1-2. Kay ano ngan paonan-o ginhimo ni Jehova nga posible para ha aton nga magin bahin han iya pamilya?

GIN-IIMBITAR kita ni Jehova nga magin bahin han iya pamilya han mga magsiringba. Makaruruyag gud ito nga imbitasyon! Ini nga pamilya ginkukompwesto hadton mga nagdedikar han ira kalugaringon ha Dios ngan hadton may pagtoo ha halad-lukat han iya Anak. Malipayon kita nga pamilya. Nagpapahimulos kita hin may katuyoan nga kinabuhi yana ngan nalilipay kita han paglaom nga mabuhi ha waray kataposan​—ha langit man o ha Paraiso ha tuna.

² Tungod han gugma ngan pinaagi han daku nga sakripisyo, ginhimo ni Jehova nga posible para ha aton nga magin bahin han iya pamilya. (Juan 3:16) ‘Ginpalit kita ha daku nga kantidad.’ (1 Cor. 6:20) Pinaagi han lukat, ginhimo ni Jehova nga posible para ha aton nga magkaada duok nga relasyon ha iya. May pribilehiyo kita nga tawagon nga Amay an pinakaharangdon nga Persona ha uniberso. Ngan sugad han ginhisgotan han naglabay nga artikulo, hi Jehova an pinakamaopay nga Amay.

3. Ano an bangin maipakiana naton? (Kitaa liwat an kahon nga “ Napapansin Daw La Ako ni Jehova?”)

³ Pariho han usa nga parasurat han Biblia, bangin kita makagpakiana: “Ano an akon maibabalos kan Jehova tungod han ngatanan nga maopay nga iya ginbuhat para ha akon?” (Sal. 116:12) An baton, diri gud kita makakabalos ha aton langitnon nga Amay. Bisan pa hito, napapagios kita nga higugmaon hiya. Hi apostol Juan nagsurat: “Nahigugma kita kay una hiya nga naghigugma ha aton.” (1 Juan 4:19) Ha ano nga mga paagi naton maipapakita ha aton langitnon nga Amay nga hinigugma naton hiya?

4. Sumala ha Santiago 4:8, kay ano nga kinahanglan kita mangalimbasog nga magin duok kan Jehova?

⁴ Karuyag ni Jehova nga magin duok kita ha iya ngan makigkomunikar ha iya. (Basaha an Santiago 4:8.) Gin-aaghat kita niya nga “magpadayon ha pag-ampo,” ngan pirme hiya mamamati ha aton. (Roma 12:12) Diri gud hiya magigin sobra ka-busy o sobra kakapoy nga diri na hiya mamamati ha aton. Ha luyo nga bahin, namamati kita ha iya pinaagi ha pagbasa han iya Pulong, an Biblia, upod na an iba nga mga publikasyon nga nabulig ha aton nga masabtan ito. Namamati liwat kita ha iya pinaagi ha pagin atentibo ha Kristiano nga mga katirok. Sugad la nga an maopay nga komunikasyon nabulig nga magpabilin nga duok an mga anak ha ira mga kag-anak, an regular nga komunikasyon kan Jehova nabulig nga magpabilin nga duok kita ha iya.

5. Paonan-o naton mapapauswag an kalidad han aton mga pag-ampo?

⁵ Hunahunaa an kalidad han imo mga pag-ampo ha Dios. Karuyag ni Jehova nga isumat naton ha iya an aton mga ginhuhunahuna ngan inaabat. (Sal. 62:8) Angay naton pakianhan an aton kalugaringon: ‘An akon ba mga pag-ampo pariho hin dinali-dali la ngan inimprinta utro nga mga mensahe, o sugad ito hin kinasingkasing nga kinamot nga mga surat?’ Waray ruhaduha nga hinigugma mo gud hi Jehova, ngan karuyag mo nga tipigan nga marig-on an imo relasyon ha iya. Basi mabuhat ito, kinahanglan regular ka nga makigkomunikar ha iya. Isumat ha iya an imo mga inaabat​—an imo mga kalipay ngan kasakit. Sarig nga makakaaro ka ha iya hin bulig.

6. Ano an kinahanglan naton buhaton basi magpabilin kita nga duok ha aton langitnon nga Amay?

⁶ Basi magpabilin nga duok ha aton langitnon nga Amay, kinahanglan magin mapasalamaton kita pirme ha iya. Nauyon kita ha salmista nga nagsurat: “Damu gud nga butang an imo ginbuhat, O Jehova nga akon Dios, an imo urusahon nga mga buhat ngan an imo mga panhunahuna ha amon. Waray gud maipapariho ha imo; kon sasarihan ko nga isumat ngan ig-istorya ito, duro ito kadamu para isaysay!” (Sal. 40:5) Diri la naton inaabat nga mapasalamaton kita, iginpapahayag liwat naton an aton pagpasalamat kan Jehova pinaagi ha aton pulong ngan buhat. Nagpapakita ini nga naiiba kita ha damu nga tawo yana. Nagkikinabuhi kita ha kalibotan diin an mga tawo diri nag-aapresyar han ngatanan nga ginhihimo han Dios para ha ira. Ngani, usa nga tigaman nga nagkikinabuhi na kita ha “kataposan nga mga adlaw” amo nga an mga tawo diri mapasalamaton. (2 Tim. 3:1, 2) Hinaot diri kita magin sugad hito!

7. Ano an karuyag ni Jehova nga buhaton naton, ngan kay ano?

⁷ Diri karuyag han mga kag-anak nga mag-araway an ira mga anak kondi karuyag nira nga magsarangkay hira. Sugad man, karuyag ni Jehova nga an tanan niya nga anak may maopay nga relasyon ha kada tagsa. Ha pagkamatuod, an gugma naton ha usa kag usa nagpapakilala ha aton sugad nga tinuod nga mga Kristiano. (Juan 13:35) Nauyon kita ha salmista nga nagsurat: “Maopay gud ngan makalilipay hinduro nga an magburugto tarampo nga naukoy nga may pagkaurosa!” (Sal. 133:1) Kon hinigugma naton an aton kabugtoan, ginpapamatud-an naton kan Jehova nga hinigugma naton hiya. (1 Juan 4:20) Maopay gud magin bahin han usa nga pamilya nga an mga membro ‘buotan ha usa kag usa, malumo nga napaid’!​—Efe. 4:32.

8. Sumala ha 1 Juan 5:3, ano an nangunguna nga rason kon kay ano nga nasugot kita kan Jehova?

⁸ Naglalaom hi Jehova nga an mga anak masugot ha ira mga kag-anak, ngan naglalaom hiya nga masugot kita ha iya. (Efe. 6:1) Angayan gud  nga sugton naton hiya kay hiya an aton Maglalarang, an Parasustinir han aton kinabuhi, ngan an pinakamaaramon ha ngatanan nga mga kag-anak. Pero an aton gugma kan Jehova an nangunguna nga rason kon kay ano nga nasugot kita ha iya. (Basaha an 1 Juan 5:3.) Bisan kon damu an rason kon kay ano nga angay naton sugton hi Jehova, diri niya kita ginpipirit nga sugton hiya. Gintagan kita ni Jehova han regalo nga kagawasan ha pagbuot, salit nalilipay hiya kon ginpipili naton nga sugton hiya tungod han aton gugma ha iya.

9-10. Kay ano nga importante nga hibaroan naton an mga suruklan han Dios ngan sundon ito?

⁹ Karuyag han mga kag-anak nga talwas an ira mga anak. Salit naghihimo hira hin mga patakaran, nga magpuprotektar ha ira mga anak. Kon ginsusunod han mga anak ito nga mga patakaran, iginpapakita nira nga natapod ngan narespeto hira ha ira mga kag-anak. Salit labi nga mas importante nga hibaroan naton an mga suruklan han aton langitnon nga Amay ngan sundon ito. Kon ginbubuhat naton ito, iginpapakita naton kan Jehova nga hinigugma ngan ginrirespeto naton hiya ngan nagpapahimulos liwat kita hito. (Isa. 48:17, 18) Pero adton mga nagsasalikway kan Jehova ngan ha iya mga suruklan naghihikaraot.​—Gal. 6:7, 8.

¹⁰ Kon nagkikinabuhi kita ha paagi nga nakakalipay kan Jehova, napuprotektaran kita tikang ha pisikal, emosyonal, ngan espirituwal nga kadaot. Maaram hi Jehova kon ano an makakaopay ha aton. Hi Aurora nga taga-Estados Unidos nagsiring, “Maaram ako nga an pagsugot kan Jehova nagriresulta pirme ha pinakamaopay nga pagkinabuhi.”  Tinuod gud ito. Paonan-o ka nagpapahimulos ha pagsugot ha mahigugmaon nga giya ni Jehova?

11. Paonan-o nabulig ha aton an pag-ampo?

¹¹ An pag-ampo nabulig ha aton nga magin masinugtanon, bisan pa ha panahon nga makuri ito buhaton. Usahay, makuri an pagsugot kan Jehova, pero kinahanglan naton pirme atohan an aton tendensya nga makasala. An salmista nanginyupo ha Dios: “Pagiosa ako nga kinaburut-on nga sumugot ha imo.” (Sal. 51:12) Hi Denise nga usa nga regular payunir nagsiring, “Kon nakukurian ako pagsugot ha usa nga sugo ni Jehova, nag-aampo ako para hin kusog nga mabuhat an tama.” Makakasiguro kita nga pirme babatunon ni Jehova an sugad nga pag-ampo.​—Luc. 11:9-13.

12. Sumala ha Efeso 5:1, ano an angay naton buhaton?

¹² Basaha an Efeso 5:1. Sugad nga “hinigugma nga mga anak” ni Jehova, ginbubuhat naton an aton pinakamaopay basi subaron hiya. Ginsusubad naton an iya mga kalidad pinaagi ha pagin mahigugmaon, buotan, ngan mapinasayloon ha aton pakig-upod ha iba. Kon nakikita hadton mga diri nakilala ha Dios an aton maopay nga panggawi, posible hira mapagios nga mas mahibaro pa mahitungod ha iya. (1 Ped. 2:12) Kinahanglan trataron han Kristiano nga mga kag-anak an ira mga anak sugad han paagi han pagtratar ni Jehova ha aton. Kon ginbubuhat nira ito, mahimo maruyag liwat an ira mga anak nga magin sangkay an aton mahigugmaon nga Amay.

13. Ano an kinahanglan naton buhaton basi magin maisugon?

 ¹³ Kaurogan na nga an kabataan proud ha ira mga tatay ngan nalilipay hira pag-istorya mahitungod ha ira. Sugad man, proud kita ha aton langitnon nga Amay, hi Jehova, ngan karuyag naton nga makilala hiya han iba. Inaabat naton an pariho han inabat ni Hadi David nga nagsurat: “Ighahambog ko hi Jehova.” (Sal. 34:2) Pero, ano man kon awdanon kita? Paonan-o kita magigin maisugon? Nagigin maisugon kita kon ginhuhunahuna naton nga mapapalipay gud naton hi Jehova kon mag-iistorya kita parte ha iya ngan magpapahimulos gud an iba ha paghibaro mahitungod ha iya. Ighahatag ni Jehova an kaisog nga aton kinahanglan. Ginbuligan niya nga magin maisugon an aton kabugtoan ha siyahan nga siglo, ngan bubuligan liwat kita niya.​—1 Tes. 2:2.

14. Ano an pipira nga rason kon kay ano nga importante an pakigbahin ha panhimo hin disipulo nga buruhaton?

¹⁴ Hi Jehova diri nagpapaurog, ngan nalilipay hiya kon nakikita niya nga nagpapakita kita hin gugma ha iba, anoman an ira kahimtang o gintikangan. (Buh. 10:34, 35) Usa han pinakamaopay nga paagi nga maipapakita naton an gugma ha iba amo an pagsangyaw ha ira han maopay nga sumat. (Mat. 28:19, 20) Ano an mahihimo hini nga buruhaton? Adton mga namamati ha aton mahimo mapauswag an ira kinabuhi yana ngan magkaada han paglaom nga mabuhi ha waray kataposan ha Paraiso.​—1 Tim. 4:16.

15-16. Ano an aton mga rason nga magin malipayon?

¹⁵ Hi Jehova mahigugmaon nga kag-anak, salit karuyag niya nga magin malipayon an iya pamilya. (Isa. 65:14) Damu an rason kon kay ano nga mahimo kita magin malipayon yana, bisan kon bangin may mga kasakitan kita. Pananglitan, sigurado kita nga hinigugma gud kita han aton langitnon nga Amay. May husto kita nga kahibaro ha Pulong han Dios, an Biblia. (Jer. 15:16) Ngan bahin kita han usa nga espesyal nga pamilya nga an mga membro nahigugma kan Jehova, nahigugma ha iya hitaas nga mga suruklan ha moral, ngan nahigugma ha usa kag usa.​—Sal. 106:4, 5.

¹⁶ Mahimo kita magin malipayon pirme kay may sigurado kita nga paglaom nga magigin mas maopay an kinabuhi ha tiarabot nga panahon. Maaram kita nga hirani na wad-on ni Jehova an tanan nga karaotan ngan gagamiton niya an iya Ginhadian basi himoon nga Paraiso an bug-os nga tuna. May-ada liwat kita maopay gud nga paglaom nga an mga namatay babanhawon ngan makakaupod utro han ira mga hinigugma. (Juan 5:28, 29) Magigin makalilipay gud ito! Ngan an mas importante, sigurado kita nga ha diri na maiha an tanan ha langit ngan ha tuna maghahatag ha aton mahigugmaon nga Amay han pasidungog, pagdayaw, ngan pagsingba nga angayan ha iya.