Diin Ka Makakakuha hin Maopay nga Sagdon?

An “ahensya ha pagsagdon” nagin negosyo nga nakita hin multibilyon-dolyar kada tuig. An mga tawo naruruyag hin bulig. An doktor-ha-hunahuna nga hi Heinz Lehmann nakaobserba: “[Ha sosiedad yana nga adlaw] mayada mga kapakyasan ha edukasyon ngan sosiedad. An mga pamatasan ha moral diri na sugad han naglabay. Diri na sugad karig-on an mga pamilya . . . , ngan salit waray direksyon an mga tawo.” An awtor nga hi Eric Maisel nasiring: “Adton naglaom hadto ha ira padi han tribo, pastor o doktor han pamilya para hin bulig ha mental, espirituwal ngan pisikal nga mga problema namimiling hin mga solusyon yana ha mga libro nga nagsasagdon.”

AN American Psychological Association nagporma hin grupo nga mag-iimbestigar hinin nag-uuswag nga industriya. Hira nagsiring nga samtang mayada “daku nga posibilidad nga mabuligan an mga indibiduwal nga masabtan an ira kalugaringon ngan an iba . . . , an mga paanunsyo ngan mga ngaran hini nga mga programa nagtitikasobra ngan imposible.” Usa nga parasurat han Toronto Star nasiring: “Magin maaramon ha mga palso han relihiyon-espirituwal. . . . Magin mabinantayon labi na ha ngatanan nga mga libro ha pagbulig-ha-kalugaringon, mga tape o mga seminar nga damu hinduro an igintatanyag, ha halipot hinduro nga panahon, ha gutiay la nga pangalimbasog o pagdisiplina ha kalugaringon.” Oo, damu hinduro an totoo nga naghihingyap ha pagsuporta hadton nagkikinahanglan. Kondi, an makasurubo nga kamatuoran amo nga ginpapahimulsan han damu magraot nga mga indibiduwal an kasubo ngan mga pag-antos han mga tawo, waray igintatanyag nga totoo nga bulig o mga solusyon.

May kalabotan hini, ano an importante nga surok han bulig nga aton masasarigan? Diin kita makakabiling hin praktikal nga sagdon nga pirme mapulsanon?

Surok han Diri Napapakyas nga Giya

An ika-19 ka siglo Amerikano nga magwarali nga hi Henry Ward Beecher nagsiring: “An Biblia amo an mapa han Dios nga maggigiya ha imo, basi diri ka malunod, ngan magsusumat ha imo kon hain an pantalan, ngan kon paonan-o madadangat ito nga diri masanglad ha mga bato o mga baras.” Usa pa nga awtor an nagsiring mahitungod han Biblia: “Waray usa nga makakatupong han Kasuratan; an libro naghahaluag ngan naghihilarom ha paglabay han aton mga panahon.” Kay ano nga sadang mo tagdon hin seryoso ini nga surok?

Ha pagpakita han kalugaringon nga bili hito, an Biblia nasiring: “An ngatanan nga mga Baraan nga Surat nga ginpakaaghat han Dios may kapulsanan man ha pagtututdoan, ha pagbadlong, ha pagsaway, ha panutdoan nga ha katadongan: Basi nga an tawo han Dios mahingpit, ngan maandam tungod ha ngatanan nga maopay nga buhat.” (2 Timoteo 3:​16, 17) An sulod han Biblia nagtikang ha Surok mismo han kinabuhi, hi Jehova nga Dios. (Salmo 36:9) Ha pagin sugad, maaram gud hiya han aton kahimtang, sugad han ginpahinumdom ha aton han Salmo 103:14: “Hiya nakilala han aton panlawas; Nahinunumdom hiya nga mga tapotapo kita.” Salit, bug-os nga makakasarig  kita ha bili han Biblia.

Ha pagkamatuod, an Biblia nagsusulod hin damu nga mga prinsipyo ngan mga giya nga maiaaplikar hin mapulsanon ha bisan ano nga imo kahimtang. Pinaagi hito an Dios nasiring ha aton: “Amo ini an dalan, maglakat kamo dida hini.” (Isaias 30:21) Nasasangkapan gud ba han Biblia an mga panginahanglan han mga tawo yana nga adlaw? Aton kitaon.

Nasasangkapan han Biblia an Aton mga Panginahanglan . . .

Ha Paglampos han mga Problema. An Biblia nagsusumat ha aton: “Diri kamo magkabaraka hin bisan ano nga bagay; kondi ha ngatanan nga bagay tungod ha pag-ampo ngan pangamuyo upod an pagpasalamat ipahibaro niyo ha atubangan han Dios an iyo mga pinangangaro. Ngan an kamurayawan han Dios, nga labaw ha ngatanan nga hibabroan, magbabantay ha iyo mga kasingkasing ngan ha iyo mga hunahuna kan Kristo Jesus.” (Filipos 4:​6, 7) Epektibo gud ba an pag-ampo basi malamposan an mga problema ha emosyon nga may kalabotan ha kakurian ha ekonomiya, pag-abuso ha sekso ngan ha pulong, o kamatay han usa nga hinigugma? Tagda an masunod nga eksperyensya.

Han nahibaroan ni Jackie an seksuwal nga pag-abuso ha iya anak nga babaye, nagsiring: “An pagbati han pagkasalaan tungod han kawaray nahimo ha pagpanalipod han anak diri gud maisasaysay. Kinahanglan pugngan ko an mga pagbati han kasubo, kapungot, ngan kasina. Ini nga mga pagbati nagtikang pagdaot han akon kinabuhi. Ginkinahanglan ko gud hi Jehova ha pagbantay han akon kasingkasing.” Katapos basahon ngan basahon-utro an Filipos 4:​6, 7, nangalimbasog gud hiya nga iaplikar an sagdon hito. “Nag-aampo ako kada adlaw, pauroutro nga naghahangyo nga diri ako madaot han negatibo nga mga pagbati, ngan binubuligan ako ni Jehova nga magkaada kalmado ngan malipayon nga kasingkasing. Inabat ko gud nga mayada ako kamurayawan ha sulod,” nagsaysay hi Jackie.

Bangin aada ka liwat ha kahimtang nga diri mo mahihimo an pagpugong o pagsulbad ngan nagdadara ito hin mga pangarit. Pinaagi ha pagsunod han sagdon han Biblia nga mag-ampo, malalamposan mo hin epektibo. Gindadasig kita han salmista pinaagi hini nga mga pulong: “Itubyan mo kan Jehova an imo agianan; Sarig liwat ha iya, ngan iya iton pagbubuhaton.”​—Salmo 37:5.

Para han Pagdasig. An salmista nagpahayag hini nga apresasyon: “Jehova, nahigugma ako hiton balay nga imo inuukyan, Ngan an kahimurutangan han imo kahimayaan. An akon tiil natukdaw ha lugar nga mapatag: Ha mga katig-uban madayaw ako kan Jehova.” (Salmo 26:​8, 12) Gindadasig kita ha Biblia nga magkatirok hin regular ha pagsingba kan Jehova. Paonan-o ini nga asosasyon makakatagbaw han imo mga panginahanglan? Ano an naeksperyensyahan han iba?

Hi Becky nagsaysay: “Diri nag-aalagad kan Jehova an akon mga ginikanan, salit ginkukontra nira ako kon nangangalimbasog ako pagbuhat hin bisan ano ha pag-alagad ha Dios. Nagkikinahanglan ito hin daku nga pangalimbasog para ha akon basi makatambong ha mga katirok.” Inaabat ni Becky nga naabot an damu nga mga bendisyon ha iya tungod kay nangangalimbasog hiya ha regular nga pagtambong ha Kristiano nga mga katirok. “An mga katirok nagpaparig-on han akon pagtoo, salit nalalamposan ko an adlaw-adlaw nga mga pag-ipit sugad nga estudyante, anak, ngan surugoon ni Jehova. An mga tawo ha Kingdom Hall naiiba gud ha mga estudyante ha eskwelahan! Mapinairon ngan mabinuligon hira, ngan an amon mga pag-uruistorya pirme nga nakakadasig. Totoo hira nga kasangkayan.”

Oo, pinaagi han pagsunod ha giya han Biblia ha regular nga pagkatirok, iginhahatag ni Jehova an aton panginahanglan hin pagdasig. Dinhi naton naieksperyensyahan an pagkatotoo han mga pulong han salmista: “An Dios amo an aton arayupan ngan an aton kusog, An parabulig gud ha panahon han kakurian.”​—Salmo 46:1.

Para ha Makapatagbaw Ngan Mapulsanon nga Buhat. “Magrig-on kamo, nga diri sadang mabantad, nga magpadayon kamo gihapon ha buruhaton han Ginoo, kay hinbaroan niyo nga an iyo kabudlay tungod ha Ginoo diri waray kapulsanan,” nagsagdon an Biblia. (1 Korinto 15:58) An “buruhaton han Ginoo” ba totoo nga makapatagbaw? May kapulsanan ba an Kristiano nga ministeryo?

Iginpahayag ni Amelia an iya binabati: “Nagdumara  ako hin pag-aram ha Biblia ha mag-asawa nga hirani na magbulag. Nabuligan ko liwat an usa nga babaye nga may anak nga babaye nga ginpatay ha mabangis nga paagi. An babaye nasamok tungod ha pagkadiri-sigurado han kahimtang han patay. Hinin duha nga kahimtang, an pag-aplikar han mga prinsipyo han Biblia nagdara hin kamurayawan ngan paglaom ha ira mga kinabuhi. Inabat ko an daku nga kalipay ngan katagbaw tungod kay mayada ako bahin ha pagbulig ha ira.” Hi Scott nasiring: “Kon mayada ka maopay nga eksperyensya ha ministeryo ha kanataran, nakagtikang hin bag-o nga pag-aram ha Biblia, o nagkaada kalipay ha pipira nga kalamposan tikang ha pagwali ha diri-pormal nga paagi, paghihisgotan mo ito ha maabot damu nga mga tuig. Aabaton an pariho nga mga pagbati ngan kalipay ha kada pagsaysay! Ha ministeryo nagtitikang an gidadakui ngan nagpapadayon nga kalipay.”

Matin-aw, an pag-aplikar han giya han Biblia basi magin aktibo nga mga ministro naghatag han panginahanglan hini nga mga indibiduwal para han makapatagbaw ngan mapulsanon nga buruhaton. Ginhahangyo ka liwat nga makigbahin hini nga buruhaton ha pagtutdo ha iba mahitungod han mga paagi ngan mga prinsipyo han Dios, ha pariho nga panahon nagpapahimulos ha imo kalugaringon.​—Isaias 48:17; Mateo 28:​19, 20.

Pagpahimulos Tikang ha Pulong han Dios

Waray ruhaduha, an Biblia amo an masasarigan nga surok han epektibo nga mga giya ha kalibotan yana nga adlaw. Basi pahimulosan ito, kinahanglan naton an padayon nga pangalimbasog. Kinahanglan regular nga basahon naton ito, adman ito, ngan pamalandungon ito. Nagsagdon hi Pablo: “Magmaabtik ka hini nga mga bagay; buhata gud ini nga mga bagay; basi nga an imo kauswagan mahipahayag ha ngatanan.” (1 Timoteo 4:15; Deuteronomio 11:​18-21) Ginsisiguro han Dios nga kon mangalimbasog ka ha pag-aplikar han iya sagdon sugad han mababasa ha Biblia, maglalampos ka. Hiya nagsaad: “Sarig kan Jehova . . . Ha ngatanan mo nga dalan kilalaha hiya, Ngan hiya magtututdo han imo mga agianan.”​—Proberbios 3:​5, 6.

[Mga Retrato ha pahina 31]

An pagsunod han sagdon ha Biblia nakakahimo han kinabuhi nga makapatagbaw ngan malampuson