Natawo ako ha Quebec City, ha probinsya han Quebec ha Canada nga French an yinaknan. Ginpadaku ako han akon mga kag-anak nga hira Louis ngan Zélia ha mahigugmaon nga paagi. Awdanon an akon tatay ngan mahilig magbasa. Nag-i-enjoy ako ha pagsurat ngan karuyag ko magin journalist.

Han 12 anyos ako, hi Rodolphe Soucy, nga usa han mga katrabaho ni Tatay, bumisita ha amon balay upod an iya sangkay. Mga Saksi ni Jehova hira. Diri ako pamilyar ha mga Saksi ngan diri gud ako interesado ha ira relihiyon. Pero, naimpres ako han ira buotan ngan lohikal nga paagi ha pagbaton han mga pakiana gamit an Biblia. Naimpres liwat an akon mga kag-anak, salit nagpa-Bible study kami.

Hito nga panahon, naeskwela ako ha usa nga Catholic school. Usahay, gin-iistorya ko ha akon mga klasmeyt an akon nahibabaroan ha akon pag-Bible study. Ha urhi, nahibaroan ini han amon mga maestro, nga mga padi. Imbes nga gamiton an Kasuratan basi ipakita nga sayop an akon ginsiring, gin-akusaran lugod ako nga rebelde han usa ha ira ha atubangan han bug-os nga klase! Bisan kon nakakaistres ito, nagkaada ito mag-opay nga resulta kay nakabulig ito ha akon nga makita nga an mga gintututdo han eskwelahan parte ha relihiyon diri nauyon ha ginsisiring han Biblia. Nasantop ko nga kinahanglan ko bumaya hito nga eskwelahan. Ha pagtugot han akon mga kag-anak, nagbalhin ako ha iba nga eskwelahan.

Nagpadayon ako ha pag-aram han Biblia, pero mahinay an akon pag-uswag kay nahadlok ako ha pagsangyaw ha balay-balay. An Katoliko nga Singbahan maimpluwensya gud ngan nakontra gud ha amon pagsangyaw nga buruhaton. Hi Maurice Duplessis nga usa nga politikal nga lider han Quebec,  duok nga kaalyado ha politika han singbahan. Tungod han iya suporta, may mga grupo hin mga tawo nga nagsasamok ngan naatake pa ngani ha mga Saksi. Kinahanglan gud an kaisog basi makasangyaw hadto.

An brother nga nakabulig ha akon nga malamposan an akon kahadlok amo hi John Rae, nga usa nga naggradwar ha ikasiyam nga klase han Gilead. Hi John, nga eksperyensyado gud, usa nga tawo nga malumo, mapainubsanon, ngan masayon madaop. Talagsa la ako niya sagdonan, pero damu an akon nahibaroan ha iya maopay nga ehemplo. Nakukurian hi John ha pagyakan hin French, salit kasagaran nga gin-uupdan ko hiya ha ministeryo ngan ginbubuligan hiya nga mahibaro han linggwahe. An pakig-upod kan John nakabulig gud ha akon nga magdesisyon nga magin usa han mga Saksi ni Jehova. Paglabay hin napulo ka tuig tikang han siyahan nga nakaistorya ko an mga Saksi, nabawtismohan ako han Mayo 26, 1951.

An amon gutiay nga kongregasyon ha Quebec City ginkukompwesto hin haros mga payunir. An ira maopay nga impluwensya nakaaghat ha akon nga magpayunir. Hadto, nagsasangyaw kami ha balay-balay nga Biblia la an gamit. Tungod kay waray literatura, kinahanglan kami magin mas epektibo ha paggamit han Kasuratan. Salit, naningkamot ako nga kabisaduhon an mga teksto ha Biblia basi madepensahan ko an kamatuoran. Pero, damu an nadiri pagbasa hin bisan ano nga bersyon han Biblia nga diri aprobado han Katoliko nga Singbahan.

Han 1952, ginpakasalan ko hi Simone Patry nga usa nga matinumanon nga sister nga akon kakongregasyon. Nagbalhin kami ha Montreal, ngan ha sulod hin usa ka tuig, nagkaanak kami hin babaye, hi Lise. Bisan kon nag-undang ako pagpayunir antes kami ikasal, nangalimbasog kami ni Simone nga magkinabuhi hin simple basi bug-os kami nga makasuporta ha mga buruhaton ha kongregasyon sugad nga pamilya.

Napulo ka tuig an naglabay antes ko ginhunahuna utro an pagpahaluag han akon ministeryo. Han 1962, samtang natambong ha usa ka bulan nga Kingdom Ministry School para ha mga tigurang ha Bethel ha Canada, nakaupod ko ha kwarto an usa nga brother nga hi Camille Ouellette. Naimpres gud ako ha kadasig ni Camille ha ministeryo​—labi na nga pamilyado hiya. Hadto, gutiay la nga pamilyado nga kabugtoan ha Quebec an nagpapayunir; pero ito an karuyag buhaton ni Camille. Han nagkaupod kami, gindasig niya ako nga hunahunaon an akon sitwasyon. Katapos la hin pipira ka bulan, nasantop ko nga puydi ako magregular payunir utro. Ginkwestyon han iba an akon desisyon, pero  nagpayunir la gihapon ako kay nasarig ako nga bibendisyonan ni Jehova an akon pangalimbasog nga mas damu an mahimo ha ministeryo.

Han 1964, gintoka kami ni Simone sugad nga mga espesyal payunir ha Quebec City, an amon natawhan nga lugar, diin nag-alagad kami hin pipira ka tuig. Hito nga panahon, medyo nag-opay na an sitwasyon, pero umatubang la gihapon kami hin pagkontra.

Makausa, han Sabado nga kulop, gin-aresto ako ha Sainte-Marie, usa nga gutiay nga bungto nga diri hirayo ha Quebec City. Gindara ako ha presinto hin usa nga pulis ngan ginpriso ako kay nagsasangyaw ako ha balay-balay nga waray permit. Katapos, gindara ako ha usa nga huwes nga hi Baillargeon, usa nga makaharadlok nga tawo. Ginpakianhan niya ako kon hin-o an akon abogado. Han ginsiring ko nga hi Glen How * nga usa nga kilala nga Saksi nga abogado, ginkukulba hiya nga nagsiring: “Ha! Hiya?” Hi Glen How kilala nga maopay gud nga abogado nga binulig ha pagdepensa ha mga Saksi hadto. Waray pag-iha, ginpahibaro ako han korte nga abswelto na ako ha ira gin-akusar ha akon.

Tungod han pagkontra ha aton buruhaton ha Quebec nagin makuri liwat an pagplete hin angayan nga lugar para ha katirok. An amon gutiay nga kongregasyon nakabiling la hin daan nga garahe nga waray heater. Basi magkaada paso ha kathagkot, an kabugtoan naggamit hin oil heater. Kasagaran nga nagkakatirok kami ha palibot hito hin pipira ka oras antes an katirok basi mag-istorya hin makapadasig nga mga eksperyensya.

Makalilipay gud makita kon paonan-o nag-uswag an pagsangyaw nga buruhaton ha sulod hin damu ka tuig. Han dekada han 1960, may pipira la nga gudtiay nga kongregasyon ha Quebec City, ha rehiyon han Côte-Nord, ngan ha Gaspé Peninsula. Yana, may-ada na sobra duha nga sirkito hini nga mga lugar, ngan an kabugtoan nagkakatirok ha mag-opay nga Kingdom Hall.

Gin-imbitar kami ni Simone nga mag-alagad ha sirkito nga buruhaton han 1970. Katapos, han 1973, igintoka kami ha distrito nga buruhaton. Hito nga mga tuig, damu gud an akon nahibaroan ha kwalipikado nga kabugtoan, sugad kanda Laurier Saumur * ngan David Splane, * nga pariho nag-alagad ha pagbiyahe nga buruhaton. Katapos han kada asembleya, kami nga duha ni David naghahatagay hin mga suhestyon kon paonan-o mapapauswag an amon pagtutdo. Nahinunumdoman ko nga makausa ginsidngan ako ni David: “Léonce, naruyagan ko an imo ultimo nga pahayag. Maopay ito, pero makakahimo ako hin tulo nga pahayag tikang hito nga materyal!” May tendensya ako nga pun-on hin damu nga impormasyon an akon mga pahayag. Kinahanglan ko mahibaro ha pagpahalipot han akon mga pahayag.

Igintoka an mga paramangno han distrito basi magdasig ha mga paramangno han sirkito. Pero,  damu nga magwarali ha Quebec an nakilala gud ha akon. Kasagaran na nga karuyag nira ako makaupod ha pagsangyaw kon nabisita ako ha mga sirkito. Bisan kon makalilipay magsangyaw kaupod nira, diri ako naghahatag hin daku nga panahon nga makaupod an paramangno han sirkito. Makausa, ginpahinumdoman ako hin usa nga mahigugmaon nga paramangno han sirkito: “Maopay nga naghahatag ka hin panahon ha kabugtoan, pero ayaw kalimti nga kinanhi ka basi bisitahon ako yana nga semana. Kinahanglan ko liwat hin pagdasig!” Inin buotan nga sagdon nakabulig ha akon nga magin mas balanse.

Han 1976, may nahitabo nga diri ginlalaoman ngan makasurubo gud. Hi Simone nga akon hinigugma nga asawa, nagkasakit hin grabe ngan kinaturog ha kamatayon. Tungod han iya pagin andam ha pagsakripisyo ngan gugma para kan Jehova, nagin maopay gud hiya nga kaupod. An pagin busy ha ministeryo nakabulig gud ha akon nga mailob an akon kasubo, ngan nagpapasalamat ako kan Jehova han iya mahigugmaon nga bulig hiton makuri nga panahon. Paglabay han panahon, ginpakaslan ko hi Carolyn Elliott, usa nga madasigon nga payunir nga nagyayakan hin Ingles nga kumadto ha Quebec basi mag-alagad ha lugar nga daku an panginahanglan. Hi Carolyn masayon madaop ngan interesado gud ha iba, labi na ha mga awdanon o masurub-on. Daku gud hiya nga bendisyon han nakaupod ko na hiya ha pagbiyahe nga buruhaton.

Han Enero 1978, igintoka ako ha pagtutdo ha siyahan nga Pioneer Service School ha Quebec. Ginkulba gud ako kay bag-o para ha akon an kurikulum sugad la nga bag-o liwat ito ha mga estudyante. Maopay na la, damu an eksperyensyado nga mga payunir ha una nga klase nga akon gintutdoan. Bisan kon ako an instruktor, damu an akon nahibaroan ha mga estudyante!

Waray pag-iha, han 1978, an “Victorious Faith” International Convention ginhimo ha Olympic Stadium han Montreal. Ito an pinakadaku nga kombensyon ha Quebec hadto, nga may sobra 80,000 nga tinambong. Gintoka ako nga magtrabaho ha News Service Department han kombensyon. Nakiistorya  ako ha damu nga mga reporter ngan nalipay gud ako nga makita an damu nga mag-opay nga report mahitungod ha aton. Gin-interbyu nira kami ha telebisyon ngan ha radyo hin sobra 20 ka oras kon susumahon, ngan nagpublikar hira hin ginatos nga mga artikulo. Nakahatag gud adto hin daku nga pamatuod!

May daku nga pagbag-o ha akon toka han 1996. Katapos mag-alagad ha Quebec diin French an linggwahe tikang han nabawtismohan ako, igintoka ako nga mag-alagad ha usa nga distrito ha Toronto nga Ingles an linggwahe. Inabat ko nga diri ako kwalipikado ngan nahadlok ako maghatag hin pahayag tungod kay diri ako maopay mag-Ingles. Kinahanglan ko mag-ampo pirme ngan sumarig hin bug-os kan Jehova.

Ginkukulba gud ako han nagtikang ako mag-alagad hito nga distrito, pero yana masisiring ko nga nalipay gud ako han duha ka tuig nga pag-alagad ha Toronto. Mapailubon nga ginbuligan ako ni Carolyn nga magkaada kompyansa ha pagyakan hin Ingles, ngan mabinuligon gud ngan makapadasig an kabugtoan. Nagkaada dayon kami bag-o nga kasangkayan.

Labot la han dugang nga mga buruhaton ngan pangandam para ha asembleya ha weekend, kasagaran nga mga usa ka oras ako nga nagsasangyaw ha balay-balay ha Biernes nga gab-i. An iba posible nga naghunahuna, ‘Kay ano nga magsangyaw pa man antes gud han asembleya ha weekend diin damu an buruhaton?’ Pero, nakita ko nga makarepresko an mag-opay nga pakiistorya ha ministeryo. Bisan yana, an pakigbahin ha ministeryo nakakapalipay gud ha akon.

Han 1998, igintoka kami ni Carolyn sugad nga mga espesyal payunir ha Montreal. Ha sulod hin pipira ka tuig, an akon toka nag-uupod ha pag-organisar hin espesyal nga pagsangyaw ha publiko ngan pakigkomunikar ha news media basi maitadong an sayop nga panhunahuna han mga tawo mahitungod ha mga Saksi ni Jehova. Yana, nalilipay kami ni Carolyn ha pagsangyaw ha mga dayo nga bag-o la nga binalhin ha Canada ngan kasagaran nga naruruyag gud mahibaro hin dugang pa mahitungod ha Biblia.

Kon ginpapamalandong ko an akon 68 ka tuig sugad nga bawtismado nga surugoon ni Jehova, inaabat ko nga ginbendisyonan gud ako. Nalipay gud ako kay nahibaroan ko nga maruyagan an ministeryo ngan nabuligan ko an damu nga tawo nga mahibaro han kamatuoran. Katapos mapadaku han akon anak nga hi Lise ngan han iya bana an ira mga anak, nagtikang hira pagregular payunir. Nalilipay gud ako kon nakikita ko hiya nga madasigon la gihap ha ministeryo. Nagpapasalamat gud ako ha akon mga igkasi-Kristiano nga an mag-opay nga ehemplo ngan maaramon nga sagdon nakabulig ha akon nga mag-uswag ha espirituwal ngan maataman an iba-iba nga teokratiko nga toka. Nakita ko nga makakapabilin la kita nga matinumanon ha usa nga toka kon masarig kita ha gamhanan nga baraan nga espiritu ni Jehova. (Sal. 51:11) Padayon ako nga nagpapasalamat kan Jehova kay gintagan niya ako han presyoso nga pribilehiyo nga dayawon an iya ngaran!​—Sal. 54:6.