Gudtiay nga mga Lawas, Dagku nga mga Kasingkasing

ANO daw la an aabaton mo kon nakikiistorya ka ha mga diri-kakilala mahitungod han Ginhadian han Dios kon 76 sentimetro la an imo kahitaas? Hi Laura makakagsumat ha imo. Ha 33 anyos nga pangidaron, ito an iya kahitaas, 76 sentimetro la. Hiya ngan an iya bugto nga babaye, hi María, nga 24 anyos ngan 86 sentimetro an kahitaas, naukoy ha Quito, Ecuador. Isasaysay nira an mga ulang nga ira inaatubang ha ira Kristiano nga ministeryo.

“Basi makakadto ha amon teritoryo ha pagwali ngan ha Kristiano nga mga katirok, nagbabaktas kami hin haros katunga hin kilometro basi makasakay ha bus. Tikang ha amon ginpaparahan, nabaktas kami hin dugang nga katunga hin kilometro basi makasakay ha ikaduha nga bus. Makasurubo, hini nga dalan nag-uukoy an lima mabangis nga ayam. Nahahadlok kami hinduro ha mga ayam tungod kay sugad hin mga kabayo an ira kadaku. Basi maitabog hira kon kinahanglan, nagdadara kami hin bunal, nga amon igintatago antes sumakay ha bus basi magamit namon ha amon pagbaktas tipauli.

“An pagsakay ha bus literal nga daku nga pitad para ha amon. Natindog kami ha bawbaw han nabukdo nga sighot ha urundangan han bus basi mas masayon an pagsakay. An iba nga mga paramaneho nahirani ha nabukdo, kondi diri an iba. Hito nga kahimtang, binubuligan han hiruhitaas ha amon nga makasakay an hiruhibubo. An pagsakay ha ikaduha nga bus nagkikinahanglan nga tabukon namon an sibot nga kalsada​—usa gud nga pangalimbasog ha amon haglipot nga mga bitiis. Tungod han amon gudtiay nga lawas, an mabug-at nga bag dugang nga nagpakuri. Basi magin magaan an bag, nagamit kami hin Biblia nga gutiay ngan gin-iibanan liwat an kadamu han literatura nga amon dara.

“Tikang ha pagkabata, nagin awdanon hinduro kami. Maaram an amon mga amyaw nga an pakiistorya ha mga diri-kakilala pirme nga makaharadlok nga eksperyensya para ha amon. Salit nahipapausa ngan nalilipay hira nga makita kami nga natuktok ha ira mga purtahan, ngan agsob nga namamati hira ha amon. Kondi ha mga lugar nga diri kami kilala, an mga tawo agsob nga nakikita la kami sugad nga mga unano; salit, diri hira pirme nahatag ha amon hin seryoso nga atensyon nga takos ha amon mensahe. Kondi, an pag-abat han gugma ni Jehova naghahatag ha amon hin kadasig nga magpadayon ha pag-ebanghelyo nga buruhaton. An pamalandong han Proberbios 3:​5, 6 naghahatag liwat ha amon hin kaisog.”

Sugad han iginpakita ni Laura ngan María, an pagkamapadayonon bisan pa han pisikal nga mga ulang makakaghimaya ha Dios. Hi apostol Pablo nag-ampo nga an iya “tunok ha unod,” bangin usa nga pag-antos ha pisikal, kuhaon ha iya. Kondi nagsiring ha iya an Dios: “Iton akon grasya igo ha imo: kay iton akon gahum mahihingpit ha kamaluya.” Oo, an pisikal nga pagkabaldado  diri kinahanglan kuhaon basi makag-alagad kita ha Dios. An bug-os nga pagsarig ha Dios makakabulig ha aton ha paghimo han gimaopayi ha aton mga kahimtang. Tungod kay ginhunahuna ni Pablo an iya “tunok ha unod” hini nga paagi, nakasiring hiya: “Kon ako maluya, niyan makusog ako.” (2 Korinto 12:​7, 9, 10) Paglabay hin pipira ka mga tuig hi Pablo nagsurat: “Ngatanan mahihimo ko ha gahum han nagpaparig-on ha akon.”​—Filipos 4:13.

Ha moderno nga mga panahon, ginhihimo han Dios an daku nga buruhaton pinaagi han kalalakin-an, kababayin-an, ngan kabataan nga bug-os nga debotado ha iya. An pipira ha ira baldado ha iba nga paagi. Bisan kon hira ngatanan naglalaom para han baraan nga pagtambal ilarom han Ginhadian han Dios, diri hira naghihinulat tubtob nga kuhaon han Dios an ira mga problema antes mangalimbasog ha pagbuhat ha pag-alagad ha iya.

Nag-aantos ka ba hin pisikal nga depekto? Ayaw panluya! Pinaagi han imo pagtoo magigin pariho ka kan Pablo, Laura, ngan María. Mahitungod ha ira masisiring ito, sugad han kahimtang han kalalakin-an ngan kababayin-an nga matinoohon ha kadaan nga panahon: “Tikang ha mga kaluyahan pinanhimo hira nga magrig-on.”​—Hebreo 11:34.

[Retrato ha pahina 8]

María

Laura

[Retrato ha pahina 9]

Binubuligan ni María hi Laura nga makasakay ha bus

[Mga Retrato ha pahina 9]

“Nahahadlok kami hinduro ha mga ayam tungod kay sugad hin mga kabayo an ira kadaku”

Ubos: Hi Laura ngan María ngan adton nag-aram ha Biblia upod nira