1. Ano an kinahanglan buhaton han usa kon karuyag niya makiistorya ha hadi han Persia?

IMADYINA nga nabubuhi ka ha Persia, mga 2,500 ka tuig na an naglabay. Karuyag mo makiistorya ha hadi hito nga nasud mahitungod ha usa nga butang, salit nagbiyahe ka ngadto ha syudad han Susan, diin naukoy an hadi. Pero antes ka makiistorya ha hadi, kinahanglan ka mangaro han iya permiso. Kon makiistorya ka ha iya nga waray han iya permiso, puydi ka patayon!​—Est. 4:11.

2. Ano an karuyag ni Jehova nga abaton naton kon nakikiistorya kita ha iya?

² Mapasalamaton gud kita nga hi Jehova diri pariho hito nga hadi han Persia! Hi Jehova mas gamhanan gud ngan mas importante kay ha bisan hin-o nga tawhanon nga magmarando, pero mahimo kita makiistorya ha iya ha bisan ano nga oras. Karuyag niya nga diri kita mag-alang ha pakiistorya ha iya. Pananglitan, bisan kon hi Jehova nagtatag-iya han higtaas nga titulo sugad han Harangdon nga Maglalarang, Makagarahum-ha-ngatanan, ngan Soberano nga Ginoo, gin-aaghat kita niya nga tawagon hiya ha pamilyar nga termino nga “Amay.” (Mat. 6:9) Nakakapalipay ha aton nga karuyag ni Jehova nga abaton naton nga duok gud kita ha iya!

3. Kay ano nga mahimo naton tawagon hi Jehova nga “Amay,” ngan ano an hihisgotan hini nga artikulo?

³ Husto la nga tawagon naton hi Jehova nga “Amay” kay hiya an gintitikangan han aton kinabuhi. (Sal. 36:9) Tungod kay Amay naton hiya, may obligasyon kita nga sugton hiya. Kon ginbubuhat naton an iya ginsusugo ha aton, makakakarawat kita hin makaruruyag nga mga bendisyon. (Heb. 12:9) Usa hito nga mga bendisyon amo an kinabuhi nga waray kataposan, ha langit man o ha tuna. Nagpapahimulos liwat kita yana hin mga benepisyo. Hihisgotan hini nga artikulo kon paonan-o iginpapakita yana ni Jehova nga mahigugmaon hiya nga Amay ngan kon kay ano nga makakasiguro kita nga diri gud kita niya papabay-an ha maabot nga panahon. Pero hisgotan anay naton kon kay ano nga makakasarig kita nga hinigugma  gud kita ngan karuyag kita buligan han aton langitnon nga Amay.

4. Kay ano nga nakukurian an iba nga hunahunaon hi Jehova sugad nga ira Amay?

⁴ Nakukurian ka ba hunahunaon an Dios sugad nga imo Amay? Bangin abaton han iba nga minos gud hira ngan diri importante kon ikompara kan Jehova. Nagruruhaduha hira nga an Makagarahum-ha-ngatanan nga Dios interesado gud ha aton sugad nga indibiduwal. Pero, diri karuyag han aton mahigugmaon nga Amay nga magruhaduha kita. Gintagan kita niya hin kinabuhi ngan karuyag niya nga magkaada kita duok nga relasyon ha iya. Katapos unabihon ini nga kamatuoran, iginsaysay ni apostol Pablo ha iya mga mamarati ha Atenas nga hi Jehova ‘diri hirayo ha tagsa ha aton.’ (Buh. 17:24-29) Karuyag han Dios nga an tagsa ha aton dumaop ha iya pariho hin bata nga diri nag-aalang pagdaop ha iya mahigugmaon gud nga kag-anak.

5. Ano an aton mahibabaroan ha eksperyensya han usa nga Kristiano nga sister?

⁵ Bangin nakukurian an iba nga hunahunaon hi Jehova sugad nga ira Amay kay an ira mismo tawhanon nga tatay gutiay la nga gugma ngan pagpalangga an iginpakita ha ira o waray gud magpakita hito. Tagda an ginsiring han usa nga Kristiano nga sister. “An akon tatay masakit gud manyakan,” siring niya. “Han nagtikang ako pag-aram han Biblia, nakurian ako magin duok ha usa nga langitnon nga Amay. Pero han nakilala ko gud hi Jehova, nagbag-o ito.” Sugad ba liwat hito an imo inaabat? Kon oo, laumi nga mahimo mo liwat abaton nga hi Jehova an pinakamaopay gud nga Amay.

6. Sumala ha Mateo 11:27, ano an usa nga paagi nga ginbubuligan kita ni Jehova nga hunahunaon hiya sugad nga aton mahigugmaon nga Amay?

⁶ An usa nga paagi nga ginbubuligan kita ni Jehova nga hunahunaon hiya sugad nga aton mahigugmaon nga Amay amo an pagpasurat niya ha Biblia han mga ginsiring ngan ginbuhat ni Jesus. (Basaha an Mateo 11:27.) Perpekto nga iginpakita ni Jesus an personalidad han iya Amay salit makakasiring hiya: “An bisan hin-o nga nakakita ha akon nakakita liwat ha Amay.” (Juan 14:9) Damu ka beses nga nag-istorya hi Jesus han papel nga gintutuman ni Jehova sugad nga Amay. Ha upat nga Ebanghelyo, gintawag ni Jesus hi Jehova nga “Amay” hin mga 165 ka beses. Kay ano nga hi Jesus pirme gud nag-iistorya mahitungod kan Jehova? An usa nga rason amo an pagkombinse ha mga tawo nga hi Jehova mahigugmaon nga Amay.​—Juan 17:25, 26.

7. Ano an aton mahibabaroan mahitungod kan Jehova ha iya pagtratar ha iya Anak?

⁷ Tagda kon ano an aton mahibabaroan mahitungod kan Jehova ha iya pagtratar ha iya Anak nga hi Jesus. Pirme namamati hi Jehova ha mga pag-ampo ni Jesus. Pero diri la kay namamati hiya, ginbabaton liwat niya ito. (Juan 11:41, 42) Anoman nga pagsari an gin-atubang ni Jesus, inabat niya an gugma ngan bulig han iya Amay.​—Luc. 22:42, 43.

8. Ha ano nga mga paagi iginhatag ni Jehova an panginahanglan ni Jesus?

⁸ Ginkilala ni Jesus nga an iya Amay an gintitikangan ngan nagsusustinir han iya kinabuhi han nagsiring hiya: “Nabubuhi ako tungod han Amay.” (Juan 6:57) Bug-os nga sinarig hi Jesus ha iya Amay, ngan iginhatag ni Jehova an iya mga panginahanglan ha pisikal. An pinakaimportante, iginhatag ni Jehova kan Jesus an iya ginkikinahanglan basi magpabilin nga matinumanon.​—Mat. 4:4.

9. Paonan-o iginpakita ni Jehova nga usa hiya nga Amay nga nahigugma gud kan Jesus?

⁹ Sugad nga mahigugmaon nga Amay, ginsiguro ni Jehova nga maaram hi Jesus nga may-ada hiya han suporta han iya Amay. (Mat. 26:53; Juan 8:16) Bisan kon waray proteksyuni ni Jehova hi Jesus ha ngatanan nga kasakitan, ginbuligan Niya hiya nga makailob. Ginpasarig hi Jesus nga temporaryo la an bisan ano nga kadaot nga  bangin niya antuson. (Heb. 12:2) Iginpakita ni Jehova nga hinigugma niya hi Jesus pinaagi ha pagpamati, pagtagana, pagbansay, ngan pagsuporta ha iya. (Juan 5:20; 8:28) Kitaon naton yana kon paonan-o an aton langitnon nga Amay nag-aataman ha aton ha pariho nga mga paagi.

10. Sumala ha Salmo 66:19, 20, paonan-o iginpapakita ni Jehova nga hinigugma kita niya?

¹⁰ Hi Jehova namamati ha aton mga pag-ampo. (Basaha an Salmo 66:19, 20.) Diri niya karuyag nga limitahan naton an aton mga pag-ampo, lugod gin-aaghat kita niya nga pirme mag-ampo. (1 Tes. 5:17) Matinalahuron nga makakadaop kita ha aton Dios ha bisan ano nga oras, hain man kita. Diri gud hiya magigin sobra ka-busy nga diri na hiya mamamati ha aton; pirme hiya andam ha pagpamati. Kon maaram kita nga hi Jehova namamati ha aton mga pag-ampo, mas ginhihigugma naton hiya. “Hinigugma ko hi Jehova,” siring han salmista, “kay namamati hiya han akon tingog.”​—Sal. 116:1.

11. Paonan-o ginbabaton ni Jehova an aton mga pag-ampo?

¹¹ An aton Amay diri la kay namamati ha aton mga pag-ampo kondi ginbabaton liwat niya ito. Ginpapasarig kita ni apostol Juan: “Anoman an aton aroon uyon ha . . . kaburut-on [han Dios], namamati hiya ha aton.” (1 Juan 5:14, 15) Syempre, bangin diri batunon ni Jehova an aton mga pag-ampo ha paagi nga aton ginlalaoman. Maaram hiya kon ano gud an makakaopay ha aton, salit usahay diri an iya baton o karuyag niya nga maghulat kita.​—2 Cor. 12:7-9.

12-13. Ha ano nga mga paagi an aton langitnon nga Amay nagtatagana ha aton?

¹² Hi Jehova nagtatagana ha aton. Ginbubuhat niya kon ano an iya iginsusugo ha tanan nga tatay. (1 Tim. 5:8) Iya iginhahatag an materyal nga panginahanglan han iya mga anak. Diri niya karuyag nga mabaraka kita mahitungod ha aton kakaunon, isusul-ot, o urukyan. (Mat. 6:32, 33; 7:11) Sugad nga mahigugmaon nga kag-anak, ginsiguro liwat ni Jehova nga magkaada kita han tanan nga aton kinahanglan ha tiarabot nga panahon.

¹³ An pinakaimportante, igintatagana ni Jehova an aton espirituwal nga panginahanglan. Pinaagi han iya Pulong, iya iginsusumat an kamatuoran mahitungod ha iya, ha iya katuyoan, ha katuyoan han kinabuhi, ngan han kabubuwason. Nagpakita hiya hin personal nga atensyon han siyahan nga nahibaroan naton an kamatuoran, pinaagi han aton mga kag-anak o iba nga magturutdo nga binulig ha aton nga makilala hiya. Ngan padayon nga nakarawat kita hin bulig tikang ha mahigugmaon nga mga tigurang ha kongregasyon ngan ha iba pa nga hamtong nga kabugtoan. Dugang pa, gintututdoan kita ni Jehova pinaagi han aton mga katirok, diin nahibabaro kita upod han aton espirituwal nga pamilya. Pinaagi hini ngan ha iba pa nga mga paagi, iginpapakita ni Jehova an iya interes ha aton ngatanan sugad nga tatay.​—Sal. 32:8.

14. Kay ano nga ginbabansay kita ni Jehova, ngan paonan-o niya ito ginbubuhat?

¹⁴ Ginbabansay kita ni Jehova. Diri pariho kan Jesus, diri kita mga perpekto. Salit basi mabansay kita, gindidisiplina kita han aton mahigugmaon nga Amay kon kinahanglan. Ginpapahinumdoman kita han iya Pulong: “An mga ginhihigugma ni Jehova iya gindidisiplina.” (Heb. 12:6, 7) Gindidisiplina kita ni Jehova ha damu nga paagi. Pananglitan, an aton nababasa ha iya Pulong o nababatian ha mga katirok mahimo magtadong ha aton. O an bulig nga aton kinahanglan bangin magtikang ha mga tigurang. Ha anoman nga paagi kita gindidisiplina ni Jehova, ginbubuhat niya ito pirme tungod han gugma.​—Jer. 30:11.

15. Ha ano nga mga paagi ginpuproteksyonan kita ni Jehova?

¹⁵ Ginbubuligan kita ni Jehova nga makailob ha mga kakurian. Pariho hin mahigugmaon nga tawhanon nga amay nga nabulig ha iya mga anak ha  panahon han kasakitan, an aton langitnon nga Amay nabulig ha aton basi makailob kita ha mga kakurian. Gin-gagamit niya an iya baraan nga espiritu basi proteksyonan kita ha kadaot ha espirituwal. (Luc. 11:13) Ginbubuligan liwat kita ni Jehova kon nanluluya o nababaraka kita. Pananglitan, gintatagan kita niya hin makaruruyag nga paglaom. Ito nga paglaom nabulig ha aton nga mailob an mga kakurian. Hunahunaa ini: Anoman nga maraot an mahitabo ha aton, wawad-on han aton mahigugmaon nga Amay an bisan ano nga kadaot nga aton gin-aantos. Temporaryo la an bisan ano nga kakurian nga aton gin-aatubang, pero an mga bendisyon nga iginhahatag ni Jehova waray kataposan.​—2 Cor. 4:16-18.

16. Ano an nahitabo han waray sumugot hi Adan ha iya mahigugmaon nga Amay?

¹⁶ Nakikita naton an pamatuod han gugma ni Jehova ha aton kon ginhuhunahuna naton an iya ginhimo han nagtalapas hi Adan. Han waray sumugot hi Adan ha iya langitnon nga Amay, hiya ngan an iya katulinan nagin diri na bahin han malipayon nga pamilya ni Jehova. (Roma 5:12; 7:14) Pero may ginbuhat hi Jehova basi buligan an katulinan ni Adan.

17. Katapos magrebelde ni Adan, ano an ginbuhat dayon ni Jehova?

¹⁷ Ginsirotan ni Jehova hi Adan, pero gintagan niya hin paglaom an magigin katulinan ni Adan. Nagsaad dayon hiya nga an masinugtanon nga mga tawo maibabalik ha Iya pamilya. (Gen. 3:15; Roma 8:20, 21) Ginhimo ni Jehova nga posible ini pinaagi han halad-lukat han iya hinigugma nga Anak, hi Jesus. Pinaagi ha paghatag han iya Anak para ha aton kaopayan, ginpamatud-an ni Jehova nga hinigugma gud kita niya.​—Juan 3:16.

18. Kay ano nga makakasiguro kita nga karuyag ni Jehova nga magin mga anak kita niya, bisan kon nagin hirayo kita ha iya?

¹⁸ Bisan kon diri kita perpekto, karuyag ni Jehova nga magin bahin kita han iya pamilya, ngan  diri gud niya ginhuhunahuna nga pabug-at kita ha iya. Bangin mapasubo naton hi Jehova o magpahirayo kita ha iya pero naglalaom pirme hiya nga mabalik kita ha iya. Igin-ilustrar ni Jesus an kahilarom han gugma ni Jehova ha iya mga anak pinaagi han istorya han anak nga nawara. (Luc. 15:11-32) Hito nga ilustrasyon, an tatay waray gud umundang ha paglaom nga mabalik an iya anak. Han inuli an anak, eksayted nga gintapo hiya han iya tatay. Kon nahibulag kita kan Jehova pero mabinasulon kita, makakasiguro kita nga an aton mahigugmaon nga Amay andam pagkarawat ha aton.

19. Paonan-o ibabalik ni Jehova ha maopay nga kahimtang an kadaot nga resulta han ginbuhat ni Adan?

¹⁹ Ibabalik han aton Amay ha maopay nga kahimtang an tanan nga kadaot nga resulta han ginbuhat ni Adan. Katapos han pagrebelde ni Adan, nagdesisyon hi Jehova nga ampunon an 144,000 nga indibiduwal tikang ha katawohan basi magin mga hadi ngan saserdote ha langit upod han iya Anak. Bubuligan ni Jesus ngan han iya mga kaupod ha pagmando an magsinugtanon nga tawo nga magin perpekto ha bag-o nga kalibotan. Katapos nira makapasar ha ultimo nga pagsari ha pagkamasinugtanon, tatagan hira han Dios hin kinabuhi nga dayon. Hito nga panahon an aton Amay malilipay gud ha pagkita ha tuna nga puno han iya perpekto nga mga anak. Makalilipay gud ito nga panahon!

20. Ha ano nga mga paagi iginpapakita ni Jehova nga hinigugma gud kita niya, ngan ano an hihisgotan ha sunod nga artikulo?

²⁰ Iginpapakita ni Jehova nga hinigugma gud kita niya. Hiya an pinakamaopay nga Amay. Ginpapamatian niya an aton mga pag-ampo ngan gintatagana an aton panginahanglan, materyal man o espirituwal. Ginbabansay ngan ginbubuligan kita niya. May makaruruyag liwat hiya nga mga bendisyon nga gin-aandam para ha aton. Nababantad an aton kasingkasing ha paghibaro nga an aton Amay nahigugma gud ha aton! An sunod nga artikulo maghihisgot hin mga paagi nga maipapakita naton nga mapasalamaton kita han iya gugma sugad nga iya mga anak.