1. Paonan-o iginpapakita han katawohan han Dios an ira gugma ha kada tagsa?

AN KATAWOHAN ni Jehova ha bug-os nga kalibotan bahin han usa nga pamilya, ngan hinigugma gud nira an kada tagsa. (1 Juan 4:16, 21) Kasagaran na nga iginpapakita nira an ira gugma, diri pinaagi ha pagbuhat hin pipira nga dagku nga pagsakripisyo para ha kabugtoan, kondi pinaagi hin damu nga gudtiay nga butang para ha ira. Pananglitan, bangin pinaagi hin pagyakan hin makaparig-on o buotan nga pagtratar ha ira. Kon buotan ngan makonsiderasyon kita ha iba, ginsusubad naton an aton langitnon nga Amay.​—Efe. 5:1.

2. Paonan-o ginsubad ni Jesus an gugma han iya Amay?

² Perpekto nga ginsubad ni Jesus an iya Amay. Hi Jesus nagsiring: “Kadi kamo ha akon, kamo ngatanan nga kinakapoy ngan binubug-atan, kay papapahuwayon ko kamo . . . , kay ako malumo ngan mapainubsanon an kasingkasing.” (Mat. 11:28, 29) Kon ginsusubad naton an ehemplo ni Jesus pinaagi ha pagpakita hin konsiderasyon ha ubos nga mga tawo, makakarawat  naton an pag-uyon han aton langitnon nga Amay ngan magigin malipayon gud kita. (Sal. 41:1) Hisgotan naton kon paonan-o naton maipapakita an konsiderasyon ha aton mga kapamilya, ha kabugtoan ha kongregasyon, ngan ha mga tawo ha ministeryo.

3. Paonan-o maipapakita han bana an konsiderasyon ha iya asawa? (Kitaa an retrato ha tinikangan hini nga artikulo.)

³ An mga bana sadang manguna ha pagpakita hin konsiderasyon ha ira mga kapamilya. (Efe. 5:25; 6:4) Pananglitan, ginsasagdonan hira nga trataron an ira asawa ha “maaramon” nga paagi​—usa nga termino nga mahimo liwat ihubad nga “pakitaan hira hin konsiderasyon; pagsabot.” (1 Ped. 3:7; ftn.) An pagin masinabuton konektado gud ha pagin makonsiderasyon. Pananglitan, an masinabuton nga bana maaram nga an iya asawa, sugad nga iya kabulig, iba gud ha iya ha damu nga paagi, pero diri niya ginhuhunahuna nga mas labaw hiya ha iya asawa. (Gen. 2:18) Salit, gintatagad niya an inaabat han iya asawa ngan gintatratar hiya nga may dignidad ngan pagtahod. Usa nga asawa nga taga-Canada an nagsiring mahitungod ha iya bana: “Diri gud niya ginmiminos an akon inaabat o nasiring nga, ‘Diri mo ito angay abaton.’ Maopay liwat hiya nga parapamati. Kon ginbubuligan niya ako nga bag-uhon an akon panhunahuna mahitungod han usa nga butang, ginbubuhat niya ito ha buotan nga paagi.”

4. Paonan-o maipapakita han bana an iya konsiderasyon ha iya asawa kon nakikig-upod hiya ha iba nga babaye?

⁴ Ginhuhunahuna liwat han makonsiderasyon nga bana an pagbati han iya asawa kon nakikig-upod hiya ha iba nga babaye. Diri gud hiya nagpipikat ha ira o nagpapakita hin diri angayan nga interes; diri liwat niya ito ginbubuhat kon nagamit hiya hin social media o Internet. (Job 31:1) Oo, nagpapabilin hiya nga maunungon ha iya asawa, diri la tungod kay hinigugma niya hiya kondi tungod kay hinigugma liwat niya an Dios ngan nangangalas hiya ha maraot.—Basaha an Salmos 19:14; 97:10.

5. Paonan-o maipapakita han asawa an konsiderasyon ha iya bana?

⁵ Kon ginsusubad han bana an pagin mahigugmaon han iya ulo nga hi Jesu-Kristo, ginbubuligan niya an iya asawa nga magkaada “daku nga respeto” ha iya. (Efe. 5:22-25, 33) Ngan kon ginrirespeto han asawa an iya bana, mapapagios hiya nga magin makonsiderasyon ha iya bana, pananglitan kon sagipo an iya bana ha teokratiko nga mga responsabilidad o kon may gin-aatubang hiya nga problema. “Usahay, nasasabtan han akon asawa nga may-ada ako ginhihinunahuna tungod ha pagbag-o han akon panggios,” siring han usa nga bana nga taga-Britanya. “Katapos, iaaplikar niya an prinsipyo ha Proberbios 20:5, bisan kon nagpapasabot ito nga kinahanglan niya maghulat han husto nga panahon ha ‘paghukad’ han akon mga ginhuhunahuna kon may kalabotan ito ha butang nga puydi ko isumat ha iya.”

6. Paonan-o naton maaaghat an kabataan nga magin makonsiderasyon ha iba, ngan paonan-o hira hito magpapahimulos?

⁶ Kon an bana ngan asawa makonsiderasyon ha kada tagsa, nagpapakita hira hin maopay nga susbaranan ha ira mga anak. Syempre, an mga kag-anak an may nangunguna nga responsabilidad ha pagtutdo ha ira mga anak nga magin makonsiderasyon ha iba. Pananglitan, mahimo tutdoan han mga kag-anak an ira mga anak nga diri magdurodalagan ha Kingdom Hall. Kon may mga katitirok, mahimo tutdoan han mga kag-anak an ira mga anak nga paunahon an mga edaran ha pagkuha hin pagkaon. Syempre, an ngatanan ha kongregasyon makakabulig ha mga kag-anak. Pananglitan, kon an usa nga bata may ginbuhat nga maopay para ha aton​—sugad han pag-abri han purtahan—​sadang naton hiya kumendasyonan. An pagbuhat hito may maopay nga epekto ha kabataan; maisisilsil ha ira kasingkasing nga “mas makalilipay an paghatag kay ha pagkarawat.”​—Buh. 20:35.

7. Paonan-o nagpakita hi Jesus hin konsiderasyon ha usa nga ngula nga lalaki, ngan ano nga mga leksyon an aton mahibabaroan ha ehemplo ni Jesus?

⁷ Makausa, han nakadto hi Jesus ha mga syudad  han Decapolis, an mga tawo nagdara ha iya hin “usa nga bungol ngan may diperensya ha pagyakan.” (Mar. 7:31-35) Imbes nga tambalon hiya ha atubangan han damu nga tawo, “gindara hiya ni Jesus pahirayo ha kadam-an” ngan gintambal hiya. Kay ano? An lalaki bangin diri komportable ha damu nga tawo kay bungol hiya. Posible nga naabat ito ni Jesus, salit gintambal niya hiya hirayo ha kadam-an. Syempre, diri kita makakahimo hin milagroso nga pagpanambal. Pero mahimo​—ngan sadang—​kita magin mahunahunaon ha panginahanglan ngan pagbati han aton igkasi-tumuroo. Hi apostol Pablo nagsurat: “Tagan naton hin atensyon an usa kag usa basi mag-inaghatay kita ha pagpakita hin gugma ngan mag-opay nga buhat.” (Heb. 10:24) Maaram hi Jesus han inaabat han bungol nga lalaki ngan gintratar niya hiya ha buotan nga paagi. Maopay gud ini nga susbaranan para ha aton!

8, 9. Paonan-o naton maipapakita an konsiderasyon ha mga lagas ngan ha mga may sakit? (Pag-unabi hin mga ehemplo.)

⁸ Magin makonsiderasyon ha mga lagas ngan ha mga may sakit. An Kristiano nga kongregasyon kilala diri tungod han pagin produktibo ha mga buruhaton, kondi tungod han gugma. (Juan 13:34, 35) Ito nga gugma nagpapagios ha aton nga buhaton an ngatanan nga aton mahihimo basi buligan an lagas nga kabugtoan ngan adton mga may sakit nga makatambong ha mga katirok ngan makagsangyaw. Ginbubuhat naton ito bisan kon gutiay na la an ira nahihimo. (Mat. 13:23) Hi Michael, nga naka-wheelchair na la, mapasalamaton gud ha bulig han iya mga kapamilya ngan han kabugtoan ha ira grupo han pagsangyaw. Hiya nagsiring: “Tungod han ira bulig, nakakatambong ako ha kadam-an nga katirok ngan regular nga nakakaupod ha ministeryo. Nalilipay ako labi na ha pagsangyaw ha publiko.”

⁹ Ha damu nga Bethel, may magtinumanon nga kabugtoan nga lagas na ngan may sakit. Iginpapakita han mahigugmaon nga mga paramangno an konsiderasyon ha ira pinaagi ha paghikay nga makagsangyaw hira pinaagi ha pagpadara hin surat ngan pinaagi ha telepono. Hi Bill, nga 86 anyos ngan nagsusurat ha mga tawo ha higrayo nga lugar, nagsiring: “Nagpapasalamat kami ha pribilehiyo nga makahimo hin surat.” Hi Nancy, nga hirani na 90 anyos, nagsiring: “Para ha akon, an paghimo hin surat diri kay basta la pagpinadara hin surat. Pagsangyaw ito. Kinahanglan mahibaroan han mga tawo an kamatuoran!” Hi Ethel, nga natawo han 1921, nagsiring: “Bahin na han akon kinabuhi an kaul-ol. May mga adlaw nga nakukurian ako bisan ha pagsul-ot la hin bado.” Bisan pa hito, nalilipay hiya ha pagsangyaw pinaagi ha telepono ngan may mag-opay hiya nga mga pagbalik-bisita. Hi Barbara, nga 85 anyos, nagsaysay: “Tungod han akon maluya nga kahimsog, nakukurian ako ha pag-upod hin regular ha pagsangyaw ha balay-balay. Pero an pagsangyaw pinaagi ha telepono nabulig ha akon nga makagsangyaw ha iba. Salamat, Jehova!” Waray pa mag-usa ka tuig, usa nga grupo han hinigugma nga lagas nga kabugtoan an naggasto hin 1,228 ka oras ha ministeryo, nakahimo hin 6,265 nga surat ngan 2,000 nga tawag ha telepono, ngan nakapanaltag hin 6,315 nga publikasyon! Sigurado nga nakapalipay gud kan Jehova an ira mga pangalimbasog!​—Prob. 27:11.

10. Paonan-o naton mabubuligan an kabugtoan nga bug-os nga magpahimulos ha aton mga katirok?

¹⁰ Magpakita hin konsiderasyon ha Kristiano nga mga katirok. Karuyag naton nga bug-os nga magpahimulos an kabugtoan ha mga katirok. An aton pagin makonsiderasyon makakabulig ha ira nga magpahimulos hito. Paonan-o? Usa nga paagi amo an pag-abot ha husto nga oras basi diri kita makadisturbo ha ira. Syempre, tungod han diri ginlalaoman nga mga panhitabo, usahay bangin maurhi kita pag-abot. Pero kon pirme kita urhi nga naabot, sadang naton hunahunaon kon ano an epekto hini ha kabugtoan ngan kon ano nga mga pagbag-o an aton mahimo buhaton basi maipakita an aton konsiderasyon ha ira. Hinumdumi liwat nga hi Jehova ngan an iya Anak an nag-iimbitar ha aton. (Mat. 18:20) Angayan gud naton ipakita ha ira an daku nga respeto!

11. Kay ano nga sadang sundon han kabugtoan nga may bahin ha katirok an instruksyon ha 1 Corinto 14:40?

¹¹ An pagin makonsiderasyon ha kabugtoan nagpapasabot liwat nga kinahanglan naton sundon ini  nga instruksyon: “Buhata niyo an ngatanan ha desente ngan organisado nga paagi.” (1 Cor. 14:40) An kabugtoan nga may bahin ha katirok nagsusunod hito nga instruksyon pinaagi ha pagtapos han ira bahin ha husto nga oras. An ira pagbuhat hito nagpapakita hin konsiderasyon diri la para ha sunod nga may bahin kondi para liwat ha bug-os nga kongregasyon. An pipira nga kabugtoan bangin magbibiyahe pa hin hirayo tipauli ha ira balay. An iba bangin nakadepende la ha panpubliko nga sarakyan. Ngan an iba bangin diri tumuroo an padis nga naghihinulat na gud han ira pag-uli.

12. Kay ano nga an maduruto nga mga tigurang takos han “labaw ha kasagaran nga konsiderasyon ngan gugma”? (Kitaa an kahon nga “ Magin Makonsiderasyon ha mga Nangunguna.”)

¹² An mga tigurang maduruto gud nga nagbubuhat para ha kongregasyon ngan madasigon nga nangunguna ha ministeryo, salit takos hira han aton respeto ngan gugma. (Basaha an 1 Tesalonica 5:12, 13.) Sigurado nga gin-aapresyar mo gud an ira ginbubuhat para ha imo. Maipapakita mo an imo apresasyon pinaagi han imo kinasingkasing nga kooperasyon ngan pagsuporta ha ira, kay “padayon nga nagbabantay hira han [imo] kalag sugad nga mga may baratunon.”​—Heb. 13:7, 17.

13. Ano an aton mahibabaroan ha paagi han pagtratar ni Jesus ha mga tawo?

¹³ May kalabotan kan Jesus, hi Isaias nagtagna: “Diri hiya magbabari hin pilas nga tangbo, ngan han pabilo nga naglalaga ha masirum diri hiya magpaparung.” (Isa. 42:3) An gugma ni Jesus ha mga tawo nagpagios ha iya nga magpakita hin empatiya. Nasasabtan niya an inaabat han mga tawo nga sugad hin mga pilas o rumok nga tangbo o pabilo nga tikaparong na. Salit nagin makonsiderasyon, buotan, ngan mapailubon hiya ha ira. Bisan an mga bata naruruyag nga makaupod hiya. (Mar. 10:14) Syempre, waray kita hilarom nga pagsabot ngan abilidad ha pagtutdo nga pariho han kan Jesus! Pero mahimo​—ngan sadang—​naton ipakita an konsiderasyon ha mga tawo ha aton teritoryo. Maipapakita naton ito ha paagi han aton pakiistorya, kon san-o kita makikiistorya, ngan kon mationan-o kaiha.

14. Kay ano nga sadang naton hunahunaon hin maopay kon paonan-o kita makikiistorya ha mga tawo?

¹⁴ Paonan-o kita sadang makiistorya ha mga tawo? Yana, minilyon nga tawo an “gin-anitan ngan ginpabay-an” han malimbong ngan waray kalooy nga mga negosyante, politiko, ngan lider han relihiyon. (Mat.  9:36) Sugad nga resulta, damu nga tawo an waray na pagtapod ha iba ngan nawad-an na hin paglaom. Salit kinahanglan makita ha mga pulong nga aton ginagamit ngan ha tono han aton tingog nga buotan ngan napaid kita ha ira! Ngani, damu an nakarawat han aton mensahe diri la tungod han aton kahibaro ha Biblia o han aton maopay nga pangatadongan kondi pati liwat han aton sinsero nga interes ha ira ngan han aton pagin makonsiderasyon.

15. Ha ano nga praktikal nga mga paagi mahimo naton maipakita an konsiderasyon ha aton mga ginsasangyawan?

¹⁵ Damu an praktikal nga paagi nga maipapakita naton an konsiderasyon ha mga tawo nga aton nasasangyawan. Pananglitan, an paggamit hin pakiana makakabulig gud ha pagtutdo. Kinahanglan naton siguruhon nga buotan ngan may respeto an aton paagi ha pagpakiana. Usa nga payunir an nag-aalagad ha teritoryo diin damu an awdanon, salit ginlilikyan niya an mga pakiana nga mahimo magpakaalo ha iya mga kaistorya kon diri hira maaram han baton o sayop an ira baton. Pananglitan, ginlilikyan niya an mga pakiana sugad han, ‘Maaram ka ba han ngaran han Dios?’ o ‘Maaram ka ba kon ano an Ginhadian han Dios?’ Lugod, ini an iya ginsisiring, “Nahibaroan ko ha Biblia nga may personal nga ngaran an Dios. Mahimo ko ba ipakita ha imo kon ano ito nga ngaran?” Syempre, iba-iba an kultura ngan an mga tawo ha tagsa nga lugar, salit diri naton kinahanglan hin espisipiko nga surundon may kalabotan hini. Pero kinahanglan naton pirme ipakita an respeto ngan konsiderasyon ha mga tawo. Basi mabuhat ito, kinahanglan naton makilala hira hin maopay.

16, 17. Paonan-o naton maipapakita an konsiderasyon kon naghuhunahuna kita (a) kon san-o kita mabisita ha mga tawo? (b) kon mationan-o kita kaiha makikiistorya ha tagbalay?

¹⁶ San-o naton sadang bisitahon an mga tawo? Kon nagsasangyaw kita ha balay-balay, an mga tawo diri naglalaom nga mabisita kita ha ira kay waray kita nira imbitara. Salit importante gud nga bisitahon naton hira ha panahon nga posible nga andam hira makiistorya ha aton! (Mat. 7:12) Pananglitan, an mga tawo ba ha iyo teritoryo naruruyag kumaturog hin mas maiha kon Sabado ngan Domingo? Kon oo, mahimo mo tikangan an imo ministeryo pinaagi ha pagsangyaw ha kalsada, pagsangyaw ha publiko, o pagbalik-bisita ha mga tawo nga maaram ka nga puydi mo na makaistorya.

¹⁷ Mationan-o kaiha kita sadang makiistorya? Okupado an damu nga tawo, salit bangin angayan nga madaliay la an aton pagbisita, labi na ha tinikangan. Mas maopay nga tapuson dayon an pag-istorya imbes nga makig-istorya hin maiha. (1 Cor. 9:20-23) Kon nakikita han mga tawo nga gintatagad naton an ira kahimtang o nasasabtan naton nga okupado hira, bangin magin andam hira makiistorya ha aton ha sunod naton nga pagbalik. Oo, sadang makita ha aton ministeryo an bunga han espiritu ni Jehova. Kon nakikita ito ha aton ministeryo, nagigin “mga igkasi-magburuhat [kita] han Dios.” Mahimo pa ngani kita gamiton ni Jehova ha pagbulig ha usa nga mahibaro han kamatuoran.​—1 Cor. 3:6, 7, 9.

18. Kon makonsiderasyon kita ha iba, ano nga mga bendisyon an aton makakarawat?

¹⁸ Salit buhaton naton an ngatanan basi maipakita an konsiderasyon​—ha aton mga kapamilya, ha kabugtoan ha kongregasyon, ngan ha mga tawo ha ministeryo. Kon bubuhaton naton ito, makakarawat naton an damu nga bendisyon yana ngan ha tidaraon. An Salmos 41:1, 2 nasiring: “Bulahan adton nagdudumdum [o, nagpapakita hin konsiderasyon] han kablasanon: Babawi-on hiya ni Jehova ha adlaw han karat-an. . . . Magiginbaraanon [o, malipayon] hiya ha tuna.”