Maaramon Ka Ba?

HA PAGPILI hin mga hukom ha Israel, nangalimbasog hi Moises ha pagbiling hin ‘makinaadmananon ngan maaramon ngan may eksperyensya nga kalalakin-an.’ (Deuteronomio 1:13) An eksperyensya, tungod ha edad, diri amo la an kuwalipikasyon. Importante liwat an kinaadman ngan abilidad ha pagdesisyon.

An tawo nga maaramon nagpapakita hin maopay nga paghukom ha pulong ngan ha paggawi. Sumala ha Webster’s Ninth New Collegiate Dictionary, an maaramon nga tawo liwat “may kapas ha pagtipig han maaramon nga paghilom.” Oo, may “panahon ha pagyakan,” ngan may “panahon ha paghilom,” ngan inaapresyar han maaramon nga tawo an pagkaiba hito. (Eklesiastes 3:7) Agsob nga mayada maopay nga hinungdan ha paghilom, kay an Biblia nasiring: “Ha kadam-an nga mga pulong diri kukulangon an kalapasan; kondi hiya nga nagpupugong han iya mga im-im nagbubuhat ha makinaadmananon.”​—Proberbios 10:19.

Nangangalimbasog an mga Kristiano nga magin maaramon ha ira pakig-upod ha usa kag usa. An usa nga nagyayakan hin agsob o mapuwersa hinduro diri pirme amo an pinakaimportante o kinahanglanon hinduro. Hinumdumi, hi Moises “gamhanan ha iya mga pulong,” kondi diri epektibo an iya panguna ha nasud han Israel tubtob nga napatubo niya an pagpailob, kaaghop, ngan pagpugong-ha-kalugaringon. (Buhat 7:22) Salit, adton gintaporan hin awtoridad labaw ha iba kinahanglan labi nga mangalimbasog nga magin mapainubsanon ngan magpakita hin nagpapasakop nga espiritu.​—Proberbios 11:2.

Adton gintaporan ni Jesu-Kristo han ‘ngatanan nga iya mga panag-iya’ iginsaysay ha Pulong han Dios sugad nga ‘matinumanon ngan maaramon.’ (Mateo 24:​45-47) Diri hira nag-uuna kan Jehova pinaagi han tigda, diri ginhuhunahuna nga mga ideya; diri man hira napaurhi kon matin-aw an giya han Dios ha usa nga butang. Maaram hira kon san-o an panahon ha pagyakan ngan kon san-o an panahon ha paghulat hin hilom para ha dugang nga pagpatin-aw. Maopay gud para ha ngatanan nga mga Kristiano nga diri la subaron an ira pagtoo kondi pamatud-an liwat an ira kalugaringon nga maaramon, sugad han uripon nga klase.​—Hebreo 13:7.