1-2. Ano an iginsumat han anghel ha kababayin-an didto ha lubnganan ni Jesus, ngan ano nga instruksyon an iginhatag ni Jesus ha ira?

KAAGAHON adto han Nisan 16, han 33 C.E. May kababayin-an nga may kahadlok ha Dios an masurub-on nga kinadto ha lubnganan diin iginbutang an lawas han Ginoo nga hi Jesu-Kristo sobra 36 ka oras na an naglabay. Pag-abot nira ha lubnganan basi magbutang hin maghamot nga herba ngan lana ha lawas ni Jesus, nahipausa hira nga waray na sulod an lubnganan! Usa nga anghel an nagsumat ha mga disipulo nga hi Jesus ginbanhaw, ngan nagsiring pa hiya: “Mag-uuna hiya ha iyo ngadto ha Galilea. Makikita niyo hiya didto.”​—Mat. 28:1-7; Luc. 23:56; 24:10.

² Pagbaya han kababayin-an ha lubnganan, hi Jesus mismo dinaop ha ira ngan naghatag hini nga instruksyon: “Lakat, sumati niyo an akon kabugtoan basi makakadto hira ha Galilea, ngan makikita nira ako didto.” (Mat. 28:10) Posible nga may importante gud nga instruksyon hi Jesus para ha iya mga disipulo, kay an siyahan niya nga ginbuhat han nabanhaw hiya amo an pag-organisar hini nga katirok!

3-4. Kay ano nga masisiring naton nga an sugo nga nakarekord ha Mateo 28:19, 20 diri la para ha mga apostol? (Kitaa an retrato ha kobre.)

³ Basaha an Mateo 28:16-20. Ha katirok nga gin-organisar ni Jesus, iya iginsaysay an importante nga buruhaton nga hihimoon han iya mga disipulo ha siyahan nga siglo​—an buruhaton nga aton liwat ginhihimo yana. Hi Jesus nagsiring: “Lakat ngan panhimo kamo hin mga disipulo ha mga tawo han ngatanan nga nasud, . . . tutdui hira ha pagtuman han ngatanan nga akon iginsugo ha iyo.”

⁴ Karuyag ni Jesus nga magsangyaw an ngatanan niya nga sumurunod. Diri la an 11 nga magtinumanon nga apostol an iya ginsugo. Kay ano nga makakasiguro kita hito? Bueno, an mga apostol la ba an presente han iginhatag didto ha bukid ha Galilea an sugo nga  manhimo hin mga disipulo? Hinumdumi nga an anghel nagsiring ha kababayin-an: “Makikita niyo hiya [ha Galilea].” Salit, posible gud nga nakadto liwat hito nga okasyon iton magtinumanon nga kababayin-an. Pero diri la hira. Hi apostol Pablo nagsiring nga “ha usa nga higayon nagpakita [hi Jesus] ha sobra 500 nga kabugtoan.” (1 Cor. 15:6) Diin?

5. Ano an aton mahibabaroan ha 1 Corinto 15:6?

⁵ May maopay kita nga mga rason nga tumoo nga an gintutudlok ni Pablo amo mismo an katirok ha Galilea nga nakarekord ha Mateo kapitulo 28. Ano ito nga mga rason? Siyahan, kadam-an han mga disipulo ni Jesus mga taga-Galilea. Salit usa nga bukid ha Galilea​—imbes nga pribado nga balay ha Jerusalem—​an angayan nga lugar para magkatirok an damu nga tawo. Ikaduha, an ginbanhaw nga hi Jesus nakigkita na ha iya 11 nga apostol ha usa nga pribado nga balay ha Jerusalem. Kon an mga apostol la an karuyag sugoon ni Jesus nga magsangyaw ngan manhimo hin mga disipulo, ginhimo na unta niya ito ha Jerusalem imbes nga hangyoon hira ngan an kababayin-an ngan an iba pa nga makigkita ha iya ha Galilea.​—Luc. 24:33, 36.

6. Paonan-o iginpapakita han Mateo 28:20 nga an sugo nga manhimo hin mga disipulo aplikado yana, ngan paonan-o ginsusunod han mga tawo yana ito nga sugo?

⁶ Tagda an ikatulo nga importante nga rason. An sugo ni Jesus nga manhimo hin mga disipulo diri la para ha mga Kristiano ha siyahan nga siglo. Kay ano nga masisiring naton ito? An instruksyon ni Jesus ha iya mga sumurunod gintapos niya pinaagi hini nga mga pulong: “Kaupod niyo ako ha ngatanan nga adlaw tubtob ha ikatarapos han sistema han mga butang.” (Mat. 28:20) Sugad la han ginsiring ni Jesus, damu yana an nanhihimo hin mga disipulo. Hunahunaa la! Haros 300,000 an nababawtismohan kada tuig sugad nga mga Saksi ni Jehova ngan nagigin mga disipulo ni Jesu-Kristo!

7. Ano an aton hihisgotan yana, ngan kay ano?

⁷ Damu nga nag-aaram han Biblia an nag-uuswag ngan nagpapabawtismo. Pero, an iba nga regular nga nag-aaram han Biblia kaupod naton baga hin nag-aalang nga magin disipulo. Nalilipay hira ha pag-aram, pero diri hira nag-uuswag ngadto ha pagpabawtismo. Kon nagdudumara ka hin pag-aram ha Biblia, sigurado kami nga karuyag mo buligan an imo estudyante nga iaplikar an iya nahibabaroan ngan magin disipulo han Kristo. Hihisgotan hini nga artikulo kon paonan-o naton maaabot an kasingkasing han estudyante ngan kon paonan-o naton hiya mabubuligan nga mag-uswag ha espirituwal. Kay ano nga importante nga hisgotan naton ini nga topiko? Kay maabot an panahon nga bangin kinahanglan naton magdesisyon kon igpapadayon an pag-aram o diri.

8. Kay ano nga makuri usahay abuton an kasingkasing han mga estudyante?

⁸ Karuyag ni Jehova nga an mga tawo mag-alagad ha iya tungod han gugma. Salit an aton tumong amo an pagbulig ha aton mga estudyante nga masabtan nga importante gud hira kan Jehova sugad nga mga indibiduwal ngan hinigugma gud niya hira. Karuyag naton hira buligan nga masabtan nga hi Jehova “tatay han mga waray tatay ngan usa nga parapanalipod han mga balo nga babaye.” (Sal. 68:5) Kon nahibabaroan han imo mga estudyante nga hinigugma gud hira ni Jehova, posible nga mabantad an ira kasingkasing ngan magtubo an ira gugma ha iya. An iba nga mga estudyante bangin makurian ha paghunahuna kan Jehova sugad nga mahigugmaon nga Amay kay an ira mismo tatay waray magpakita ha ira hin gugma ngan pagpalangga. (2 Tim. 3:1, 3) Salit kon nagdudumara ka hin pag-aram, pabug-ati an makaruruyag nga mga kalidad ni Jehova. Buligi an imo mga estudyante nga masabtan nga karuyag han aton mahigugmaon nga Dios nga magkaada hira hin kinabuhi nga waray kataposan, ngan andam hiya pagbulig ha ira nga  makab-ot ito nga tumong. Ano pa an aton mahihimo?

9-10. Ano nga mga publikasyon an angay naton gamiton ha pagdumara hin pag-aram ha Biblia, ngan kay ano nga ito nga mga libro?

⁹ Gamita an mga libro nga “Ano an Igintututdo ha Aton han Biblia?” ngan “Kon Paonan-o Magpapabilin ha Gugma han Dios.” Ito nga mga publikasyon gindisenyo basi buligan kita nga maabot an kasingkasing han aton mga estudyante. Pananglitan, ginbabaton han kapitulo 1 han Igintututdo ha Aton nga libro an mga pakiana: Interesado ba an Dios ha aton kaopayan o waray hiya kalooy?, Ano an inaabat han Dios kon nag-aantos an mga tawo?, Puydi ka ba magin sangkay ni Jehova? Kumusta man an libro nga Magpabilin ha Gugma han Dios? Ito nga publikasyon mabulig ha estudyante nga masabtan kon paonan-o an pag-aplikar han mga prinsipyo ha Biblia makakapaopay han iya kinabuhi ngan makakabulig ha iya nga magin mas duok kan Jehova. Bisan kon nagamit mo na ini nga mga publikasyon ha pagdumara hin pag-aram ha iba, pag-andam hin maopay para ha tagsa nga pag-aram, ngan hunahunaa an espisipiko nga panginahanglan han estudyante.

 ¹⁰ Pero, ano man kon an estudyante interesado ha usa nga topiko nga ginhihisgotan ha usa nga publikasyon nga waray ha aton Toolbox ha Pagpanutdo? Mahimo mo hiya aghaton nga personal nga basahon ito nga publikasyon basi niyo maipadayon an pag-aram ha usa han iginsuhestyon nga garamiton ha pag-aram han Biblia nga gin-unabi pa la.

11. San-o naton angay tikangan ngan tapuson an pag-aram pinaagi hin pag-ampo, ngan paonan-o naton mabubuligan an estudyante nga masabtan nga importante ito?

¹¹ Tikangi an pag-aram pinaagi hin pag-ampo. Maopay gud nga tikangan ngan tapuson an pag-aram pinaagi han pag-ampo ha pinakatemprano tubtob nga posible, nga kaurogan na nga ginhihimo ha siyahan nga mga semana tikang han nagin regular na an pag-aram. Kinahanglan naton buligan an estudyante nga masantop niya nga masasabtan la naton an Pulong han Dios pinaagi ha bulig han espiritu han Dios. Iginsasaysay han pipira nga magturutdo han Biblia kon kay ano nga nag-aampo kita kon nag-aaram pinaagi ha pagbasa han Santiago 1:5, nga nasiring: “Kon may bisan hin-o ha iyo nga kulang hin kinaadman, padayon nga mangaro hiya ha Dios.” Katapos, ginpapakianhan han nagdudumara an estudyante, “Paonan-o kita mangangaro ha Dios hin kinaadman?” Posible nga umuyon an estudyante nga kinahanglan kita mag-ampo ha Dios.

12. Paonan-o mo gagamiton an Salmo 139:2-4 basi buligan an usa nga estudyante nga mapauswag an kalidad han iya mga pag-ampo?

¹² Tutdui an imo estudyante kon paonan-o mag-aampo. Pasariga hiya nga karuyag ni Jehova pamatian an iya kinasingkasing nga mga pag-ampo. Isaysay nga ha aton personal nga mga pag-ampo, puydi naton isumat kan Jehova an aton inaabat pati an mga butang nga bangin nag-aalang kita pagsumat ha bisan hin-o nga tawo. Ngani, maaram na hi Jehova han aton mga inaabat ngan ginhuhunahuna. (Basaha an Salmo 139:2-4.) Mahimo liwat naton aghaton an aton estudyante nga mangaro hin bulig ha Dios basi mabag-o an sayop nga panhunahuna ngan maraot nga binuhatan. Pananglitan, usa nga estudyante ha Biblia nga pipira ka panahon na nga nag-aaram an nalilipay ha usa nga selebrasyon nga pagano an gintikangan. Maaram hiya nga sayop ito, pero nag-i-enjoy la gihapon hiya ha pipira nga bahin hito. Aghata hiya nga espisipiko nga isumat kan Jehova an iya inaabat ngan mangaro hin bulig nga higugmaon kon ano la an ginhihigugma han Dios.​—Sal. 97:10.

13. (a) Kay ano nga kinahanglan naton imbitaron dayon tubtob nga posible an aton mga estudyante ngadto ha mga katirok? (b) Ano an puydi naton himoon basi magin mas komportable ha Kingdom Hall an aton estudyante?

¹³ Imbitara dayon tubtob nga posible an imo estudyante ha Biblia nga tumambong ha mga katirok. An nababatian ngan naoobserbaran han imo estudyante ha Kristiano nga mga katirok mahimo makabantad han iya kasingkasing ngan makabulig ha iya nga mag-uswag. Ipakita an video nga Ano an Ginbubuhat ha Kingdom Hall? ngan imbitara hiya nga umupod ha imo. Kon posible, pagtanyag hin bulig basi hiya makatambong. Maopay kon iba-iba nga magwarali an imo ig-uupod ha iyo pag-aram. Hito nga paagi, makikilala han imo estudyante an iba ha kongregasyon, ngan posible nga magin mas komportable hiya ha iya pagtambong ha aton mga katirok.

14. Ano an makakaaghat ha usa nga estudyante nga mag-uswag ha espirituwal?

¹⁴ Tumong naton nga buligan an aton estudyante ha Biblia nga mag-uswag ha espirituwal. (Efe. 4:13) Kon maruyag an usa nga mag-aram ha Biblia, bangin interesado la hiya han benepisyo nga iya makukuha. Pero samtang nagtutubo an iya gugma kan Jehova, posible nga magtikang hiya paghunahuna kon paonan-o niya mabubuligan an iba, upod na adton membro na han kongregasyon. (Mat. 22:37-39) Kon angayan na, ayaw pag-alang ha pag-unabi ha estudyante  han pribilehiyo nga makasuporta ha pinansyal ha buruhaton han Ginhadian.

15. Paonan-o naton mabubuligan an estudyante ha Biblia nga buhaton an husto kon nabangon an mga problema?

¹⁵ Tutdui an imo estudyante ha Biblia han angay niya buhaton kon nabangon an mga problema. Pananglitan, an imo estudyante, nga diri-bawtismado nga magwarali, nagsumat ha imo nga nasakitan hiya ha ginbuhat ha iya han usa ha kongregasyon. Imbes nga may dapigan, isaysay ha iya an ginsisiring han Biblia nga angay niya buhaton. Puydi niya pasayloon an bugto o, kon diri niya ito mapapalabay, kaistoryahon niya an bugto ha buotan ngan mahigugmaon nga paagi nga an tumong ‘maibalik an bugto.’ (Ikompara an Mateo 18:15.) Buligi an imo estudyante nga mag-andam kon ano an iya isisiring. Ipakita ha iya kon paonan-o gagamiton an JW Library^® nga app, an Giya ha Pagsaliksik Para ha Mga Saksi ni Jehova, ngan an jw.org^® basi mahibaro hin praktikal nga mga paagi ha pag-atubang hito nga sitwasyon. Samtang mas nahibabaro hiya pagsulbad han mga problema antes pa hiya magpabawtismo, posible gud nga magkaada hiya hin maopay nga relasyon ha iba ha kongregasyon kon bawtismado na hiya.

16. Ano nga mga bentaha an imo nakikita ha pag-imbitar hin iba nga magwarali nga umapi ha iyo pag-aram?

¹⁶ Imbitara an iba ha kongregasyon​—ngan an paramangno han sirkito kon nabisita hiya ha kongregasyon—​nga umapi ha iyo pag-aram. Kay ano? Labot pa ha mga rason nga gin-unabi na, an iba nga mga magwarali mahimo makahatag ha imo estudyante hin bulig nga diri mo maihahatag. Pananglitan, an estudyante naniningkamot pag-undang ha pagsigarilyo pero damu na ka beses hiya nga napakyas. Imbitara nga umupod ha iyo pag-aram an usa nga Saksi nga nakabaya han sugad liwat nga bisyo, nga bangin pipira ka beses nga napakyas liwat hadto. An imo igkasi-Saksi mahimo makahatag hin praktikal nga sagdon nga kinahanglan mabatian han imo estudyante. Kon diri ka komportable ha pagdumara hin pag-aram upod an usa nga eksperyensyado nga bugto, hangyoa hiya ha pagdumara hito nga higayon. Ha bisan ano nga kahimtang, pahimulsi an eksperyensya han iba. Hinumdumi nga an aton tumong amo an pagbulig ha estudyante nga mag-uswag ha espirituwal.

17-18. Ano an angay ikonsiderar kon nagdidesisyon kon ig-uundang an pag-aram?

¹⁷ Kon an imo estudyante ha Biblia diri nag-uuswag, may panahon nga kinahanglan mo pakianhan an imo kalugaringon, ‘Angay ko ba iundang an pag-aram?’ Antes ka maghimo hin desisyon, kinahanglan ikonsiderar mo an abilidad han estudyante. May mga tawo nga mas maiha an pag-uswag kay ha iba. Pakianhi an imo kalugaringon: ‘An akon ba estudyante nag-uuswag ha angayan nga kalaksi uyon ha iya kahimtang?’ ‘Nagtitikang na ba hiya “pagtuman,” o pag-aplikar, han iya mga nahibabaroan?’ (Mat. 28:20) Bangin maiha para ha usa nga estudyante nga magin disipulo, pero kinahanglan hinay-hinay hiya nga maghimo hin mga pagbag-o.

¹⁸ Pero ano man kon an estudyante nga nag-aaram hin pipira na ka panahon waray apresasyon  han iya pag-aram? Tagda ini nga senaryo: Natapos na han imo estudyante an pag-aram han Igintututdo ha Aton nga libro ngan bangin nagtikang pa ngani han Magpabilin ha Gugma han Dios nga libro, pero waray pa hiya tumambong bisan makausa ha katirok ha kongregasyon​—bisan ha Memoryal! Ngan kaurogan, ginkakansela niya an pag-aram tungod han diri importante nga mga rason. Kon sugad hito an imo estudyante, maopay nga prangka nga kaistoryahon mo hiya. *

19. Ano an puydi mo isiring ha usa nga baga hin diri nag-aapresyar han iya pag-aram ha Biblia, ngan ano an kinahanglan mo ikonsiderar?

¹⁹ Puydi mo tikangan an pakiistorya pinaagi ha pagpakiana ha iya, ‘Ano daw la an pinakamakuri nga ulang ha imo basi magin usa ka han mga Saksi ni Jehova?’ Bangin bumaton an estudyante, ‘Naruruyag ako pag-aram han Biblia, pero diri gud ako magigin Saksi ni Jehova!’ Kon sugad hito an iya disposisyon katapos mag-aram hin pipira ka panahon, may rason pa ba nga ipadayon an pag-aram? Ha luyo nga bahin, bangin isumat han imo estudyante ha siyahan nga higayon kon ano an nakakaulang ha iya. Pananglitan, nagsiring hiya nga diri gud niya kaya magsangyaw ha balay-balay. Yana nga nahibaroan mo na an iya inaabat, mas masasabtan mo kon paonan-o hiya mabubuligan.

20. Paonan-o an Buhat 13:48 nabulig ha aton ha pagdesisyon kon angay ba ipadayon an pag-aram o diri?

²⁰ Makasurubo, an pipira nga estudyante puropariho han mga Israelita ha panahon ni Ezekiel. Tagda an ginsiring ni Jehova kan Ezekiel mahitungod ha ira: “Kitaa! Para ha ira pariho ka hin romantiko nga kanta, nga ginkakanta han usa nga maopay an tingog ngan may kaabtik nga gintutokar ha instrumento nga may kwerdas. Mababatian nira an imo mga pulong, pero waray bisan usa nga magbubuhat hito.” (Ezek. 33:32) Bangin makuri para ha aton nga sumatan an estudyante nga maundang na kita pagdumara hin pag-aram ha iya. Pero, “halipot na la an nabibilin nga panahon.” (1 Cor. 7:29) Imbes nga padayon nga gamiton an panahon ha pagdumara hin pag-aram ha diri nag-uuswag nga estudyante, kinahanglan mamiling kita hin iba nga nagpapakita nga hiya “may husto nga disposisyon basi magkaada kinabuhi nga waray kataposan.”​—Basaha an Buhat 13:48.

21. Ano an aton tinuig nga teksto para ha 2020, ngan kay ano nga angayan ito?

²¹ Ha 2020, an aton tinuig nga teksto mabulig ha aton nga magpokus ha pagpauswag han kalidad han aton panhimo hin disipulo nga buruhaton. Nag-uupod ito han pipira han mga pulong nga ginsiring ni Jesus ha makasaysayan nga katirok ha usa nga bukid ha Galilea: “Lakat ngan panhimo kamo hin mga disipulo . . . , bawtismuhi hira.”​—Mat. 28:19.