1. Ano an mahimo magin relasyon han matinumanon nga mga tawo kan Jehova?

HA PAMILYA han mga magsiringba ni Jehova, kaapi hi Jesus, nga amo “an suhag han ngatanan nga linarang,” ngan an damu gud nga mga anghel. (Col. 1:15; Sal. 103:20) Han hi Jesus nakanhi ha tuna, ginbuligan niya an matinumanon nga mga tawo nga masabtan nira nga mahimo nira tawagon hi Jehova sugad nga ira Amay. Han nakikiistorya hi Jesus ha iya mga disipulo, gintawag niya hi Jehova nga “akon Amay ngan iyo Amay.” (Juan 20:17) Ngan han nagdedikar kita han aton kalugaringon ngadto kan Jehova ngan nagpabawtismo, nagin bahin kita ha usa nga mahigugmaon nga espirituwal nga pamilya.​—Mar. 10:29, 30.

2. Ano an paghihisgotan naton hini nga artikulo?

² Nakukurian an iba nga hunahunaon hi Jehova sugad nga mahigugmaon nga Amay. An iba naman bangin diri maaram kon paonan-o ipapakita an ira gugma ha ira kabugtoan. Hini nga artikulo, hihisgotan naton kon paonan-o hi Jesus nabulig ha aton nga hunahunaon hi Jehova sugad nga mahigugmaon nga Amay, nga mahimo kita magin duok ha iya. Aton liwat mahibabaroan kon paonan-o naton masusubad hi Jehova ha aton pagtratar ha aton kabugtoan.

3. Paonan-o an modelo nga pag-ampo nabulig ha aton nga magin mas duok kita kan Jehova?

³ Hi Jehova usa nga mahigugmaon nga Amay. Karuyag ni Jesus nga an aton magin panhunahuna kan Jehova magin pariho han iya panhunahuna​—usa nga buotan ngan mahigugmaon nga kag-anak nga masayon madaop, diri usa nga persona nga waray konsiderasyon ngan diktador. Makikita ito ha pag-ampo nga igintutdo ni Jesus ha iya mga disipulo. Gintikangan niya an modelo nga pag-ampo hini nga mga pulong: “Amay namon.” (Mat. 6:9) Puydi unta sidngan kita ni Jesus nga tawagon naton hi Jehova nga “an Makagarahum-ha-ngatanan,”  “an Maglalarang,” o “an Hadi ha kadayonan”​—nga ito ngatanan angayan nga mga titulo para kan Jehova kay ginagamit ito han Biblia sugad nga mga diskripsyon ha iya. (Gen. 49:25; Isa. 40:28; 1 Tim. 1:17) Lugod, ginsidngan kita ni Jesus nga tawagon hi Jehova nga “Amay” basi ipakita nga puydi kita magin duok ha iya.

4. Paonan-o naton nahibaroan nga karuyag ni Jehova nga magin duok kita ha iya?

⁴ Nakukurian ka ba nga hunahunaon hi Jehova sugad nga mahigugmaon nga Amay? Ito an naieksperyensyahan han iba ha aton. Kon an aton tatay diri buotan, bangin makurian kita pag-imadyin hin usa nga amay nga nahigugma ha aton. Nakakaliaw gud hibaroan nga naiintindihan gud ni Jehova an aton inaabat! Karuyag niya magin duok ha aton. Salit gin-aaghat kita han iya Pulong: “Magin duok ha Dios, ngan magigin duok hiya ha iyo.” (San. 4:8) Hinigugma kita ni Jehova, ngan nasiring hiya nga hiya an aton magigin pinakamaopay nga Amay.

5. Sumala ha Lucas 10:22, paonan-o kita mabubuligan ni Jesus nga magin mas duok kan Jehova?

⁵ Mabubuligan kita ni Jesus nga magin mas duok kan Jehova. Kilala gud ni Jesus hi Jehova, ngan nasusubad niya hin perpekto an iya mga kalidad, salit nagsiring hiya: “An bisan hin-o nga nakakita ha akon nakakita liwat ha Amay.” (Juan 14:9) Pariho hin magurang nga bugto, gintututdoan kita ni Jesus kon paonan-o rirespetuhon ngan susundon an aton Amay, kon paonan-o lilikyan nga mapasubo hiya, ngan kon paonan-o makakarawat an iya pag-uyon. Pero labi na nga iginpakita ni Jesus ha iya pagkinabuhi dinhi ha tuna nga buotan ngan mahigugmaon gud hi Jehova. (Basaha an Lucas 10:22.) Tagdon naton an pipira nga ehemplo.

6. Paghatag hin mga ehemplo kon paonan-o ginpamatian ni Jehova hi Jesus.

⁶ Ginpapamatian ni Jehova an iya mga Anak. Tagda kon paonan-o ginpamatian ni Jehova an iya suhag nga Anak. Sigurado nga ginpamatian ni Jehova an damu nga pag-ampo han iya Anak han nakanhi hiya ha tuna. (Luc. 5:16) Ginpamatian niya an pag-ampo ni Jesus mahitungod han importante nga mga desisyon, sugad han nagpili hiya han iya 12 nga apostol. (Luc. 6:12, 13) Ginpamatian liwat ni Jehova an pag-ampo ni Jesus han nababaraka gud hiya. Antes gud trayduron hi Jesus, naniguro hiya ha pag-inampo ha iya Amay mahitungod han makuri nga  pagsari nga iya maieksperyensyahan. Waray la basta pamatii ni Jehova an pag-ampo ni Jesus, kondi nagpadara liwat hiya hin anghel basi parig-unon an iya hinigugma nga Anak.​—Luc. 22:41-44.

7. Ano an aton inaabat nga nahibaroan naton nga ginpapamatian ni Jehova an aton mga pag-ampo?

⁷ Yana, hi Jehova padayon nga namamati ha mga pag-ampo han iya mga surugoon, ngan ginbabaton niya hira ha husto nga panahon ngan ha pinakamaopay nga paagi. (Sal. 116:1, 2) Tagda kon paonan-o ini naeksperyensyahan han usa nga sister ha India. Nag-antos hiya hin grabe nga problema ha emosyon, ngan igin-inampo gud niya ito kan Jehova. Nagsurat hiya: “An Mayo 2019 JW Broadcasting^® nga programa mahitungod ha kon paonan-o aatubangon an pangarit ngan kabaraka amo gud an akon ginkikinahanglan. Ito an baton han akon mga pag-ampo.”

8. Paonan-o iginpakita ni Jehova an iya gugma kan Jesus?

⁸ Hinigugma kita ni Jehova ngan gin-aataman kita niya, sugad la nga ginhigugma ngan gin-ataman niya hi Jesus durante han iya makuri nga toka dinhi ha tuna. (Juan 5:20) Gintagana niya an ngatanan nga panginahanglan ni Jesus ha espirituwal, emosyonal, ngan pisikal. Ngan hi Jehova waray mag-alang ha pagpahayag han iya gugma ngan pag-uyon ha iya Anak. (Mat. 3:16, 17) Tungod kay maaram hi Jesus nga an iya mahigugmaon nga langitnon nga Amay pirme aada para ha iya, waray gud niya abata nga nag-uusahan hiya.​—Juan 8:16.

9. Ano an aton ebidensya nga hinigugma kita ni Jehova?

⁹ Pariho kan Jesus, inaabat naton ngatanan an gugma ni Jehova ha aton nga Iya iginpapahayag ha damu nga paagi. Hunahunaa la: Iginpahirani kita ni Jehova ha Iya ngan gintagan kita hin mahigugmaon ngan nagkakaurosa nga espirituwal nga pamilya basi magin malipayon kita ngan mapun-an an aton emosyonal nga panginahanglan. (Juan 6:44) Padayon liwat nga nagtatagana hi Jehova ha aton hin espirituwal nga pagkaon basi maparig-on an aton pagtoo. Iya pa ngani kita ginbubuligan nga magkaada han aton adlaw-adlaw nga materyal nga panginahanglan. (Mat. 6:31, 32) Kon aton ginhuhunahuna an gugma ni Jehova ha aton, naghihilarom an aton gugma ha iya.

10. Ano an aton mahibabaroan ha paagi han pagtratar ni Jehova ha aton kabugtoan?

¹⁰ Hinigugma ni Jehova an aton kabugtoan. Pero bangin diri pirme masayon nga higugmaon naton an mga membro han aton espirituwal nga pamilya ngan ipakita nga hinigugma naton hira. Tinuod ito kay iba-iba an aton kultura ngan gindak-an. Ngan kita ngatanan nakakahimo hin mga sayop nga mahimo makapaaringit ngan makapasubo ha iba. Bisan pa hito, may mahihimo kita basi maparig-on an gugma ha aton espirituwal nga pamilya. Paonan-o? Pinaagi ha pagsubad ha aton Amay ha pagpakita hin gugma ha aton kabugtoan. (Efe. 5:1, 2; 1 Juan 4:19) Kitaon naton kon ano an aton mahibabaroan ha ehemplo ni Jehova.

11. Paonan-o iginpakita ni Jesus an “malumo nga pagpaid” ni Jehova?

¹¹ Hi Jehova nagpapakita hin “malumo nga pagpaid.” (Luc. 1:78) An usa nga mapinairon nasusubo kon nakikita niya nga nag-aantos an mga tawo; namimiling hiya hin paagi basi buligan ngan liawon hira. Iginpakita ni Jesus ha iya pagtratar ha mga tawo an pagpaid ni Jehova ha ira. (Juan 5:19) Ha usa nga higayon, han nakita ni Jesus an damu nga tawo, “nalooy hiya ha ira, kay ginpanitan hira ngan ginpabay-an sugad hin mga karnero nga waray paraataman.” (Mat. 9:36) Diri la kay basta nalooy hi Jesus, may ginbuhat hiya basi buligan hira. Gintambal niya an mga may sakit ngan gintagan hin karepreskohan adton “kinakapoy ngan binubug-atan.”​—Mat. 11:28-30; 14:14.

12. Paghatag hin ehemplo kon paonan-o naton maipapakita an pagpaid.

¹² Basi kita makapakita hin pagpaid ha kabugtoan, kinahanglan hunahunaon ta kon ano nga mga problema an ira gin-aatubang. Pananglitan, an  usa nga sister bangin may grabe nga sakit. Bisan kon diri hiya nag-iistorya han iya problema, posible gud nga malilipay hiya kon may mahatag ha iya hin praktikal nga bulig. Naaasikaso pa ba niya an mga panginahanglan han iya pamilya? Puydi ba naton hiya buligan ha pagluto o ha paglimpyo han ira balay? An usa nga brother bangin nawad-an hin trabaho. Puydi ba naton hiya tagan hin gutiay nga kwarta, nga mahimo nga diri naton isumat nga tikang ito ha aton, basi makabulig ha iya tubtob nga magkaada hiya trabaho.

13-14. Paonan-o kita magigin mahinatagon pariho kan Jehova?

¹³ Mahinatagon hi Jehova. (Mat. 5:45) Diri naton hulaton nga an aton kabugtoan mangaro ha aton hin bulig antes kita magpakita hin pagpaid. Pariho kan Jehova, magkaada kita inisyatibo ha pagbulig. Kada adlaw, ginpapasirang niya ha aton an adlaw bisan kon diri naton ito ginhahangyo. Ngan an ngatanan nagpapahimulos han adlaw, diri la adton mga mapasalamaton. Tungod kay igintatagana ni Jehova an aton mga panginahanglan, diri ka ba mauyon nga hinigugma kita niya? Hinigugma gud naton hi Jehova tungod kay buotan gud hiya ngan mahinatagon!

¹⁴ Damu han aton kabugtoan an nagsusubad kan Jehova ha pagin mahinatagon. Pananglitan, han 2013, tungod han Super Typhoon Yolanda (Haiyan), nagkaada daku nga distroso ha Pilipinas. Damu nga kabugtoan an nawad-an hin balay ngan mga panag-iya. Pero dayon hira ginbuligan han ira espirituwal nga pamilya ha bug-os nga kalibotan. Damu an nagdonar hin kwarta o binulig ha konstruksyon, salit waray pa mag-usa ka tuig, haros 750 na nga balay an naayad o natukod! Ha panahon han COVID-19 nga pandemya, an mga Saksi nangalimbasog gud nga buligan an ira kabugtoan. Kon aton dayon ginbubuligan an aton espirituwal nga pamilya, iginpapakita naton ha ira nga hinigugma naton hira.

15-16. Sumala ha Lucas 6:36, ano an usa nga importante nga paagi nga masusubad naton an aton langitnon nga Amay?

¹⁵ Hi Jehova maloloy-on ngan mapinasayloon. (Basaha an Lucas 6:36.) Kada adlaw, naieksperyensyahan naton an kalooy han aton langitnon nga Amay. (Sal. 103:10-14) Diri perpekto an mga sumurunod ni Jesus; pero ginpakitaan niya hira hin kalooy ngan ginpasaylo. Kinaburut-on pa ngani nga iya iginhalad an iya kinabuhi basi mapasaylo an aton mga sala. (1 Juan 2:1, 2) Diri  ka ba naaaghat nga magin mas duok kan Jehova ngan kan Jesus tungod han ira pagin maloloy-on ngan mapinasayloon?

¹⁶ Ginpaparig-on naton an bugkos han gugma ha aton espirituwal nga pamilya kon “hura nga nagpapasaylo” kita. (Efe. 4:32) Oo, usahay makuri gud an pagpasaylo ha iba, salit kinahanglan pangalimbasogan naton ito. Nakabulig ha usa nga sister an artikulo ha Barantayan nga “Kinaburut-on nga Magpasaylo ha Usa kag Usa.” * Hiya nagsurat: “An pag-aram hini nga artikulo nakabulig ha akon nga magkaada hin mas positibo nga panhunahuna mahitungod ha pagpasaylo. Iginsaysay hito nga an pagin andam magpasaylo diri nagpapasabot nga nauyon ka ha ira sayop nga paggawi o naghuhunahuna nga waray ito maraot nga epekto ha iba. Lugod, nangangahulogan ito nga diri ka magtitipig hin kasina ha mga sayop nga ginbuhat ha imo ngan magpapabilin ka nga mamurayawon.” Kon hura nga ginpapasaylo naton an aton kabugtoan, iginpapakita naton nga hinigugma naton hira ngan ginsusubad naton an aton Amay nga hi Jehova.

17. Sumala ha Mateo 5:16, paonan-o naton mapapasidunggan an aton langitnon nga Amay?

¹⁷ Daku gud nga pribilehiyo nga magin bahin ha usa nga mahigugmaon nga internasyonal nga pamilya. Karuyag naton nga damu pa tubtob nga posible an umupod ha aton ha pagsingba ha aton Dios. Salit kinahanglan nga maghirot gud kita nga diri makabuhat hin bisan ano nga makakaraot han reputasyon han katawohan ni Jehova o han aton langitnon nga Amay. Nangangalimbasog kita nga gumawi hin maopay basi mainteres an mga tawo ha maopay nga sumat.​—Basaha an Mateo 5:16.

18. Ano an makakabulig ha aton basi diri kita mahadlok pagsangyaw?

¹⁸ Usahay, bangin minuson kita o pagtimarauton pa ngani tungod kay ginsusugot naton an aton langitnon nga Amay. Ano man kon nahahadlok kita kon nakikiistorya kita ha iba mahitungod han aton gintotoohan? Makakasiguro kita nga bubuligan kita ni Jehova ngan han iya Anak. Ginpasarig ni Jesus an iya mga disipulo nga diri hira angay mabaraka kon paonan-o hira magyayakan  o kon ano an ira igyayakan. Kay ano? Hi Jesus nagsiring: “Kay an iyo igyayakan ihahatag ha iyo hito nga oras; kay diri la kamo an nagyayakan, kondi an espiritu han iyo Amay an nagyayakan pinaagi ha iyo.”​—Mat. 10:19, 20.

19. Paghatag hin ehemplo han usa nga indibiduwal nga waray mahadlok pagsangyaw.

¹⁹ Tagda an ehemplo ni Robert. Hadto, han bag-o pa la hiya nga Bible study ngan gutiay pa la an iya nahibabaroan ha Biblia, inatubang hiya ha usa nga korte han militar ha South Africa basi isaysay kon kay ano nga diri hiya naapi pagsundalo. Waray kahadlok nga iginsaysay niya nga karuyag niya magpabilin nga neutral tungod han iya gugma ha iya Kristiano nga kabugtoan. Mapasalamaton hiya nga bahin hiya han aton espirituwal nga pamilya. “Hin-o an imo kabugtoan,” tigda nga ginpakianhan hiya han huwes. Waray laumi ni Robert nga ipapakiana ito ha iya, pero nahinumdoman dayon niya an teksto hito nga adlaw​—an Mateo 12:50 nga nasiring: “An bisan hin-o nga nagbubuhat han kaburut-on han akon Amay nga aadto ha langit, hiya an akon bugto nga lalaki ngan bugto nga babaye ngan nanay.” Bisan kon hi Robert bag-o pa la nga Bible study, ginbuligan hiya han espiritu ni Jehova nga mabaton ito nga pakiana ngan an damu pa nga pakiana nga waray niya laumi. Sigurado nga nalipay gud hi Jehova kan Robert! Ngan nalilipay liwat hi Jehova ha aton kon nasarig kita nga bubuligan niya kita basi diri kita mahadlok pagsangyaw bisan ha makuri nga mga sitwasyon.

20. Ano an dapat naton magin determinasyon? (Juan 17:11, 15)

²⁰ Hinaot padayon nga magin mapasalamaton kita nga bahin kita han usa nga mahigugmaon nga espirituwal nga pamilya. May-ada kita pinakamaopay nga Amay ngan damu nga kabugtoan nga nahigugma ha aton. Kinahanglan pirme gud naton ito pabilhan. Ginhihimo ni Satanas ngan han iya maraot nga mga sumurunod an tanan basi magruhaduha kita nga hinigugma kita han aton langitnon nga Amay ngan samukon an aton pagkaurosa. Kondi hi Jesus nag-ampo para ha aton; naghangyo hiya ha aton Amay nga bantayan kita basi magpabilin nga nagkakaurosa an aton pamilya. (Basaha an Juan 17:11, 15.) Ginbabaton ni Jehova ito nga pag-ampo. Pariho kan Jesus, hinaot diri gud kita magruhaduha nga hinigugma kita han aton langitnon nga Amay ngan bubuligan kita niya. Magin determinado kita nga padayon nga magin mas duok pa ha aton espirituwal nga pamilya.