MASASALBAR BA AN ATON PLANETA?
Tubig-Tab-ang
AN KINABUHI ha tuna diri magigin posible kon waray tubig, labi na an tubig-tab-ang. Ngani, an ngatanan nga buhi nga linarang ginkukompwesto hin kadak-an tubig. An mga linaw, salog, matubig nga mga dapit, ngan tubig ha ilarom han tuna naghahatag hin irimnon ha mga tawo ngan hayop ngan nabulig basi matubigan an aton mga kaumhan.
Kon Kay Ano nga Bangin Magkulang an Tubig-Tab-ang
An aton planeta kaurogan tubig. Pero sumala ha World Meteorological Organization, “0.5% la han tubig ha tuna an puydi gamiton nga tubig-tab-ang.” Inin gutiay la nga kadamu han tubig-tab-ang igo na unta nga makasustiner han kinabuhi ha tuna, pero an kadam-an hito nagigin mahugaw na o nagtitikakuri makuha tungod han pagtikadamu han nanginginahanglan hito ngan han climate change. Ginbabanabana han mga eksperto nga ha sulod hin 30 ka tuig, lima ka bilyon ka tawo an diri magkakaada igo nga suplay han tubig-tab-ang.
An Aton Planeta—Gindisenyo nga Magpabilin ha Kadayonan
An aton planeta may natural nga mga proseso basi diri magkulang an suplay han tubig. Dugang pa, an tuna, mga linarang nga nabubuhi ha tubig, ngan bisan an sirak nabulig basi padayon nga magin limpyo an aton tubig. Pansina an pipira nga ebidensya nga nagpapakita nga an aton planeta gindisenyo basi magpabilin ha kadayonan.
-
An tuna nakakabulig pagtanggal han damu nga butang nga nakakahugaw han aton tubig. Ha matubig nga mga dapit, may pipira nga tanom nga kilala nga nakakatanggal hin nitrogen, phosphorus, ngan mga pesticide.
-
Nahibaroan han mga syentista kon paonan-o nakakapabilin nga limpyo an tubig ha palibot. An nakakadaot nga mga substansya ginpapalabnaw han naawas nga tubig, katapos gintutunaw ito han mga mikroorganismo.
-
An mga tuway ngan mga tahong ha tubig-tab-ang nakakatanggal han pipira nga nakakadaot nga mga kemikal ha tubig ha sulod hin pipira la ka adlaw—ngan posible nga mas epektibo pa ngani ito kay ha nahihimo han mga planta nga naglilimpyo han tubig.
-
Gintitipigan han aton planeta an tubig pinaagi han sikolo han tubig. Tungod hini nga sikolo ngan han iba pa nga natural nga mga proseso, nabulig ini nga an tubig diri gumawas ha aton atmospera o diri mawara.
Kon Ano Na an Ginhihimo nga Solusyon
Pinaagi ha pag-ayad han mga tagas han asyete ngan husto nga paglabog han nakakahilo nga mga kemikal, nakakabulig kita nga magpabilin nga limpyo an ginkukuhaan han tubig-tab-ang
An mga eksperto nasiring nga kinahanglan pirme kita maghirot nga diri magkarag hin tubig. Basi maibanan an kontaminasyon ha tubig, ginsagdonan kita nira nga aydon an mga tagas han asyete ha aton mga sarakyan ngan diri ibuhos ha inudoro an diri na gin-gagamit nga mga medisina o ihuwad an nakakahilo nga mga kemikal ha kanal.
An mga engineer nakabiling hin bag-o nga mga paagi ha pagtanggal han asin tikang ha tubig-dagat. An tumong hito basi madugangan an kadamu han puydi mainom nga tubig.
Pero labaw pa hito an ginkikinahanglan. An pagtanggal han asin ha tubig-dagat baga hin diri maopay nga solusyon tungod kay magasto ito hinduro ngan nagkikinahanglan ito hin damu hinduro nga enerhiya. Ha usa nga report han 2021 mahitungod ha kon paonan-o puprotektaran an irimnon nga tubig, usa nga publikasyon han United Nations an nagsiring: “Ha bug-os nga kalibotan, an pag-uswag nga iginreport yana kinahanglan madoble.”
Mga Rason Para Maglaom—Kon Ano an Ginsisiring han Biblia
‘An Dios nagkakabig tipaigbaw han mga turo han tubig; an alisngaw nabubug-os basi magin uran; katapos, iginbububo ini han mga dampog; nagpapauran ito ngada ha katawohan.’—Job 36:26-28.
Ginhimo han Dios an natural nga mga sikolo basi protektaran an mga tubig han tuna.—Eclesiastes 1:7.
Hunahunaa ini: Kon nahimo han Maglalarang an mga proseso basi padayon nga magin limpyo an tubig-tab-ang, diri ba makatadunganon tumoo nga kaya ngan karuyag niya wad-on an mga kadaot nga ginhimo han tawo dida hito? Kitaa an artikulo nga “An Dios Nagsasaad nga Masasalbar an Aton Planeta,” ha pahina 15.
