahin, tubtob yana sobra 106,400,000 nga kopya hini nga hubad an inimprinta ha 38 nga yinaknan. An Watch Tower Bible and Tract Society of Pennsylvania totoo nga sosiedad han Biblia!

‘An matinumanon nga uripon’ ‘an gintaporan han ngatanan nga mga panag-iya han iya agaron.’ Nag-uupod ini han mga pasilidad ha headquarters ha Estado han New York, E.U.A., ngan han 110 nga opisina han sanga nga nagios yana ha bug-os nga kalibotan. An mga membro han uripon nga klase maaram nga tatawagon hira ha pakighusay ha paagi  han paggamit nira han igintapod ha ira. (Mateo 25:14-30) Kondi, diri ini nagpupugong han ‘uripon’ ha pagtugot han kuwalipikado nga mga paramangno tikang ha ‘iba nga mga karnero’ ha pag-ataman han legal ngan administratibo nga mga responsabilidad. Ha pagkamatuod, nagtutugot ini ha mga membro han Nagmamando nga Lawas nga magkaada dugang nga panahon ha “pag-ampo ngan pagpasamwak han pulong.”—Buhat 6:4.

Samtang igintutugot han mga kahimtang hini nga kalibotan, gagamiton han Nagmamando nga Lawas, nga nagrirepresentar han ‘matinumanon ngan maaramon nga uripon,’ an legal nga mga korporasyon. Nakakapasayon ini han mga buruhaton, kondi diri ito importante hinduro. Kon kukuhaon an legal nga korporasyon pinaagi han balaud han gobyerno, an pagwali nga buruhaton magpapadayon pa gihapon. Bisan yana, ha mga nasud nga mayada mga pagdiri ngan waray ginagamit nga legal nga mga korporasyon, iginwawali an mensahe han Ginhadian, naghihimo hin mga disipulo, ngan nagpapadayon an pag-uswag han organisasyon han Dios. Nahitatabo ito tungod kay an mga Saksi ni Jehova nagtatanom ngan nagbibisibis, ngan an ‘Dios padayon nga nagpapatubo hito.’—1 Korinto 3:6, 7.

Samtang naghuhulat kita han tidaraon, nakakasiguro kita nga itatagana ni Jehova an espirituwal ngan materyal nga mga panginahanglan han iya katawohan. Hiya ngan an iya Anak, hi Jesu-Kristo, padayon nga magtatagana han langitnon nga giya ngan suporta nga ginkikinahanglan ha pagtapos han pagwali-han-Ginhadian nga buruhaton. Siyempre, anoman an nahihimo naton sugad nga mga surugoon han Dios nahihimo ‘diri tungod han militar nga puwersa, o han gahum, kondi tungod han espiritu ni Jehova.’ (Sakarias 4:6) Salit nag-aampo kita para han bulig han Dios, tungod kay maaram nga pinaagi han kusog nga igintatagana ni Jehova, matatapos naton an buruhaton nga iya iginpapabuhat ha aton hini nga panahon han kataposan!