An Matagnaon nga Pulong han Dios Naghahatag hin Paglaom ha Tidaraon

PINAAGI han Pulong han Dios, an Baraan nga Biblia, ginlalantaw han totoo nga mga Kristiano an tidaraon nga may pagtoo, paglaom, ngan pagsarig. Tungod kay sigurado ha ira relasyon kan Jehova nga Dios, ginhuhulat nira nga may paglaom an tidaraon. Sugad han iginsaysay han siyahan nga pahayag ha “Matagnaon nga Pulong han Dios” Distrito nga mga Kombensyon, an mga Saksi ni Jehova sinsero nga mga estudyante ha tagna han Biblia ha damu na nga katuigan. Salit, ano an inandam ni Jehova para ha iya katawohan hini nga mga kombensyon? Samtang andam an ira mga Biblia, disidido an ngatanan nga tinambong nga usisahon ito. An tema han tagsa nga adlaw han kombensyon iginbutang sugad nga nabubulag nga sub-ulohan.

SIYAHAN NGA ADLAW: Paglakat ha Kahayag han Pulong han Dios

An pahayag nga “An Pulong han Dios Nagtutugway ha Aton” nagsaysay nga an katawohan ni Jehova pariho hin usa ka tawo nga nagtitikang ha pagbiyahe ha masirom nga kagab-ihon. Samtang nasirang an adlaw, nakikita niya an mga lambong, kondi han hitaas na gud an adlaw, nakikita niya an matin-aw nga detalye. Sugad han igintagna ha Proberbios 4:​18, nakikita hin matin-aw han katawohan ni Jehova an ira dalan tungod han malamrag nga sanag han kamatuoran tikang ha matagnaon nga pulong han Dios. Diri hira ginpapabay-an nga mahipakdol ha espirituwal nga kasisidman.

An keynote address, “Pamati ha Matagnaon nga Pulong han Dios,” nagpahinumdom ha mga mamarati nga adton nasarig kan Jehova nakakalikay ha kapakyasan ngan kawad-i hin paglaom nga naieksperyensyahan han katawohan nga nasunod ha palso nga mga mesias ngan palso nga mga propeta. Ha kabaliktaran, damu gud an mga pangirilal-an han totoo nga Mesias, hi Jesu-Kristo! Pananglitan, an mamilagrohon nga pagbalhin-han-dagway ni Jesus nagtagana hin abanse nga pagpakilala ha iya sugad nga an nahitrono nga Hadi ha Ginhadian han Dios. Tikang nga naghadi ha Ginhadian han 1914, hi Jesus liwat an “bitoon ha kaadlawon” nga gin-unabi ha 2 Pedro 1:19. “Sugad nga Mesianiko nga Bitoon ha kaadlawon, iya iginpapasamwak an bag-o nga adlaw, o panahon, nga hibabaroan han ngatanan masinugtanon nga katawohan,” siring han mamumulong.

 Ha pagtikang han programa ha kulop, an pahayag nga “Naglalamrag Sugad hin mga Sugâ” nagpatin-aw han Efeso 5:​8, diin ginsasagdonan kita ni apostol Pablo nga ‘manggawi sugad ha mga anak han kalamragan.’ Mga sugâ an mga Kristiano, diri la pinaagi han pagpaangbit han Pulong han Dios ha iba kondi pinaagi liwat han pag-aplikar han Biblia ha ira mga kinabuhi ha pagsubad kan Jesus.

Basi magin sugad hini nga klase hin sugâ, kinahanglan kita “Malipay ha Pagbasa han Pulong han Dios.” Ini nga topiko iginpatin-aw ha tulo-ka-bahin nga simposyum. Katapos igkotar hi Abraham Lincoln, nga nagtawag han Biblia nga “an gimaopayi nga regalo nga iginhatag han Dios ha tawo,” ginpakianhan han siyahan nga mamumulong an mamarati kon ano an iginpapakita han ira mga batasan ha pagbasa mahitungod han kahilarom han ira apresasyon ha Pulong ni Jehova. Gindasig an mga mamarati nga basahon hin maopay an Biblia, maggasto hin panahon ha paghanduraw han Kasuratanhon nga mga asoy ngan ha pagkaw-ing han bag-o nga mga punto ha mga butang nga hinbaroan na.

An sunod nga bahin han simposyum nagpabug-at han panginahanglan han pag-aram, diri ordinaryo nga pagbasa, kon kinakarawat naton an “mabaskog nga kakaunon.” (Hebreo 5:​13, 14) Labaw nga makaparig-on an pag-aram, siring han mamumulong, kon aton abanse nga ‘inaandam an aton mga kasingkasing,’ sugad han ginbuhat han Israelita nga saserdote nga hi Esra. (Esra 7:10) Kondi kay ano nga importante hinduro an pag-aram? Tungod kay mayada ito direkta nga kalabotan ha aton relasyon kan Jehova. Salit, an pag-aram ha Biblia sadang magin birilhon, makalilipay, ngan makarepresko, bisan kon nag-uupod ito hin pagdisiplina ngan pangalimbasog han hunahuna. Paonan-o kita magkakaada hin panahon para ha mapulsanon nga pag-aram? Pinaagi han ‘pagpahimulos han oras’ tikang ha diri gud importante nga mga buruhaton, siring han ultimo nga mamumulong han simposyum. (Efeso 5:16) Oo, an yawi ha pagkaada hin panahon amo an gimaopayi nga paggamit han aton panahon.

An pahayag nga “Ginpapakusog han Dios an Ginkakapoy” nag-unabi nga damu nga mga tawo an nakakapoy yana nga mga adlaw. Salit basi kita magkaada hin “kapin kaopay nga gahum” para ha Kristiano nga ministeryo, kinahanglan kita sumarig kan Jehova, nga “nahatag hin gahum ngadto ha nanluluya.” (2 Korinto 4:7; Isaias 40:29) An nakakaparig-on nga mga bulig nag-uupod han Pulong han Dios, pag-ampo, Kristiano nga kongregasyon, regular nga pakigbahin ha ministeryo, Kristiano nga mga magmarangno, ngan matinumanon nga susbaranan han iba. An tema nga “Magin mga Magturutdo Tungod han Panahon” nagpatin-aw han panginahanglan han mga Kristiano nga magin mga magturutdo sugad man magin magwarali ngan mangalimbasog ha pagpatubo han ‘arte han panutdo.’​—2 Timoteo 4:2.

An ultimo nga pahayag han adlaw, “Diri Maglalampos an mga Nakontra ha Dios,” nag-unabi han bag-o sayop nga mga pangalimbasog ha pipira nga mga nasud ha pagpakilala ha mga Saksi ni Jehova nga usa ka peligroso nga kulto. Kondi diri kita mahadlok, tungod kay an Isaias 54:17 nasiring: “Waray hinganiban nga ginhitsura patok ha imo nga mauswag; ngan an tagsatagsa nga dila nga mabangon patok ha imo ha paghukom imo pagsasayupon. Amo ini an panurundon han mga surugoon ni Jehova, ngan an ira pagkamatadong nga tikang ha akon, nasiring hi Jehova.”

IKADUHA NGA ADLAW: Mga Butang nga Iginpahibaro Pinaagi han Matagnaon nga Kasuratan

Katapos paghisgotan an teksto han Biblia para han adlaw, ginpahimulosan han nagkatirok an  ikaduha nga simposyum han kombensyon, nga may ulohan “Paghimaya kan Jehova Sugad nga mga Paradara han Kalamrag.” Iginpakita han siyahan nga pahayag nga an tumong han Kristiano amo an pagdayaw kan Jehova pinaagi han pagwali ha bisan diin. An sunod nga bahin nag-unabi han panginahanglan ha pagtugway han mabinatunon nga mga tawo ha organisasyon han Dios. Paonan-o? Pinaagi han paggasto naton hin lima o napulo ka minutos antes o katapos han tagsa nga pag-aram ha Biblia ha balay ha pagpakita kon paonan-o nagios an organisasyon han Dios. Ginpabug-atan han ikatulo nga pahayag hini nga simposyum an panginahanglan han pagdayaw ha Dios pinaagi han maopay nga mga buhat.

An pahayag nga “Higugmaa Gud an mga Pahinumdom ni Jehova” naghisgot han pinili nga mga bersikulo ha Salmo 119. Matin-aw, nagkikinahanglan kita hin mga pahinumdom, tungod kay kita ngatanan posible nga hingalimot. Importante, kon sugad, nga mapatubo naton an gugma ha mga pahinumdom ni Jehova, sugad la han ginbuhat han salmista!

Katapos sumunod an espesyal nga pahayag​—an pahayag ha bawtismo nga may ulohan “An Pagpamati ha Matagnaon nga Pulong Nagtutugway ha Bawtismo.” Ginpahinumdom an mga kandidato ha bawtismo nga ginsusubad nira hi Kristo diri la ha pagpabawtismo kondi liwat ha duok nga pagsunod ha iya mga pitad. (1 Pedro 2:21) Daku gud an pribilehiyo hini nga mga bag-ohan ha pakigbahin ha katumanan han Juan 10:​16, diin igintagna hi Jesus nga iya titirukon an “iba nga mga karnero” basi mag-alagad kaupod han iya dinihogan-han-espiritu nga mga disipulo!

Ha pagtikang han programa ha kulop, an pahayag nga “Pamati Kon Ano an Isinisiring han Espiritu” nagsaysay nga an espiritu ni Jehova nakikiistorya ha aton pinaagi han Biblia, ‘han matinumanon ngan maaramon nga uripon,’ ngan han aton binansay-ha-Biblia nga konsensya. (Mateo 24:45) Salit, an mga Kristiano diri kinahanglan makabati hin literal nga tingog tikang ha langit basi mahibaro kon paonan-o mapapalipay an Dios. An sunod nga paghisgot, “Parig-ona an Katutdoan nga Uyon ha Diosnon nga Debosyon,” nagdasig ha mga Kristiano nga diri mag-usisa ha maraot nga mga ideya nga iginpapasarang hini nga kalibotan. Oo, an waray-kontrol nga pagkamausisa magdadani ha aton ngadto ha peligroso nga impormasyon nga ginhihimo han mga apostata ngan han iba nga mga ahente ni Satanas. Maoroopay gud an regular nga pagbasa han Biblia sugad man han ngatanan nga mga artikulo han An Barantayan ngan Awake!

An ulohan nga “Padayon nga Kumapot ha Surubdan han Magopay nga mga Pulong,” amo an sunod nga pahayag nga nagpabug-at han bili han pagin pamilyar gud ha Kasuratanhon nga “surubdan,” o pundasyon, han kamatuoran. (2 Timoteo 1:13) An pagsunod hini nga surubdan amo an yawi diri la ha pagkaada hin diosnon nga debosyon kondi ha pagkilala liwat han diri nauyon ha kamatuoran.

Handurawa an pagin makaruruyag para kan Jehova. Daku gud nga dungog! Basado ha tagna ni Hagay, an pahayag nga “Napupuno han ‘Birilhon nga mga Butang’ an Balay ni Jehova” labaw nga makapadasig tungod kay ginpasarig hito an mga mamarati nga an tagsa nga membro han “daku nga kadam-an” totoo nga makaruruyag kan Jehova. (Pahayag 7:9) Salit, luluwason hira ni Jehova ha iya ultimo nga ‘pagbay-og’ han mga nasud durante han tiarabot nga “daku nga kagol-anan.” (Hagay 2:​7, 21, 22; Mateo 24:21) Kondi, samtang yana, kinahanglan magpabilin nga nagbabantay ha espirituwal an katawohan ni Jehova, sugad han iginsaysay ha bahin nga “An Matagnaon nga Kasuratan Nagpapahamangno ha Aton nga Magin Mabinantayon.” An mamumulong nagkotar han mga pulong ni Jesus: “Busa magbantay kamo, kay diri kamo maaram kon ano nga adlaw an pagkanhi han iyo Ginoo.” (Mateo 24:42) Paonan-o naton matitipigan an espirituwal nga pagkamabinantayon? Pinaagi han pagpabilin nga sibot ha pag-alagad kan Jehova, pirme nga pag-ampo, ngan pagpabilin nga naghuhulat ha daku nga adlaw ni Jehova.

An ultimo nga pahayag han adlaw may ulohan nga “An Matagnaon nga Pulong ha Panahon han Kataposan.” Mahinunumduman ito ha mga tuig nga maabot. Kay ano? Tungod kay iginpahibaro han mamumulong an paggowa han bag-o nga libro​—Pay Attention to Daniel’s Prophecy! “Inin matahom an mga ilustrasyon 320-pahina nga publikasyon naghihisgot han ngatanan nga bahin han libro ni Daniel,” siring han mamumulong. Makaparig-on gud ha pagtoo nga ebidensya nga hi Jehova nagpapasanag han kahayag ha iya matagnaon nga Pulong!

IKATULO NGA ADLAW: Diri Gud Napapakyas an Matagnaon nga Pulong han Dios

An ultimo nga adlaw han kombensyon nagtikang ha simposyum nga “Matagnaon nga mga Pulong Para ha Itinanda nga Panahon.” An tulo nga  bahin nag-usisa han tulo nga kapahayagan ni propeta Habakuk han makabungkag nga mga paghukom ni Jehova. An siyahan kontra ha matinalapasnon nga Juda ngan an ikaduha kontra ha matalumpiguson nga Babilonya. An ultimo, nga waray pa mahitabo, aplikado ha hirani na nga kabungkagan han ngatanan magraot nga katawohan. Ha paghisgot mahitungod han Armagedon, an kataposan nga bugto ha simposyum nagdasig ha iya mga mamarati han husto nga kahadlok ha Dios han hiya sumiring: “Oo, magigin makalilisang kon buhian na ni Jehova an bug-os nga puwersa han iya daku nga gahum.”

“Pag-apresyar ha Aton Espirituwal nga Panurundon” amo an ulohan han makapabantad nga drama han Biblia ha kombensyon. Inin nag-uusisa-han-kalugaringon nga presentasyon nagtanding han mga paggios ni Jakob ngan Esaw ha espirituwal nga mga butang. Ginbalewaray ni Esaw an iya espirituwal nga panurundon, salit iginhatag ito kan Jakob, nga nagpabili hito. “Ano nga [espirituwal nga panurundon] an iginhahatag ha aton ni Jehova?” ginpakianhan an mga kombensyonista. “An kamatuoran han iya Pulong, an Biblia; an paglaom ha kinabuhi nga waray kataposan; ngan an kadungganan ha pagrepresentar ha iya sugad nga mga parasamwak han maopay nga sumat,” binaton an mamumulong.

An sunod nga bahin may ulohan nga “Ano an Kahulogan ha Imo han Aton Presyoso nga Panurundon?” Ipinapakita naton an husto nga paggios ha aton espirituwal nga panurundon pinaagi han pag-una han pag-alagad kan Jehova ngan han espirituwal nga mga pribilehiyo antes han personal o materyal nga mga interes. Hini nga paagi aton gintutukod an aton kinabuhi ha aton relasyon kan Jehova, nga kabaliktaran gud kan Adan, Esaw, ngan ha diri-matinumanon nga mga Israelita.

An pahayag publiko, “Ginbabag-o an Ngatanan nga Butang​—Sugad han Igintagna,” nag-urosa han upat importante nga mga tagna mahitungod han “bag-o nga mga langit” ngan han “bag-o nga tuna.” (Isaias 65:​17-25; 66:​22-24; 2 Pedro 3:13; Pahayag 21:​1, 3-5) Matin-aw, ginhunahuna ni Jehova an darodaku nga katumanan hini nga mga tagna kay han iya nahibalik nga katawohan han 537 A.K.P. Oo, ginhunahuna niya an iya gobyerno nga Ginhadian (an “bag-o nga mga langit”) ngan an tunan-on nga mga ginsasakopan hito (an “bag-o nga tuna”), nga amo an maukoy ha mahimayaon nga paraiso ha bug-os nga tuna.

An nagdara han makalilipay ngan makapabantad nga pagtapos han kombensyon amo an pahayag nga “An Aton mga Ginlalaoman Samtang Gintutugwayan Kita han Pulong han Dios.” Ginpahinumdom hito an ngatanan nga “an panahon ginpahalipot” ha pagtapos han buruhaton han pagpasamwak han Ginhadian. (1 Korinto 7:29) Oo, natindog kita ha ganghaan han katumanan han paghukom ni Jehova kontra kan Satanas ngan ha iya bug-os maraot nga sistema. Hinaot an aton mga pagbati magin sugad han salmista nga nagkanta: “An aton kalag naghulat kan Jehova: Hiya amo an aton parabulig ngan an aton taming.” (Salmo 33:20) Mahimayaon gud nga paglaom an naghuhulat hadton an mga paglaom iginbasar ha matagnaon nga pulong han Dios!

[Retrato ha pahina 7]

An makapabantad nga drama nagpahilarom han apresasyon ha espirituwal nga panurundon han mga surugoon ni Jehova

[Retrato ha pahina 7]

Nabawtismohan an damu nga namati ha matagnaon nga pulong han Dios