1. Ano an usa han pinakamakaruruyag nga bahin han personalidad ni Jesus? Isaysay.

USA han pinakamakaruruyag nga bahin han personalidad ni Jesus amo an iya abilidad nga masabtan an mga problema nga aton gin-aatubang sugad nga diri perpekto nga mga tawo. Han nakanhi hiya ha tuna, ‘nalipay [hiya] upod han mga nalilipay’ ngan ‘nagtangis upod han mga nagtatangis.’ (Roma 12:15) Pananglitan, han an iya 70 nga disipulo binalik nga malipayon katapos han ira malampuson nga pagsangyaw, hi Jesus “nalipay gud . . . ha baraan nga espiritu.” (Luc. 10:17-21) Ha luyo nga bahin, han nakita ni Jesus nga nasusubo an mga nahigugma ha namatay nga hi Lasaro, “nabantad gud an iya kasingkasing ngan nasubo gud.”​—Juan 11:33.

2. Ano an nagpagios kan Jesus nga magpakita hin pagpaid ha mga tawo?

² Ano an nagpagios hini nga perpekto nga tawo nga magin maloloy-on ngan mapinairon ha iya pagtratar ha makasasala nga mga tawo? An siyahan gud nga nagpagios kan Jesus amo an iya gugma ha mga tawo. Sugad han gin-unabi ha nahiuna nga artikulo, ‘an iya kalipay aada ha mga anak han mga tawo.’ (Prob. 8:31) An iya gugma ha mga tawo nagpagios ha iya nga hibaroan hin maopay an paagi han ira paghunahuna. Hi apostol Juan nagsaysay: “Hiya mismo maaram han aada ha kasingkasing han tawo.” (Juan 2:25) May pagpaid gud hi Jesus ha iba. Inabat han mga tawo an iya gugma ha ira ngan namati hira ha mensahe han Ginhadian. Samtang ginkukultibar naton an pariho nga pagpaid ha mga tawo, nagigin mas epektibo kita ha pagtuman han aton ministeryo.​—2 Tim. 4:5.

3-4. (a) Kon may pagpaid kita, ano an aton magigin panhunahuna ha aton ministeryo? (b) Ano an aton hihisgotan hini nga artikulo?

³ Hi apostol Pablo maaram nga obligado hiya ha pagsangyaw, ngan sugad man kita. (1 Cor. 9:16) Pero kon may pagpaid kita, huhunahunaon naton nga an aton ministeryo diri kay obligasyon la. Karuyag naton ipakita nga napaid kita ha mga tawo ngan andam kita ha pagbulig ha ira. Maaram kita nga “mas makalilipay an paghatag  kay ha pagkarawat.” (Buh. 20:35) Kon sugad hito an aton panhunahuna ha aton ministeryo, magigin mas malipayon kita ha pagbuhat hito.

⁴ Hini nga artikulo, aton hihisgotan kon paonan-o kita magpapakita hin pagpaid ha aton pagministeryo. Siyahan, aton uusisahon kon ano an aton mahibabaroan mahitungod ha pagtagad ni Jesus ha mga tawo. Katapos, aton hihisgotan an upat nga paagi kon paonan-o naton masusubad an iya ehemplo.​—1 Ped. 2:21.

5-6. (a) Kan kanay nagpakita hi Jesus hin pagpaid? (b) Kay ano nga nalooy hi Jesus ha mga tawo nga iya ginsangyawan, sugad han igintagna ha Isaias 61:1, 2?

⁵ Tagda an usa nga ehemplo kon paonan-o nagpakita hi Jesus hin pagpaid. Makausa, hi Jesus ngan an iya mga disipulo nakapoy hinduro tungod ha pagsinangyaw han maopay nga sumat. Waray na hira “panahon bisan ha pagkaon.” Salit igin-upod ni Jesus an iya mga disipulo ngadto ha “mamingaw nga lugar” basi ‘mamahuway didto.’ Kondi, damu nga tawo an nandadlagan ngan nahiuna ngadto ha lugar nga kakadtoan ni Jesus ngan han iya mga disipulo. Pag-abot ni Jesus didto ngan pakakita niya han mga tawo, ano an iya reaksyon? “Nalooy * hiya, kay sugad hira hin mga karnero nga waray paraataman. Salit damu an iya igintutdo ha ira.”​—Mar. 6:30-34.

⁶ Tigamni kon kay ano nga nalooy, o pinaid, hi Jesus ha mga tawo. Nakita niya nga “sugad hira hin mga karnero nga waray paraataman.” Posible nga maaram hi Jesus nga an pipira ha ira mga pobre ngan nagpipinaniguro pagtrabaho basi makagtagana ha ira pamilya. Bangin an iba nasusubo tungod han kamatyi hin hinigugma. Kon amo, posible gud nga nasasabtan ni Jesus an ira sitwasyon. Sugad han ginhisgotan na ha nahiuna nga artikulo, posible nga naeksperyensyahan mismo ni Jesus an iba hito nga mga problema. Pinaid hi Jesus ha iba, ngan napagios hiya nga sumatan hira hin nakakaliaw nga mensahe.​—Basaha an Isaias 61:1, 2.

7. Paonan-o naton masusubad an ehemplo ni Jesus?

 ⁷ Ano an aton mahibabaroan ha ehemplo ni Jesus? Pariho kan Jesus, napapalibotan kita hin mga tawo nga ‘sugad hin mga karnero nga waray paraataman.’ Damu an ira mga problema. May-ada kita han ira ginkikinahanglan​—an mensahe han Ginhadian. (Pah. 14:6) Sugad nga pagsubad ha aton Agaron, iginsasangyaw naton an maopay nga sumat tungod kay ‘nalolooy [kita] ha mga kablasanon ngan makinuri-on.’ (Sal. 72:13) Napaid kita ha mga tawo, ngan karuyag naton nga buligan hira.

8. Ano an usa nga paagi nga maipapakita naton an pagpaid ha aton pagministeryo? Iilustrar.

⁸ Ano an mahimo makabulig ha aton nga maipakita an pagpaid ha aton mga ginsasangyawan? Karuyag naton ibutang an aton kalugaringon ha kahimtang han aton mga nakakaistorya ha ministeryo ngan trataron hira pariho han karuyag naton nga magin pagtratar ha aton. * (Mat. 7:12) Aton hisgotan an upat nga paagi nga mahihimo naton ito. Siyahan, hunahunaa an panginahanglan han tagsa nga indibiduwal. Kon nagsasangyaw kita han maopay nga sumat, an aton papel pariho han usa nga doktor. Ginhuhunahuna han maopay nga doktor an panginahanglan han tagsa nga pasyente. Ginpapakianhan niya an pasyente ngan namamati hiya hin maopay samtang iginsusumat han pasyente an iya kahimtang o mga inaabat. Imbes nga maghatag dayon hin reseta, mahimo palabyon anay han doktor an panahon basi maobserbaran niya an mga sintomas han pasyente, ngan katapos mahatag na hiya han husto nga reseta. Sugad man, diri liwat kita sadang gumamit hin parapriho nga paagi ha pakiistorya kon nagsasangyaw. Lugod, nangangalimbasog kita nga masabtan an kahimtang ngan opinyon han tagsa nga tawo.

9. Ano nga panhunahuna an sadang naton likyan? Isaysay.

⁹ Kon may nakakaistorya ka ha ministeryo, likyi an panhunahuna nga maaram ka na han iya kahimtang o han iya gintotoohan ngan kon kay ano nga natoo hiya hito. (Prob. 18:13) Lugod, pagbangon hin mataktika nga mga pakiana basi magkaada ka ideya mahitungod ha iya. (Prob. 20:5) Kon angayan ha iyo kultura, pakianhi hiya mahitungod han iya trabaho, pamilya, eksperyensya, ngan mga opinyon. Kon ginpapakianhan naton hiya, sugad hin gintatagan naton hiya hin higayon nga sumatan kita kon kay ano nga kinahanglan niya an maopay nga sumat. Kon mahibaroan na naton ito, maipapakita naton an aton pagpaid ha iya kahimtang ngan maihahatag naton an ginkikinahanglan nga bulig, sugad han ginbuhat ni Jesus.​—Itanding an 1 Corinto 9:19-23.

10-11. Uyon ha 2 Corinto 4:7, 8, ano an ikaduha nga paagi nga maipapakita naton an pagpaid? Paghatag hin ehemplo.

¹⁰ Ikaduha, hunahunaa kon ano an posible nga ira kahimtang. Ha pipira nga paagi, naiintindihan naton an ira sitwasyon. Kay bisan kita,  tungod kay diri kita perpekto nakakaeksperyensya liwat hin mga problema. (1 Cor. 10:13) Maaram kita nga makuri gud an pagkinabuhi dinhi hinin presente nga sistema. Nakakapailob la kita tungod han bulig ni Jehova. (Basaha an 2 Corinto 4:7, 8.) Pero hunahunaa la kon ano kakuri para hadton waray duok nga relasyon kan Jehova an pagkinabuhi dinhi hini nga kalibotan. Pariho kan Jesus, nalolooy kita ha ira, ngan napapagios kita ha pagsumat ha ira han “magopay nga mga sumat han kaopayan.”​—Isa. 52:7.

¹¹ Tagda an ehemplo han bugto nga hi Sergey. Antes mahibaro han kamatuoran, awdanon gud hi Sergey. Nakukurian gud hiya pakiistorya ha iba. Ha urhi, kinarawat hiya hin pag-aram ha Biblia. “Samtang nag-aaram ako han Biblia, nahibaroan ko nga obligasyon han mga Kristiano nga isumat ha iba an ira gintotoohan,” siring ni Sergey. “Inabat ko nga diri ko gud ito mahihimo.” Pero, ginhunahuna niya adton waray pa makabati han kamatuoran, ngan nasantop niya nga makuri gud an ira kinabuhi tungod kay diri hira nakilala kan Jehova. Hi Sergey nagsiring: “An bag-o nga mga butang nga akon nahibabaroan nakahatag ha akon hin daku nga kalipay ngan kamurayawan. Maaram ako nga kinahanglan liwat hibaroan han iba ini nga mga kamatuoran.” Samtang nakukultibar ni Sergey an pagpaid, nadudugangan liwat an iya kaisog ha pagsangyaw. “Nahipausa gud ako,” siring ni Sergey, “nga an pagsumat ha iba mahitungod han Biblia nakabulig gud ha akon nga mas magkaada kompyansa. Naparig-on liwat hito an akon pagtoo.” *

12-13. Kay ano nga kinahanglan naton magin mapailubon ha aton mga gintututdoan ha ministeryo? Iilustrar.

¹² Ikatulo, magin mapailubon ha imo mga gintututdoan. Hinumdumi nga bangin waray pa gud nira mahunahuna an pipira nga kamatuoran ha Biblia nga pamilyar gud ha aton. Ngan damu an naawil ha ira presente nga gintotoohan. Bangin ginhuhunahuna nira nga an ira mga gintotoohan nabulig ha ira nga magin duok ha ira pamilya, kultura, ngan komunidad. Paonan-o naton hira mabubuligan?

¹³ Tagda ini nga ilustrasyon: Ano an mahitatabo kon an daan ngan dumog na nga tulay  kinahanglan na liwanan? Kasagaran nga naghihimo hin bag-o nga tulay samtang ginagamit pa an daan nga tulay. Kon puydi na agian an bag-o nga tulay, mahimo na gubaon an daan nga tulay. Sugad man, antes naton hangyoon an mga tawo nga bayaan an ira ginpapabilhan nga “daan” nga mga gintotoohan, bangin kinahanglan anay naton buligan hira nga mahibaroan ngan higugmaon an “bag-o” nga mga kamatuoran​—mga katutdoan ha Biblia nga diri hira pamilyar hadto. Kon mahimo na naton ini, magigin andam na hira ha pagbaya han ira daan nga gintotoohan. Bangin magkinahanglan hin panahon nga mabuligan an mga tawo nga himoon an sugad nga mga pagbag-o.​—Roma 12:2.

14-15. Paonan-o naton mabubuligan adton gutiay la o waray hinbabaroan mahitungod han paglaom nga kinabuhi nga waray kataposan ha Paraiso nga tuna? Paghatag hin ehemplo.

¹⁴ Kon mapailubon kita ha mga tawo nga aton nakakaistorya ha ministeryo, diri kita maglalaom nga masasabtan o kakarawaton nira an kamatuoran han Biblia ha siyahan nga higayon nga mabatian nira ito. Lugod, an pagpaid magpapagios ha aton nga buligan hira nga hunahunaon hin maopay an ginsisiring han Biblia ha sulod hin pipira ka panahon. Pananglitan, tagda kon paonan-o kita mahimo mangatadongan ha usa nga tawo mahitungod han paglaom nga kinabuhi nga waray kataposan ha Paraiso nga tuna. Damu an gutiay la o waray hinbabaroan mahitungod hini nga katutdoan. Bangin natoo hira nga an kamatayon amo na gud an kataposan. O bangin naghuhunahuna hira nga an ngatanan nga mag-opay nga tawo mahingangadto ha langit. Paonan-o naton hira mabubuligan?

¹⁵ Usa nga bugto an nag-istorya mahitungod han iya naobserbaran nga epektibo nga paagi han pagsangyaw. Siyahan, ginbabasa niya an Genesis 1:28. Katapos, iya ginpapakianhan an tagbalay kon diin ngan kon ano nga kahimtang an karuyag han Dios nga an mga tawo mabuhi. Kadam-an an nabaton, “Ha tuna, ngan ha maopay nga kahimtang.” Sunod, ginbabasa han bugto an Isaias 55:11 ngan napakiana kon nagbag-o ba an katuyoan han Dios. Kasagaran nga an tagbalay nabaton hin waray. Ha kataposan, ginbabasa han bugto an Salmos 37:10, 11 ngan napakiana kon ano an magigin kahimtang han mga tawo ha tidaraon. Pinaagi ha paggamit han Biblia hini nga paagi, nabuligan niya an damu nga tawo nga masabtan nga karuyag la gihapon han Dios nga an mag-opay nga tawo mag-ukoy ha Paraiso nga tuna ha waray kataposan.

16-17. Uyon ha Proberbios 3:27, ano an pipira nga praktikal nga paagi nga maipapakita naton an pagpaid? Iilustrar.

¹⁶ Ikaupat, pamiling hin praktikal nga paagi nga maipakita an pagtagad ha iba. Pananglitan, binisita ba kita ha panahon nga baga hin diri kombinyente ha tagbalay? Mahimo kita mangaro hin dispensa ngan magsiring nga mabalik na la kita ha iba nga panahon. Ano man kon an tagbalay nagkikinahanglan hin bulig ha gutiay nga buruhaton? O ano man kon may usa nga diri nakakagawas ha balay, tungod ha sakit o kalagas, nga nagkikinahanglan hin bulig ha pag-asikaso hin  pipira nga butang? Ha sugad nga mga sitwasyon, bangin may maibulig kita.​—Basaha an Proberbios 3:27.

¹⁷ Usa nga sister an nakaeksperyensya hin maopay nga resulta han naghimo hiya hin baga hin gutiay la nga buhat han pagkabuotan. Tungod han pagpaid, nagsurat hiya ha usa nga pamilya nga namatyan hin anak. Gin-unabi niya ha surat an pipira nga nakakaliaw nga teksto tikang ha Kasuratan. Ano an reaksyon han pamilya? “Depres gud ako kakulop,” siring ha surat han nasusubo gud nga nanay. “Diri ka la maaram kon ano kadaku an epekto han imo surat ha amon. Daku gud an akon pagpasalamat tungod han imo surat nga nakaliaw gud ha amon. Siguro mga 20 ka beses ko ito ginbasa kakulop. Inabat ko gud dida hito an pagkabuotan, pagpaid, ngan pagliaw. Kinasingkasing kami nga nagpapasalamat ha imo.” Sigurado nga makakaeksperyensya kita hin mag-opay nga resulta kon ibubutang naton an aton kalugaringon ha kahimtang hadton nag-aantos ngan kon maghahatag kita ha ira han ginkikinahanglan nga bulig.

18. Uyon ha 1 Corinto 3:6, 7, ano nga timbang nga panhunahuna an karuyag naton tipigan?

¹⁸ Syempre, karuyag naton tipigan an timbang nga panhunahuna may kalabotan ha aton papel ha ministeryo. May papel kita ha pagbulig ha iba nga makilala an Dios, pero diri an aton papel an pinakaimportante. (Basaha an 1 Corinto 3:6, 7.) Hi Jehova an nagpapahirani ha mga tawo ngada ha iya. (Juan 6:44) Pero madepende ha kahimtang han kasingkasing han tagsa nga indibiduwal kon makarawat ba hiya han maopay nga sumat o diri. (Mat. 13:4-8) Hinumdumi, waray karawata han kadam-an an mensahe ni Jesus bisan ko hiya an pinakabantogan nga Magturutdo nga nabuhi! Salit diri kita sadang manluya kon damu han aton ginbubuligan an diri nakarawat han mensahe.

19. Ano an mag-opay nga resulta kon magpapakita kita hin pagpaid ha aton pagministeryo?

¹⁹ Maieksperyensyahan naton an mag-opay nga resulta kon magpapakita kita hin pagpaid ha aton pagministeryo. Mas malilipay kita ha aton pagsangyaw. Maieksperyensyahan naton an mas daku nga kalipay tungod ha paghatag. Ngan nakakabulig kita nga magin mas masayon para hadton “may husto nga disposisyon basi magkaada kinabuhi nga waray kataposan” nga karawaton an maopay nga sumat. (Buh. 13:48) Salit “samtang may higayon kita, buhaton naton an maopay ha ngatanan.” (Gal. 6:10) Kon hihimoon naton ini, maieksperyensyahan naton an kalipay tungod kay nahihimaya naton an aton langitnon nga Amay.​—Mat. 5:16.