Ano an Yawi ha Kalamposan?

DUHA nga maabtik nga batan-on nga lalaki an sistematiko nga naghimo hin urusahon-pagkit-on nga makina para ha importante nga pagsari. Ha tigda, usa nga makusog nga huyop han hangin an nagpalid han matapok nga aparato, nagtuyok ito ngadto ha igbaw, ngan ha makusog nga haganas iginpusak ito han hangin tipaubos. Tungod kay nanluya, an kalalakin-an nagtindog nga mamingaw. An ira metikuloso makuri nga gintrabaho nabuong ha nakasalapid nga tambak nga kahoy ngan metal.

Para kan Orville ngan Wilbur Wright, an nahinabo hito nga adlaw han Oktubre 1900 diri an siyahan makapaluya nga kapakyasan ha ira pangalimbasog nga makahimo hin maburobug-at-kay-han-hangin nga makina nga nalupad. Naggasto na hira hin pipira ka mga tuig ngan daku nga kantidad hin kuwarta ha pag-eksperimento.

Kondi, ha kataposan, nagkaada balos an ira pagkamapinadayonon. Han Disyembre 17, 1903, ha Kitty Hawk, North Carolina, E.U.A., an magbugto nga Wright nakapagpalupad hin de-motor nga eruplano nga linupad hin 12 ka segundo​—madaliay la kon itanding ha mga biyahe yana, kondi igo na an kaihaon ha pagbag-o han kalibotan ha kadayonan!

An kalamposan ha kadak-an nga mga pangalimbasog kasagaran nadepende gud ha mapailubon nga pagkamapinadayonon. Pagin maabtik man ito ha bag-o nga yinaknan, pag-aram hin bag-o nga trabaho, o bisan pagpatubo hin pakigsangkay, kadam-an han birilhon nga mga butang nakukuha la pinaagi han padayon nga pangalimbasog. “Siyam ha napulo,” siring han awtor nga hi Charles Templeton, “nga kalamposan an direkta nga resulta han usa nga butang: maduruto nga pagtrabaho.” An kolumnista nga hi Leonard Pitts, Jr., nasiring: “Ginhihisgotan naton an kalidad, kinikilala an suwerte, kondi agsob gud, nga ginbabalewaray naton an pinakaimportante nga mga butang. An maduruto nga pagtrabaho ngan damu nga mga kapakyasan. An temprano nga pag-abot ngan an hilawig nga mga oras ha pagtrabaho.”

Ginpapamatud-an hini an maiha na nga ginsiring han Biblia: “An kamot han maduruto magdadara han kaladnganan.” (Proberbios 12:24) An pagkamauyatom nagpapasabot nga magpapadayon kita ha aton mga pangalimbasog. Kinahanglanon ini kon karuyag naton nga maglampos ha aton ginhunahuna nga bubuhaton. Ano an pagkamapinadayonon? Poanan-o kita makakagpadayon ha pangalimbasog han aton mga tumong, ngan ha ano sadang kita magpadayon? Ini nga mga pakiana babatunon ha sunod nga artikulo.

[Ginkuhaan han Retrato ha pahina 3]

U.S. National Archives photo