Diri naton dapat hunahunaon nga an 70 nga disipulo waray na uyuni ni Jesus o ginbayaan nira hiya, tungod la kay diri hira presente han gintikangan niya an Panihapon han Ginoo. Karuyag la ni Jesus nga makaupod hito nga okasyon an iya mga apostol.

Pariho niya gin-uuyonan an 12 ngan an 70. Una nga ginpili ni Jesus tikang ha iya damu nga disipulo an 12 nga kalalakin-an, nga gintawag niya nga mga apostol. (Luc. 6:​12-16) Nakadto hiya ha Galilea han “gintirok niya an Dose” ngan han “ginsugo niya hira nga magsangyaw han Ginhadian han Dios ngan manambal.” (Luc. 9:​1-6) Ha urhi, hi Jesus “nagtoka . . . hin 70 nga iba pa ngan ginsugo hira nga tagduha-duha” pakadto ha Judea. (Luc. 9:51; 10:1) Salit hi Jesus may-ada na mga sumurunod ha iba-iba nga lugar nga nasangyawan han iya mensahe.

An mga Judio nga nagin mga disipulo ni Jesus nagsiselebrar la gihapon han tinuig nga Paskua, posible gud upod han ira pamilya. (Ex. 12:​6-11, 17-20) Samtang nagtitikahirani an kamatayon ni Jesus, kinadto hiya ngan an iya mga apostol ha Jerusalem . Pero waray niya tawaga an ngatanan niya nga disipulo tikang ha Judea, Galilea, ngan Perea basi tarampo nga magselebrar han Paskua. Klaro nga karuyag la ni Jesus nga makaupod an iya mga apostol hito nga okasyon. Ginsidngan niya hira: “Naghingyap gud ako nga kumaon hini nga panihapon ha Paskua upod niyo antes ako mag-antos.”​—Luc. 22:15.

May maopay nga rason hi Jesus para hito. Diri na maiha mamatay hiya sugad nga “an Kordero han Dios nga nagkukuha han sala han kalibotan.” (Juan 1:29) Mahitatabo ito ha Jerusalem, diin maiha na nga ginbubuhat dida hito an mga paghalad ha Dios. An kamatayon ni Jesus maghahatag hin mas daku nga kagawasan kay han naihatag han kordero nga ginkaon han Israelita nga mga pamilya han gab-i nga binaya hira ha Ehipto. (1 Cor. 5:​7, 8) Tungod han ginbuhat ni Jesus, an Dose magigin mga membro han pundasyon han Kristiano nga kongregasyon. (Efe. 2:​20-22) Makapainteres nga an baraan nga syudad nga Jerusalem may “12 nga bato nga pundasyon” nga nakasurat hito an “12 nga ngaran han 12 nga apostol han Kordero.” (Pah. 21:​10-14) Oo, an matinumanon nga mga apostol magkakaada importante nga papel ha pagtuman han katuyoan han Dios. Salit masasabtan naton kon kay ano nga karuyag ni Jesus nga makaupod niya hira hito nga ultimo nga Paskua ngan ha masunod dayon nga pagbubuhaton—an Panihapon han Ginoo.

An 70 ngan an iba pa nga mga disipulo diri kaupod ni Jesus hito nga pangaon. Pero an ngatanan niya nga disipulo nga nagin matinumanon magpapahimulos ha kon ano an gintikangan ni Jesus—an Panihapon han Ginoo. An ngatanan nga nagin dinihogan nga mga Kristiano paglabay han panahon magigin kaapi han kasabotan para ha usa nga ginhadian, nga gin-unabi ni Jesus ha iya mga apostol hito nga gab-i.​—Luc. 22:​29, 30.