Nag-uubos an mga Prinsipyo ha Moral

“ITO nga butang waray gud mahitabo hadto,” siring ni Helmut Schmidt, usa nga opisyal hadto han Alemanya. Nasusubo hiya ha bag-o nga mga kaso han duro nga panlimbong han mga opisyal han gobyerno nga nagin ulohan han mga sumat. “Nawara na an mga suruklan ha moral tungod han kahakog,” siring niya.

Damu an mauyon ha iya. An mga prinsipyo ha moral nga nakagamot ha Pulong han Dios, an Biblia, ngan maiha na nga kaylap nga kinakarawat sugad nga giya kon ano an husto ngan an sayop, ginhuhunahuna nga diri-importante. Ini an kahimtang bisan ha mga nasud nga nag-aangkon nga Kristiano.

Mapulsanon ba an Moralidad han Biblia?

An moralidad nga iginbasar ha katutdoan han Biblia nag-uupod han pagkatangkod ngan integridad. Kondi, kaylap an panggantso, panlimbong, ngan pagpalsipikar. An The Times han Londres nagsusumat nga an iba nga mga sekreta “gin-aakusahan nga nagkakawat hin mga £100,000 ha kada pagkuha han mga droga nga ginkompiskar ngan ihatag ha mga kriminal basi ibaligya o pagpara han ebidensya kontra han mga tawo ha organisasyon nga nagbubuhat hin krimen.” Ha Austria an panlimbong ha insurance ginsisiring nga ordinaryo nga buhat. Ngan ha Alemanya nahipausa an grupo han mga syentista han an mga parasaliksik  bag-o pa la nga nakadiskobre han “usa han pinakamaraot nga mga kaso han panlimbong ha syensya han Alemanya.” Usa nga propesor, “eksperto ha mga henetiko ha Alemaya,” an gin-akusahan hin pagpalsipikar o paghimohimo hin impormasyon ha daku nga sukol.

An basado ha Biblia nga moralidad nag-uupod liwat han pagin maunungon ha pag-asawa, nga gintatagad nga permanente nga relasyon. Kondi an nagdadamu nga ihap han mga mag-asawa natatapos ha korte ha pagdiborsyo. An pahayagan han Katoliko nga Christ in der Gegenwart (An Moderno nga Kristiano) nagreport nga “bisan ha ‘konserbatibo’ nga Switzerland, nagtitikadamu nga mga pag-asawa an nabubungkag.” Ha Netherlands, 33 porsyento han ngatanan nga mga pag-asawa an natatapos ha diborsyo. Usa nga babaye nga nakaobserba han mga pagbag-o han mga tawo ha Alemanya ha naglabay nga pipira ka mga tuig nagsurat han iya kabaraka: “An pag-asawa gintatagad yana sugad nga kadaan ngan diri uso. An mga tawo diri na nag-aasawa hin usa nga padis para ha bug-os nga kinabuhi.”

Ha luyo nga bahin, gintatagad han minilyon an mga suruklan ha moral nga igintututdo ha Biblia nga masasarigan ngan importante ha aton moderno nga kalibotan. Usa nga mag-asawa nga nag-uukoy ha giutan han Swiss-Alemanya nakadiskobre nga an paghibaro ha pagkinabuhi uyon ha moralidad han Biblia nakahimo ha ira nga malipayon. Para ha ira, “mayada usa la nga giya para ha ngatanan nga bahin han kinabuhi. Ito nga giya amo an Biblia.”

Ano ha imo hunahuna? An Biblia ba mahimo magin birilhon nga giya? An moralidad ba han Biblia praktikal yana nga panahon?