Mahibabaro Ka han Tidaraon!

Damu nga mga tawo an naghuhunahuna hin seryoso mahitungod han tidaraon. Karuyag nira magplano, maaramon nga mamuhunan, ngan makasiguro. Kondi mayada ba iba nga paagi basi masiguro kon ano an mahitatabo buwas?

HA PANGALIMBASOG basi mahibaroan an tidaraon, an katawohan nag-ieksperimento ha ngatanan nga mga butang. An mga syentista han sosiedad nga tinatawag nga mga futurologist nag-uusisa han bag-o nga mga hilig ngan iginbabasar an ira mga panagna tikang hini. Sugad liwat an ginhihimo han mga ekonomista ha ira kanataran. An mga astrologo ngan mga paratigo nag-uusisa han mga horoscope, mga bola nga kristal, ngan han okultismo, ngan mayada hira damu nga mga sumurunod. Pananglitan, an Franses nga astrologo nga hi Nostradamus bantogan la gihapon, bisan kon mga siglo na hiya nga patay.

Ini ngatanan nga nag-aangkon nga mga propeta napamatud-an nga diri gud masasarigan ngan makabibido. Kay ano? Tungod kay ginbabalewaray nira hi Jehova nga Dios ngan an iya Pulong, an Biblia. Tungod hini napakyas hira ha pagbaton han importante nga mga pakiana sugad hini: ‘Kay ano nga makakasiguro ako nga mahitatabo an mga igintagna ha Biblia? Paonan-o ito naangay ha katuyoan han Dios para ha katawohan? Paonan-o an akon pamilya ngan ako makakapahimulos tikang hini nga mga tagna?’ Ginbabaton han Biblia ini nga mga pakiana.

Nalabaw liwat an tagna han Biblia ha damu nga mga paagi. Diri pariho ha mga tagna han astrologo, nagtutugot ito hin personal nga kagawasan ha pagbuot. Salit, waray bisan hin-o an biktima han kapalaran. (Deuteronomio 30:19) An mga sinurat sugad han kan Nostradamus waray pulos ha moral, ngan ira iginsasaysay ini nga pagkawaray-pulos sugad nga misteryo ngan pagpagios han emosyon. Kondi an tagna han Biblia mayada marig-on nga basihan ha moral. Nagsasaysay ito kon kay ano nga bubuhaton han Dios an iya katuyoan. (2 Kronikas 36:15) Ngan diri napapakyas an mga tagna ni Jehova, kay “an Dios . . . diri makakagbuwa.” (Tito 1:2) Salit, an mga indibiduwal nga ginigiyahan han Pulong han Dios mayada maaramon, may-katuyoan, ngan malipayon nga mga kinabuhi nga diri nagkakarag han ira presyoso nga panahon ngan mga panag-iya ha waray-pulos nga mga buruhaton.​—Salmo 25:​12, 13.

Ini ngan an damu iba pa nga mga punto an ginhisgotan ha 1999/2000 “Matagnaon nga Pulong han Dios” Distrito nga mga Kombensyon han mga Saksi ni Jehova nga gindumara ha bug-os nga kalibotan. An mga pakigpulong, mga interbyu, mga demonstrasyon, ngan usa nga drama ha Biblia nga nakadani han atensyon han mamarati ha maopay espirituwal nga panurundon nga napapahimulosan hadton nag-aaram ngan nag-aaplikar han matagnaon nga pulong han Dios. An masunod nga artikulo magrirepaso han pipira makapainteres nga mga punto han kombensyon.