Pamati ha Matagnaon nga Pulong han Dios

“Ginparig-on pa gud ha amon hin labi an pulong nga igintagna; busa nagbubuhat kamo hin maopay ha pagtagam niyo.”​—2 PEDRO 1:19.

1, 2. Ano nga ehemplo han palso nga mesias an maisasaysay mo?

 MGA siglo na nga an palso nga mga mesias nangangalimbasog ha pagtagna han tidaraon. Han ikalima ka siglo K.P., usa ka tawo nga nagpakilala nga hi Moises an nagkombinse ha mga Judio ha isla han Kreta nga hiya an mesias ngan tatalwason hira tikang ha pagtalumpigos. Ha itinanda nga adlaw han ira kagawasan, inupod hira ha iya ngadto ha hitaas nga lugar nga nakikita an Dagat Mediteranyo. Nagsiring hiya nga kinahanglan lumukso la hira ngadto ha dagat ngan mababahin ito ha ira atubangan. Damu gud an linukso ngadto ha dagat ngan nalunod, ngan an palso nga mesias waray na magpakita.

² Han ika-12 ka siglo, usa nga “mesias” an binangon ha Yemen. An caliph, o magmarando, nangaro ha iya hin tigaman han iya pagkamesias. Ini nga “mesias” nagsugyot nga pugotan hiya han caliph. Nagtagna hiya han madagmit nga pagkabanhaw sugad nga tigaman. Inuyon an caliph ha plano​—ngan ito an kataposan hiton nga “mesias.”

3. Hin-o an totoo nga Mesias, ngan ano an pinamatud-an han iya ministeryo?

³ An palso nga mga mesias ngan an ira mga tagna sigurado nga mapapakyas, kondi an pagpamati ha matagnaon nga pulong han Dios diri gud mapapakyas. An totoo nga Mesias, hi Jesu-Kristo, amo an buhi nga katumanan han damu nga mga tagna han Biblia. Pananglitan, ha pagkotar han tagna ni Isaias, an parasurat han Ebanghelyo nga hi Mateo nagsurat: “An tuna ha Sabulon ngan an tuna ha Neptali tipakadto ha dagat, ngadto dapit han Jordan ha Galilea han mga Hentil; An katawohan nga nagkakalingkod ha kasisidman nakakita han daku nga kalamragan; ngan an mga nagkakalingkod ha ginsakupan ngan lambong han kamatayon nagkalalamragan. Tikang hadto nga panahon hi Jesus nagtikang panwali ngan pagsiring: Magbasol kamo, kay an ginhadian han langit tikahirani na.” (Mateo 4:​15-17; Isaias 9:​1, 2) Hi Jesus an “daku nga kalamragan,” ngan an iya ministeryo nagpamatuod nga hiya an Propeta nga igintagna ni Moises. Bubungkagon adton diri namamati kan Jesus.​—Deuteronomio 18:​18, 19; Buhat 3:​22, 23.

4. Paonan-o gintuman ni Jesus an Isaias 53:12?

⁴ Gintuman liwat ni Jesus an matagnaon nga mga pulong han Isaias 53:12: “Hiya naghuho han iya kalag ngadto ha kamatayon, ngan inihap kaupod han mga matinalapasnon: kondi iya ginpas-an an sala han kadam-an ngan nag-ampo para han mga matinalapasnon.” Tungod kay maaram nga ha diri mag-iiha ihahatag niya an iya tawhanon nga kinabuhi sugad nga lukat, ginparig-on ni Jesus an pagtoo han iya mga disipulo. (Markos 10:45) Ginbuhat niya ini ha bantogan nga paagi pinaagi han transpigurasyon (pagbalhin han dagway).

An Transpigurasyon Nagpaparig-on han Pagtoo

5. Ha imo kalugaringon nga mga pulong, paonan-o mo isasaysay an transpigurasyon?

⁵ An transpigurasyon usa ka matagnaon nga hitabo. Hi Jesus nagsiring: “An anak han Tawo makanhi ha himaya han Amay upod an iya mga anghel . . . Matuod, ako nasiring ha iyo: Mayada dinhi ha ira nga nagkakatukdaw, nga diri gud makakatilaw han kamatayon, tubtob han ira pagkita ha Anak han Tawo nga tisulod ha iya ginhadian.” (Mateo 16:​27, 28) Aktuwal ba nga nakita han iba nga mga apostol nga naabot hi Jesus ha iya Ginhadian? An Mateo 17:​1-7 nasiring: “Katapos han unom ka adlaw kan Jesus ipinangupod hira hi Pedro ngan hi Jakobo ngan hi Juan nga iya bugto, ngan pagdad-on hira ha antaw ngadto ha usa nga hitaas nga bukid. Ngan nabalhin an iya dagway ha ira atubangan.” Usa gud ka makatirigamnan nga hitabo! “An iya bayhon naglamrag sugad hin adlaw, ngan an iya panapton nagbusag sugad hin lamrag. Ngan kitaa,  didto napakita ha ira hi Moises ngan hi Elias, nga nakikigkarokayakan ha iya.” Ngan, “usa nga masilaw nga dampog linambong ha ira,” ngan ira hinbatian an tingog han Dios nga nasiring: “Ini an akon hinigugma nga Anak, nga akon nalilipayan: pamatii niyo hiya. Ngan han pakabati han mga tinon-an, hira nanhipakulob, ngan nagkahadlok hinduro. Ngan hi Jesus inabot, ngan kinamkam hira, ngan siniring: Buhat, ngan diri kamo magkahadlok.”

6. (a) Kay ano nga gintawag ni Jesus an transpigurasyon nga usa ka bisyon? (b) Abanse nga pagpakita han ano an transpigurasyon?

⁶ Inin makatarag-ob nga hitabo posible nga nahitabo ha usa han mga bakilid han Bukid Hermon, diin nagpalabay han gab-i hi Jesus ngan an tulo nga apostol. An transpigurasyon sigurado nga nahitabo ha gab-i, salit nagin matin-aw ito. An usa nga hinungdan nga gintawag ito ni Jesus nga bisyon tungod kay hi Moises ngan hi Elias diri literal nga presente. Hi Kristo la an aktuwal nga nakadto. (Mateo 17:​8, 9) An sugad makatirigamnan nga pagpakita naghatag kan Pedro, Jakobo, ngan Juan hin makatarag-ob nga panan-awon han mahimayaon nga presensya ni Jesus ha gahum han Ginhadian. Hi Moises ngan hi Elias naglaladawan ha dinihogan nga mga igkasi-manurunod ni Jesus, ngan an bisyon gamhanan nga nagparig-on han iya asoy mahitungod han Ginhadian ngan han iya tidaraon nga pagkahadi.

7. Paonan-o kita nahibaro nga hi Pedro matin-aw nga nahinumdom pa han transpigurasyon?

⁷ An transpigurasyon nakabulig ha pagparig-on han pagtoo han tulo nga apostol nga mangunguna ha Kristiano nga kongregasyon. An naglalamrag nga nawong ni Kristo, an iya masilaw nga panapton, ngan an tingog han Dios mismo nga nagpapahayag nga hi Jesus an Iya hinigugma nga Anak nga sadang pamatian nira​—ini ngatanan nakahimo han katuyoan hito ha pinakaepektibo nga paagi. Kondi diri isusumat han mga apostol ha bisan hin-o an bisyon tubtob ha kabanhaw ni Jesus. Mga 32 ka tuig an naglabay, ini nga bisyon matin-aw pa gihapon ha hunahuna ni Pedro. Ha pagpatin-aw hito ngan han kahulogan hito, hiya nagsurat: “Waray kami magsunod hin mga surumatanon nga mga hinimo ha larang la, han amon pagsumat ha iyo han kagamhanan ngan pagkanhi han aton Ginoo Jesu-Kristo, kondi mga testigo kami nga nangita han iya pagkaharangdon. Kay hiya kinarawat tikang ha Dios nga Amay hin kadungganan ngan kahimayaan, han pag-abot ngada ha iya han pulong nga tikang ha Harangdon nga Kahimayaan: Ini amo an akon hinigugma nga Anak, nga akon nalilipayan. Ngan amo ini nga tingog an amon ngahaw hinbatian tikang ha langit, han upod kami niya didto ha baraan nga bukid.”​​—2 Pedro 1:​16-18.

8. (a) An kapahayagan han Dios mahitungod han iya Anak nakasentro ha ano? (b) Ano an iginpasabot han dampog nga nakita ha transpigurasyon?

 ⁸ An pinakaimportante amo an pagpasamwak han Dios: “Ini an akon hinigugma nga Anak, nga akon nalilipayan: pamatii niyo hiya.” Ini nga pahayag nakasentro kan Jesus sugad nga nahitrono nga Hadi han Dios, nga ha iya kinahanglan sumugot an ngatanan nga mga linarang. An dampog nga nakatabon nagpasabot nga an katumanan hini nga bisyon diri-makikita. Masasabtan la ito pinaagi han mga mata han pagsabot hadton maaram han “tigaman” han diri-nakikita nga presensya ni Jesus ha gahum han Ginhadian. (Mateo 24:3) Ha pagkamatuod, an instruksyon ni Jesus nga diri isumat an bisyon ha bisan hin-o tubtob ha kabanhaw niya tikang ha mga minatay nagpapakita nga an pagpahitaas ngan paghimaya ha iya maabot katapos han iya pagkabanhaw.

9. Kay ano nga an transpigurasyon sadang magparig-on han aton pagtoo?

⁹ Katapos unabihon an transpigurasyon, hi Pedro nagsiring: “Ginparig-on pa gud ha amon hin labi an pulong nga igintagna; busa nagbubuhat kamo hin maopay ha pagtagam niyo, sugad hin lamparahan nga nakakalamrag hin lugar nga masirom, ngada ha pag-isisirang han adlaw, ngan ngada ha pagsirang ha iyo mga kasingkasing han Bitoon ha kaadlawon. Hibaroan ini siyahan, nga waray igintagna han [Kasuratan] nga paghubaron pinaagi han kalugaringon nga hunahuna. Kay waray pa gud igintagna nga inabot pinaagi han kaburut-on han tawo: kondi an mga tawo nagyayakan tikang ha Dios, tungod nga ginmandoan han [baraan nga espiritu].” (2 Pedro 1:​19-21) An transpigurasyon nagpapatin-aw han pagkamasasarigan han matagnaon nga pulong han Dios. Kinahanglan mamati kita hiton nga pulong ngan diri ha “mga surumatanon nga mga hinimo ha larang la,” nga waray pag-uyon han Dios. An aton pagtoo ha matagnaon nga pulong sadang maparig-on han transpigurasyon tungod kay iton nga bisyon han himaya ni Jesus ngan han gahum han Ginhadian natutuman na. Oo, mayada kita diri-manigaran nga ebidensya nga presente na hi Kristo yana nga adlaw sugad nga gamhanan langitnon nga Hadi.

Kon Paonan-o Nasirang an Bitoon ha Kaadlawon

10. Hin-o o ano an “bitoon ha kaadlawon” nga gin-unabi ni Pedro, ngan kay ano nga ito an imo baton?

¹⁰ Hi Pedro nagsurat: “Nagbubuhat kamo hin maopay ha pagtagam niyo [ha matagnaon nga pulong], sugad hin lamparahan nga nakakalamrag hin lugar nga masirom, ngada ha pag-isisirang han adlaw, ngan ngada ha pagsirang han bitoon ha kaadlawon.” Hin-o o ano an “bitoon ha kaadlawon”? An pulong nga “bitoon ha kaadlawon” makikita hin makausa la ha Biblia, ngan pariho an kahulogan hito han “bitoon ha kaagahon.” Ha Pahayag 22:16 tinatawag hi Jesu-Kristo nga ‘an malamrag nga bitoon ha kaagahon.’ Mayada mga panahon han tuig, nga an sugad nga mga bitoon amo an urhi nga nasirang ha sinirangan antes sumirang an adlaw, ngan salit nagpapasabot ito hin kaagahon han bag-o nga adlaw. Ginamit ni Pedro an pulong nga “bitoon ha kaadlawon” ha pagtudlok kan Jesus katapos makarawat Niya an gahum ha Ginhadian. Hiton nga panahon, sinirang hi Jesus ha bug-os nga uniberso, upod na an aton tuna! Sugad nga Mesianiko nga Bitoon-ha-Kaadlawon, iginpapasamwak niya an pagtikang han bag-o nga adlaw, o panahon, para ha masinugtanon nga katawohan.

11. (a) Kay ano nga an 2 Pedro 1:19 diri nangangahulogan nga “an bitoon ha kaadlawon” nasirang ha literal nga kasingkasing han mga tawo? (b) Paonan-o mo isasaysay an 2 Pedro 1:19?

¹¹ Damu nga mga hubad han Biblia an nag-aaghat han ideya nga an mga pulong ni apostol Pedro nga iginrekord ha 2 Pedro 1:19 nagtutudlok ha pisikal nga kasingkasing han tawo. An kasingkasing han adulto mga 9 tubtob 11 libras la an bug-at. Paonan-o masirang hi Jesu-Kristo​—nga yana mahimayaon na diri-mamaratyon espiritu nga linarang ha langit​—dida hinin gudtiay nga mga organo han tawo? (1 Timoteo 6:16) Siyempre, nahidadabi hini an aton simboliko nga mga kasingkasing, kay pinaagi hito namamati kita ha matagnaon nga pulong han Dios. Kondi kitaa hin maopay an 2 Pedro 1:​19, ngan makikita mo nga ginagamit han New World Translation an mga koma ha pagbulag han mga pulong “ngada ha pag-isisirang han adlaw, ngan ngada ha pagsirang han bitoon ha kaadlawon” tikang ha nahiuna nga mga pulong ha bersikulo ngan tikang ha ekspresyon “ha iyo mga kasingkasing.” Ini nga bersikulo mahimo igpahayag hini nga paagi: ‘Mayada kita han matagnaon nga pulong nga ginparig-on hin labi; ngan nagbubuhat kamo hin maopay ha pagpamati hito sugad hin lamparahan nga naglalamrag ha lugar nga masirom, nga amo, ha iyo mga kasingkasing, tubtob ha pagsidlit han adlaw ngan pagsirang han bitoon ha kaadlawon.’

12. Ano an kahimtang han mga kasingkasing han mga tawo ha kabug-osan, kondi ano an kahimtang han totoo nga mga Kristiano?

¹² Ano an kahimtang han simboliko nga mga  kasingkasing han makasasala nga katawohan ha kabug-osan? Aw, an ira mga kasingkasing aada ha espirituwal nga kasisidman! Kondi, kon totoo kita nga mga Kristiano, sugad hin mayada kita lamparahan nga naglalamrag ha aton mga kasingkasing, nga mahimo magsirom liwat. Sugad han iginpasabot han mga pulong ni Pedro, pinaagi han pagpamati ha naglalamrag matagnaon nga pulong han Dios nga an totoo nga mga Kristiano magpapadayon nga alerto ngan nalamragan han pagsirang han bag-o nga adlaw. Mahibabaro hira han kamatuoran nga an Bitoon-ha-Kaadlawon sinirang, diri ha unudnon nga mga kasingkasing han tawo, kondi ha atubangan han ngatanan nga mga linarang.

13. (a) Kay ano nga makakasiguro kita nga an Bitoon-ha-Kaadlawon sinirang na? (b) Kay ano nga makakailob an mga Kristiano ha makuri nga mga kahimtang ha aton panahon nga igintagna ni Jesus?

¹³ An Bitoon-ha-Kaadlawon sinirang na! Makakasiguro kita hito pinaagi han pagpamati ha bantogan nga tagna ni Jesus mahitungod han iya presensya. Yana nga adlaw, naieksperyensyahan naton an katumanan hito ha mga hitabo sugad han waray kapariho nga mga girra, mga kagutom, mga linog, ngan bug-os-kalibotan nga pagwali han maopay nga sumat. (Mateo 24:​3-14) Bisan kon an makuri nga mga kahimtang nga igintagna ni Jesus nakakaapekto liwat ha aton sugad nga mga Kristiano, nakakailob kita nga may kamurayawan ngan kalipay ha kasingkasing. Kay ano? Tungod kay namamati kita ha matagnaon nga pulong han Dios ngan natoo ha iginsasaad niya para ha tidaraon. Maaram kita nga aada na kita ha purtahan han gimaopayi nga mga panahon tungod kay aada kita ha durho na gud han “panahon han kataposan”! (Daniel 12:4) An kalibotan aada ha makalolooy nga kahimtang nga igintagna ha Isaias 60:2: “Kitaa, an kasisidman magpuputos han tuna, ngan an madakmol nga kasisidman han mga katawohan.” Paonan-o makakaagi an usa han iya dalan hini nga kasisidman? An usa ka tawo kinahanglan mapainubsanon nga mamati ha matagnaon nga pulong han Dios yana, antes magin urhi na hinduro. An mga tawo nga tangkod an kasingkasing kinahanglan bumirik ngadto kan Jehova nga Dios, an Surok han kinabuhi ngan kalamrag. (Salmo 36:9; Buhat 17:28) Pinaagi la han pagbuhat hini nga an usa magkakaada totoo nga kalamrag ngan makakalaom ha pagpahimulos han urusahon nga tidaraon nga gintuyo han Dios para ha masinugtanon nga katawohan.​—Pahayag 21:​1-5.

 ‘An Kalamrag Naabot ha Kalibotan’

14. Ano an kinahanglan buhaton naton basi makaeksperyensya han katumanan han magopay nga mga tagna han Biblia?

¹⁴ Iginpapatin-aw han Kasuratan nga hi Jesu-Kristo nagmamando na sugad nga Hadi. Tungod han iya paghadi han 1914, matutuman an urusahon nga mga tagna. Basi maeksperyensyahan an katumanan hito, kinahanglan pamatud-an naton nga mga maaghop kita nga nagbubuhat hin pagtoo kan Jesu-Kristo, nagbabasol ha makasasala nga mga buhat ngan ha mga sala nga ginbuhat tungod ha kawaray-sarabotan. Siyempre, adton nahigugma han kasisidman diri makarawat hin kinabuhi nga waray kataposan. Hi Jesus nagsiring: “Ini amo an paghukom hin sirot, nga an kalamragan nakanhi ha kalibotan ngan an mga tawo nahigugma han kasisidman labi han Kalamrag, kay an ira mga buhat magngil-ad. Kay an ngatanan nga nagbubuhat han mangil-ad nadiri han kalamragan ngan diri napahirani ha kalamragan, bangin sawayon an ira mga buhat. Kondi an nagbubuhat han kamatuoran nahirani ha kalamragan basi humayag an ira mga buhat kay ipinapagbuhat han Dios.”​—Juan 3:​19-21.

15. Ano an mahitatabo kon aton pasibay-an an katalwasan nga iginhahatag han Dios pinaagi han iya Anak?

¹⁵ An espirituwal nga kalamrag inabot ha kalibotan pinaagi kan Jesus, ngan importante an pagpamati ha iya. Hi Pablo nagsurat: “An Dios nga nagyakan hadto nga una nga panahon ha dirodilain nga mga bahin ngan ha dirodilain nga mga paagi, ngadto ha mga ginikanan pinaagi han mga manaragna, nga nagyakan ha aton ha kataposan hini nga mga adlaw pinaagi han iya Anak, nga ginpili niya nga manurunod ha ngatanan nga mga butang.” (Hebreo 1:​1, 2) Ano an mahitatabo kon aton igbalewaray ini nga katalwasan nga iginhahatag han Dios pinaagi han iya Anak? Hi Pablo nagpadayon ha pagsiring: “Kay kon an pulong nga iginyakan pinaagi han mga anghel naproybahan nga magrig-on gud, ngan an tagsatagsa nga pagtalapas ngan diri pagkamasinugtanon nakakarawat hin matadong nga balos nga bayad; oonan-on ta an pakapalagiw, kon bayaan ta an sugad nga daku nga kaluwasan? Nga han siyahan iginwali pinaagi han Ginoo, iginpamatuod ha aton hadton mga nagpakabati; an Dios nagpamatuod man upod ha ira, pinaagi han mga tigaman, ngan mga urusahon ngan magkadirodilain nga mga kagamhanan, ngan ha mga hatag han [baraan nga espiritu], sumala ha iya kalugaringon nga kaburut-on”? (Hebreo 2:​2-4) Oo, hi Jesus an pinakaimportante ha pagpasamwak han matagnaon nga pulong.​—Pahayag 19:10.

16. Kay ano nga bug-os nga makakatoo kita ha mga tagna ni Jehova nga Dios?

¹⁶ Sugad han iginpatin-aw, hi Pedro nagsiring: “Waray igintagna han [Kasuratan] nga paghubaron pinaagi han kalugaringon nga hunahuna.” An mga tawo la diri gud pagtitikangan han totoo nga tagna, kondi magkakaada kita bug-os nga pagtoo ha ngatanan nga mga tagna han Dios. Nagtitikang ito kan Jehova nga Dios mismo. Pinaagi han baraan nga espiritu ginpahinabo niya nga makasabot an iya mga surugoon kon paonan-o natutuman an mga tagna ha Biblia. Oo, mapasalamaton gud kita kan Jehova nga nakikita naton an katumanan han damu han sugad nga mga tagna tikang han tuig 1914. Ngan sigurado gud kita nga an nahibibilin pa nga mga tagna mahitungod han kataposan hinin maraot nga sistema han mga butang matutuman ngatanan. Importante nga padayon nga mamati kita ha baraan nga mga tagna samtang ginpapasanag naton an aton kalamrag. (Mateo 5:16) Mapasalamaton gud kita nga hi Jehova nagpapahinabo han ‘kalamrag nga mag-idlap ha aton ha madakmol nga kasisidman’ nga nagtatabon ha tuna yana nga adlaw!​—Isaias 58:10.

17. Kay ano nga ginkikinahanglan naton an espirituwal nga kalamrag tikang ha Dios?

¹⁷ An pisikal nga kalamrag nakakahimo ha aton nga makakita. Ito liwat an nakakapatubo han mga tanom nga naghahatag ha aton hin pagkaon ha magkalainlain nga klase. Diri kita mabubuhi kon waray pisikal nga kalamrag. Kumusta man an espirituwal nga kalamrag? Naghahatag ito ha aton han giya ngan ipinapakita ha aton an tidaraon sugad han igintagna ha Pulong han Dios, an Biblia. (Salmo 119:105) Hi Jehova nga Dios mahigugmaon nga ‘naghahatag han iya kalamrag ngan han iya kamatuoran.’  (Salmo 43:3) Sigurado sadang magpakita kita hin daku nga apresasyon para ha sugad nga mga tagana. Salit buhaton naton an aton mahihimo ha pagkarawat han kalamrag han ‘mahimayaon nga kahibaro han Dios’ basi maglamrag ito ha aton simboliko nga kasingkasing.​—2 Korinto 4:6; Efeso 1:18.

18. Ano an andam na yana nga buhaton han Bitoon-ha-Kaadlawon ni Jehova?

¹⁸ Ginbendisyonan gud kita ha paghibaro nga han 1914, hi Jesu-Kristo, an Bitoon-ha-Kaadlawon, sinirang ha bug-os nga uniberso ngan nagtikang pagtuman han bisyon han transpigurasyon! An kan Jehova Bitoon-ha-Kaadlawon presente na yana, andam ha pagbuhat han katuyoan han Dios ha dugang nga katumanan han transpigurasyon​—‘an girra han daku nga adlaw han Dios nga Makagarahum-ha-ngatanan.’ (Pahayag 16:​14, 16) Katapos bungkagon inin daan nga sistema, tutumanon ni Jehova an iya saad nga “mga bag-o nga langit ngan bag-o nga tuna” diin makakadayaw kita ha iya ha kadayonan sugad nga Soberano nga Ginoo han uniberso ngan an Dios han totoo nga tagna. (2 Pedro 3:13) Tubtob hiton daku nga adlaw, magpadayon kita ha paglakat ha baraan nga kalamrag pinaagi han pagpamati ha matagnaon nga pulong han Dios.

Paonan-o Mo Babatunon?

• Paonan-o mo isasaysay an transpigurasyon ni Jesus?

• Paonan-o nagpaparig-on han pagtoo an transpigurasyon?

• Hin-o o ano an Bitoon-ha-Kaadlawon ni Jehova, ngan kakan-o ito sinirang?

• Kay ano nga sadang kita mamati ha matagnaon nga pulong han Dios?

[Mga Pakiana]

[Retrato ha pahina 13]

Maisasaysay mo ba an kahulogan han transpigurasyon?

[Retrato ha pahina 15]

Sinirang na an Bitoon-ha-Kaadlawon. Maaram ka ba kon paonan-o ngan kakan-o?