Ginsasalikway han damu nga tawo an Dios kay hiya an ira ginbabasol ha ira mga pag-antos.

Ha direkta man o ha diri direkta nga paagi, igintututdo han damu nga lider han relihiyon nga an Dios an hinungdan han aton pag-antos. Pananglitan, may mga nasiring:

• An mga kalamidad sirot han Dios.

• Namamatay an mga bata kay kinahanglan han Dios hin damu pa nga anghel ha langit.

• An Dios may gindadapigan ha mga girra​—usa nga hinungdan han duro nga pag-antos.

Pero posible ba nga an mga lider han relihiyon nagtututdo hin sayop mahitungod ha Dios? Ano man kon iginsalikway ngay-an hira han Dios?

An Dios diri amo an hinungdan han aton pag-antos.

Kon hiya an hinungdan hito, diri ito uyon ha iya mga kalidad nga mababasa ha Biblia. Pananglitan:

‘Ngatanan nga dalan han Dios hustisya. Matadong ngan tangkod hiya.’​—DEUTERONOMIO 32:4.

“Imposible gud nga magbuhat hin maraot an tinuod nga Dios, nga magbuhat hin sayop an Makagarahum-ha-ngatanan!”​—JOB 34:10.

“An Makagarahum-ha-ngatanan diri nagbabaliko han hustisya.”​—JOB 34:12.

Iginsasalikway han Dios an mga relihiyon nga nagtututdo hin sayop mahitungod ha iya.

Upod hini an mga relihiyon nga nagtututdo nga an Dios an hinungdan han aton pag-antos ngan an mga relihiyon nga nasuporta ha mga girra ngan kamadarahog.

“An mga propeta nananagna hin mga buwa ha akon [karuyag sidngon, an Dios] ngaran. Waray ko hira ipadara o sugoa, ngan waray liwat ako makiistorya ha ira. An buwa nga bisyon ngan . . . an panlimbong han ira mismo kasingkasing an ira igintatagna ha iyo.”​—JEREMIAS 14:14.

Waray uyuni ni Jesus an pagin hipokrito han mga relihiyon.

“Diri an ngatanan nga nasiring ha akon, ‘Ginoo, Ginoo,’ masulod ha Ginhadian han langit, kondi adto la nga nagbubuhat han kaburut-on han akon Amay nga aadto ha langit. Hito nga adlaw damu an masiring ha akon: ‘Ginoo, Ginoo, diri ba nanagna kami ha imo ngaran, ngan nagpagawas hin mga demonyo ha imo ngaran, ngan nagbuhat hin damu nga gamhanan nga buhat ha imo ngaran?’ Pero masiring ako ha ira: ‘Diri ko gud kamo kilala! Iwas kamo ha akon, kamo nga matinalapason!’”​—MATEO 7:21-23.