An rekord ha Deuteronomio 22:25-27 diri mahitungod ha pagpamatuod kon salaan ba an lalaki, kay hini nga asoy ginhukman na hiya nga salaan. Lugod, ini nga balaud nakapokus ha pagpamatuod kon inosente ba an babaye o diri. Tagda an konteksto.

An nauna nga mga bersikulo naghihisgot may kalabotan ha usa nga lalaki nga nakighilawas ha karaslon nga babaye “ha syudad.” Tungod han iya ginbuhat, nakasala hiya hin pag-adulteryo, kay an karaslon nga babaye ginhuhunahuna nga inasaw-an na. Kumusta man an babaye? “Waray hiya gumuliat ha syudad.” Kon gumuliat hiya, sigurado nga may makakabati ha iya ngan mabulig ha iya. Pero waray niya ito buhata. Tungod hito, an babaye masisiring nga nag-adulteryo liwat, salit hira nga duha ginhukman nga salaan.​—Deut. 22:23, 24.

Sunod, an Balaud naghisgot hin iba nga sitwasyon: “Pero kon han iginkita han lalaki an karaslon nga babaye didto ha uma ngan ginlugos hiya han lalaki ngan nakighilawas ha iya, an lalaki nga nakighilawas ha iya mamamatay nga hiya la, ngan waray ka hihimoon nga bisan ano ha babaye. An babaye waray ginbuhat nga sala nga angay hin kamatayon. Pariho ini ha kaso han usa nga tawo nga umatake ha iya igkasi-tawo ngan ginpatay hiya. Kay han iya iginkita ha uma an karaslon nga babaye, ginuliat hiya, pero waray bisan usa nga binulig ha iya.”​—Deut. 22:25-27.

Hito nga sitwasyon, an mga hukom tumuod ha babaye. Ha ano nga paagi? Inuyon hira nga “ginuliat hiya, pero waray bisan usa nga binulig ha iya.” Salit waray hiya makasala hin pag-adulteryo. Pero an lalaki salaan hin paglugos ngan pag-adulteryo tungod kay an karaslon nga babaye ‘ginlugos han lalaki ngan nakighilawas ha iya.’

Salit bisan kon ini nga balaud nakapokus ha pagin inosente han babaye, ini nga asoy husto nga nag-uunabi ha lalaki sugad nga salaan hin paglugos ngan pag-adulteryo. Makakasarig kita nga ‘iimbistigaran ito hin maopay’ han mga hukom ngan maghihimo hira hin desisyon nga uyon ha suruklan nga klaro ngan pauroutro nga ginsiring han Dios.​—Deut. 13:14; 17:4; Ex. 20:14.