NATOO ka ba nga an Biblia tikang ha Dios? O para ha imo, usa la ito nga libro nga nagsusulod han panhunahuna han tawo?

Ini nga isyu padayon nga gindidebatehan bisan han nag-aangkon nga mga Kristiano. Pananglitan han 2014, usa nga surbey han Gallup ha Estados Unidos an nagpapakita nga kadam-an han nag-aangkon nga mga Kristiano an nauyon nga “an Biblia baga hin may kalabotan ha Dios.” Ha luyo nga bahin, mga 1 ha 5 nga ginsurbey an naghunahuna nga an Biblia usa nga libro han “kadaan nga mga hinimo-himo nga istorya, susmatanon, kasaysayan, ngan mga surundon nga ginsurat han tawo.” Tungod hito, bumangon an isyu kon ano gud an kahulogan han pulong nga “giniyahan” may kalabotan ha Biblia.​—2 Timoteo 3:16.

An Biblia ginkukompwesto hin 66 nga gudtiay nga libro nga ginsurat hin mga 40 ka tawo ha sulod hin sobra 1,600 ka tuig. Pero kon tawo la an nagsurat han Biblia, kay ano nga masisiring nga “giniyahan han Dios” ito? Aw, an mga pulong nga “giniyahan han Dios” nagpapasabot nga an gintikangan han impormasyon hito amo an Dios. Ini an siring han Biblia: “Tikang ha Dios an ginyakan han mga tawo samtang ginigiyahan hira han baraan nga espiritu.” (2 Pedro 1:21) Ha iba nga pagkayakan, gin-gamit han Dios an iya diri nakikita nga pwersa, an baraan nga espiritu, basi ipahayag an iya mensahe ha mga nagsurat han Biblia. Maipapariho ini ha usa nga negosyante nga nagdidikta han iya mensahe basi isurat han iya sekretaryo. An awtor han surat diri an nagsusurat, kondi an nagdidikta.

An pipira han nagsurat han Biblia aktuwal nga nakabati han mensahe han Dios pinaagi hin anghel. An iba nakakita hin mga bisyon tikang ha Dios. Ha pipira nga kahimtang, iginsumat han Dios an iya mensahe pinaagi hin mga inop. Bisan kon usahay gintugotan han Dios an mga parasurat nga gumamit han ira kalugaringon nga mga pulong, ha iba nga panahon iginhatag niya an eksakto nga mga pulong. Kondi ha tanan nga higayon, an panhunahuna han Dios an ira iginsurat, diri an ira kalugaringon.

Kay ano nga makakasiguro kita nga an Dios an naggiya han mga nagsurat han Biblia? Tagda an tulo nga ebidensya nga nagpaparig-on han aton pagsarig nga an Biblia tikang ha Dios.