Samtang nangangandam ha pag-aram, mahimo naton pakianhan an aton kalugaringon, ‘Ano an akon ginlalaoman nga mahibaroan?’ Pero kinahanglan naton hinumdoman nga bisan kon may ginlalaoman kita nga mahibaroan nga espisipiko nga butang, diri ini nagpapasabot nga waray bag-o nga butang nga karuyag ni Jehova nga mahibaroan ta. Paonan-o naton matitipigan an abrido nga hunahuna kon nag-aaram kita?

Pag-ampo para hin kinaadman. Hangyoa hi Jehova nga buligan ka nga masabtan kon ano an karuyag niya nga hibaroan mo yana. (San. 1:5) Ayaw kakontento ha kon ano na an imo nahibaroan.​—Prob. 3:​5, 6.

Respetoha an kakaiba nga gahum han Biblia. “An pulong han Dios buhi.” (Heb. 4:12) An buhi nga “pulong” han Dios makakaimpluwensya ha aton ha iba-iba nga paagi ha kada pagbabasa naton han Biblia—pero mahitatabo la ito kon andam kita nga karawaton kon ano an aton mahimo mahibaroan o makuha tikang hito samtang nagbabasa kita.

Apresyara an ngatanan nga aada ha lamesa ni Jehova. An iya espirituwal nga pagkaon pariho “hin panagtawo nga may magrasa nga mga putahe.” (Isa. 25:6) Ayaw likyi an “mga putahe” nga ginhuhunahuna mo nga diri mo mai-enjoy. Labot la nga magpapahimulos ka, malilipay ka gud liwat ha kon ano an igintatagana han Dios!